མི་དམངས་ཀྱིས་ཐད་ཀར་འདེམས་བཞིན་ཨེ་ཡོད། ཁང་གསར་རྡོ་རྗེ།

གཤམ་མཆན་ཉུང་ངུ་འདི་ནི་ངེད་ཀྱིས་སེམས་གཏིང་ནས་སྐུ་ཞབས་ཁང་གསར་ལགས་ཀྱི་དགོངས་ཚུལ་ལ་བསམ་ཚུལ་བཤད་པ་ཙམ་ལས་འདི་ལ་གཞན་དང་གཞན་གྱི་རྒྱུ་མཚན་གནས་ལུགས་ཅི་ཡང་མེད། དྲ་གྲོགས་དག་ལ་རྩོམ་ཡིག་དང་མཆན་བུའི་སྐོར་ནས་བསམ་ཚུལ་ཅང་མེད་ན་སྐད་ཆ་འདི་རིགས་ཆོལ་ཁ་དང་གང་ཟག་སྒེར་གྱི་དགའ་ཁ་འཁྱེར་ཕྱོགས་སོགས་ཀྱི་ལྟ་བའི་གཡང་ལ་མ་འདེད་རོགས། སྐུ་ཞབས་ཁང་གསར་ལགས་ནས་ལན་དགོས་སར་ལན་དང་གསལ་བཤད་དགོས་སར་གསལ་བཤད་གང་རྒྱས་རེ་ཡོང་བའི་རེ་སྐུལ་དང་བཅས། ལམ་སྟོན་གཟབ་རྒྱས་གནང་རོགས་ཀྱང་ཞུ།

ཚན་པ་དང་པོ་ལྟར་ན། བཀའ་ཁྲི་མི་མང་གིས་འདེམས་ཀྱི་ཡོད་མེད་ལ་དོགས་པ་མི་འདུག། ཡིན་ནའང་། ཕྱོགས་འགལ་ཚོགས་པའི་དོན་དག་ཟེར་ན་ཅང་མི་ཤེས། ཕྱོགས་འགལ་ཚོགས་པ་ཁག་གིས་གཅིག་གིས་གཅིག་བཀག་རུང་མ་བཀག་རུང་དོན་དག་འདི་མི་དམངས་ཀྱི་བཀའ་ཁྲི་ཐད་ཀར་འདེམས་ཀྱི་ཡོད་མེད་དང་འབྲེལ་བ་མེད་པར་འདོད། འདི་ནི་ཆབ་སྲིད་ཀྱི་ངོས་ནས་བཤད་ན་ལངས་ཕྱོགས་མ་འདྲ་བའི་ལས་གཞི་ཙམ་ལས་མི་དམངས་དང་འབྲེལ་བའི་འོས་ཤོག་ལ་འབྲེལ་བ་ཅང་མེད་པར་མཐོང་ངོ་།།

ཚན་པ་གཉིས་པ་ལྟར་ན། དོན་དངོས་ཐོག་དབུས་གཙང་ཚོགས་པ་དང་མདོ་སྟོད་ཚོགས་པ། མདོ་སྨད་ཚོགས་པ། ད་དུང་མངའ་རིས་སྤྱི་མཐུན་ཚོགས་པ་བཅས་སོ་སོའི་སྣང་བར་མི་འགྲོ་བའི་མི་ཞིག་བཀའ་ཁྲིར་སླེབས་ཐབས་མེད་ཟེར་ཚུལ་འདི་ཅུང་ཐད་དྲགས་པར་བདག་མཐོང་། རྒྱུ་མཚན། སྤྱིར་ཚོགས་པ་ཚང་མས་རང་རང་གིས་དཔྱད་འཇོག་གནང་རྗེས་སྤྱི་ཚོགས་ཐོག་ལ་འོས་མི་རེ་གསལ་བསྒྲགས་བྱེད་བཞིན་པ་བདེན་ཡང་། མཐའ་མར་ཁོང་ཚོའི་ནང་གི་གཅིག་ལ་ཐོབ་འགྲོ་བ་ལས་འོས་མི་འདི་ལ་ཚོགས་པ་འདི་ཉིད་ཀྱི་དགའ་མོས་མེད་པས་ཐོབ་མི་ཐུབ་པ་འདྲ་ཅང་མེད་པར་མཐོང་།
གཞན། ཆོས་རྒྱུད་བླ་ཆེན་གང་ཡིན་དེའི་ཐུགས་མོས་མེད་ན། སྤྱི་འཐུས་སུ་སླེབས་ཀི་མེད་ཟེར་བ་འདི་ལ་རྒྱུ་མཚན་གང་ཡང་མཐོང་མ་སོང་། འདས་པའི་ཆོས་རྒྱུད་སྤྱི་འཐུས་ཚང་མ་རང་རང་གི་ཆོས་རྒྱུད་བླ་ཆེན་གྱི་ཐུགས་མོས་བཞིན་འདེམས་པ་རེད་ཟེར་ན་ཅུང་གནས་ལུགས་དང་མཐུན་དཀའ་བར་མཐོང་སོང་ངོ་།།

