བོད་ཀྱི་དུས་བབ་སྤྱིའི་འདོན་ཐེངས་ ༤༨༨ སྟེང་གི་རྩོམ་སྒྲིག་པའི་གཏམ།
རྒྱ་ནག་གཞུང་གི་ཞེ་སྡང་དང་གདུག་རྩུབ་ལ་མ་ལྟོས་པར། ད་ལོའི་སྐུའི་འཁྲུངས་སྐར་གྱི་ཉིན་མོར་ཡང་རྨ་ཡུལ་ཕྱུག་མོ་ནས་གཞིས་ལུས་མི་དམངས་ཀྱིས་སེམས་ཐག་ཆོད་པོའི་སྒོ་ནས་༧གོང་ས་མཆོག་གི་འཁྲུངས་སྐར་ལ་བསྟོད་གླུ་ཕུལ་ཡོད། ཁ་སང་དེ་རིང་རྒྱ་གཞུང་གིས་བོད་རིགས་སྒྱུ་རྩལ་བ་དང་ཤེས་ཡོན་པ་ཚོ་རེ་རེ་བཞིན་རྩ་མེད་དུ་གཏོང་བཞིན་པའི་ཆབ་སྲིད་ཀྱི་ཁོར་ཡུག་ལ་བསམ་ན། ཁོང་ཚོ་ནི་ཅི་འདྲའི་སེམས་ཐག་ཆོད་པོ་ཞིག་རེད་ཨང་།
ཁོང་ཚོའི་གླུ་སྐད་ཀྱི་འགྱུར་ཁུག་དེ་ཚོ་ཐོག་མར་ཝ་ཤིན་ཊོན་ནས་བསྒྲགས་ཤིང་། དེ་ནས་ངྷ་རམ་ས་ལ་དང་པེ་ཅིན་སོགས་གཙོས་པའི་རྒྱལ་སྤྱིའི་སྤྱི་ཚོགས་གང་ས་ནས་ཐོས་པར་གྱུར། གཞས་འདི་དག་ནི་སྤྱིར་ན་༧གོང་ས་མཆོག་ལ་ཕུལ་བ་ཡིན་རུང་། ཝ་ཤིན་ཊོན་དང་པེ་ཅིན་ནས་ཀྱང་གཞས་འདི་དག་ལ་ཉན་འདོད་ཧ་ཅང་ཆེ་ལ། གཞས་ཚིག་འདི་འདྲའི་ཐོག་ལ་ཚོར་བ་ཡང་ཧ་ཅང་རྣོ།
ཕྱོགས་གཞན་ནས་བཤད་ན། གཞས་འདི་དག་གོ་རྗེས་ཉན་མཁན་གྱི་ཁྲོམ་པ་སོ་སོར་སྡུག་བསྔལ་མི་འདྲ་བ་རེ་སྐྱེས་གིན་ཡོད། ངྷ་རམ་ས་ལ་ནས་ཐོས་སྐབས་སེམས་ཁྲལ་རང་བཞིན་གྱི་སྡུག་བསྔལ་ཅིག་ཚོར་ཡོང་གི་ཡོད་ལ། རྒྱལ་སྤྱིའི་སྤྱི་ཚོགས་ལ་ཡང་གདུང་སེམས་ཀྱི་ཚོར་བ་ཞིག་ཡོང་གི་ཡོད། ལྷག་པར་དུ། པེ་ཅིན་གྱི་དབུ་ཁྲིད་ཚོར་སྡུག་བསྔལ་ཧ་ཅང་ཆེ། གཞས་འདི་དག་གོ་དུས་ཁོ་ཚོར་ཁེར་རྐྱང་དང་སུན་སྣང་། ཞེད་སྣང་སོགས་ཚོར་བ་མི་འདྲ་བ་ཞིག་ཡོང་གི་ཡོད། མི་ལོ་ ༥༠ རྗེས་ནས་པེ་ཅིན་ལ་བསྟོད་གླུ་འབུལ་མཁན་ཆད་སོང་ལ། མདོ་དབུས་མཐོ་སྒང་གི་གཞས་པ་དང་གཞས་མ་གསར་པ་དག་གིས་སེམས་ཐག་ཆོད་པོའི་སྒོ་ནས་གཞས་གཏོང་གི་ཡོད། ཁོང་ཚོས་རང་གི་མི་རིགས་ཀྱི་གཞས་ངོ་མ་དང་། རང་དབང་གི་གཞས། ཞི་བདེ་དང་འདྲ་མཉམ་གྱི་གཞས་གཏོང་གིན་ཡོད།
