དངོས་པོའི་རིན་ཐང་ནི་ཕན་ཐོགས་ཆེན་པོ་ཞིག་ཡིན་པར་མ་ཟད། དེ་ནི་ང་ཚོར་ངེས་པར་དུ་དགོས་ངེས་ཞིག་ཡིན་ནའང་། དངོས་པོའི་མཐུན་རྐྱེན་དེས་སེམས་ལ་ཞི་བདེ་བསྐྲུན་ཐུབ་ཀྱི་མེད་ཅེས་༧གོང་ས་མཆོག་གིས་སང་གྷ་ཕོར་དང་མ་ལེ་ཤི་ཡ་ནས་ཕེབས་པའི་རྒྱ་རིགས་ཆོས་ཞུ་བར་གསུངས་ཡོད།
དེ་རིང་ཞོགས་པའི་ཆུ་ཚོད་ ༩ པའི་སྟེང་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། སང་གྷ་ཕོར་དང་མ་ལེ་ཤི་ཡ། ཧོང་ཀོང་སོགས་ཀྱི་རྒྱ་རིགས་དད་ལྡན་མང་ཚོགས་ཀྱིས་ཇི་ལྟར་གསོལ་འདེབས་ཞུས་པ་བཞིན་༧གོང་ས་མཆོག་གིས་རྒྱ་རིགས་ནང་པ་གཙོས་ཝེ་ཐི་ནམ་དང་ཀོ་རི་ཡ། ཉི་ཧོང་། དེ་བཞིན་འཛམ་གླིང་ཕྱོགས་མཐའ་ཁག་ནས་ཕེབས་པའི་ཕྱི་རྒྱལ་མི་རིགས་དང་བཞུགས་སྒར་ཁུལ་གྱི་བོད་མི་མང་ཚོགས་བཅས་ལ་ཉིན་གསུམ་རིང་ཤེས་རབ་སྙིང་པོ་དང་རྒྱལ་སྲས་ལག་ལེན་སོ་བདུན་མའི་འཆད་ཁྲིད་དབུ་འཛུགས་གནང་ཡོད་པ་དང་། གསུང་ཆོས་དབུ་འཛུགས་མ་གནང་གོང་༧གོང་ས་མཆོག་གིས་གསུངས་དོན། ངོས་ཀྱིས་དེ་རིང་འདིར་ཕེབས་པའི་མང་ཚོགས་ཁྲོད་ཀྱི་ཆོས་ཞུ་བ་ཕལ་ཆེ་བ་ནང་པ་ཡིན་པ་ཤེས་ཀྱི་ཡོད་ལ། དེ་བཞིན་ཡི་ཤུ་དང་ཧིན་ངྷི་བ་གང་འཚམ་ཞིག་དང་། ཁ་ཆེ་རེ་ཟུང་དང་ཆོས་དད་མེད་མཁན་ཁག་ཅིག་ཀྱང་ཕེབས་ཡོད་པ་རེད། ང་རང་ལ་མཚོན་ན་མང་ཚོགས་དེ་འདྲའི་རིགས་ལ་ཤིན་ཏུ་དགའ་བོ་ཡོད། ངོས་ཀྱིས་བསམས་ན་འཛམ་གླིང་འདིར་མི་གྲངས་དུང་ཕྱུར་ ༦༠ ལྷག་ཡོད་པ་ཚང་མས་བདེ་བ་འདོད་ཀྱི་ཡོད་པ་རེད། ནང་ཆོས་ཉམས་ལེན་པ་ཞིག་ལ་མཚོན་ན། ཉིན་རྟག་པར་འགྲོ་བ་སེམས་ཅན་ཐམས་ཅད་ཀྱི་བདེ་སྐྱིད་དོན་དུ་གསོལ་བ་སྨོན་ལམ་འདེབས་ཀྱིན་ཡོད། འཛམ་གླིང་གཞན་པའི་སྟེང་ཡོད་པའི་སེམས་ཅད་ཚོར་ང་ཚོས་ཐད་ཀར་དུ་འབྲེལ་བ་བྱ་ཐུབ་ཀྱི་མེད་ཀྱང་འཛམ་གླིང་འདིའི་དབང་དུ་བྱས་ན་ཕན་ཚུན་བར་འབྲེལ་བ་གང་འཚམ་བྱ་ཐུབ་ཀྱི་ཡོད། དེའི་སྟབས་ཀྱིས་མི་རེ་ངོ་རེའི་མ་འོངས་པ་དེ་མི་གྲངས་དུང་ཕྱུར་ ༦༠ ལྷག་གི་བདེ་སྡུག་ལ་བརྟེན་ཡོད་པ་ཞིག་ཡིན་ཞེས་གསུངས།