ཚན་པ་གསུམ་པ་ལྟར་ན། ཁྲིམས་ཐོག་ནས་ཆོལ་ཁ་དང་ལུང་ཚན་གྱི་ཚོགས་པ་དག་གིས་ལུང་ཚན་དེའི་མང་ཚོགས་ཀྱི་ངོ་བོ་མཚོན་ཐུབ་མིན་བཤད་དཀའ་ཡང་། བཙན་བྱོལ་མགོ་བཙུགས་པ་ནས་ད་ལྟའི་བར་དུ་རང་རང་གི་ཆོལ་ཁའི་མིང་བཏགས་ཡོད་པའི་ཚོགས་པ་དེས་མི་དམངས་ཀྱི་ངོ་བོ་མ་མཚོན་པ་གང་ཞིག་ཀྱང་ཡོད་བཟོ་མི་འདུག། སྐུ་ཉིད་ཉེ་ཁོར་གྱི་དབུས་པ་སུས་ཀྱང་ཚོགས་པ་དེའི་ཚོགས་མི་འོས་འདེམས་མ་གནང་བ་དེ་སྐུ་ཉིད་ཉེ་ཁོར་བ་ཚོའི་སྐྱོན་དུ་འབབ་པ་ལས་དེ་ཚོགས་པ་དེའི་སྐྱོན་དུ་ག་ལ་འགྲོ། བསམ་ཚུལ་ཚན་པ་འདི་ནི་ཁྱོད་རང་གི་སེམས་ནང་དུ་དབུས་གཙང་ཚོགས་པ་དེ་རང་གི་ཆོལ་ཁའི་ཚོགས་པར་རྩ་འཛིན་མེད་པའི་རྟགས་ཙམ་དུ་ཟད་པར་འདོད།

ཚན་པ་བཞི་པ་ལྟར་ན། ངེད་ཀྱི་བསམ་པར་ལོ་རབས་བདུན་ཅི་བརྒྱད་ཅུ་དང་ད་ལྟའི་གནས་ཚུལ་ཕྱོགས་ཡོངས་ནས་ལོག་ཀ་ཁག་ཁག་རེད། ད་ལྟའི་སྤྱི་ཚོགས་འདི་ལོ་རབས་བདུན་ཅུ་བརྒྱད་ཅུའི་སྐབས་ཀྱི་སྤྱི་ཚོགས་མིན་ལ། སྔར་གྱི་ལོ་རབས་བདུན་ཅི་བརྒྱད་ཅུའི་སྤྱི་ཚོགས་དེ་དེང་གི་སྤྱི་ཚོགས་འདི་ཡང་མིན། ངེད་ཀྱི་བསམ་པར་གནད་ཡོད་མཁན་ཚོ་གནད་ཡོད་མཁན་ཚོ་དང་འབྲེལ་ལམ་ལེགས་ཤོས་ཡིན་པ་འདི་རྡ་རམ་ས་ལ་དང་གངས་ཅན་སྐྱིད་གཤོངས་གཅིག་པུའི་འགྲོ་ལུགས་སྡོད་སྟངས་ཙམ་ཨེ་ཡིན་ནམ། མི་རིགས་གཞན་དང་རྒྱལ་ཁབ་གཞན་དག་ལ་ཡང་སྣང་ཚུལ་འདི་ཡོད་ཐག་ཆོད་དུ་མཐོང་སོང་། ཚན་པ་འདི་ལ་དངོས་གནས་ཞེ་འཁོན་ལྟ་བུའི་ནད་རིགས་ཀྱི་སེམས་ཚོར་དྲག་པོ་ཙམ་ལས་གནས་ལུགས་དེ་ཙམ་མཐོང་མ་སོང་།།

