བོད་ཀྱི་སྐད་ཡིག་དོན་དངོས་ཐོག་ཅི་ཞིག་ཡིན་ནམ།
བོད་གངས་ཅན་གྱི་རིག་གནས་འདི་ལོ་ངོ་སྟོང་ཕྲག་ལྷག་གི་ལོ་རྒྱུས་ཡོད་ལ། འདི་ནི་རིན་ཐང་ཆེ་ཞིང་གཏིང་དཔག་དཀའ་བའི་ཤེས་རིག་གི་བང་མཛོད་ལྟ་བུ་ཞིག་ཡིན་སྟབས། ང་ཚོ་མི་རིགས་འདིའི་ངོམ་སོ་དང་སྤོབས་ལ་རྒྱ་བཅས་ཀྱང་མཚོན། དེང་སྐབས་གཞན་མི་རིགས་མང་པོ་ཞིག་གིས་བོད་ཀྱི་རིག་གནས་དང་། ལྷག་དོན་བསམ་པའི་འདུ་ཤེས་ལས་འཁྲུངས་པའི་གཤིས་སྤྱོད་དང་། ཀུན་ཕན་གྱི་བློ་སྟེ་རང་རྒྱལ་གཞན་ཕམ་གྱི་བསམ་བློ་ཞིག་མེད་པ་དེ་ལ་རྒྱུས་མངའ་དང་སྦྱང་བརྩོན་བྱེད་བཞིན་ཡོད། ཡིན་ཡང་། རང་སེམས་དྲོན་མོ་འཁྱག་གིས་བདམ།། ལ་རྒྱའི་བུ་ཆུང་རྙི་ལ་ཤོར།། ཞེས་པ་ལྟར་བོད་ནང་དང་ཕྱི་ཡུལ་དུ་ཡོད་པའི་བོད་མི་ཚོའི་རང་སྐད་བཞག་ནས་གཞན་སྐད་ལ་ཤི་འཐམ་རོ་འཐམ་བྱེད་བཞིན་པ་དང་། ཕ་མེས་ཡང་མེས་རིང་ནས་ས་ཁྱབ་རྡོ་ཁྱབ་ཏུ་སོང་བའི་ཕ་སྐད་གཙང་མ་གཡུག་ནས་གཞན་སྐད་འཁྱར་མ་འཁྱོར་ཞིག་ལ་བརྟེན་ནས་སློབ་ཁྲིད་ཀྱི་ལས་ལ་ཞུགས་ཁུལ་བྱེད་བཞིན་པ་ནི། ལོ་ཆུང་བྱིས་པ་རྣམས་ལ་རང་སྐད་དང་རང་གི་ལོ་རྒྱུས་ཤེས་འདོད་མེད་པའི་འགག་རྡོ་རུ་འགྱུར་བཞིན་ཡོད། ད་དུང་ལ་རྒྱ་དབེན་པའི་དགེ་རྒན་མིང་ཅན་ཁ་ཤས་ནས་བོད་ཡིག་ནི་ཁ་འདོན་དགེ་སྦྱོར་ཙམ་ལས་ཕུགས་མདུན་ལ་ཅང་མི་ཕན་པའི་བསླབ་བྱ་ངན་པ་རྒྱག་བཞིན་ཡོད། དེ་ནི་རང་ཉིད་ཀྱིས་བསླབ་བཞིན་པའི་སློབ་ཚན་དེའི་སྦྱང་འབྲས་ཡག་པོ་ཞིག་བྱུང་བའི་ཆེད་དུ་ཡིན་ལ། དེ་ཡག་པོ་བྱུང་ན་རང་ཉིད་ལ་གོང་རིམ་གྱིས་གཟིགས་གསོལ་དང་མཐོང་ཕྱོགས་ཡག་པོ་ཞིག་ཡོང་བའི་ཆེད་དུ་ཡིན་པ་ལས། དོན་གྱིས་ཕྲུ་གུ་དེ་ལ་བསམ་བློ་བཏང་བ་ཞིག་གཏན་ནས་མིན། འདི་ལྟ་བུའི་སློབ་གསོ་རྒྱག་མཁན་ཚོ་ནི་ང་ཚོའི་དགྲ་བོ་དངོས་གནས་བ་དེ་ཡིན་ལ། བོད་ཀྱི་རིགས་གཞུང་དང་སྐད་ཡིག་གི་སྐེ་ནས་བགེགས་མཁན་གྱི་གཏེ་བོ་དེ་ཡང་ཡིན།