དེ་ལྟར་ཀྱང་། གཞས་པ་རེ་རེར་གཞས་གཅིག་རེ་མ་གཏོགས་གཏོང་དབང་མེད། སྔོན་ནས་སེམས་ཐག་བཅད་ཡོད་པ་ལྟར། གཞས་དེ་བཏང་རྗེས་ཁོང་ཚོས་མནར་གཅོད་ཀྱི་གོ་རིམ་ཞིག་བརྒྱུད་དགོས་ལ། ཡང་ན་ཕྱིར་ཡོང་མེད་ས་ཞིག་ཏུ་ཆས་འགྲོ། ཁོང་ཚོའི་གླུ་སྐད་ཀྱང་དེ་ནས་བཟུང་ཆད་འགྲོ། ཡིན་ཡང་། གཞས་པ་དང་གཞས་མ་གསར་པ་དག་མུ་མཐུད་ནས་ཡོང་གི་རེད། ཁོང་ཚོས་མུ་མཐུད་ནས་རང་རང་གི་ལས་སྐལ་ལྟ་བུའི་གཞས་རེ་སེམས་ཐག་ཆོད་པོའི་སྒོ་ནས་གཏོང་གི་རེད། དེ་ནས་རང་རང་གིས་བདམས་པའི་ལམ་དེར་འཇུག་དགོས་པ་རེད།
ད་སྐབས་སེམས་ཁྲལ་ཅིག་ཡོང་གི་ཡོད། དེ་ནི་གཞས་པ་དང་གཞས་མ་ཚོའི་ཕྱོགས་ནས་མིན་པར། ཉན་མཁན་ཚོ་རེད། ཉན་མཁན་ཁྲོམ་པ་དག་གི་ཚོར་བ་བརླག་གིན་པའི་རྣམ་པ་ཞིག་མངོན་ཡོང་གི་ཡོད། དཔེར་ན། ངྷ་རམ་ས་ལ་དང་པེ་ཅིན། ཝ་ཤིན་ཊོན་དང་རྒྱལ་སྤྱིའི་སྤྱི་ཚོགས་ཀྱིས་གཞས་འདི་དག་གོ་རུང་། དེ་ལ་ཚོར་བ་ཞེ་དྲག་མེད་པ་ལྟ་བུར་མངོན། སྡུག་བསྔལ་ཡང་སྐྱེས་གི་མེད། ཐ་ན་གཞས་དེ་དག་གི་ནང་དོན་ལ་མི་རིགས་ཀྱི་མངོན་འདོད་དང་ལངས་ཕྱོགས་ལ་མི་འཚམ་པའི་གནད་དོན་ཆེན་པོ་ཡོད་པའི་གཅིག་གྱུར་གྱི་ངོས་འཛིན་ཞིག་བྱེད་ཀྱིན་ཡོད། འདི་ནི་ད་ལྟ་དང་མ་འོངས་པའི་བོད་རིགས་གཞས་པ་དང་གཞས་མ་དག་གིས་གཟབ་དགོས་ས་གཙོ་བོ་དེ་ཡིན་པར་འདོད།།
དེང་སང་གི་གཞས་པ་གཞས་མ་མང་ཆེ་བ་ནི། བརྒྱུད་ལམ་ལྟ་བུ་ཞིག་རེད། ཁོང་ཚོས་རང་ཉིད་བློས་གཏོང་ཆེན་པོས་བརྒྱུད་ལམ་གང་ཞིག་ཏུ་ཧུར་གྱིས་འབད་པ་འདི་བསྔགས་འོས་ཤིག་ཅིས་མ་ཡིན་ཏེ། གཞས་གདངས་སུ་གྱེར་ཐེངས་གཅིག་གིས་