ང་ཚོའི་འོས་བསྡུ་ལས་འཕྲོས་པའི་སེམས་ཀྱི་ཁ་བརྡ། ཚྭ་རུ་མའི་ཐབས་མཁས།

སེམས་ཀྱི་ཁ་བརྡ་དང་པོ།

 མ་བརྟགས་མ་དཔྱད་པར་ཕྱི་ཚུལ་མངོན་སྟངས་འདི་ལ་གཞིགས་ན་ཧ་ཅང་དགའ་འོས་པ་དང་ཡང་དག་པའི་མང་གཙོའི་འགྲོ་ལུགས་ནང་མདུན་དུ་བསྐྱོད་པ་ལྟ་བུ་ཞིག་ཏུ་བརྩི་ཆོག་ན་ཡང༌།བརྟགས་ཤིང་དཔྱད་ན་ད་དུང་ཧ་ཅང་ཡིད་སྐྱོ་བ་དང་ཕྱོགས་སུ་ལྷུང་བའི་ལས་གཞི་སྤེལ་སྟངས་ཤིག་རེད་འདུག

     ཐེངས་འདིའི་འོས་བསྡུ་ནི་སྔོན་འགྲོ་དང་དངོས་གཞི་གང་ཡང་མིན་པའི་ཆ་ནས་ངས་འདི་ལྟར་རི་བོང་གནམ་རྡིབ་ཀྱི་སྐད་ཆ་བཤད་དགོས་དོན་མེད་པར་མཐོང་ཡང༌།ད་ལྟ་ཚོད་ལྟའི་སྐབས་ནས་གཟབ་ནན་མ་བྱས་ན་གཞུག་མར་སྔོན་འགྲོ་དང་དངོས་གཞིའི་འོས་བསྡུའི་སྐབས་ཀྱང་འདི་ལྟར་མི་ཡོང་བའི་ངེས་པ་གཏན་ནས་མེད་པར་སེམས།གལ་སྲིད་ང་ཚོས་འདེམས་བྱའི་འོས་མི་ཚོའི་ལོ་རྒྱུས་རྒྱབ་ལྗོངས་སོགས་ལ་ཞིབ་འཇུག་དང་རྒྱུས་ལོན་ཅི་ཡང་མེད་པར་འོས་བསྡུ་བྱས་ན།མཇུག་འབྲས་ཅི་ཡོང་ནི་སྔར་ལོར་ང་ཚོའི་རང་གཞུང་དཔལ་ལྡན་གྲོས་ཚོགས་ཀྱི་ཚོགས་རྭའི་ནང་གནས་ཚུལ་བྱུང་བ་ལྟ་བུ་རེད།དེ་ནི་གཙོ་བོ་ང་ཚོ་མི་མང་སྒེར་སོ་སོ་རང་ངོས་ནས་འགན་མ་ཁུར་པའི་མཇུག་འབྲས་ཤིག་ཡིན་པ་ངེས་པར་དུ་ཤེས་དགོས།

 མ་གཞི་མང་གཙོའི་གོ་རྟོགས་འཕེལ་རིམ་ནང་འདི་ལྟར་འོས་བསྡུ་སོགས་ལས་གཞི་ཁག་ཚད་ལྡན་མིན་པ་ནས་ཚད་ལྡན་དུ་འགྱུར་བར་གོམ་པ་རིམ་བགྲོད་ཀྱིས་ཡར་རྒྱས་དང་ཡང་དག་ཏུ་འགྲོ་བའི་གོམ་རིམ་ཞིག་ཡོད་ན་ཡང༌།ང་ཚོར་འདི་ལྟའི་དུས་ཚོད་སླེབས་རྒྱུར་སྒུག་ཁོམ་མེད་ཅིང་སྒུག་དགོས་ཀྱང་མེད།རྒྱུ་མཚན་ནི་ང་ཚོའི་འདས་པའི་ལོ་རྒྱུས་མདོ་སྟོད་སྨད་ལ་རྒྱ་དམག་གིས་དཔུང་འཇུག་བྱེད་ཀྱིན་ཡོད་ན་ཡང༌།ང་ཚོའི་རྒྱལ་ས་ལྷ་སའི་སྐུ་ངོ་སྐུ་དྲག་ཚོས་ད་དུང་སྤྲོ་སྐྱིད་ཀྱི་གླིང་ག་གཏོང་བཞིན་ཤོ་སྦག་རྒྱག་གིན་བསྡད་པའི་ངོས་བྱུང་ཉམས་མྱོང་དང༌།ད་ལྟ་ང་ཚོ་རང་བཙན་དང་རང་དབང་ནས་རང་སྐྱོང་དང་རྒྱ་ནག་གི་ཁྲིམས་འོག་བར་མར་བབས་ནས་སྡོད་རྒྱུར་ཁས་ལེན་བྱས་ཀྱང་རྒྱ་གཞུང་གིས་ངོས་ལེན་མེད་པ་དང༌།་རྒྱལ་སྤྱིའི་རྒྱབ་སྐྱོར་མཁན་ཚོ་ཡང་དཔལ་འབྱོར་དང་སྟོབས་ཤུགས་ཀྱི་དབང་སྒྱུར་འོག་ཚུད་ནས་ང་ཚོའི་བོད་ཀྱི་རྩ་དོན་ལྟ་བུའི་ཁེ་མེད་གྱོང་མེད་ཀྱི་གནད་དོན་རིགས་ཆུ་ནང་ལ་བཏང་བའི་རྟུག་དྲི་བཞིན་འགྱུར་བཞིན་ཡོད།

