༢༠༡༠ ལོའི་ཟླ་ ༧ པའི་ཚེས་ ༡༡ ཉིན་ནི་འཛམ་གླིང་མི་འབོར་གྱི་ཉིན་མོའི་དུས་དྲན་ཐེངས་ ༢༡ པ་དེ་ཆགས་ཡོད་ལ་ད་ལོའི་འཛམ་གླིང་མི་འབོར་གྱི་ཉིན་མོའི་བརྗོད་གཞི་ནི་མི་རེ་ངོ་རེ་ཧ་ཅང་རྩ་ཆེན་ཡིན་ཞེས་པ་དེ་ཡིན་འདུག ༡༩༨༧ ལོའི་ཟླ་ ༧ པའི་ཚེས་ ༡༡ ཉིན་འཛམ་གླིང་ཧྲིལ་པོར་མི་འབོར་གྱི་འཕེལ་ཚད་མི་གྲངས་དུས་ཕྱུར་ ༥༠ བརྒལ་བའི་དུས་དྲན་སྲུང་གཙི་བྱས་ཡོད་ལ། མཉམ་འབྲེལ་རྒྱལ་ཚོགས་ཀྱི་འཛུགས་སྐྲུན་ལས་འཆར་ཚོགས་པས་ ༡༩༩༠ ལོའི་སྐབས་ ༣༦ པའི་ཚོགས་ཆེན་ཐོག ལོ་རེའི་ཕྱི་ཟླ་ ༧ པའི་ཚེས་ ༡༡ ཉིན་ནི་འཛམ་གླིང་མི་འབོར་ཉིན་མོར་གཏན་འབེབས་བྱུང་བ་ནས་བཟུང་། འཛམ་གླིང་གང་སར་གནད་དོན་དེར་དོ་སྣང་གསར་པ་ཞིག་བྱུང་མགོ་ཚུགས་ཡོད།
ད་ལོའི་རྒྱ་ནག་གི་འཛམ་གླིང་མི་འབོར་གྱི་ཉིན་མོའི་བྱ་འགུལ་གཙོ་བོ་ནི་ཕྱི་ཟླ་ ༡༡ པའི་ཚེས་ ༡ ཉིན་ནས་བཟུང་རྒྱལ་ཡོངས་མི་འབོར་ཞིབ་བཤེར་ཐེངས་ ༦ པ་དེ་མགོ་རྩོམ་རྒྱུ་ཡིན་འདུག ༢༠༠༩ ལོའི་ཟླ་ ༩ པའི་ནང་རྒྱ་ནག་འཆར་ལྡན་བུ་སྐྱེས་ཀྱི་འགན་འཛིན་ལི་བྷིན་གྱིས་ཞིན་ཧྭ་གསར་ཁང་གི་བཅའ་འདྲིར་དང་ལེན་བྱས་སྐབས་བརྗོད་དོན། རྒྱ་ནག་གིས་འདས་པའི་ལོ་ ༣༠ ནང་མི་གྲངས་དུང་ཕྱུར་ ༤ ཙམ་སྐྱེས་རྒྱུར་ཉུང་དུ་གཏོང་ཐུབ་ཡོད། བྱས་འབྲས་དེ་འཛམ་གླིང་ཐོག་གཟི་བརྗིད་ཅིག་ཏུ་གྱུར་ཡོད་ཅེས་བརྗོད་ཡོད། ཡིན་ནའང་། རྒྱ་ནག་ཆེད་མཁས་པ་དག་གིས་བཤད་ན། འཆར་ལྡན་བུ་སྐྱེས་ཀྱི་སློབ་གསོའི་འོག་འདས་པའི་ལོ་ ༣༠ ནང་མི་གྲངས་སྐྱེས་འཕེལ་དུང་ཕྱུར་ ༤ ཙམ་ཉུང་དུ་གཏོང་ཐུབ་ཡོད་ཟེར་བ་དེ་ནི་ཚན་རིག་དང་མི་མཐུན་པར་མ་ཟད། དེ་ནི་ཁུངས་མེད་ཀྱི་འཆལ་གཏམ་ཞིག་རེད་ཅེས་བརྗོད་ཡོད། ལྷག་པར་དུ་རྒྱ་ནག་གི་མི་འབོར་རྒས་འགྱུར་གྱི་གནད་དོན་དེ་བསྐྱར་དུ་གླེང་གཞི་གལ་ཆེན་ཞིག་ཏུ་གྱུར་ཡོད། རྒྱལ་ཚོགས་ཀྱིས་བཏོན་པའི་ཚད་ལྡན་གྱི་གཏན་འབེབས་ནང་། སྤྱི་ཚོགས་དང་ས་ཁུལ་གང་ཞིག་ཏུ་ལོ་ན་ ༦༥ སོན་པའི་མི་འབོར་དེ་སྤྱིའི་མི་འབོར་གྱི་བརྒྱ་ཆ་ ༧ ཟིན་གྱི་ཡོད་ན། དེར་རྒས་འགྱུར་སྤྱི་ཚོགས་ཞེས་བརྗོད་ཀྱི་ཡོད་ལ། གལ་སྲིད་བརྒྱ་ཆ་ ༡༤ ལས་བརྒལ་བ་ཡིན་ན་དེར་རྒན་ཁོག་སྤྱི་ཚོགས་བརྗོད་ཀྱི་ཡོད། དོན་དངོས་ཐོག་ཕྱི་ལོ་ ༢༠༠༡ ལོའི་མཇུག་ཏུ་ རྒྱ་ནག་ནི་རྒས་འགྱུར་སྤྱི་ཚོགས་སུ་བསྐྱོད་མགོ་ཚུགས་ཡོད་པ་རེད། ཆེད་མཁས་པས་རོབ་རྩིས་བརྒྱབ་པ་ལྟར་ན། ཕྱི་ལོ་ ༢༠༢༤ ནས་ ༢༠༢༦ བར་དུ་རྒྱ་ནག་ནི་རྒན་ཁོག་སྤྱི་ཚོགས་ཤིག་ཏུ་འགྱུར་རྒྱུ་ཡིན་ལ། དུས་རབས་འདིའི་དུས་དཀྱིལ་དུ་ལོ་ན་ ༦༥ བརྒལ་བའི་མི་འབོར་གྱིས་རྒྱ་ནག་སྤྱིའི་མི་འབོར་གྱི་བཞི་ཆ་གཅིག་དང་རྒས་ཁོག་གི་གྲངས་འབོར་དུང་ཕྱུར་ ༣༌༣ ཙམ་ཟིན་རྒྱུ་ཡིན་ལ། དེའི་ནང་ལོ་ན ༨༠ བརྒལ་བའི་རྒས་ཁོག་དུང་ཕྱུར་ ༡ ཙམ་འབྱུང་རྒྱུ་ཡིན་འདུག འདིའི་ཐད་མི་སྣ་ཁ་ཤས་ཀྱིས་རྒྱལ་ཁབ་ཀྱིས་ཕྲུ་གུ་གཉིས་སྐྱེས་ཆོག་པའི་སྲིད་བྱུས་ཤིག་གཏན་འབེབས་བྱུང་བ་ཡིན་ན། མི་འབོར་རྒན་ཁོག་ཏུ་འགྱུར་བཞིན་པའི་སྤྱི་ཚོགས་ཀྱི་གནོན་ཤུགས་ཉུང་དུ་གཏོང་ཐུབ་པའི་རེ་བ་ཡོད་ཚུལ་ཡང་བཤད་ཡོད།
ཡིན་ནའང་། ཕྱི་ལོ་ ༢༠༠༥ ལོ་ནས་བཟུང་རྒྱ་གཞུང་གིས་མཚོ་སྔོན་ཞིང་ཆེན་གྱི་བོད་རིགས་ཞིང་འབྲོག་མང་ཚོགས་ལ་ཉུང་སྐྱེས་ཕྱུག་འགྱུར་དང་འཆར་ལྡན་བུ་སྐྱེས་ཞེས་པའི་སྲིད་བྱུས་རིམ་པར་སྤེལ་ཡོད་ལ། ཕྲུ་གུ་མང་བ་སྐྱེས་ན་ཉེས་ཆད་གཅོད་པ་དང་། ཉུང་བ་སྐྱེས་ན་བྱ་དགའ་སོགས་སྤྲོད་ཀྱིན་ཡོད་འདུག འདིའི་ཐད་མཚོ་སྔོན་མི་འབོར་དང་འཆར་ལྡན་བུ་སྐྱེས་ཀྱི་ལས་བྱེད་ཅིག་གིས་བརྗོད་ན། ཉུང་སྐྱེས་ཕྱུག་འགྱུར་གྱི་ལས་འཆར་ལག་བསྟར་བྱས་པ་ནས་བཟུང་། ཕྲུ་གུ་གཅིག་ལས་སྐྱེས་རྒྱུར་འདོད་པ་མེད་པའི་གྲངས་ཉུང་མི་རིགས་ཁྱིམ་ཚང་ ༢༨༨༤༩ ཙམ་དང་། ཕྲུ་གུ་གསུམ་སྐྱེས་ཆོག་པའི་འབྲོག་པའི་ཁྱིམ་ཚང་ ༡༠༩༤༠ ཡིས་དེང་ཕྱིན་ཕྲུ་གུ་གཅིག་གམ་གཉིས་ལས་མི་སྐྱེས་པའི་ཁས་ལེན་འོག་ཁྱིམ་ཚང་རེར་རྒྱ་སྒོར་ ༣༠༠༠ རེའི་བྱ་དགའ་སྤྲད་ཡོད་ཅེས་བརྗོད་ཡོད་འདུག