ཚན་པ་ལྔ་པ་ལྟར་ན། ཚོགས་པ་སོ་སོའི་རང་རང་གི་རྣམ་དཔྱོད་རྩལ་ཏུ་བཏོན་ནས་སླེབས་ལ་ཉེ་བའི་བཀའ་སྤྱིའི་འོས་མི་ཁྱབ་བསྒྲགས་དང་ངོ་སྤྲོད་བྱེད་པ་འདི་ནི་དམངས་གཙོ་རང་དབང་ཅན་གྱི་བྱེད་ལས་ཤིག་རེད། ལས་གཞི་འདི་རིགས་ལ་གཟས་ནས་ཚོགས་པ་ཤུགས་རྐྱེན་ཅན་ཚོས་མིང་རྟགས་བཀོད་མ་བཀོད་ཟེར་བ་ནི་ཅུང་བསམ་བློ་ཡག་ས་ནས་མ་བཏང་བའི་རྟགས་སུ་མངོན་པར་མཐོང་ངོ་།།

རྭ་ལོས་བཤད་པའི་དོན་དག་དེའི་ཐད་ནས་བཤད་ན། ཚོགས་པ་འདི་ཚོའི་གནད་ཡོད་ལས་བྱེད་དང་བོད་གཞུང་གི་དབར་གཞུང་འབངས་ཀྱི་འབྲེལ་བ་རྒྱུན་ལྡན་ཞིག་ཡོད་ན་ཡག་པོ་རེད། འོན་ཀྱང་ངས་བཤད་པའི་འབྲེལ་བ་དེ་དེའི་རིགས་མ་རེད། དཔེར་ན། ཆོལ་ཁ་ཀ་པའི་ཚོགས་གཙོ་དང་བཀའ་བློན་འདི་དང་བཀའ་ཟུར་འདིའི་དབར་འབྲེལ་བ་ཡོད་པ་དང་། ཆོལ་ཁ་ཁ་པའི་ཚོགས་གཙོ་ཚོགས་གཞོན་དང་བོད་གཞུང་གི་ཨ་ལག་འདི་དང་ཁྲི་ཟུར་འདི་འབྲེལ་བ་ཡོད་པ། ཆོལ་ཁ་ག་པའི་འགོ་ཁྲིད་དང་དྲུང་ཆེ་བྱེ་བྲག་པ་འདི་དང་བཀའ་ཟུར་འདིའི་དབར་འབྲེལ་བ་ཡོད་པ་ཞེས། མདོར་ན་བཙན་བྱོལ་གྱི་ན་ཚ་རྙིང་པ་དང་འཐབ་རྩོད་རྙིང་པ་ཚང་མ་འདི་ཚོའི་ཐོག་ཏུ་འགོས་ཡོད་པ་ཞིག་རེད། སྤྱིར་བཏང་གཞུང་འབྲེལ་མ་ཡིན་པའི་ཚོགས་པ་ཟེར་དུས། གཞུང་ལ་རྟེན་བསྡད་པ་དང་གཞུང་གི་བཀོད་ཇུས་འོག་ལ་མེད་པ་ཞིག་དགོས་རེད།