ཡང་ཁོང་གིས་དངོས་པོའི་རིན་ཐང་གིས་མིའི་སེམས་ལ་ཞི་བདེ་ངོ་མ་ཞིག་བསྐྲུན་ཐབས་མེད་པའི་སྐོར་ལ་གསུངས་དོན། ངོས་རང་གང་དུ་སོང་ནས་ཅི་ཞིག་བཤད་ཀྱང་། ཐོག་མར་རང་ཉིད་ནི་འཛམ་གླིང་འདིའི་མི་གྲངས་དུང་ཕྱུར་ ༦༠ ལྷག་ཡོད་པའི་ནང་གི་མི་གཅིག་ཡིན་ཞེས་བཤད་ཀྱིན་ཡོད། འཛམ་གླིང་ཐོག་ཡོད་པའི་འགྲོ་བ་མིའི་རིགས་ཚང་མ་ལུས་པོའི་གྲུབ་སྟངས་དང་སེམས་ཀྱི་རྣམ་གཞགཚོར་བའི་བདེ་སྡུག་བཅས་ཚང་མ་གཅིག་མཚུངས་ཡིན། མི་ཚང་མས་ཞི་བདེའི་ངང་མི་ཚེ་ཞིག་འདོད་ཀྱི་ཡོད་ལ། བདེ་སྐྱིད་ཀྱི་མི་ཚེ་ཞིག་འཐོབ་ན་བསམ་གྱི་ཡོད། མི་སུ་གཅིག་གིས་ཀྱང་སྡུག་བསྔལ་འདོད་ཀྱི་མེད། དེའི་སྟབས་ཀྱིས་ང་ཚོ་མི་ཚང་མར་བདེ་སྐྱིད་ལྡན་པའི་མི་ཚེ་ཞིག་འཐོབ་རྒྱུའི་ཐོབ་ཐང་ཡོད།ནམ་རྒྱུན་མི་མང་གིས་དོན་དམ་གྱི་བདེ་སྐྱིད་ཅིག་འཐོབ་ཐབས་སུ་དངོས་པོའི་རིན་ཐང་གལ་ཆེར་བརྩིས་ཏེ། བདེ་སྐྱིད་ནི་དངོས་པོའི་རིན་ཐང་ཁོ་ན་ལས་ཡོང་བར་འབད་བརྩོན་བྱེད་ཀྱིན་ཡོད། མ་གཞི་དངོས་པོའི་རིན་ཐང་དེ་ཕན་ཐོགས་ཆེན་པོ་ཞིག་ཡིན་པར་མ་ཟད། དེ་ནི་ང་ཚོར་ངེས་པར་དུ་དགོས་ངེས་ཞིག་ཡིན་ནའང་། དངོས་པོའི་མཐུན་རྐྱེན་དེས་སེམས་ལ་ཞི་བདེ་བསྐྲུན་ཐུབ་ཀྱི་མེད་ལ། ངས་བསམ་ན་རིགས་ཁ་ཤས་ལ་དེ་འདྲའི་ཉམས་མྱོང་བྱུང་ཡོད། མི་ཚེ་དོན་དང་ལྡན་པ་ཞིག་ཡོང་བར་དངུལ་མང་བོ་དགོས་པ་དང་། དངུལ་མང་དུ་ཕྱིན་ན་ཕྲག་དོག་ཆེ་རུ་འགྲོ་བ་དང་། དོགས་པའང་ཆེ་རུ་འགྲོ་གི་རེད།དེར་བརྟེན་དངོས་པོའི་རིན་ཐང་དེས་སེམས་མི་སྐྱིད་པ་དང་གནོན་ཤུགས་སོགས་སླེབས་ཡོང་གི་ཡོད།
