ཉིན་འགའི་སྔོན་ལ་རྒྱ་ནག་དབུས་མི་དམངས་དཔེ་སྐྲུན་ཁང་གིས་ ༼ ཀྲུང་གོའི་སྲིད་གཞུང་གི་བོད་ཀྱི་རྒྱབ་ཤ་དཀར་པོའི་དེབ་ཕྱོགས་བསྒྲིགས ༽ ཞེས་པ་དེ་དཔར་འགྲེམས་བྱས་ཡོད་ཅིང་། དཔེ་དེབ་ཕྱོགས་བསྒྲིགས་དེ་ནི་རྒྱ་ནག་གི་ཕྱི་ཕྱོགས་དྲིལ་བསྒྲགས་གཞུང་ལས་ཁང་དང་། རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གཉིས་ཐུན་མོང་ཐོག་རྩོམ་སྒྲིག་བྱས་པ་ཞིག་ཡིན་འདུག ཐེངས་འདིའི་རྒྱབ་ཤ་དཀར་པོའི་དཔེ་དེབ་ཕྱོགས་བསྒྲིགས་དེའི་ནང་། ཕྱི་ལོ་ ༡༩༩༢ ལོ་ནས་ད་ལྟའི་བར་རྒྱ་ནག་གཞུང་ཕྱོགས་ནས་བོད་དོན་སྐོར་གྱི་རྒྱབ་ཤ་དཀར་པོའི་དེབ་ ༨ དང་། མི་རིགས་དང་ཆོས་ལུགས་གནད་དོན་སྐོར་གྱི་རྒྱབ་ཤ་དཀར་པོའི་དེབ་ ༣ བཅས་ཁྱོན་བོད་དོན་དང་འབྲེལ་བའི་རྒྱབ་ཤ་དཀར་པོའི་དེབ་ ༡༡ ཙམ་ཕྱོགས་བསྒྲིགས་བྱས་ཡོད་འདུག
རྒྱབ་ཤ་དཀར་པོའི་དཔེ་དེབ་ཕྱོགས་བསྒྲིགས་ཐད། བོད་ལྗོངས་དྲ་བ་སོགས་སུ་གནས་ཚུལ་བཀོད་པའི་ནང་། “རྒྱབ་ཤ་དཀར་པོའི་དེབ་འདི་དག་ནང་རིགས་པས་ཁུངས་སྐྱེལ་དང་། ཞིབ་ཅིང་བདེན་པའི་ཐོག་ནས་བོད་ནི་གནའ་སྔ་མོ་ནས་ཀྲུང་གོའི་ཁ་འབྲལ་དུ་མི་རུང་བའི་ཆ་ཤིས་ཤིག་ཡིན་པའི་ལོ་རྒྱུས་ཀྱི་དོན་དངོས་བརྗོད་ཡོད་པ་དང་། བོད་ལ་ཞི་བས་བཅིངས་གྲོལ་བཏང་བ་དང་དམངས་གཙོའི་བཅོས་སྒྱུར་བྱས་རྗེས། ཟིལ་རླབས་དགུང་དུ་འཕྱུར་བའི་ལོ་རྒྱུས་ཀྱི་འཕེལ་རིམ་བརྗོད་དེ། བོད་ཀྱི་མི་དམངས་རྣམས་མི་རིགས་ས་ཁོངས་རང་སྐྱོང་ལམ་ལུགས་འོག