ད་སྔ་འཛམ་གླིང་ཐོག་མི་འབོར་རྒས་འགྱུར་གྱི་གནད་དོན་ཆེ་ཤོས་ཀྱི་རྒྱལ་ཁབ་ནི་སི་པན་དང་ཨི་ཊ་ལི། ཉི་ཧོང་བཅས་ཡིན་པ་རེད། ད་ལོའི་འཛམ་གླིང་མི་འབོར་གྱི་ཉིན་མོར་རྒྱལ་ཚོགས་དྲུང་ཆེ་བྷན་ཀེ་མོན་གྱིས་ མི་འབོར་གྱི་ཉིན་མོ་དང་སྟབས་བསྟུན་ནས་དབུལ་ཕོངས་དང་བཀྲེས་སྐོམ་མྱོང་མཁན། དེ་བཞིན་སློབ་གསོ་དང་འཕྲོད་བསྟེན། ཕོ་མོ་འདྲ་མཉམ་བཅས་ཀྱི་ཐད་ལ་མུ་མཐུད་ཤུགས་སྣོན་རྒྱག་དགོས་པའི་འབོད་སྐུལ་ཞུས་ཡོད།
གསར་འགོད་པ། དཔལ་ལྡན་རྒྱ་མཚོ།
ཀྲུང་གོའི་ཕྱི་འབྲེལ་པུའུ་ཡིས་རྒྱ་གར་གྱིས་ཏཱ་ལའི་བླ་མའི་གནད་དོན་འོས་འཚམ་ངང་ཐག་གཅོད་བྱེད་པའི་དམ་བཅའ་བརྩི་སྲུང་བྱེད་པའི་རེ་བ་བཏོན་པ།
ཀྲུང་གོའི་ཕྱི་འབྲེལ་པུའུ་ཡི་མགྲིན་ཚབ་པ་ཆིན་ཀང་གིས་ཚེས་༡༣ཉིན་འཚོགས་པའི་གསར་འགོད་པའི་རྒྱུན་སྲོལ་ཚོགས་འདུའི་སྟེང་དུ་འདི་ལྟར། རྒྱ་གར་གྱི་ཕྱི་འབྲེལ་དྲུང་ཡིག་གིས་ཏཱ་ལའི་བླ་མར་མཇལ་འཕྲད་བྱས་པའི་སྐོར་ལ་ཀྲུང་གོའི་བརྗོད་བསམ་པ་ནི། རྒྱ་གར་གྱིས་ཏཱ་ལའི་གནད་དོན་འོས་འཚམ་ངང་ཐག་གཅོད་བྱེད་པའི་དམ་བཅའ་བརྩི་སྲུང་བྱས་ནས། སེམས་ཆུང་ངང་འབྲེལ་ཡོད་གནད་དོན་ཐག་གཅོད་བྱེད་པའི་རེ་བ་ཡོད་ཅེས་བརྗོད་པ་རེད།
ཆིན་ཀང་གིས་ཀྲུང་གོའི་ཕྱོགས་ཀྱིས་རྒྱ་གར་ལ་ཀྲུང་གོའི་དོན་འདིའི་ཐད་ཀྱི་ལངས་ཕྱོགས་གསལ་བོར་བསྟན་ཡོད་ཅིང་། རྒྱ་གར་སྲིད་གཞུང་གིས་ཐེངས་མང་པོར་བོད་རང་སྐྱོང་ལྗོངས་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ཡིན་པ་ཁས་བླངས་ཤིང་། རྒྱ་གར་དུ་ཡོད་པའི་ཡུལ་གྱར་བོད་པས་ཀྲུང་གོར་རྒོལ་བའི་ཆབ་སྲིད་བྱེད་སྒོ་སྤེལ་བར་བཀག་འགོག་བྱེད་རྒྱུའི་ཁས་ལེན་བྱེད་མྱོང་། ཀྲུང་གོའི་ཕྱོགས་ཀྱིས་རྒྱ་གར་གྱིས་འབྲེལ་ཡོད་ཁས་ལེན་བརྩི་སྲུང་བྱས་ནས། འབྲེལ་ཡོད་གནད་དོན་སེམས་ཆུང་ངང་ཐག་གཅོད་བྱེད་པའི་རེ་བ་ཞུ་ཞེས་བརྗོད་བྱུང་།
ཤེས་རྟོགས་བྱུང་བ་ལྟར་ན། རྒྱ་གར་གྱི་ཕྱི་འབྲེལ་དྲུང་ཡིག་ནེ་ལུའུ་ཕཱ་མཱ• ལ་ཨོ་ཡིས་ཚེས་༡༠ཉིན་རྒྱ་གར་གྱི་རྡ་རམ་ས་ལ་ནས་ཏཱ་ལའི་བླ་མ་དང་མཇལ་འཕྲད་བྱས་ཡོད་པ་རེད།