ཁོང་ཚོའི་ཡོད་ཚད་ག་ཤེད་ཅིག་ལ་ཟགས་འགྲོ་ཐེངས་རེ་རེར། ང་ཚོར་དེ་འབྲེལ་གྱི་ཚོར་སེམས་སྔར་མེད་དགོས་རྒྱུ་ལ། ད་ནི་རེ་བ་བྱ་ཡུལ་ཙམ་ཡང་མེད་པར་འགྱུར་བཞིན་པ་འདིས་བརྡ་སྟོན་ཁྱར་པར་བ་གཞན་ཞིག་བྱེད་ཀྱི་ཡོད་པར་འདོད།
ད་ཆ་བོད་སྐད་ཀྱིས་གཞས་གཏོང་མཁན་ཚོར་མང་ཚོགས་ཀྱིས་དགའ་མོས་ཆེ་ཤོས་བྱེད་ཀྱི་ཡོད་ཅིང་། དགའ་མོས་འདིས། གཞོན་སྐྱེས་གཞས་པ་གཞས་མ་ཚོ་བོད་སྐད་གཙང་མའི་གཞས་ཚིག་གྱེར་བའི་ཕྱོགས་ལ་སྐུལ་འདེད་ཆེན་པོ་ཞིག་ཐུབ་ཡོད།
དེ་དང་ཕྱོགས་མཚུངས་ཁོང་ཚོའི་རྒྱབ་རོལ་ན་འཇབ་རྒོལ་བ་ཚོས་རྗེས་འདེད་གཏོང་གི་ཡོད། དེ་ནི་བོད་མིའི་ལར་ཞེན་དང་རེ་འདུན་གཞས་སུ་དྲངས་ནས་སླེབས་སྐབས་སུ། མགྱོགས་མྱུར་སྒོས་གཞས་ཀྱིནང་དོན་དག་རྒྱ་ཡིག་ཏུ་བསྒྱུར་འགྲོ་ཞིང་། བསྒྱུར་ཚིག་ལ་དཔྱད་པ་གྲུབ་པ་དང་གཞས་པ་གཞས་མ་དེ་ཚོ་ག་ཤེད་ཅིག་ལ་འཁྲིད་འགྲོ་བར་འདུག་ཅེས་གཞིས་བཞུགས་གྲོགས་པོ་ཞིག་གིས་ཚོར་ཚུགས་དང་བཅས་ཏེ་བསྙད་བྱུང་། འདི་འདྲ་ན་ང་ཚོའི་ཚེ་སྲོག་འདིར་བར་ཆད་མང་བར་འདུག་སྟབས། ད་ནི་གཞས་ཚིག་ཅིག་ལ་ཚེ་སྲོག་འདོགས་པ་སོགས་ལ་ལམ་སྟོན་རེ་ཡོད་ན་གནང་རན་ནས་འདུག
ཁྱོས་སེམས་ཐག་ཆོད་པའི་གླུ་ཞིག་ལོངས།
ངས་སེམས་རྩ་ཁོལ་པའི་རྣམ་ཅིག་གཡར།
ཞང་ཨ་རེ་ལ་མོའི་འགྱུར་ཁུག་ཁྲོད།
དགྲ་ནང་པོའི་མགོ་ལ་ཧོ་མ་ཡ།
དངོས་གནས་བསྔགས་བརྗོད་ཡོད།
དམར་གསོད་མཚོན་ཆའི་འཇབ་རྒོལ་ཀློང་ནས་ཞི་བདེ་མཁའ་དབུགས་རྔུབ་ཏུ་འགྲོ།།
ལར་ཞེན་དཔའ་བོའི་གད་རྒྱངས་ཀློང་ནས་འཕག་འཚག་འོ་དོད་འབོད་དུ་འགྲོ།།
ལོ་ཟླ་སྐྱ་བོའི་ཆག་གྲུམ་ཀློང་ནས་ཕོ་བྲང་དམར་བོ་བསྲུང་དུ་འགྲོ།།
གདུང་ཡུས་ལྕི་མོའི་ཕམ་ཉེས་ཀློང་ནས་སྐྱོ་གདུང་གླུ་གཞས་གཏོང་གི་འགྲོ།།
