རྒྱལ་སྤྱིའི་བོད་རིག་པའི་ཞིབ་འཇུག་པའི་ཚོགས་ཆེན་གྲོལ་བ།

རྒྱལ་སྤྱིའི་བོད་རིག་པའི་ཚོགས་ཆེན་ཐེངས་ ༡༢ པ་དེ་ཕྱི་ཚེས་ ༢༠ ཉིན་ཡོངས་སུ་གྲུབ་སོང་། ཉིན་ལྔའི་རིང་གི་ཚོགས་ཆེན་སྟེང་། བོད་ཕྱི་ནང་དང་རྒྱལ་སྤྱིའི་བོད་རིག་པའི་ཞིབ་འཇུག་པ་ ༤༠༠ ལྷག་གིས་ཉིན་རེར་རྩོམ་ཡིག་ ༨༠ ལྷག་རེ་སྒྲོག་སྦྱངས་གནང་བ་དང་། རྩོམ་ཡིག་གི་བརྗོད་གཞིའི་ཕྱོགས་ནས་ཀྱང་གནའ་བོའི་བོད་ཀྱི་ཆོས་སྲིད་དང་དཔལ་འབྱོར། སྤྱི་ཚོགས། རིག་གནས། སློབ་གསོ། སྐད་ཡིག་སོགས་སྣ་ཁ་འདྲ་མིན་ནས་ད་ལྟའི་བོད་ཀྱི་ཆབ་སྲིད་དང་རིག་གཞུང་གི་གནས་བབ་དང་གནད་དོན་སོགས་ཀྱི་བར་གླེང་བ་ཡོད་པ་རེད།

ཐེངས་འདིའི་ཚོགས་ཆེན་སྟེང་བོད་ནང་ནས་མཁས་དབང་རྒན་པ་ནོར་ཕྲེང་ཨོ་རྒྱན་ལགས་དང་། རྒྱལ་མོ་འབྲུག་པ་གཉིས་ཀྱིས་གཙོས་པའི་མི་གྲངས་ ༤༠ ལྷག་ཅིག་དང་། རྒྱ་གར་ནས་མཁས་དབང་བཀྲ་ཤིས་ཚེ་རིང་ལགས་ཀྱིས་གཙོས་པའི་མི་ ༡༠ གྲངས་ཤིག ཡུ་རོབ་ནས་མཁས་དབང་མཁར་རྨེ་བསམ་གཏན་ལགས་ཀྱིས་གཙོས་པའི་བོད་དང་ཕྱི་གླིང་བའི་བོད་རིག་པ་རྣམས། བྱང་ཨ་རིའི་ཁུལ་ནས་མཁས་དབང་པདྨ་འབུམ་གྱིས་གཙོས་པའི་ཕྱི་སྡོད་བོད་རིགས་ཤེས་ཡོན་པ་བཅས་ཕེབས་ཡོད་ལ། ཕྱི་གླིང་བའི་ནང་དུ་ཡང་ལོ་ངོ་ ༣༠ ནས་ ༤༠ བར་བོད་རིག་པའི་ཉམས་ཞིབ་གནང་མཁན་མང་པོ་ཞིག་ཕེབས་འདུག་ལ། ལྷག་པར་དུ། མཁས་པ་དང་ཉམས་ཞིབ་པ་དག་གིས་སྐྱེད་སྲིང་བྱས་པའི་ཞིབ་འཇུག་པའི་དཔུང་ཁག་གསར་པ་ཞིག་བསླེབས་ཡོད་ལ། འདི་དག་གིས་བོད་རིག་པའི་ཞིབ་འཇུག་གི་ལས་དོན་འདི་སྔར་ལས་ཀྱང་རྒྱལ་སྤྱི་རང་བཞིན་དང་། བོད་རིག་པའི་ངོ་བོ་ལྡན་པ། ཧ་ཅང་འཐུས་ཚང་གི་རྣམ་པ་ཞིག་ལ་གོང་སྤེལ་བྱེད་གྱིན་པའི་རྣམ་པ་དེ་མཚོན་ཡོད། བོད་རིག་པའི་ཞིབ་འཇུག་པ་འདི་དག་གི་བརྒྱ་ཆའི་བརྒྱད་ཅུ་ཙམ་ནི་བོད་ཕྱི་ནང་དང་རྒྱལ་སྤྱིའི་སྟེང་གི་གཙུག་ལག་སློབ་གྲྭ་ཆེན་མོ་དག་ནང་གི་མཁས་དབང་དང་། དེ་དག་གིས་རྗེས་སུ་བཟུང་བའི་ཞིབ་འཇུག་པའི་སློབ་མ་རྣམས་ཡིན།