ལྷག་དོན་འདི་ལྟ་བུའི་སྐད་ངན་འབྱིན་མཁན་བཙན་བྱོལ་དུ་གནས་བའི་བོད་ཀྱི་སློབ་གྲྭ་ཁག་གི་ནང་དེ་བས་མང་། འདི་ ལྟར་བྱས་རྐྱེན་ཕྲུ་གུའི་སྣང་ངོར་དེ་བཞིན་གྱི་ལོག་རྟོག་སྐྱེས་ནས་བོད་ཡིག་དང་ བོད་སྐད་ལ་དེ་ཙམ་གྱི་ཡིད་འཇོག་མི་བྱེད་པར་མཚམས་རེར་བོད་དགེ་རྣམས་ལ་སྣང་ཆུང་གིས་འདིའི་ངའི་མི་ཚེ་ལ་མི་ཕན་པའི་ཁ་རྩོད་བྱེད་མཁན་ཡང་བྱུང་མྱོང་ཡོད། འདི་ནི་རང་ཉིད་བོད་པ་ཞིག་ཡིན་པའི་གོ་མ་ཆོད་པ་ཡིན་ལ་ལྷག་དོན་དགེ་རྒན་ཞིག་ཡིན་པའི་མཚན་ཉིད་དེ་བས་ཀྱང་མ་ཚང་བ་རེད།
འཛམ་གླིང་གི་གཙུག་རྒྱན་ལྟ་བུའི་བོད་འདི་ཡང་མི་རིགས་གཞན་དང་གཅིག་མཚུངས་བཞིན་སྐད་དང་ཡི་གེ ཡུལ་སྲོལ་གོམས་གཤིས། སྡོད་གནས། ཐུན་མོང་གི་གོ་སྤྱོད་དང་བསམ་པའི་གོ་རྟོགས་སོགས་འཛོམས་ཡོད་པའི་མི་རིགས་ཤིག་ཡིན་པར་མ་ཟད། ལོ་རྒྱུས་གཏིང་ཟབ་ཞིང་ཕུན་སུམ་ཚོགས་མི་རིགས་ཤིག་ཀྱང་ཡིན། མི་རིགས་ཤིག་གི་ཁྱད་ཆོས་ཚང་བ་འདི་དག་ལས་སྐད་དང་ཡི་གེ་ནི་མི་རིགས་སུ་ཡིན་རུང་བླ་སྲོག་ལྟ་བུ་ཡིན་སྟབས། དེ་གཅེས་འཛིན་དང་སྲུང་སྐྱོབ་བྱེད་རྒྱུ་གལ་གནད་ཆེ་བ་ལས་མཐོང་ཆུང་དང་ཁྱད་གསོད་བྱས་ན་དེ་བས་ཀྱང་མི་རུང་སེམས། ལྷག་ དོན་རང་ཉིད་ཀྱིས་རང་གི་རིག་གཞུང་རྣམ་དག་མི་ཚུད་དང་ཕན་མེད་བེམ་རོ་ཞིག་ཏུ་ བརྩི་བ་ནི་དེ་བས་ཀྱང་ཡ་ཆད་གོ་ལྡོག་གི་གནས་སུ་ལྷུང་བའི་མི་ཞིག་ཡིན། བཙན་བྱོལ་དང་བོད་ནང་གི་སློབ་གྲྭ་ཆེ་འབྲིང་ཆུང་གསུམ་ནས་བོད་ཡིག་སྦྱངས་ནས་ སློབ་མཐར་ཕྱིན་པའི་ལས་བྱེད་པ་མང་ཆེ་བས། རང་ཉིད་ཀྱི་ལས་གནས་ཐོག་བོད་ཡིག་མི་བཀོལ་བར་གཞན་གྱི་སྐད་ཡིག་བཀོད་སྤྱོད་བདེ་ ཤོས་ཡིན་ཚུལ་དང་། བོད་ཡིག་རྙོག་འཛིང་ཆེ་བའི་རྒྱུ་རྐྱེན་ངན་བརྗོད་བྱེད་བཞིན་པ་ནི་ཤིན་ཏུ་བློ་ ཕམ་གྱི་གནས་ཤིག་ཡིན། ལྷག་དོན་དེང་གི་འཆར་ས་རཱ་བོད་ཀྱི་མཐོ་སློབ་དང་ཝ་ཎ་མཐོ་སློབ་ཁག་ནས་བོད་ཡིག་ སྦྱངས་ནས་མཐར་གསོན་པ་རྣམས་ལ། གཞན་སྐད་ཀྱི་ཕྱོགས་ནས་ཀྱང་ལྟ་སོ་མེད་ལ་རང་སྐད་ཀྱི་ཕྱོགས་ནས་ཀྱང་ཧ་ཅང་ཇེ་ཞན་ དང་། ཡིད་སྐྱོ་བའི་གནས་ཤིག་ཏུ་གྱུར་ཡོད་པ་ཇི་ཙམ་བལྟས་ན་དེ་ཙམ་གྱི་བློ་ཁོང་དུ་ ཆུད་པ་ཞིག་ཏུ་འགྱུར་བཞིན་འདུག གནད་དོན་དེ་གང་དུ་ལྷག་མིན་རྩ་ཞིབ་བྱེད་དགོས་ལ། དོན་ཕན་གང་ཞིག་ཏུ་འཁྱོག་ལམ་དུ་འདེད་བཞིན་ཡོད་པ་རྙེད་ཐུབ་བྱེད་དགོས་པ་འདུག དེ་མིན་མིང་གི་དབེན་པའི་ལག་འཁྱེར་རྫིག་པོ་ཞིག་བཟུང་ནས་དོན་གྱི་དབུལ་བ་ཞིག་ བྱས་ན་སྐད་ཡིག་དང་རིག་གཞུང་ལ་ཞབས་འདེགས་ལས་ཞབས་འདྲེན་ཞུ་ཡུལ་ཞིག་ཏུ་འགྱུར་ བ་འདུག
