ཁ་སང་ཕྱི་ཚེས་ ༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། མདོ་སྨད་ཀན་སུའུ་ཞིང་ཆེན་ཀན་ལྷོ་ཁུལ་འབྲུག་ཆུ་རྫོང་དུ་ཆུ་ལོག་གི་ཚབས་ཆེའི་གནོད་སྐྱོན་ཕོག་པར་ཐུགས་གསོའི་འཚམས་འཕྲིན་གནང་ཡོད།
འཚམས་འཕྲིན་དེའི་ནང་གསལ་དོན། བོད་རྒྱལ་ལོ་ ༢༡༣༧ རབ་གནས་ལྕགས་སྟག་ལོའི་བོད་ཟླ་ ༦ ཚེས་ ༢༨ ཕྱི་ལོ་ ༢༠༡༠ ཟླ་ ༨ ཚེས་ ༨ ཀྱི་སྔ་དྲོ་ཐོ་རེངས་སྐབས་སུ། དེང་སང་རྒྱ་ནག་གིས་ཀན་སུའུ་ཞིང་ཆེན་ཞེས་པར་བགོས་པའི་ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་དུ་གློ་བུར་དུ་ཆུ་ལོག་ཚབས་ཆེན་བྱུང་སྟེ། ད་ལྟའི་བར་མི་ ༡༢༧ ཙམ་རྐྱེན་ལམ་དུ་ཕྱིན་པ་དང་། མི་ ༢༠༠༠ ལྷག་གར་སོང་ཆ་མེད་དུ་གྱུར་པ། དུད་ཚང་ ༣༠༠ ཅན་གྱི་གྲོང་སྡེ་རྨེག་མེད་དུ་འདེད་དེ་འབྲུག་ཆུའི་སྨད་རྒྱུད་ཡུལ་གྲུ་ཁག་གི་མང་ཚོགས་ཀྱི་བདེ་འཇགས་ལའང་ཉེན་ཁ་ཚབས་ཆེན་འཕྲད་བཞིན་པའི་གནས་ཚུལ་སྐྱི་གཡའ་བ་བརྗོད་ཀྱི་མི་ལངས་པ་ཐོན་བཞིན་པར། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ད་ཐེངས་ཆུ་ལོག་གི་འཇིག་པའི་ཁྲོད་ནས་རྐྱེན་ལམ་དུ་ཕྱིན་པའམ། རྨས་སྐྱོན་ཕོག་པའི་བོད་རིགས་སྤན་ཟླ་གཙོས་མི་རིགས་ཁག་གི་མི་མང་ལ་ཐུགས་གསོའི་འཚམས་འདྲི་ཞུ་རྒྱུ་དང་། རྐྱེན་འདས་སུ་ཕྱིན་པ་རྣམས་ལ་དལ་འབྱོར་མི་ལུས་མྱུར་དུ་ཐོབ་པའི་སྨོན་ལམ་ཡང་ཞུ་རྒྱུ་ཡིན། ཆུ་ལོག་གི་དོན་རྐྱེན་བྱུང་མ་ཐག རྒྱ་ནག་དབུས་གཞུང་གིས་མཐོང་ཆེན་པོའི་ངང་ཛ་དྲག་མྱུར་སྐྱོབ་རིམ་པ་ཨང་གཉིས་པ་དང་། འཕྲལ་སྐྱོབ་མ་དངུལ་རྒྱ་སྒོར་དུང་ཕྱུར་ལྔ་འཕྲལ་མར་གནང་སྟེ་མྱུར་སྐྱོབ་ཀྱི་ལས་འགོ་བརྩམས་པ་དང་། ལྷག་པར་དུ་རྒྱ་ནག་གི་སྲིད་བློན་སྐུ་ཞབས་ཝུན་ཇ་པའོ་མཆོག་དུས་ཚོད་དང་པོའི་སྐབས་སུ་ཆུ་ལོག་བྱུང་ཡུལ་འབྲུག་ཆུ་ས་ཁུལ་དུ་ཕེབས་འབྱོར་བྱུང་བ་བཅས་ལ་རྗེས་སུ་ཡི་རངས་ཞུ་ཡི་ཡོད་ཅེས་གསལ་ཡོད།