ཕ་ཡུལ་ན། ཡིད་གདུང་དང་མིག་ཆུ་དབྱངས་སུ་གྱེར་གྱིན་ཡོད། འདི་ན། སྟོན་མོ་དང་དགའ་འབོད་ཀྱི་གནམ་ས་འགེངས་ཀྱིན་ཡོད། ཕ་ཡུལ་ན། ཆིག་སྒྲིལ་དང་ཕ་སྐད་ཤོད་པར་བརྩོན་གྱིན་ཡོད། འདི་ན། ནང་དམེ་དང་གཞན་སྐད་གཅེས་པར་འཛིན་གྱིིན་ཡོད།
བཀུར་འོས་མི་ནག་ཚང་ལུང་རིགས་རྒྱལ་ལགས་ཁྱོད་ཀྱི་བཤད་པ་དངོས་གནས་བདེན་པ་རེད། ང་ལ་ཡང་འདིའི་སྐོར་ལ་སེམས་ཁྲལ་ཧ་ཅང་ཆེ་གི གོང་ས་མཆོག་གི་འཁྲུངས་སྐར་ལ་བསྟོད་གླུ་དུས་བབ་དྲ་ཐོག་ཏུ་ཐོན་མ་ཐག་ངས་རིང་གི་ངོ་ཤེས་པ་མང་པོ་ཞིག་ལ་བལྟ་བར་སྐུལ་བ་ཡིན། དེ་དག་གི་ནང་དུ་མཐོ་རིམ་སློབ་མ་ཡང་ཡོད་ལ། གཞུང་ཞབས་ལས་བྱེད་ཡང་ཡོད། དངོས་གནས་ང་ཡིད་ཆད་གི་བཅུག་སོང་། རྒྱུ་མཚན་ནི་”ཨམ་སྐད་རེད་མི་གོ་གི་ཟེར།” སྐབས་དེར་ངས་ཨམ་སྐད་མི་གོ་ན་བོད་ཡིག་ལོས་ཤེས་ཞེས་སྐུལ་ཀྱང་ད་དུང་ཕན་འབྲས་མི་འདུག ཨ་ཧ་ཧཧཧཧ
བོད་ཀྱི་གླུ་བ་གླུ་མ་ཚོའི་སེམས་ཤུགས་ལ་ངོ་མཚར་ཆེ་ འཆི་བདག་གཤིན་རྗེ་ཚང་གིས་ཡང་ ཅི་ཞིག་ བྱ་ཡོང་སྙམ་པའི་སེམས་འཕྲལ་ཡང་ཤིན་ཏུ་ཆེ་།
བཟོད་པ་ལྷ་རྩེ་་ཡིན་ན་འདི་ཡང་སྙན་ངག་པ་ཞིག་རེད། ཡིན་རྒྱུ་རེད། རྩོམ་སྒྲིག་པའི་གཏམ་གྱི་ཁ་བྱང་ཡང་སྙན་ངག་ཅིག་གི་ཁ་བྱང་རེད་མོ།
མེ་འདའི་སོ་ཁར་ཁུ་ཚུར་ཕྱར་བཞིན་རང་སྲོག་རྟ་རྔ་ལ་རྒྱའི་འབེན་དུ་བཤམས།
སོར་མོ་ལྔ་ཡིས་བོད་ཀྱི་ལས་དབང་གླེང་ཞིང་རང་ལུས་གྲུ་བཞི་དམྱལ་ཁམས་བརྫངས།
སྙན་པའི་དབྱངས་ཀྱི་༧རྒྱལ་བའི་འཁྲུངས་སྐར་བསུ་བཞིན་རང་སྲོག་ཤོར་ཀྱང་མི་མགྱོད་བཞེས།
གཞི་ལུས་བོད་མིའི་ལྷག་བསམ་སྙིང་སྟོབས་གངས་དཀར་ཏི་སིའི་དཔང་ལས་མཐོ་བཞིན་ལྗིད།
བདག་གི་མིག་ཟུང་མཆི་མས་བརླན་བཞིན་ལག་ཟུང་འདར་ཀྱང་དཔའ་བོ་དཔའ་མོར་བསྟོད།