འདིར་བརྡ་ཆད་སྐལ་ཆད་ཀྱི་དུས་ཤིག་ང་ཚོ་ལ་ཤར་ཉེན་ཆེ་ ལ་འདི་ལྟ་བུའི་ལམ་བུ་ཆུང་ཆུང་ཞིག་བཙལ་བཞིན་ཡོད་པ་ལྟ་བུའི་ཚོར་སྣང་ཡང་ངང་ངམ་ གྱི་སྐྱེ་ཡོང་། དོན་དངོས་ནས་སློབ་གྲྭ་ཁག་གི་བོད་ཡིག་བཀོལ་སྤྱོད་ཐད་མགོ་ལས་ནས་གལ་ཆེན་དང་ དོན་ཆེན་དུ་བཟུང་ནས། བོད་དགེ་རྣམས་ཀྱི་ཕྲག་སྟེང་ལ་ལས་འགུལ་ལྕི་མོ་ཞིག་འགེལ་དགོས་ལ། དེ་ལྟར་ལས་འགན་སྤྲད་པ་ནང་བཞིན་སློབ་ཕྲུག་རྣམས་ལ་ཡང་སྐུལ་སློང་དང་། གལ་ཆེན་ཡིན་པའི་ཁོར་ཡུག་བསྐྲུན་ཐབས་བྱེད་དགོས། དགེ་རྒན་གཞན་རྣམས་ལ་ཡང་བོད་ཡིག་གལ་ཆེན་ཡིན་པའི་ངེས་ཤེས་རྙེད་ཕྱིར་བོད་ཡིག་ སྦྱོང་དུ་འཇུག་རྒྱུ་དང་། ལོ་རེར་བོད་གི་ཡིག་རྒྱུགས་ཐེངས་རེར་བཏང་ནས་ཡིག་རྒྱུགས་ལ་གཞིག་ནས་ཞབས་ལོ་ འཕར་རིམ་བཟོ་དགོས་པ་འདུག དེ་མིན་ཕྱོགས་གཅིག་ནས་རམ་འདེགས་བྱེད་པ་དང་ཕྱོགས་གཞན་ཞིག་ནས་སྣང་མེད་ངང་བཞག་ ནས་འགྲོ་ན་མཉམ་རུབ་ཀྱི་ནུས་བ་འདོན་ཐུབ་ཀྱི་མེད་པ་རེད། ལྷག་དོན་བོད་ཡིག་དགེ་རྒན་ དག་ཐེར་ནན་གཟབ་བྱེད་དགོས་ལ། ད་ཡོན་དགེ་རྒན་ལས་བོད་ཡིག་དགེ་རྒན་གཙང་སེལ་བྱེད་པ་དང་། མཐོ་སློབ་ཁག་ནས་ཐོན་བཞིན་པ་དང་སྦྱོང་བཞིན་པ་དག་དང་སྤུས་གཙང་དང་ཞིབ་དཔྱོད་ གཟབ་ནན་བྱེད་དགོས་པ་འདུག དེ་མིན་བོད་ཀྱི་སྐད་ཡིག་དོན་དངོས་ཅི་ཞིག་ཡིན་མིན་ཡང་ཁ་མཚོན་གཅོད་དཀའ་བའི་རང་བཞིན་ཞིག་ཏུ་གནས།
འཇམ་མགོན་ལགས་ཀྱི་དཔྱད་གཏམ་ལ་བསྟོད་ཚིག་གི་མེ་ཏོག་སྟོར་བ་ལས་དགག་གཞག་གི་ལམ་ནས་གཉིད་མ་སད་པ་དེ་ཚོ་ལ་ཞོགས་དུང་འབུད་དུ་མི་འཇུག་པ་འདི་ཅི་ཞིག་ཡིན།རང་གིས་རང་ལ་འུར་བསྟོད་བྱས་ནས་ཡིད་ཚིམ་པོ་བྱེད་པ་འདི་ནི་བག་ཆགས་རྣྙིང་བས་བོད་ལ་རྐང་སྒྲོག་བརྒྱབ་པ་རེད།ལྟ་བ་མི་མཐུན་པ་བརྗེ་རེས་ཀྱི་བརྒྱུད་རིམ་ཁྲོད་འགལ་ཟླ་འབྱུང་བ་དང་དེ་ལས་སྲེག་བཅད་བརྡར་གསུམ་བྱས་པའི་འབྲས་བུར་ཡེ་ཤེས་ཀྱི་སྤྱན་ཇེ་གསལ་དུ་འགྲོ་ངེས། རང་གིས་རང་ལ་མཐེ་བོང་བསྒྲེངས་མཁན་ནི་བླུན་པོ་ཉིད་ལས་མ་འདས་སོ།