མགྲིན་པ་ཟབ་མོ་ལགས། ༡༽ བོད་མི་མང་སྤྱི་འཐུས་ལྷན་ཚོགས་འདི་བོད་གཞིས་བྱེས་གཉིས་ཀྱི་སྐུ་ཚབ་འཐུས་མི་རེད། འོན་ཀྱང་སྐུ་ཚབ་འཐུས་མི་ཡིན་པ་བཞིན་དུ་མཚོན་ཐུབ་པ་བྱེད་ཀི་ཡོད་མེད་ནི་སྤྱི་འཐུས་ཚོ་ལ་རག་ལས་པ་ཞིག་རེད།
༢༽ དམིགས་བསལ་ཚོགས་ཆེན་གྱི་གྲོས་ཆོད་ནང་། སྤྱི་མོས་བྱུང་བ་དེ་༸གོང་ས་མཆོག་གིས་དུས་ནས་དུས་སུ་ཡེ་ཤེས་དབྱིངས་དཔྱད་ཀྱིས་ཐག་གཅོད་གང་གནང་གི་རྗེས་སུ་འབྲང་རྒྱུ་དེ་རེད། མང་མོས་ནི་དབུ་མའི་ལམ་རེད། དེ་མིན་རང་བཙན་དང་རང་ཐག་རང་གཅོད་ཀྱི་སྐོར་ཡང་བཀོད་འདུག གྲོས་ཆོད་ཀྱི་འབྲེལ་ཐག་་འདི་ལ་གཟིགས་དང་། http://www.shambalapost.com/exile-news/151-2008-11-24-14-35-06

༣༽ ངས་ཚོད་དཔག་བྱས་པ་ནོར་མེད་ན། ད་རེས་ཀི་དམིགས་བསལ་ཚོགས་ཆེན་དེ་ལ་ཆོ་ཞེ་དྲག་ཡོང་གི་མ་རེད། དེར་བརྟེན་སྤྱི་འཐུས་ལྷན་ཚོགས་ཀྱི་ནུས་པ་དང་དབང་ཚད་རང་འཇགས་གནས་ཀི་རེད་ལ་གནས་དགོས་ཀི་རེད། གྲོས་ཚོགས་དེ་ཡག་པོ་ཞིག་ཆགས་མིན་ནི་ང་རང་ཚོའི་འོས་ཤོག་ལ་རག་ལས་ཡོད།

དེ་རིང་ཁང་གསར་རྡོ་རྗེས་གསུངས་པ་བདེན
ད་ང་ལྟ་བུ་དག་མགོ་འཐོམ་སོང་ཡ། ད་ནི་བཀའ་སྤྱི་ལ་ཡང་འོས་སུ་ཞིག་བླུག་དགོས་མིན་མ་ཤེས་པར་གནས་ཡོད། ང་ལྟ་བུ་ཅི་ཙམ་ཡོད་རྒྱུ་རེད་སོམས་ཤིག
ངའི་ངོ་ཤེས་བ་ཞིག་གི་ད་ནི་བཀའ་སྤྱིའི་འིས་བླུག་གིན་མིན་་་འདིན་ཡིན་ཞེས་གཏན་ཁེལ་ཞིག་རག་གིན་མི་འདུག་ འོས་མི་མང་པོ་ཞིག་ཚོགས་པ་ཁག་མང་པོའི་བསྡུས་འདུག་མོད་་་འོན་ཀྱང་འོས་མི་དེ་དག་གི་ཕྱག་ལས་ཙམ་ཡང་ངོ་སྤྲོད་བྱས་མི་འདུག་པས་ད་མགོ་ཚོད་ཀྱིན་མི་འདུག་ཟེར།
ངའི་ཚོད་དཔག་ཞིག་བྱས་ན་མང་ཚོགས་a༦༠་ཞིག་མགོ་འཐོམ་ནས་ཡོད་རྒྱུ་རེད