ཡང་འཚམས་འཕྲིན་དེའི་མུ་མཐུད་དེ་གསལ་དོན། ཚང་མས་མཁྱེན་གསལ་ལྟར། མདོ་སྨད་འབྲུག་ཆུ་ས་ཁུལ་ནི་བོད་ཁུལ་དུ་ནགས་ཚལ་རྒྱ་ཁྱོན་ཆེ་ཤོས་ཀྱི་ས་གནས་ཤིག་ཡིན་ཞིང་། ལོ་རྒྱུས་ཐོག་ཆུ་ལོག་བྱུང་བའི་གནས་ཚུལ་མཐོང་ཐོས་དཀའ་ཡང་། རྒྱ་ནག་གིས་བོད་དབང་བསྒྱུར་བྱས་པའི་རྗེས་སུ་ནགས་ཚལ་སྨྱོན་ཧམ་ལྟར་གཅོད་འབྲེག་བྱས་པའི་དབང་གིས་བོད་ཀྱི་སྐྱེ་ཁམས་ཁོར་ཡུག་ལ་གནོད་སྐྱོན་ཤིན་ཏུ་ཚབས་ཆེན་ཐེབས་ཡོད་པར་མ་ཟད། ཤིང་ནགས་བཅད་ཟིན་མཚམས་གཙོ་བོ་གཏེར་ཁ་སྔོག་འདོན་དང་། ཆུ་གློག་གསར་རྒྱག་བཅས་སྐྱེ་ཁམས་ཁོར་ཡུག་ལ་སྲུང་སྐྱོབ་ཀྱི་འཆར་གཞི་གང་ཡང་མེད་པའི་ལས་གྲྭ་འབོར་ཆེན་སྤེལ་བཞིན་པ་སོགས་ནི་ད་ཐེངས་ཆུ་ལོག་ཚབས་ཆེན་ཡོང་བའི་རྐྱེན་རྩ་གཙོ་བོ་ཡིན་སྟབས། རྒྱ་ནག་གཞུང་ནས་ཚན་རིག་དང་མཐུན་པའི་གོང་སྤེལ་ལྟ་བའི་གཞུང་ལུགས་གཏན་ལ་ཕབ་པ་གཞིར་བཟུང་། བོད་ཁུལ་དུའང་དེ་མཚུངས་ལག་བསྟར་ཐུབ་པའི་རེ་བ་དང་། ད་ཐེངས་མྱུར་སྐྱོབ་ཀྱི་ལས་འགུལ་ཁྲོད་དུའང་གཙོ་བོ་དམག་མི་དང་། དྲག་ཆས་ཉེན་རྟོག་པ། ཉེན་རྟོག་པ་སོགས་འབོར་ཆེན་གཏོང་བཞིན་ཡོད་ན། ཁོང་ཚོའི་དཀའ་སྤྱད་འབད་བརྩོན་དང་སྐུལ་སློང་ལ་དོགས་པ་མེད་ཀྱང་། ནམ་རྒྱུན་གྱི་ཉམས་མྱོང་ལས་རྒྱ་ནག་གིས་སྤྱི་ཚོགས་བརྟན་ལྷིང་སྲུང་སྐྱོབ་དང་། གསང་བ་ཕྱིར་བསྒྲགས་སོགས་ཀྱི་སྲིད་བྱུས་འོག་གྱོང་གུན་ཕོག་པའི་མང་ཚོགས་ལ་དགོས་མེད་ཀྱི་བརྡབ་གསིག་འཕར་མ་སོགས་མི་ཡོང་བའི་རེ་བ་བཅས་ཞེས་གསལ་འདུག
དེ་རིང་རྒྱ་གཞུང་གི་གསར་ལམ་ཁག་ནང་བསྒྲགས་པ་ལྟར་ན་འདས་གྲོངས་སུ་སོང་བ་མི་བདུན་རྒྱ་དང་ག་སོང་ཆ་མེད་དུ་གྱུར་པ་གཅིག་སྟོང་ལྷག་ཡོད་པར་བཤད། ས་གནས་རང་ནས་གནས་ཚུལ་འབྱོར་བ་ལྟར་ན་བོད་པ་མང་པོ་འདས་གྲོངས་སུ་གྱུར་པ་མ་ཟད་ས་རང་གིས་ད་དུང་གནས་ཚུལ་གསལ་གོ་བྱུང་རྒྱུར་དཀའ་ངལ་ཡོད་པར་བཤད། ད་རེ་ཆུ་ལོག་ཆར་པ་ཤུགས་ཆེ་བཏང་ནས་འབྲུག་དཀར་གཙང་པོ་ཡར་འཁྱིལ་བའི་ནང་རི་འགོ་ནས་ས་རིད་རྒྱབས་ནས་འདམ་ཆུ་འདྲེས་མས་འབྲུག་ཆུའི་རྫོང་ཐོག་རང་ལ་གནོད་སྐྱོན་ཚབ་ཆེན་ཐེབས་ཀྱང་གྲོང་གསེབ་ཁག་ལ་དེ་འདྲའི་གནོད་སྐྱོན་ཚབ་ཆེ་མེད་པའི་གནས་ཚུལ་འདུག