རྒན་འཇམ་མགོན་ལགས་སྐུ་ཁམས་བཟང། དེ་ཐེངས་དངོས་ནས་ཡག་པོ་ཞིག་བྲིས་འདུག་ལ་མ་འོངས་པར་ཡང་དེ་འདྲ་མང་པོ་འབྲི་བའི་སྨོན་འདུན་ཡོད། རྩོམ་ཡིག་འདི་བསྐྱར་དཔར་བརྒྱབ་ཏེ་སློབ་གྲོགས་གཞན་ལ་བཀྲམ་ངེས་ཡིན།
སྤྱིར་བོད་ཀྱི་རིག་གཞུང་དང་མིའི་རྒྱུད་དང་སེམས་ཁམས་རྣམས་བོད་ཕྱི་ནང་གཉིས་ཀར་ཉམས་རྒུད་དུ་འགྲོ་བཞིན་པར་བོད་རིགས་རྒན་གཞོན་ཚང་མས་གླེང་མོལ་བྱེད་མུས་སུ་མཆིས་ནའང་ལག་ལེན་ཁྲོད་དུ་ཁ་བཤད་ཆུ་ཡི་ལྦུ་བ་ལྟར་དོན་ཐོག་ཏུ་ཁེལ་ཐུབ་ཀྱི་མེད་པ་ནི་བོད་རིགས་ཚང་མའི་ལས་དབང་རེད།
ད་ཐེངས་རྒན་འཇམ་མགོན་ལགས་ཀྱིས་ཡུན་རིང་ཉེར་བའི་ན་ཟུག་ཅིག་དྲ་གྲོགས་ཚོའི་མིག་ལམ་ལ་ཕུལ་བ་འདི་དངོས་ནས་ཡག་པོ་རེད། འོན་ཀྱང་ང་ཚོས་རང་ཉིད་དང་རང་ཉིད་ཀྱི་འཁོར་ཡུག་ནས་འགོ་འཛུགས་དགོས་སྟབས། ཁྱེད་ཀྱི་བསམ་ཚུལ་འདི་ཡང་ཁྱེད་རང་གནས་སའི་སློབ་གྲྭ་དེའི་སྦྱར་པང་སྟེང་ལ་སྦྱར་ཏེ་བོད་དགེ་ཡིན་ཡང་བོད་ཡིག་བེད་མེད་དུ་འདོད་པའི་ཁྱེད་རང་གི་ལས་གྲོགས་ཚོར་དྲན་སྐུལ་ཞིག་བཏང་ན་ཡག་པོ་འདུག ཡིན་ཡང་ཁྱོད་བློ་ཁོག་དེ་ཡོད་མེད་ངས་མི་ཤེས།
འཇམ་མགོན་འདི་ངས་ཤེས་པའི་དགེ་རྒན་འཇམ་མགོན་ཡིན་ས་རེད་པ། དངོས་གནས་ཡག་པོ་འདུག བཙན་བྱོལ་ནང་ན་དགེ་རྒན་རྩོམ་འབྲི་བ་ཨ་སུ་རི་ཡི་ཚེ་རིང་ལྷ་མོ་ཡིན་ནམ་ཡང་ན་ཚེ་དབང་ལྷ་མོ་ཟེར། ཁོ་གཉིས་ལས་གཞན་སུ་ཡོད་པ་རེད། དགེ་རྒན་ཚོས་རང་སྡོད་སའི་སློབ་གྲྭའི་བོད་སྐད་ཡིག་གི་གནས་སྟངས་དང་། དགེ་སློབ་དབར་གྱི་བོད་སྐད་ཡིག་གི་འབྲེལ་འདྲིས་སོགས་དངོས་ཡོད་གནས་ཚུལ་ཅི་ཡིན་དངོས་འབྲིའི་ལམ་ནས་ངོ་སྤྲོད་དང་། ལེགས་སྤེལ་ཉེས་འགོག་གི་རྩོམ་ཡིག་མང་ཙམ་འབྲི་ཐུབ་ན་བཟང་གི དེ་མིན་བཙན་བྱོལ་ནང་གི་སློབ་གྲྭ་གནས་ཚུལ་མང་ཆེ་བ་བཙན་བྱོལ་གྱི་གཞི་རིམ་སློབ་གྲྭར་སོང་མ་མྱོང་བ་དང་། རྒྱུས་མེད་ཟེར་སྒྲས་ལ་གཞི་བཅོལ་ནས་བྲིས་པ་རེད་འདུག དེ་བས་འདིའི་ཕྱོགས་ནས་གཞི་རིམ་སློབ་དགེ་ཚོས་དངོས་བྱུང་གི་གནས་ཚུལ་ཅི་ཡོད་མང་ཙམ་བྲི་ཐུབ་པའི་རེ་བ་ཧ་ཅང་ཆེ།