དེ་བཞིན་ཞི་བདེ་ངོ་མ་དེ་སེམས་ཀྱི་རིན་ཐང་ཡར་རྒྱས་ལས་འབྱུང་དགོས་པའི་ཐད་གསུངས་དོན། ནང་སེམས་ཀྱི་རིན་ཐང་དེར་ཆོས་དད་ཡོད་མེད་གང་ལྟར་ཡང་ངེས་པར་དུ་དོ་སྣང་སྤྲོད་དགོས་ངེས་ཤིག་ཡིན། ད་ལྟ་ཚན་རིག་པས་ཀྱང་སེམས་ལ་ཞི་བདེ་ཞིག་ཡོང་བར་ལུས་སེམས་གཉིས་ཀྱི་བདེ་ཐང་དེ་ཧ་ཅང་གལ་ཆེན་པོ་རེད་ཅེས་བརྗོད་ཀྱིན་ཡོད། གང་ཡིན་ཟེར་ན། ང་ཚོའི་སེམས་དེ་ཞི་བདེ་བག་ཕེབས་པ་ཞིག་ཡིན་ཚེ། ལུས་པོའི་འབྱུང་བ་དེའང་ཏག་ཏག་ཅིག་སྡོད་ཐུབ་ཀྱི་ཡོད། ལུས་པོར་གནོན་ཤུགས་དང་སེམས་ཁྲལ་ཆེ་བ་ཡོད་ན།ལུས་པའི་འབྱུང་བར་གནོད་སྐྱེལ་གྱི་ཡོད། དེར་བརྟེན་སེམས་ཀྱི་ཞི་བདེ་དེ་ཧ་ཅང་གལ་ཆེན་པོ་རེད། གཞི་རྩའི་ང་ཚོའི་སེམས་ཀྱི་གནས་སྟངས་ཞི་བདེར་གནས་ཡོད་པ་ཞིག་ཡིན་ན། རྙོག་དྲའི་རིགས་ཡོང་གིན་ཡོད་ནའང་། སེམས་སུ་རྒྱུན་རིང་པོར་ལྷག་གི་མ་རེད་ལ།ཡོང་གིན་ཡོང་གིན་འགྲོ་བསྡད་ཀྱི་རེད། སེམས་ནང་དུ་གཞི་རྩ་བརྟན་པོ་ཞིག་ཡོད་དུས་གནོན་ཤུགས་དང་ཕྲག་དོག་བཅས་སླེབས་ཀྱིན་ཡོད་ནའང་དེ་ཙམ་ཤུགས་རྐྱེན་སྤྲོད་ཐུབ་ཀྱི་མེད་ཅེས་དང་།
ཡང་ཁོང་གིས་མུ་མཐུད་གསུངས་དོན། ང་ཚོས་འགྲོ་བ་མིའི་གནས་སྟངས་ཐོག་སྐད་ཆ་བཤད་ཀྱི་ཡོད་པ་གཏོགས། སྐྱེ་བ་ཕྱི་མའི་སྐོར་ལ་བཤད་ཀྱི་མེད་ལ་ལྷའི་གོ་འཕང་དང་དམྱལ་བ་སོགས་ཀྱི་ཆེད་དུའང་བཤད་ཀྱི་མེད། ང་ཚོས་རང་གི་མི་ཚེ་དང་ཁྱིམ་ཚང་། སྤྱི་ཚོགས། དེ་བརྒྱུད་ནས་འཛམ་གླིང་ནང་བདེ་སྐྱིད་ཇི་ལྟར་བསྐྲུན་ཐབས་སྐོར་ལ་སྐད་ཆ་བཤད་ཀྱིན་ཡོད་ཅེས་དང་། བོད་ཀྱི་ནང་ཆོས་ལ་ཆོས་ལུགས་གཞན་ལས་དམིགས་བསལ་ཁྱད་ཆོས་ལྡན་ཡོད་པའི་ཐད་ལ་ཁོང་གིས་གསུངས་དོན། ངོས་རང་ལ་ཆ་མཚོན་ན་ནང་པའི་དགེ་སློང་ཞིག་ཡིན་ལ་འདིར་རྒྱ་ནག་གི་ནང་པའི་ཆོས་ལུགས་ཀྱི་རྗེས་འཇུག་པ་མང་པོ་ཞིག་སླེབས་འདུག རྒྱ་ནག་ལ་ནང་ཆོས་དར་ནས་ལོ་སུམ་བརྒྱ་བཞི་བརྒྱ་ཙམ་གྱི་རྗེས་སུ་གཞི་ནས་རྒྱ་གར་ནས་བོད་ལ་ནང་ཆོས་དར་བ་རེད། དེར་བརྟེན་ང་རང་ཚོ་དགེ་ཕྲུག་གཞོན་པ་དང་ཁྱེད་ཚོ་དགེ་ཕྲུག་རྒན་པ་ཆགས་ཡོད་མོད། ཤེས་ཡོན་གྱི་ཆ་ནས་དགེ་ཕྲུག་གཞོན་པ་སྐྱོ་བ་རང་མེད། བོད་པའི་སྤྱི་ཚོགས་ནང་མི་ལོ་ ༣༠ རིང་ནང་ཆོས་ལ་སློབ་སྦྱོང་བྱེད་མཁན་ཡོང་གི་ཡོད་ལ། སློབ་སྦྱོང་གི་ཐབས་ལམ་དེ་བགྲོ་གླེང་གི་རྣམ་པའི་ཐོག་ནས་འགྲོ་དགོས་དུས་དགོངས་དོན་མཐིལ་ཕྱིན་པར་རྟོགས་རྒྱུར་ཕན་ཐོགས་ཆེན་པོ་ཡོད། ང་རང་ལ་མཚོན་ནའང་། ངའི་ཤེས་ཡོན་དེ་བོད་ཀྱི་བླ་མ་དགེ་བཤེས་མཐོ་གྲས་ཚོ་དང་བསྡུར་ན་ད་དུང་ཚད་གཞི་དམའ་བོ་རེད། ངོས་ནས་རང་ལོ་ ༣༠ རིང་བོད་ཀྱི་སྐད་ཡིག་གི་མཚོན་དཔལ་ལཎྡྲའི་མཁས་པའི་རྩེ་ཕུད་མགོན་པོ་ཀླུ་སྒྲུབ་ཀྱི་གཞུང་སོགས་ལ་སློབ་སྦྱོང་བྱས་པ་ཡིན། མི་ལོ་ ༥༡ ཙམ་གྱི་རིང་མི་འདྲ་མིན་སྣ་ཚོགས་ལ་ཐུག་འཕྲད་དང་། ལྷག་པར་དུ་འཛམ་གླིང་ནང་པའི་རྒྱལ་ཁབ་ཁག་ཏུ་ཕྱིན་ཏེ་ནང་པའི་སྤུན་ཟླ་རྣམས་དང་ཉམས་མྱོང་བརྗེ་རེས་བྱས་ཡོང་དུས་བོད་ཀྱི་ནང་པའི་ཆོས་དེ་ཡག་པོ་ཞིག་ཤེས་ཐུབ་ཀྱི་འདུག་ལ། གཞུང་འགྲེལ་བཤད་རྒྱག་རྒྱུར་རྒྱ་ཡིག་དང་པ་ལིའི་སྐད་ཡིག་གི་འདང་གི་མེད་པ་དེའང་ཤེས་ཐུབ་ཀྱི་འདུག་ཅེས་གསུངས་སོང་།གསར་འགོད་པ། དཔལ་ལྡན། པར་བ། ཨ་རིག་འགྱུར་མེད།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
གསར་འགོད་པ་དཔལ་ལྡན་ལགས།
བཟོ་བཅོས་གནང་པར་བསམ་པ་ཐག་པས་ཐུགས་རྗེ་ཆེ་ཞུ་རྒྱུ་ཡིན། གང་ཡིན་ཞེས་ན་༸གོང་ས་མཆོག་གི་བཀའ་སློབ་ལ་དོ་སྣང་དང་ཡིད་ཆེས་བྱེད་མཁན་མི་རིགས་མང་དག་ཅིག་ཡོད་སྟབས་ཧ་ཅང་གི་གལ་ཆེན་པོ་ཞིག་ཏུ་མཐོང་གི་འདུག
ཀློག་པ་པོ་ཤེལ་དཀར་བློ་བཟང་ལགས་ཀྱིས་བསམ་ཚུལ་གསུངས་བར་ཐུགས་རྗེ་ཆེ་ཞུ་རྒྱུ་ཡིན། ཁ་སང་༧གོང་ས་མཆོག་གིས་བཀའ་ཆོས་དབྱིན་སྐད་ནང་གསུངས་བ་ཡིན་སྟབས། གོ་ནོར་ཅུང་ཐེབས་ཡོད་འདུག ང་རང་གིས་དབྱིན་སྐད་ཀྱི་ ༡༣ དང་ ༣༠ གཉིས་ཀྱི་སྒྲ་དབྱེ་འབྱེད་མ་ཐུབ་པའི་དབང་གིས་གོ་ནོར་ཐེབས་པ་རེད། གུས་པས་ཡང་བསྐྱར་ཁོང་གི་གསུང་ལ་ཞིབ་ཏུ་ཉན་རྗེས་འདི་ལྟར་ཡིན་པ་རེད། ངོས་ནས་མི་ལོ་ ༣༠ རིང་བོད་ཀྱི་སྐད་ཡིག་གི་མཚོན་པའི་ནང་པའི་ལྟ་གྲུབ་ཐོག་སློབ་སྦྱོང་བྱས་པ་ཡིན་ཞེས་གསུངས་འདུག གཞན་དེ་ཡང་རིགས་ལམ་རྟགས་བསལ་གྱི་ལམ་ནས་འགྲོ་དགོས་དུས་ཕན་ཐོགས་ཆེན་པོ་འདུག་ཅེས་གསུངས། གསར་འགོད་པ་དཔལ་ལྡན་གྱིས་གུས་ཕུལ། ཐུགས་རྗེ་ཆེ།
བཀའ་སློབ་འདི་དག་ཐོག་མར་༸གོང་ས་མཆོག་གིས་དབྱིན་སྐད་ཐོག་གསུངས་པ་གསར་འགོད་པས་དོན་བསྒྱུར་བྱས་པ་ཞིག་རེད་འདུག་ལ་ཚིག་སྦྱོར་སོགས་གང་ཅིའི་ཐོག་ནས་ཧ་ཅང་ཡག་པོ་འདུག། ཐུགས་རྗེ་ཆེ། འོན་ཀྱང་།
༼ངོས་ནས་རང་ལོ་ ༡༣ ནས་མགོ་འཛུགས་ཏེ་བོད་ཀྱི་སྐད་ཡིག་གི་མཚོན་ནང་པའི་ལྟ་གྲུབ་ཐོག་མར་སྦྱངས་པ་ཡིན་༽ ཞེས་པ་ཡིན་གྱི་མ་རེད་སྙམ། གང་ཡིན་ཞེས་ན་༸གོང་ས་མཆོག་སྐུ་གཞོན་ནུ་ཕལ་ཆེར་དགུང་ལོ་བཞི་ཙམ་ནས་གསན་བསམ་སློབ་གཉེར་གནང་པ་གོ་ཐོས་བྱུང་། རིག་པས་སྤྱད་ནའང་དགུང་ལོ་ཉི་ཤུའི་ནང་ལྷ་རམས་དགེ་བཤེས་དམ་བཅའ་འཇོག་གནང་མཛད་པས་དུས་ཡུན་ཐུང་ཐུང་འདི་འདྲ་ཞིག་ལ་དགེ་བཤེས་ལྷ་རམ་ཆགས་རྒྱུ་ཧ་ཅང་དཀའ་མོ་རེད། ཞིབ་ཕྲ་༸གོང་ས་མཆོག་གིས་མཛད་རྣམ་ངོས་ཀྱི་ཡུལ་དང་ངོས་ཀྱི་མི་མང་ཞེས་པར་གཟིགས་ན་མཁྱེན་ངེས་རེད།
ཁོ་བོའི་གོ་ཚོད་བྱས་ན་ལོ་༡༣ རིང་བོད་ཀྱི་སྐད་ཡིག་གི་མཚོན་ནང་པའི་ལྟ་གྲུབ་ཁག་སྦྱངས་པ་ཡིན་ཞེས་གསུངས་སོ།
༼སློབ་སྦྱོང་གི་ཐབས་ལམ་དེ་བགྲོ་གླེང་གི་རྣམ་པའི་ཐོག་ནས་འགྲོ་དགོས་དུས་དགོངས་དོན་མཐིལ་ཕྱིན་པར་རྟོགས་རྒྱུར་ཕན་ཐོགས་ཆེན་པོ་ཡོད།༽ ངས་གོ་ཚུལ་ནི་རིགས་ལམ་རྟགས་གསལ་ཐོག་ནས་འགྲོ་དགོས་དུས་དགོངས་དོན་མཐིལ་ཕྱིན་པ་རྟོགས་རྒྱུར་ཕན་ཐོགས་ཆེན་པོ་ཡོད་ཅེས་གོ་ཐོས་བྱུང་།
གངས་རི་ཨ་མའི་ཕངས་དུ་བཞད་པའི།
གངས་ལྷ་སྒེག་མོའི་ལང་ཚོ་ཅན།
གང་སྐུ་མཛེས་པའི་འོད་སྣང་རེ་ཡང་།
འགྲོ་བའི་དཔལ་དུ་རྟག་བརྟན་སྨོན།