སེམས་ཀྱི་ཁ་བརྡ་གཉིས་པ།

     རྡ་ས་དང་ལྡི་ལིའི་བོད་གཞིས་ཀྱི་ཁྲོམ་སྲང་གི་རྩིག་ངོས་དག་ལ་ལྟོས་དང༌།ང་ཚོའི་མི་སྒེར་དང་ཚོགས་ཁག་རེ་རེས་རང་རང་གི་ལུང་ཚན་དང་འབྲེལ་ཡོད་ཀྱི་མི་སྣ་རེ་བཀའ་བློན་ཁྲི་པའི་འོས་མི་རུ་བདམས་ནས་ཁྱབ་བསྒྲགས་བྱེད་བཞིན་ཡོད།མ་གཞི་དེ་ལྟར་བྱེད་པ་ནི་མང་གཙོའི་ལམ་སྲོལ་དང་ཐོབ་ཐང་ཞིག་ཏུ་བརྩི་ཆོག་ན་ཡང༌།ང་ཚོར་དགོས་པའི་བཀའ་བློན་ཁྲི་པ་ནི་ལུང་ཚན་ཞིག་དང་ཆོལ་ཁ་ཞིག་གི་བཀའ་བློན་ཁྲི་པ་མིན་ཞིང༌།ང་ཚོར་དགོས་པའི་བཀའ་བློན་ཁྲི་པ་ནི་ཁྱིམ་ཚང་ཞིག་དང་ཚོགས་ཁག་ཅིག་གི་བཀའ་བློན་ཁྲི་པ་ཞིག་གཏན་ནས་མིན།ང་ཚོར་དགོས་པའི་བཀའ་བློན་ཁྲི་པ་ནི་ཆོལ་ཁ་དང་ཆོས་བརྒྱུད།ང་ཚོ་བོད་མི་མང་སྤྱི་ཡོངས་ཀྱི་ཚབ་མཚོན་དང་འགན་ཁུར་ནས་ང་ཚོའི་རྩ་དོན་ཐོག་འཕག་འཚག་རྒྱག་ཐུབ་མཁན་གྱི་ཤེས་འཇོན་གཉིས་ལྡན་གྱི་བཀའ་བློན་ཁྲི་པ་ཞིག་དགོས་པ་ལས་ང་ཚོའི་ཚོགས་པ་དང་ལུང་ཚན།ཆོལ་ཁ་རེ་རེར་བཀའ་བློན་ཁྲི་པ་རེར་འདེམས་བཞིན་མེད་པ་ཤེས་དགོས།