ཆོལ་ཁ་དང་ཆོས་ལུགས་ཀྱི་ཁྱབ་ཁོངས་ནས་འཐུས་མིའི་འོས་གཞི་གདམ་པ་དེ་ཡང་མང་གཙོའི་ཁྲིམས་ལུགས་དང་མཐུན་པ་ཞིག་རེད་བསམ་གྱིན་འདུག དེ་ཙམ་མ་ཟད་མི་སྒེར་རེ་རེ་བའི་ངོས་ནས་ཀྱང་འོས་གཞི་བཏོན་ན་འགྲིག་པར་བསམ་གྱིན་འདུག ཅི་ཙམ་གྱིས་ཁྱབ་བསྒྲགས་ཤུགས་ཆེ་ན་དེ་ཙམ་གྱིས་གླེང་སློང་ཤུགས་ཆེ་བ་དང་། གླེང་སློང་ཤུགས་ཆེ་ན་འཐུས་མིའི་ལོ་རྒྱུས་ཀྱི་ཡག་ཉེས་ངོ་མ་དེ་ཤེས་པའི་ཕན་ཐོགས་ཡོད་པར་སྙམ།

ཡིན་ནའང་། ད་སྔར་བཏོན་པའི་ཚོགས་པ་ཁག་ཅིག་གི་འོས་གཞི་ལ་སེམས་ཚོར་ཆེན་པོ་བྱུང་། ངས་བསམ་ན་འཐུས་མི་དེ་གསར་འབྱོར་དང་རྙིང་འབྱོར་གྲངས་མཉམ་གྱི་སྒོ་ནས་སླེབས་དགོས་པར་འདོད་ཀྱིན་ཡོད།
རྒྱ་མཚན་ནི། ང་ཚོ་བཙན་བྱོལ་བའི་ལས་འགན་ནི་བཙན་བྱོལ་དུ་ཡོད་པའི་གཞུང་དང་སྒྲིག་འཛུགས། མི་མང་གཅིག་བུ་ལ་བདག་སྐྱོང་བྱེད་རྒྱུ་ཙམ་མིན་པར། གཞིས་བྱེས་བོད་མིའི་འབྲེལ་ལམ་དང་། གཞིས་ལུས་བོད་མིའི་བདེ་སྡུག་ལ་ལྟ་དགོས་པ་དེ་ཧ་ཅང་གི་གནད་འགག་རེད་བསམ་ཡོད། དེ་ཡིན་པ་ལ། བོད་ནང་མིག་གིས་མཐོང་མ་མྱོང་མཁན་ཞིག་གིས་གཞིས་བྱེས་བོད་མིའི་འབྲེལ་ལམ་ཇི་ལྟར་འཛིན་རྒྱུ་དང་། གཞིས་ལུས་བོད་མིའི་བདེ་སྡུག་ལ་ལྟ་རྟོག་ཅི་ལྟར་བྱེད་རྒྱུ་དེ་རེད།

ཁང་གསར་རྡོ་རྗེ་ལགས། ཁྱེད་ཀྱི་བཤད་པ་རྣམས་བདེན་ནོ། ངེད་ཚོ་བཙན་བྱོལ་སྤྱི་ཚོགས་ཀྱི་ཚོགས་པ་འདྲ་མིན་དེ་ཚོས། རང་ཉིད་ཀྱི་ཁེ་ཕེན་ཁོ་ནས་ཆེད་དུ་ལས་ཀ་བྱེད་པ་ལས། གཞུང་དང་མི་མངས་ཀྱི་ཆེད་དུ་ལས་ཀ་བྱེད་པ་ནི། ཉིན་མོའི་སྐར་མ་བཞིན་ནོ། ལྷག་པར་ཚོགས་པ་འདིའི་རིགས་སྤྱི་ཚོགས་ཀྱི་ནང་རྙོག་གླེང་བཟོ་མཁན་ཞིག་ཏུ་མཐོང། ཉེ་ལམ་ཚོགས་པ་དེ་ཚོས། ཁོང་རང་ཚོའི་རྒྱུན་ལས་ལས་ཁུངས་ཀྱི་ངོས་ནས་བཀའ་སྤྱི་འོས་མི་མང་དག་ཤིག་སྟོན་ཡོད་ལ། མང་ཆེ་བ་ནི་ཕྱོགས་འཛིན་གྱི་བསམ་བློ་ཁོ་ན་ལས། བོད་མི་རིགས་ཀྱི་ལས་དབང་ལ་བསམ་བློ་ནམ་ཡང་མི་གཏོང་བ་བཟོ་འདྲ་བོ་འདུག