འདིའི་ཐད་བོད་ནང་ནས་ཕེབས་མཁན་ཞིག་གིས་གསུངས་དོན། བོད་རིག་པའི་ཞིབ་འཇུག་པ་རྣམས་ལ་ཐུན་མོང་གི་ཁྱད་ཆོས་ཤིག་ཡོད་པ་ནི། ཚང་མ་བོད་དང་བོད་ཀྱི་རིག་གནས་ལ་དང་བ་ཡོད་མཁན་ཙམ་མིན་པར། ཁོང་ཚོའི་འབྲེལ་བའི་ཆ་ནས་ཀྱང་ཆོས་གྲོགས་སམ་ཡང་ན། དགེ་སློབ་ཀྱི་འབྲེལ་བ་ཡོད་མཁན་རྐྱང་ཡིན་སྟབས། ཕན་ཚུན་དམ་ཚིག་གཙང་བའི་ཁར་ལས་དོན་འདིའི་ཐད་ལ་རྡོར་རྩ་གཅིག་སྒྲིལ་རང་བཞིན་གྱིས་ཡར་རྒྱས་གཏོང་བར་དགེ་ཕན་ཆེ་བ་འདུག་ཟེར།

ཡང་བོད་རིགས་མཁས་དབང་ཞིག་གིས་ཐེངས་འདིའི་ཚོགས་ཆེན་སྟེང་གི་ཞིབ་འཇུག་པ་དག་གི་སྤུས་ཚད་ཐད་གསུངས་དོན། འདས་པའི་ལོ་ ༣༠ རིང་བོད་རིག་པའི་ཞིབ་འཇུག་དང་ལས་དོན་འདི་བོད་ཀྱི་ཆོས་རིག་ལ་དོ་སྣང་ཡོད་མཁན་ནུབ་ཕྱོགས་ཀྱི་མི་སྣ་མང་པོ་ཞིག་གིས་ཧུར་ཐག་གིས་གོང་སྤེལ་བྱས་ཡོད་ལ། ད་ནི་བོད་པ་ཚོའི་ནང་དུའང་སྔར་དང་མི་འདྲ་བའི་ཞིབ་འཇུག་པའི་མི་རབས་གསར་པ་ཞིག་སླེབ་ཡོང་གི་འདུག་ལ། བོད་རིགས་གཞོན་སྐྱེས་འདི་དག་གི་ཞིབ་འཇུག་གི་རྣམ་གྲངས་དང་། ཐབས་ལམ། རྒྱུ་སྤུས་བཅས་ཀྱི་ཐད་ནས་ཧ་ཅང་ཡིད་འགུལ་ཐེབས་པ་ཞིག་འདུག མ་འོངས་པར་བོད་མི་རིགས་རང་གི་ནང་དུ་ཞིབ་འཇུག་གི་ལས་དོན་འདི་ཚུགས་རང་བཞིན་ཞིག་ཏུ་འགྱུར་རྒྱུའི་རེ་བ་ཆེན་པོ་འདུག་ཟེར།

ཕྱི་ཚེས་ ༢༠ ཉིན་རྒྱལ་སྤྱིའི་བོད་རིག་པའི་ཚོགས་པ་འདིའི་ཚོགས་གཙོ་དང་རྒྱུན་ལས་རྣམས་འོས་འདེམ་བྱས་པ་དང་། དེ་བཞིན་དུ་ཐེངས་རྗེས་མར་རྒྱལ་སྤྱིའི་བོད་རིག་པའི་ཚོགས་ཆེན་ཐེངས་ ༡༣ པ་དེ་འཚོགས་ཡུལ་བཅས་ལ་གོ་བསྡུར་བྱས་ཡོད། རྒྱལ་སྤྱིའི་བོད་རིག་པའི་ཚོགས་པ་འདིའི་ཚོགས་གཙོ་ནི་ཨོ་ཁུ་སི་ཧྥོར་ཌི་ནས་ཡིན་པའི་ཌོག་ཊར་ ཆར་ལི་སི་ རམ་བྷར་ལགས་རང་འཇགས་བདམས་ཡོད། རྒྱུན་ལས་བཅུ་གསུམ་ཡོད་པའི་གྲས་སུ་དགེ་རྒན་ཆེན་མོ་ཚེ་རིང་ཤཱཀྱ་ལགས་དང་བློ་བཟང་ཤསྟྲི། དགེ་རྒན་ཆེན་མོ་ཚེ་རིང་ཐར་བཅས་ཀྱང་ཚུད་ཡོད་པ་རེད།