རང་ཁྱིམ་རང་བདག་གི་དབང་ཆ་ལོངས་སུ་སྤྱོད་པའི་གོ་སྐབས་མངོན་འགྱུར་བྱས་ཤིང་། བོད་ཡུལ་འཛུགས་སྐྲུན་དང་རིག་གནས་འཕེལ་རྒྱས། སྣོད་བཅུད་དང་ཁོར་ཡུག་སྲུང་སྐྱོང་ཐོག་གྲུབ་འབྲས་ཆེན་པོ་ཐོབ་པ་ངོ་སྤྲོད་བྱས་ཏེ། ང་ཚོ་དང་ཏཱ་ལའི་རུ་ཚོགས་བར་གྱི་གནད་དོན་དེ་གཅིག་གྱུར་དང་ཁ་ཕྲལ། ཡར་རྒྱས་དང་ཕྱི་བཤོལ་བར་གྱི་འཐབ་རྩོད་བྱེད་པའི་ངོ་བོ་ཐེར་འདོན་བྱས་ཏེ། མི་རྣམས་ཀྱིས་བོད་ཀྱི་ལོ་རྒྱུས་དང་དངོས་ཡོད་གནས་ཚུལ་ཤེས་རྟོགས་དང་། ཏཱ་ལའི་རུ་ཚོགས་ཀྱི་ཁ་ཕྲལ་ངོ་བོ་དང་། བོད་ཀྱི་གནད་དོན་ཟེར་བ་གང་ཡིན་གསལ་རྟོགས་ཡོང་བའི་ཡིག་ཆ་ཞིག་ཡིན” ཞེས་བཀོད་འདུག
གསར་འགོད་པ། དོན་འགྲུབ་བཀྲ་ཤིས།
རྒྱ་ནག་གིས་རྒྱབ་ཤོག་དཀར་པོ་ཡིན་ན་ཡང་ནང་དོན་ནག་པོ་ཡིན་པའི་དེབ་བཏོན་ཚར་འདུག ད་ང་ཚོས་ཡང་བསྐྱར་དེབ་ཀྱི་ཕྱི་ནང་གཉིས་ཀ་དཀར་པོ་ཡིན་པ་ཞིག་འདོན་དགོས་ཀྱི་རེད།
རྒྱབ་ཤ་དཀར་པོ་ཟེར་བ་ལས་རྒྱབ་ཤོག་དཀར་པོ་ཞེས་བྲིས་ན་དོན་དང་ལྡན་པར་བསམས། ཤོག་བུ་ཡིན་པ་ཤེས་བཞིན་དུ་ཤ་ཞེས་འབྲི་དོན་མེད་ཀ བོད་ཤ་གཟན་གྱི་ལུང་པར་ཤོག་བུ་ཤ་རུ་མཐོང་གི་ཡོད་ནའང་ཐང་། མི་ཤེས། ནམ་རྒྱུན་མདུན་ཤོག་དང་རྒྱབ་ཤོག་ཅེས་འབྲི་བཞིན་ཡོད་ན་ཡང་། ཆབ་སྲིད་དྲིལ་སྒྲོག་གི་དེབ་དེབ་འདི་ཚོར་རྒྱབ་ཤ་དཀར་པོ་ཞེས་འབྲི་བཞིན་འདུག་ལ། འདི་ཡང་སུ་ཞིག་གི་མ་དག་རྒྱུན་འབྱམས་སུ་འགྲོ་བཞིན་ཡོད་ངེས་པས། རྩོམ་སྒྲིག་པ་དང་རྩོམ་པ་པོ་རྣམས་ཀྱིས་རྒྱབ་ཤོག་དཀར་པོའི་དེབ་ཅེས་འབྲི་རོགས། ཐུགས་རྗེས་གཟིགས།
ཀྲུང་གོའི་རྒྱབ་ཤ་དཀར་པོ་དང་དགེ་ཆོས་ཀྱི་དེབ་ཐེར་དཀར་པོ་གཉིས་མཉམ་དུ་བཞག་ནས་བཀླགས་ན་ངོ་མ་སྐྱིད་པོ་འདུག སུ་རྒྱལ་སུ་ཕམ་རེད་ཡ། ང་ཚོས་མ་འཇོན་པ་མ་གཏོགས་མེས་པོ་གོང་མ་ཚོས་ནི་རླབས་ཆེ་བའི་ལོ་རྒྱུས་ཤིག་བྲིས་འདུག