རྩོམ་འདིར་དངོས་གནས་ཡག་པོ་ཞིག་བྲིས་ འདུག་ཐུགས་རྗེ་ཆེ་མ་ཟད་གོང་དུ་འཆན་འདེད་པ་ཚོ་གསུང་པ་སྟེ་བདེན་པ་རེད་བོད་མི་རིགས་ཀྱི་སྐད་བོད་རང་གི་སྲོག་རྩ་ལྟའུ་ཞིག་ཆགསཡོད་པ་རེད།
འཇམ་འགོན་གྱིས་བོད་ཀྱི་སྐད་ཡིག་གི་གནས་བབ་སྐོར་ལ་་གླེང་བ་ཐུགས་རྗེ་ཆེ་ཞུ།་་སྤྱིར་ང་ཚོའི་སྤྱི་ཚོགས་འདི་ད་ལྟ་རྒྱ་མིན་བོད་མིན་ཞིག་དང་ར་མ་ལུག་གི་སྐད་ཆ་བཤད་མཁན་ཞིག་ཏུ་འགྱུར་འགྲོ་བཞིན་ཡོད་པ་དང་།་འདི་དག་རྒྱུ་རྐྱེན་གཙོ་བོ་ཁོར་ཡུག་བཀོལ་སྤྱོད་བྱེད་ས་ཡག་པོ་མེད་པའམ་སྐྲུམ་མ་ཐུབ་པའི་རྐྱེན་གྱིས་རེད་འདུག་སྙམ།
མ་ཚད་ཕྱི་རྒྱལ་ཁག་ནས་ཡོད་པའི་བོད་མི་རྣམས་ལ་བོད་ཡིག་དང་བོད་སྐད་གང་འདྲ་ཞིག་ཡོད་མེད་བཤད་མི་དགོས་པ་ཞིག་ཡིན་པ་དང་བཙན་བྱོལ་དུ་ཡོད་པའི་བོད་མི་རྣམས་བོད་ཡིག་དང་བོད་སྐད་ལ་མཐོང་ཆེན་གང་འདྲ་ཞིག་ཡོད་མེད་དེ་ནི་ད་ལྟའི་བོད་ཡིག་ཉམས་ཆག་འགྲོ་བའི་རྐྱེན་འདི་ལས་ཤེས་ཐུབ།
ཁ་ནས་བོད་སྐད་རྩ་ཆེན་ཡིན་ཚུལ་དང་སྦྱོང་དགོས་ཚུལ་བཤད་མཁན་སྐུ་ངོ་དང་ལས་བྱེད་་་་་་་་་་་་་མཐོ་རིམ་མི་སྣ་དག་གི་བུ་ཕྲུག་དག་ཚང་མ་ཕྱི་རྒྱལ་དུ་ཡོད་ལ་ཧ་ལམ་བོད་སྐད་དང་བོད་ཡིག་ཅུང་ཙམ་ཡང་མི་ཤེས་མཁན་ཞིག་ཏུ་གྱུར་ཡོད།
བོད་ནང་དུ་མཚོན་ན་ཡང་དགོན་སྡེ་ཁག་དང་མཚཽ་སྔོན་ཕྱོགས་ནས་ཡོད་པའི་མཐོ་སློབ་ཁག་གཅིག་དང་བོད་ལྗོངས་དང་དར་མདོ་སོགས་ལ་ཡོད་པའི་མཐོ་སློབ་ཁ་ཤས་ཞིག་མ་གཏོགས་ཧ་ལམ་གཞན་རེ་བ་བྱེད་ས་མེད་པ་ལྟ་བུ་ཞིག་ཏུ་གྱུར་ཡོད།
དེར་བརྟེན་ང་ཚོས་མི་རིགས་ཞིག་གི་སྲོག་རྩ་བོད་སྐད་བོད་ཡིག་འདི་ཉིད་ནད་ཡུན་རིང་བའི་བརྒྱད་ཅུའི་རྒན་པོ་ལྟ་བུ་ཞིག་ཏུ་གྱུར་ཡོད་པས་ཁོ་བོས་བསམ་བློ་གང་འདྲ་ཞིག་བཏང་ཡང་ཡང་དག་པའི་ཐབ་ལམ་ཞིག་མ་རྙེད།
དེར་བརྟེན་དྲ་གྲོགས་ཚོས་བསམ་ཚུལ་འདྲ་ཡོད་ན་ཕན་ཐོགས་ཆེ།།།།