ཕྱི་ཚེས་ ༡༩ དགོང་མོ་ཝན་ཁོ་ཝར་དུ་བཞུགས་པའི་དགའ་ལྡན་ཀླུ་འབུམ་མཚན་སྒྲོགས་རིན་པོ་ཆེ་མཆོག་དང་སྦི་སི་ས་གནས་བོད་མིའི་རིག་གཞུང་ཚོགས་པ་གཉིས་ཀྱིས་བོད་ཕྱི་ནང་ནས་ཕེབས་པའི་བོད་རིགས་རྣམས་མཚན་སྒྲོགས་དགོན་པར་གདན་འབོད་ཀྱིས་ཞལ་ལག་ཕུལ་ཡོད་པ་དང་། བོད་ཕྱི་ནང་གི་བོད་རིགས་རྣམས་ཀྱིས་མཚན་སྒྲོགས་དགོན་པ་ནས་གུ་ཡངས་པོ་དང་བརྩེ་སེམས་འཁོལ་བའི་སྒོ་ནས་གླེང་མོལ་དང་ཞལ་ལག་མཉམ་བཞེས་གནང་ཡོད་པ་རེད། མཚན་སྒྲོགས་རིན་པོ་ཆེ་མཆོག་གིས་གསུངས་དོན། ཐེངས་འདིར་བོད་ཕྱི་ནང་གི་བོད་རིགས་མཁས་པ་མང་པོ་ཞིག་འདིར་ཕེབས་ཏེ་ཕན་ཚུན་ངོ་ཤེས་དང་དགོངས་ཚུལ་བརྗེ་རེས་བྱས་པ་དང་། ལྷག་དོན་དུ་མཁས་པ་རྒན་གཞོན་མང་པོ་ཞིག་གིས་བོད་ཀྱི་ཆོས་རིག་སོགས་ཀྱི་ཐད་ལག་རྗེས་བཞག་དང་འཇོག་བཞིན་པ་ནི་ཧ་ཅང་དགའ་འོས་པ་ཞིག་རེད་ལ། ཁོང་ཚོ་ད་ལོར་ཝན་ཁོ་ཝར་དུ་ཕེབས་པ་དང་། དེ་ཡང་རང་ཉིད་ཀྱི་དགོན་པའི་ནང་དུ་ཕེབས་པ་དེར་ཧ་ཅང་དགའ་བོ་བྱུང་ཞེས་གསུངས།

ཚོགས་ཆེན་གྱི་ཉིན་དང་པོར། རྒྱལ་སྤྱིའི་བོད་རིག་པའི་ཚོགས་པའི་ཚོགས་གཙོ་ཌོག་ཊར་ ཆར་ལི་སི་ རམ་བྷར་ལགས་ཀྱིས། བོད་རིག་པའི་ཞིབ་འཇུག་གི་གྲུབ་དོན་འདི་དག་སྡེ་ཚན་འདི་ཙམ་མ་ཡིན་པར། སྤྱི་ཚོགས་རིམ་པ་དང་། རྒྱལ་ཁབ་རིམ་པའི་སྲིད་གཞུང་གི་བར་དུ་ཁྱབ་ཐུབ་པའི་རེ་བ་ཡོད་སྐོར་ཞུས་ལ། དེ་བཞིན་དུ་ཐེངས་འདིར་བོད་ནང་དང་། རྒྱ་བལ་འབྲུག་གསུམ་ནས་བོད་རིགས་མང་པོ་ཞིག་ལ་ཐོངས་མཆན་མ་རག་པ་དང་། ད་ལོར་འབྲེལ་ཡོད་རྒྱལ་ཁབ་ཀྱིས་བོད་རིག་ཞིབ་འཇུག་པ་རྣམས་ལ་དམིགས་བསལ་གྱི་དམ་དྲག་བྱས་འདུག་ལ། ཁོང་ཚོ་ཐེངས་འདིར་ཚོགས་ཞུགས་བྱེད་མ་ཐུབ་པ་དེར་ཧ་ཅང་བློ་འགྱོད་ཡོད་ཅེས་གསུངས།

ཐེངས་རྗེས་མའི་ཚོགས་ཆེན་དེ་ ༢༠༡༣ ལོར་ཐའེ་ལན་ཌི་དང་། ཝེར་རྗི་ནེ་ཡ། སིན་གྷ་པོར། སུད་སི་བཅས་ིཡིན་ལ། གལ་སྲིད་དེ་ལྟར་མ་བྱུང་བ་ཡིན་ན། ཧོ་ལན་ཌིའི་མཚོ་ཐོག་ནས་འཚོགས་རྒྱུའི་གྲོས་བསྡུར་བྱས་ཡོད་པ་རེད།

གསར་འགྱུར་སྤེལ་མཁན། ལུང་རིགས་རྒྱལ།