ད་ལྟ་ཐེ་བོའི་དགོན་གྲོང་གཉིས་གཙོ་བྱས་ནས་བོད་རིགས་མང་པོ་རོགས་སྐྱོར་དུ་འབྱོར་བཞིན་འདུག་ལ། ཐེ་བོ་རྫོང་གི་ལས་ཁུངས་ཡོངས་ནས་རོགས་སྐྱོར་བྱེད་པར་སྐྱོད་འདུག
བོད་མི་ཉམས་ཆུང་ཚོར་སྟེང་ལ་གནས་ཚུལ་འདི་འདྲ་འབྱུང་བ་སེམས་པ་སྐྱོ་ཡ་ཞིག་རེད་འདུག་། ཅི་དྲག་གང་དྲག་། ཤུལ་ལུས་ཀྱི་གཉེན་ཉེ་ཚན་ཚང་མར་གདུང་སེམས་མཉམ་སྐྱེད་ཡོད་།
ཆུ་ལོག་གི་རྐྱེན་ལམ་དུ་ཕྱིན་པའི་་འདས་པོ་རྣམས་ལ་མྱ་ངན་ཞུ་བཞིན་ཡོད།
ངས་བསམ་ན་ཆུ་ལོག་གི་འབྱུང་རྐྱེན་ངོ་མ་དེ་ནི་རྒྱ་ནག་དམར་ཕྱོགས་ལས་མ་འདོད།རྒྱུ་མཚན་ནི་ནགས་ཚལ་ཚད་བརྒལ་རངབཞིན་གྱིས་གཅོད་འབྲེག་དང་གཏེར་ཁ་སྔོག་འདོན་སོགས་བྱས་པས་སོ།དེའི་ཕྱིར་དོན་དག་འདིའི་འགོ་མཇུག་བར་གསུམ་ཐམས་ཅད་རྒྱ་ནག་གིས་འགན་ཁུར་དགོས་འདོད།
ལུས་ཀྱི་ཕྱག་མཆོད་ཁྱེད་ཀྱི་ཕྱོགས་སུ་བཏང༌།།
ངག་གི་མ་ཎི་ཁྱེད་ཀྱི་སྙན་ལ་འབུལ།།
སེམས་ཀྱི་བསྔོ་སྨོན་འདས་པོའི་རྣམ་ཤེས་གསོ།།
ང་ཡི་ཡོད་ཚད་ཁྱེད་ཀྱི་ཆེད་དུ་འབྱིན།།
གདུང་སེམས་མཉམ་སྐྱེད་ལུས་ཀྱི་དཀའ་སྡུག་སེལ།།
སྐྱིད་སྡུག་མཉམ་མྱོང་སེམས་ཀྱི་རྨ་ཁ་གསོ།།
བསྔོ་སྨོན་འཚམས་འཕྲིན་སེམས་ལ་སྤོབས་པ་འབྱིན།།
སྡུག་དུས་མཉམ་རོགས་དུས་ཀྱི་དགོས་མཁོ་ཡིན།།
ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་དུ་ཆུ་ལོག་གི་གནོད་འཚེ་བྱུང་སྟེ་མི་རྒྱུ་གཉིས་ཐད་ལ་གྱོང་གུན་ཚབས་ཆེན་ཕོག་པར་ཞེ་ཐག་པ་ནས་བློ་ཕམ་ཞུ་རྒྱུ་དང༌། ཤུལ་ལུས་ནང་མི་ཉེ་འབྲེལ་ལྟོས་བཅས་ལ་ཐུགས་གསོ་འཚམས་འདྲི། ལྷག་པར་དུས་མིན་རྐྱེན་འདས་སུ་སོང་བ་རྣམས་འཕགས་མཆོག་སྤྱན་རས་གཟིགས་ཀྱིས་རྗེས་སུ་བཟུང་སྟེ་དལ་རྟེན་རིམ་པར་བརྒྱུད་བླ་མེད་རྫོགས་བྱང་མྱུར་ཏུ་འཐོབ་པའི་བསྔོ་སྨོན་ཤུགས་དྲག་ཞུའོ།།