འདིར་རྒན་མི་ནག་ཚང་ལུང་རིགས་རྒྱལ་ལགས་ཀྱི་མཆན་བུ་འོས་མཚམས་ཤིག་དང་། ཞིབ་དཔྱོད་བྱེད་རིན་ཡོད་པའི་སྐད་ཆ་གསོན་པོ་ཞིག་བཤད་ཡོད་པ་ནི་༼དེང་སྐབས་དྲ་ཐོག་ན་བོད་ཡིག་འབྲི་མཁན་དང་། དྲ་ཐོག་ལ་བོད་ཡིག་འབྲི་སའི་ཁོར་ཡུག་སྐྲུན་མཁན། གཞི་རིམ་ནས་བོད་ཡིག་སློབ་ཁྲིད་བྱེད་མཁན། རྩོམ་ཡིག་འབྲི་མཁན། རྩོམ་ཡིག་ཀློག་མཁན། རྩོམ་ཡིག་གླེང་མཁན། རྩོམ་སྒྲིག་བྱེད་མཁན། བོད་ཡིག་གི་ཆེད་དུ་རང་སྲོག་འབེན་ལ་འཇོག་ལ་ཁལ་བྱེད་ཀྱིན་པ་འདི་དག་ཕལ་ཆེ་བ་ཞིག་ ༧༠ དོན་གྲངས་ནང་གི་བྱིས་པ་སྣབ་ལུག་དེ་ཚོ་རེད་འདོད།༽འདི་རེད། ངོ་མ་བསམ་ཞིབ་ཐུང་ངུ་ཞིག་གི་ནང་ནས་ཀྱང་འདི་འདྲ་ཞིག་རྟོགས་ཐུབ་པ་འདུག ༡༩༧༠ནང་དུ་སྐྱེས་པའི་དར་མ་ཚོའི་བོད་འདི་བསམ་ཕྱོགས་གཅིག་དང་། སྣེ་འཁྲིད་གཅིག་གི་ལམ་བུ་ཞིག་བརྒྱུད་ཐུབ་པ་འདུག་ཞེས་བཤད་ན་ཡང་ནོར་མི་འདུག་བསམ། དཔེར་མཚོན་ཙམ་བཞག་ན་བོད་གཞུང་ལས་བྱེད་ཁག་དང་། ཚོགས་སྡེ་ཁག་གི་ལས་བྱེད། སློབ་གྲྭ་ཁག་གི་ནང་དེ་མིན་རང་སྒེར་གྱི་ལས་གནས་གང་གི་ཕྱོགས་ནས་ལྟོས་ཀྱང་དེ་འདྲ་ཞིག་ལོ་ཚོད་དང་དུས་སྐབས་གང་ནས་དེད་དེ་ལྟོས་ཀྱང་བདེན་ཤེས་ཆེ། གཅིག་བྱས་ན་དུས་རབས་ཀྱི་འཕེལ་འགྲིམ་ལས་བརྒྱུད་སྤྲོད་ཞེས་པ་དེ་འདྲ་ཞིག་ཡིན་ཡང་སྲིད། གང་ལྟར་འཇམ་མགོན་གྱི་གླེང་སློང་ལས་འཕྲོས་དོན་འདི་འདྲ་ཞིག་རེད་བསམ།
འདིར་ཕེབས་ནས་ཕྲན་ལ་གསལ་འདེབས་དང་རྒྱབ་སྐྱོར་གནང་མཁན་ཚང་མ་ལ་ཐུགས་རྗེ་ཆེ་ཞུ། རེ་རེ་བཞིན་རང་ཉིད་ལ་ཆ་རྐྱེན་མེད་སྟབས་མཆན་འགྲེལ་བྱེད་ཁོམ་མ་བྱུང་བས་དགོངས་དག་ཞུ།
འཇམ་མགོན་ལགས།
ཁྱེད་ཀྱིས་གསུངས་པའི་དགེ་རྒན་དགེ་ཕྲུག་བར་གྱི་རྩོད་པ་འདི་འདྲ་ཞིག་ང་དང་ངའི་བུའི་བར་དུ་ཡོད། ངས་རང་གི་བུ་ལ་བོད་ཡིག་སློབ་དུས་ཁོས་ང་ལ་དྲི་བ་མང་པོ་བཏང་གི་རེད།
དང་པོ། ངའི་བུ་ཡིས་བོད་ཡིག་འདིའི་ང་ལ་ཕན་ག་རེ་ཐོགས་ཀྱི་རེད་དམ་ཟེར་བའི་དྲི་བ་ཞིག་བསླེབས་ཡོང་དུས། ངས་ཅི་ལབ་འདི་ལབ་མེད་པར་ཁྱེད་རང་བོད་པ་མིན་པས་ཟེར་བ་དང་བོད་མི་ཡིན་པའི་རྗེས་སུ་བོད་ཡིག་ངེས་པ་ཏུ་ཤེས་དགོས་རེད་ཞེས་ལབ་པ་མ་གཏོགས་ཁག་པོ་འདུག
བོད་ཡིག་གིས་མི་ཚེ་སྐྱེལ་དུས་ཕན་འདིར་ཐོགས་ཀྱི་རེད་ཞེས་ལབ་ཁག་པོ་འདུག་པས་ལམ་སྟོན་རེ་གནང་རོགས་ཞུ།
