བོད་པ་ང་ཚོའི་རིགས་འདི་སྙིང་རེ་རྗེ།

ཨ་རོ། ཉིན་མ་ཁ་ཤས་ལ་ས་ཆ་གཞན་ཞིག་ལ་སོང་བས་ཁྱོད་ཀྱི་ཟིན་བྲིས་ནང་ལ་ཡི་གེ་གཅིག་ཀྱང་འབྲི་ཐུབ་མ་སོང་། གང་ལྟར་ཁྱོད་ཀྱི་ཉལ་ས་དྲོ་ཡང་སེམས་པ་འཁྱག་ཟེར་བའི་བསམ་ཚུལ་དེ་ལ་ངས་བསམ་ཚུལ་ཞིག་བྲིས་ཡོད། དེ་ངའི་ཟིན་བྲིས་ནང་ལ་ཡོད་པས་ཐུགས་སེམས་སྤྲོ་བོའི་ངང་ནས་ཀློག་རོགས་གནང་། ངའི་བསམ་ཚུལ་དེ་འཁྱོག་བསྡད་ཡོད་ས་དང་བཀུག་བསྡད་ཡོད་ས་འདྲ་ཡོད་ན་ལན་རྒྱོབས།

ཤ་ཁྲག་རུས་གསུམ་ཁྱེད་རང་གིས་དོན་སྙིང་ལྡན་པའི་རྩོམ་ཡག་པོ་བྲིས་འདུག་ བོད་པའི་གསང་མཐིལ་བརྟོལ་འདུག་ཅེས་བརྗོད་ཀྱང་མི་འཚམ་པ་མེད། ཤ་ཚ་བའི་གཏམ་དང་བླང་དོར་བྱེད་དགོས་པའི་བསླབ་བྱ་རྣལ་མ་བཏོན་འདུག་ཀྱང་འུ་ཚོ་སྒང་བ་བོད་ཀྱི་འདིའི་རིགས་ལ་དོ་སྣང་དང་མཉན་འཇོག་མི་བྱེད་པར་མ་ཟད་ད་དུང་གཏམ་ངན་དུ་བརྩི་བ་འདི་ཤེས་དཔྱོད་ཀྱིས་མ་འདང་བས་ལན། སློབ་དཔོན་རིན་པོ་ཆེས་ཀྱང། བོད་ལ་དྲིན་ཆེས་བྱས་ཀྱང་དྲིན་མི་གོ། །ཞེས་ཐུགས་ཕམ་གྱི་རྣམ་པ་དང་བཅས་ཏེ་བོད་ཡུལ་ནས་གཤེགས་པ་དང། མཁས་དབང་དགེ་ཆོས་ཀྱང་གཤེགས་རྗེས་ཤིག་ལ་གཞི་ནས་རྗེས་དྲན་དང་རྩོམ་རིགས་ལ་གདེང་འཇོག་ཅིག་ཐོབ་པ་ལས་མངོན་སུམ་དུ་ཡོད་སྐབས་རྒྱལ་འཚོང་བ་ཞེས་མིང་མི་སྙན་པ་སྣ་ཚོགས་ཤིག་ཡོང་བ་བཞིན་དེང་སང་སྤྱི་ཚོགས་ཁྲོད་དུའང་བོད་ལ་ཤ་ཞེན་དང་རུས་ཞེན་ཡོད་པ་རྣམས་ཀྱིས་སེམས་གཏིང་གི་སྐད་ཆ་ལ་དེ་ཙམ་དོ་སྣང་མི་བྱེད་པར་མཐོན་པོའི་ཁྲི་ལ་འགྱིངས་པའི་བླ་དཔོན་ཚོའི་སྐད་ཆ་བདེན་མིན་ཇི་ལྟར་དེ་ལ་རང་བཞིན་གྱིས་གཙིགས་ཆེར་བྱེད་པའི་བག་ཆགས་འདི་སྤྲུག་དགོས་པར་མཐོང་ན་དེ་ལ་ཐབས་ལམ་ཡག་ཤོས་ཤིག་འཚོལ་དཀའ།

སྡུག་གི་ཁུར་བོ་འཁུར་ནས་གླིང་ཀུན་འཁྱམ།།
སྡུག་ཡས་མང་པོའི་གནམ་ས་གཡོ་བ་བྱས།།
སྡུག་བསྔལ་འདི་ཡང་སྔོན་བསགས་ལས་ཤིག་རེད།།
སྡུག་གྱོང་བོད་པར་སྐྱེ་བ་སྐྱོ་ཉམས་ཤིག།

ཀུ་རེ་རྩེད་མཚར་གཏམ་གྱི་མགོ་མ་ཡིན།།
ཀུ་རེ་རྩེད་བཞིན་ཀུན་གྱི་དོན་ལ་འབད།།
ཀུ་རེ་རྩེད་སྟངས་གླིང་ཀུན་མི་འདྲ་ཡང་།།
ཀུ་རེ་འོག་ན་ཀུན་ཤེས་གཅིག་གྲོལ་ཡོད།།