མེ་འདའི་སོ་ཁར་ཁུ་ཚུར་ཕྱར་བཞིན་རང་སྲོག་རྟ་རྔ་ལ་རྒྱའི་འབེན་དུ་བཤམས།
སོར་མོ་ལྔ་ཡིས་བོད་ཀྱི་ལས་དབང་གླེང་ཞིང་རང་ལུས་གྲུ་བཞི་དམྱལ་ཁམས་བརྫངས།
སྙན་པའི་དབྱངས་ཀྱི་༧རྒྱལ་བའི་འཁྲུངས་སྐར་བསུ་བཞིན་རང་སྲོག་ཤོར་ཀྱང་མི་མགྱོད་བཞེས།
གཞི་ལུས་བོད་མིའི་ལྷག་བསམ་སྙིང་སྟོབས་གངས་དཀར་ཏི་སིའི་དཔང་ལས་མཐོ་བཞིན་ལྗིད།
བདག་གི་མིག་ཟུང་མཆི་མས་བརླན་བཞིན་ལག་ཟུང་འདར་ཀྱང་དཔའ་བོ་དཔའ་མོར་བསྟོད།
བཙན་པོའི་དུས་སྐབས་ནས་བཟུང་ད་བར་གྱི་བོད་ཀྱི་ལོ་རྒྱུས་ཁྲོད། བོད་ལ་གཞས་མ་གྲགས་ཅན་ཞིག་བྱུང་བ་ནི་གཞས་མ་ཚེ་བརྟན་སྒྲོལ་མ་རེད། མོ་རང་ནང་བཞིན་གྱི་སྐད་གྲགས་འཇོག་མཁན་ཞིག་བྱུང་མེད་ཚོད་རེད། ན་ནིང་ཡང་སྐད་གྲགས་ཆོད་པའི་གླུ་གཞས་ཤིག་བཏང་བྱུང་། དེའི་རྒྱུ་མཚན་རྣམ་པ་ཚོས་ཤེས་གསལ་ལྟར་རེད།
མོའི་ཚབ་མཚོན་གྱི་གླུ་གཞས་གཅིག་ནི། པེ་ཅིན་གྱི་གསེར་རིའི་སྟེང་ནས་ཞེས་པ་དེ་རེད།
གཞིས་ལུས་རྒྱ་ཆེའི་མི་དམངས་ཀྱི་སེམས་ཤུགས་དང་སྙིང་སྟོབས་དེ་ཧ་ལས་པ་རེད། ད་ནངས་ཞོགས་པའི་ཨེ་ཤ་ཡའི་རང་དབང་གསར་འགྱུར་ལས། དཔལ་ལྡན་རྒྱལ་གྱིས་གཞས་ལེན་མཁན་བུ་མོ་དེར་དྲ་བ་དྲིས་སོང་། ཉན་གྱིན་ཉན་གྱིན་ཞེ་སྣང་འདྲ་ཞིག་ལངས་ཡོང་གི་འདུག དངོས་གནས་བློ་སྤོབས་ཅན་ཟེར་བ་རེད། དེ་ལྟར་དྲི་བ་འདྲ་དྲིས་ཚེ་རྒྱ་གཞུང་གིས་ལྷག་ཏུ་བསུན་གཙེར་ཆེ་བར་གཏོང་གི་རེད་སྙམ། ད་གང་དྲག སང་གནངས་ཤིག་ལ་ཁོ་མོ་བཟུང་ཚར་བའི་གཏམ་ངན་དེ་གོ་ཡོང་གི་རེད་སྙམ།
རེད་ཁྱེད་ཀྱིས་བཤད་པ་ལྟར་འུ་ཚང་གི་གཞིས་ལུས་རྒྱ་ཆེའི་མི་མང་གི་སེམས་ཤུགས་དེ་བཤད་ཚོད་ཐུག་ནི་མ་རེད་ཡིན་ན་བྱེས་བ་རྣམས་ཀྱི་ངོས་ནས་ཡང་གང་ལ་གང་འཚམས་ཤུགས་རྒྱབ་ཡོད་ནི་རེད།