གཅིག་ནས་ང་རང་ཚོ་ལ་རྒྱལ་ཁབ་མེད་པ་དང་གཉིས་ནས་བོད་ཀྱི་སྐད་ཡིག་ནང་དུ་དེང་རབས་གསར་པའི་ལག་ཤེས་རིག་གནས་མེད་པས་བོད་ཡིག་ནས་ནང་ཆོས་འདྲ་སློབ་སྦྱོང་བྱེད་ཀྱི་དང་གསར་འགྱུར་འདྲ་ལྟ་ཐུབ་ཙམ་ལས་གཞན་མེད་པར་དངོས་ཡོད་གནས་ཚུལ་རེད།
དཔེར་ན། དེང་རབས་གསར་པའི་རིག་གནས་ཆུང་ཆུང་ཞིག་བོད་ཡིག་ཐོག་ནས་སློབ་སྦྱོང་བྱེད་ཐུབ་ཀྱི་མེད་དུས། ཕྲུ་གུ་ཚོ་ལ་བོད་ཡིག་སྦྱོང་དགོས་ཞེས་ལབ་བསྡད་པ་ཡིན་ནའང་མ་འགྲིག་འདྲ་ཅིག་འདུག་སྙམ།
བོད་ཀྱི་སྐད་ཡིག་འདི་ཆོས་ལུགས་ཅན་ཞིག་ཡིན་ཀྱང་ལྟ་གོས་ཅན་ཞིག་མིན་པས་མ་འོང་སོན་རྩ་རྣམས་ཀྱིས་འབད་བརྩོན་བྱེད་ཐུབ་མེད་པ་རེད། བོད་མི་རིགས་འདིས་བདེ་བ་འདོད་སྟངས་ལ་དབྱེ་ན་གཉིས་ཡོད། གཅིག་ནི་ལྐོག་ཏུ་གྱུར་པའི་སྐྱེ་བ་ཕྱི་མ་ཐར་པ་དང་ཐམས་ཅན་མཁྱེན་པའི་གོ་འཕང་ཟེར་བ་འདིར་རེད།
གཉིས་པ་ནི་མི་ཚེ་འདིའི་བདེ་སྐྱིད་རེད། མི་ཚེ་འདིའི་བདེ་སྐྱིད་དང་འཚོ་བའི་དཔལ་འབྱོར་བར་རུ་འབྲེལ་བ་ཆེ་བ་དང་མི་རྣམས་ཀྱིས་དུས་རྒྱུན་དུ་དཔལ་འབྱོར་ཆེད་དུ་འབད་བརྩོན་བྱས་དང་བྱེད་བཞིན་པ་རེད། དེར་བརྟེན་འཛམ་གླིང་ཐོག་ཏུ་སློབ་གྲྭ་བ་རྣམས་ཀྱིས་སློབ་སྦྱོང་ལ་འབད་བརྩོན་བྱེད་པ་འདི་ནི་སྐྱེ་བ་ཕྱི་མ་ལ་ཕན་པའི་བྱ་བ་མིན་པ་ཐམས་ཅད་ཚེ་འདིའི་བདེ་སྐྱིད་ཐོབ་ཆེད་དུ་རེད།
ཚེ་འདིའི་བདེ་སྐྱིད་ཐོབ་པ་ལ་རང་ཉིད་ཀྱི་འཚོ་བ་ཡག་པོ་ཞིག་ཡོང་ཐབས་ལ་འབད་དགོས་པ་དང་འཚོ་བ་ཡག་པོ་ཞིག་འགྲུབ་ཐུབ་པའི་ཆེད་དུ་ *ལས་དོན་* occupation. Professional.*སློབ་སྦྱོང་བྱེད་དགོས།
ལས་དོན་སློབ་སྦྱོང་བྱེད་པར་སྐད་ཡིག་གཅིག་བརྟེན་ནས་བསླབ་དགོས་པ་དང་དེ་འདྲ་ཡིན་དུས་རང་གི་བསླབ་པའི་སྐད་ཡིག་དེའི་ནང་དུ་ལས་དོན་སྡེ་ཚན་རྣམས་ཡོད་དགོས། བོད་ཀྱི་སྐད་ཡིག་ནང་དུ་ལས་དོན་སྡེ་ཚན་མེད་དུས་བོད་ཀྱི་སྐད་ཡིག་ལ་བསྟེན་ནས་ལས་དོན་སློབ་སྦྱོང་བྱེད་ཐུབ་ཀྱི་མེད་པས་མ་འོང་སོན་རྩ་རྣམས་ཀྱིས་བོད་ཡིག་སློབ་སྦྱོང་ཡག་པོ་བྱེད་ཀྱི་མེད་པ་རེད་འདོད།
གལ་སྲིད་བོད་ཡིག་ལ་བརྟེན་ནས་དེང་རབས་གསར་པའི་ལས་དོན་སྡེ་ཚན་ཁག་བསླབ་ཐུབ་པ་དང་དེར་བརྟེན་དཔལ་འབྱོར་ཡོང་ཁུངས་ཞིག་ཡོད་ན་རྒད་མགོ་དཀར་མན་ཆད་དང་ཆུང་སོ་དཀར་ཡན་ཆད་ཀྱིས་ཉིན་མཚན་མེད་པར་འབད་བརྩོན་བྱེད་ངེས་རེད།
