རྒྱ་གར་གཞུང་ཁ་དན་ཚིག་ལ་གནས་རོགས་ཟེར།

རྒྱ་གར་གྱི་ཕྱི་སྲིད་དྲུང་ཆེ་༧གོང་ས་མཆོག་ལ་མཇལ་བཅར་གྱིས་ནང་མོལ་གནང་བའི་ཐད། རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པས་རྒྱ་ནག་གིས་འདིའི་ཐད་བརྗོད་བསམ་པ་ནི། རྒྱ་གར་གྱིས་ཏཱ་ལའི་བླ་མའི་གནད་དོན་འོས་འཚམ་ངང་ཐག་གཅོད་བྱེད་པའི་དམ་བཅའ་གཙི་སྲུང་བྱས་ནས། སེམས་ཆུང་ངང་འབྲེལ་ཡོད་གནད་དོན་ཐག་གཅོད་བྱེད་པའི་རེ་བ་ཡོད་སྐོར་བརྗོད་འདུག

བདུན་ཕྲག་སྔོན་མའི་རེས་གཟའ་ཉི་མ་དང་ཕྱི་ཚེས་ ༡༡ ཉིན་རྒྱ་གར་ཕྱི་སྲིད་དྲུང་ཆེ་ Nirupama Rao ངྷ་རམ་ས་ལར་ཕེབས་ནས་༧གོང་ས་མཆོག་དང་མཇལ་འཕྲད་ཀྱིས་ནང་མོལ་ཞིག་གནང་ཡོད་ལ། སྐབས་དེར་བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་ཡང་ནང་མོལ་དེའི་སྟེང་མཉམ་བཞུགས་གནང་ཡོད།

འོན་ཀྱང་། ནང་མོལ་དེ་ནི་གསང་བའི་ཚུལ་དུ་གནང་ཡོད་ལ། རྒྱ་གར་གྱི་ཕྱི་སྲིད་བློན་ཆེན་མཆོག་གིས་༧གོང་ས་མཆོག་དང་མཇལ་འཕྲད་གནང་བའི་ཐད། སྐུ་སྒེར་དྲུང་ཆེ་བསྟན་འཛིན་སྟག་ལྷ་ལགས་ཀྱིས།  ད་ལྟའི་ཆར་ང་ཚོས་བརྒྱུད་ལམ་ཁག་ལ་འདིིའི་ཐད་ནས་གསལ་བཤད་ཞུ་གི་མེད་ཅེས་གསུངས་ཡོད།

གང་ལྟར་ནང་མོལ་དེ་གསང་རྒྱ་བྱས་ཡོད་མེད་ལ་མ་ལྟོས་པར། རྒྱ་ནག་གི་ཀྲུང་གོའི་ཕྱི་འབྲེལ་སྡེ་ཁག་གི་མགྲིན་ཚབ་པ་ཆིན་ཀང་གིས་ཁ་སང་ཕྱི་ཚེས་ ༡༣ ཉིན་འཚོགས་པའི་གསར་འགོད་པའི་རྒྱུན་སྲོལ་ཚོགས་འདུ་ཟེར་བའི་སྟེང་དུ། རྒྱ་གར་གྱི་ཕྱི་འབྲེལ་དྲུང་ཡིག་གིས་ཏཱ་ལའི་བླ་མར་མཇལ་འཕྲད་བྱས་པའི་སྐོར་ལ་ཀྲུང་གོས་བརྗོད་བསམ་པ་ནི། རྒྱ་གར་གྱིས་ཏཱ་ལའི་གནད་དོན་འོས་འཚམ་ངང་ཐག་གཅོད་བྱེད་པའི་དམ་བཅའ་གཙི་སྲུང་བྱས་ནས། སེམས་ཆུང་ངང་འབྲེལ་ཡོད་གནད་དོན་ཐག་གཅོད་བྱེད་པའི་རེ་བ་ཡོད་ཅེས་བརྗོད་འདུག

ཆིན་ཀང་གིས་ད་དུང་། ཀྲུང་གོའི་ཕྱོགས་ཀྱིས་རྒྱ་གར་ལ་ཀྲུང་གོས་དོན་འདིའི་ཐད་ཀྱི་ལངས་ཕྱོགས་གསལ་བོར་བསྟན་ཡོད་ཅིང་། རྒྱ་གར་སྲིད་གཞུང་གིས་ཐེངས་མང་བོར་བོད་རང་སྐྱོང་ལྗོངས་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པ་ཁས་བླངས་ཤིང་། རྒྱ་གར་དུ་ཡོད་པའི་ཡུལ་གྱར་བོད་པས་ཀྲུང་གོར་རྒོལ་བའི་ཆབ་སྲིད་བྱེད་སྒོ་སྤེལ་བར་བཀག་འགོག་བྱེད་རྒྱུའི་ཁས་ལེན་བྱེད་མྱོང་། ཀྲུང་གོའི་ཕྱོགས་ཀྱིས་རྒྱ་གར་གྱིས་འབྲེལ་ཡོད་ཁས་ལེན་གཙི་སྲུང་བྱས་ནས། འབྲེལ་ཡོད་གནད་དོན་སེམས་ཆུང་ངང་ཐག་གཅོད་བྱེད་པའི་རེ་བ་ཞུ་ཞེས་བརྗོད་འདུག

གསར་འགོད་པ། ཨ་རིག་འགྱུར་མེད།