   རྒྱུ་མཚན་དེའི་ཕྱིར།ཁྱོད་རང་སྒེར་དང་ཚོགས་པ།ལུང་ཚན་དང་ཆོལ་ཁ་སུ་ཞིག་ཡིན་ཡང་ཁྱོད་དང་ཁྱོད་ཀྱི་ཚོགས་པ་དང་ལུང་ཚན།ཆོལ་ཁ་རུ་ང་ཚོ་བོད་སྤྱི་ཡོངས་ལ་སྣེ་ཁྲིད་བྱ་ཐུབ་མཁན་གྱི་བཀའ་བློན་ཁྲི་པ་ཞིག་མེད་ན།ཨུ་ཚུགས་ཀྱིས་ཁྱོད་དང་ཁྱོད་ཀྱི་ཚོགས་པ་དང་ལུང་ཚན།ཆོལ་ཁ་ནས་ངེས་པར་དུ་འདེམས་དགོས་གཏན་ནས་མེད་པར་ཚོགས་པ་དང་ཆོལ་ཁ་གཞན་དང་གཞན་དག་ཏུ་ཡོད་ན་ངེས་པར་དུ་འདེམས་དགོས།རྒྱུ་མཚན་ནི།ང་ཚོས་བོད་སྤྱི་ཡོངས་ཀྱི་དབུ་ཁྲིད་བཀའ་བློན་ཁྲི་པ་ཞིག་འདེམས་བཞིན་ཡོད་པ་ལས་ང་ཚོས་ཚོགས་པ་ཞིག་དང་ལུང་ཚན་ཞིགཆོལ་ཁ་ཞིག་གི་དབུ་ཁྲིད་ཀྱི་བཀའ་བློན་ཁྲི་པ་ཞིག་འདེམས་བཞིན་མེད།

   ང་ཚོ་བོད་པ་ཚོ་གནད་དོན་གལ་གནད་ཆེ་ཆུང་གང་གི་ཕྱོགས་ལ་ཡང་རྡོག་རྩ་ཆིག་སྒྲིལ་དང་ནང་ཁུལ་མཐུན་འབྲེལ་མེད་པས།ང་ཚོའི་འདས་པའི་ལོ་རྒྱུས་ནང་རང་གི་རྒྱལ་ཁབ་དང་ཕ་ཡུལ་གཞན་ལ་ཤོར་པ་རེད་ལ།འདས་པའི་མི་ལོ་ལྔ་བཅུའི་རིང་ང་ཚོའི་རྩ་དོན་ཐོག་དམིགས་བསལ་གྲུབ་འབྲས་མ་ཐོན་པ་དང་ཕྱོགས་མང་པོར་འཐུས་ཤོར་བྱུང་བ་རེད།

 རྒྱུ་མཚན་དེའི་ཕྱིར།ང་ཚོའི་རྒྱལ་ཁབ་དང་མི་རིགས་འཇིག་ཉེན་དང་ཡལ་ཉེན་ཆེ་བའི་དུས་སྐབས་ཛ་དྲག་ཅིག་དང༌།རྒྱ་ནག་གཞུང་དང་རྒྱལ་སྤྱི་སུས་ཀྱང་མཐུན་འབྲེལ་དང་རྒྱབ་སྐྱོར་མེད་པའི་དུས་ཚོད་འདིར་ད་དུང་ང་ཚོས་ང་ཚོའི་གནས་བབ་ངོ་མ་དང་མ་འོངས་ཅི་འབྱུང་ལ་བསམ་བློ་མི་གཏོང་བར་སྔར་སྲོལ་གྱི་ཆོལ་ཁ་དང་ཆོས་བརྒྱུད།ལུང་ཚན་དང་ཚོགས་ཁག་བར་ཕྱོགས་རིས་དང་མཐུན་སྒྲིལ་མེད་པའི་ལས་གཞི་སྤེལ་ནས་གཞུང་ལས་སྒེར་གཙོ་བོར་འཛིན་པའི་ལམ་ལུགས་འདི་ལྟར་ལག་བསྟར་བྱས་ན།ང་ཚོར་སང་ཉིན་གྱི་ཉི་མ་ཅི་ཞིག་འཆར་རྒྱུ་ཡིན་པ་ཧ་ཅང་གསལ་བོ་མ་རེད་དམ།

    དེས་ན་ང་ཚོ་ཚང་མས་བསམ་བློ་གསར་པ་ཞིག་དང་ལམ་སྲོལ་གསར་པ་ཞིག་བརྒྱུད་ནས་༧རྒྱལ་དབང་དོན་གྱི་བདག་པོ་ང་ཚོའི་དབུ་ཁྲིད་དུ་ཡོད་སྐབས་འདིར་ང་ཚོའི་སྤྱི་སྒེར་ཡོད་ཚད་ཀྱིས་མཐུན་སྒྲིལ་ངང་༧ཁོང་གི་དགོངས་གཞི་ལྟར་བོད་ཀྱི་འཕྲལ་ཕུགས་སྤྱི་སྒེར་ཡོངས་ལ་ཕན་པའི་མང་གཙོའི་ལམ་ལུགས་ཡང་དག་པ་ཞིག་ཏུ་བསྐྱོད་ཐུབ་པ་ངེས་པར་དུ་བྱ་དགོས།