ང་ཚོས་རྒྱུན་དུ་དེའི་རིགས་ལ་ཡིད་གཟབ་དགོས་པ་ནི་ཤིན་ཏུ་ནས་གལ་ཆེ།

ཁང་གསར་རྡོ་རྗེ་ལགས། བཀྲ་ཤིས་བདེ་ལེགས།།།།

༢༠༠༨ ལོའི་དམིགས་བསལ་ཚོགས་ཆེན་སྐབས་ལ། བཀའ་ཁྲི་ཟམ་གདོང་བློ་བཟང་བསྟན་འཛིན་མཆོག་གིས། ད་ཡོད་ཀྱི་སྤྱི་འཐུས་འདི་དག་གིས་བོད་མིའི་ངོ་ཚབ་ཆ་ཚང་བ་ཞིག་མཚོན་ཐུབ་གི་མེད་སྟབས། དམིགས་བསལ་ཚོགས་ཆེན་དེ་བསྐངས་པ་ཡིན་ཅེས་གསུངས་སོང་།

དམིགས་བསལ་ཚོགས་ཆེན་དེའི་སྟེང་ནས་དོན་གནད་ཆེན་པོ་དེ་འདྲ་ཐག་བཅད་པ་རེད། དཔེར་ན། བོད་མིའི་རྩ་དོན་འཐབ་རྩོད་དེ་དབུ་མའི་ལམ་ལས་གཞན་མེད་པའི་གྲོས་ཆོད་བཞག་པ་རེད།

ད་ལོ་ཡང་དམིགས་བསལ་ཚོགས་ཆེན་དེ་འཚོགས་རྒྱུ་གཏན་འཁེལ་ཡོད་པ་རེད།

འདི་དག་ལ་བསམ་ན། བོད་མི་མང་སྤྱི་འཐུས་གྲོས་ཚོགས་འདི་ལས་ལྷག་ཅིག་ང་ཚོའི་ངོ་ཚབ་མཚོན་མཁན་ཞིག་མེད་སྙམ་པའི་བློ་དེ་ཡང་རང་བཞིན་གྱིས་ཡལ་འགྲོ་གི་འདུག བཅའ་ཁྲིམས་རིན་པོ་ཆེའི་ནང་བཀོད་པའི་བོད་མིའི་སྐུ་ཚབ་དེ་ཚོ་ད་དུང་གྲོས་ཚོགས་ནང་ཕེབས་ཐུབ་མེད་པ་འདྲ།

གྲོས་ཚོགས་ཀྱི་ནུས་པ་ཉམས་བཞིན་པའི་སྐབས་འདིར། རྒྱལ་བ་རིན་པོ་ཆེ་མཆོག་དང་བཙན་བྱོལ་བོད་གཞུང་གི་འཛིན་སྐྱོང་སྒྲིག་འཛུགས་འདི་ཨུ་ཐུག་སྟེ། ལས་དོན་ཆེ་ཕྲ་ཆུང་གསུམ་དམིགས་བསལ་ཚོགས་ཆེན་གྱི་སྟེང་ནས་ཐག་གཅོད་དགོས་འཁེལ་བ་རེད།

གྲོས་ཚོགས་འདི་སྒོ་ཡང་བརྒྱག་མ་ཤེས། འདིས་ཕན་ཡང་མ་ཐོགས། ཐབས་ཤེས་མེད་ནས་བོད་མིའི་ངོ་ཚབ་ངོ་མ་མཚོན་པའི་དམིགས་བསལ་ཚོགས་ཆེན་ཞེས་པ་ཞིག་སྐོང་གི་ཡོད་པ་རེད།

ད་གང་དྲག