དཔེར་ན། བལ་ཡུལ་སྤོར་ར་གཞི་ཆགས་ཁག་གི་བོད་མི་རྒད་པོ་རྒད་མོ་ཚོས་སྐད་རིགས་སྣ་མ་སྣ་ཚོགས་ཤེས་ཀྱི་ཡོད། ཁོང་རྣམ་པའི་འཚོ་བའི་ཆེད་དུ་ཡུལ་སྐོར་སྤྲོ་འཁྱམ་པའི་མཉམ་དུ་ཚོང་ལས་ལ་བརྟེན་ནས་འཚོ་བ་སྒྲུབ་དགོས་པས་རེད།
ཚེ་འདིའི་འཚོ་བ་སྒྲུབ་ཐུབ་པའི་སྐད་ཡིག་ཅིག་ཡིན་ན་སྐད་ཡིག་དེ་ལ་འབད་བརྩོན་བྱེད་མཁན་ཡོད་ཡོད་པ་རེད། དེར་མེད་ན་ཆོས་གཅིག་པོ་བྱེད་ཐུབ་ཙམ་གྱི་སྐད་ཡིག་ཞིག་ལ་ཁ་ནས་རྩ་བ་ཆེན་པོ་རེད་ཞེས་བཤད་ཀྱང་དོན་དངོས་ཐོག་འབད་བརྩོན་ཅི་ཙམ་ཡོད་མེད་ང་རང་ཚོའི་བཙན་བྱོལ་བོད་ཕྲུག་རྣམས་ལ་གཟིགས་དང།
བོད་ཡིག་ཡག་པོ་ཤེས་ཀྱི་མེད་པ་དང་དབྱིན་ཡིག་ཡག་པོ་ཤེས་པ་དང་འབད་བརྩོན་གཙོ་བོ་དབྱིན་ཡིག་ཐོག་ཏུ་བྱེད་ཀྱི་ཡོད། བོད་ཀྱི་སྐད་ཡིག་འདི་ཡུན་རིང་གནས་དགོས་ན་འདི་ལ་སློབ་སྦྱོང་བྱེད་མཁན་དགོས་ཀྱི་རེད།བོད་ཡིག་ལ་སློབ་སྦྱོང་བྱེད་མཁན་དགོས་ན་བོད་ཡིག་ནང་དུ་ལས་དོན་སྡེ་ཚན་བསྒྱུར་དགོས་པ་མཐོང།
རྨེའུ་དཀོན་རྒྱམ་གྱིས་དྲི་བ་༥》 དེང་དུས་ཀྱི་རིག་གནས་དང་རྒྱུན་ཤེས་གང་མང་ཞིག་བོད་ཡིག་ཏུ་བསྒྱུར་ཐབས་སུ། བྱ་ཐབས་ག་འདྲ་ཞིག་འདོན་དགོས་པ་རེད་དམ།
ལན།
དེང་དུས་ཀྱི་ལས་དོན་སྡེ་ཚན་གྱི་རིག་གནས་བོད་ཀྱི་སྐད་ཡིག་ནང་དུ་བསྒྱུར་པར་ཆ་རྐྱེན་མང་པོ་ཞིག་དགོས་ཀྱི་རེད་སྙམ། དཔེར་ན་འཛམ་གླིང་ཐོག་ཏུ་དེང་དུས་ཀྱི་ལས་དོན་སྡེ་ཚན་མང་པོ་ཡོད་པའི་ནང་ནས་ང་ཅོ་རིས་ཤེས་པ་ནི་མ་ཆེན་གྱི་ལས་དོན་ཡིན་པས་ཟས་ཀྱི་རིག་གནས་སྐོར་རུ་མྱོང་བ་ཅང་ཟད་ཡོད་པས་མ་ཆེན་ལས་དོན་བོད་ཡིག་ནང་དུ་བསྒྱུར་སྟངས་བཤད་ན།
དང་པོ་ཐ་སྙད་ཀྱི་མ་འདང་བའི་དཀའ་ངལ་ཆེ་ཤོས་རེད། ཟས་ཀྱི་རིགས་མི་འདྲ་ཧ་ཅང་མང་པོ་ཡོད་པ་དང་དེ་འདྲའི་རིགས་རྣམས་ཐ་སྙད་འདི་དང་འདི་བེད་སྤྱོད་བྱ་དགོས་མིན་ཁ་ཚོན་གཅད་མ་ནུས་པ་དང་ག་སྲིད་ཐག་གཅོད་ནས་བྲིས་པ་ཡིན་ན་གཞན་གྱིས་གོ་མི་ཐུབ་པའི་དཀའ་ངལ་འདི་ནི་སྡུག་ཤོས་འདུག
དཔེར་ན་Pizza ལྟ་བུ་བཟོ་སྟངས་བོད་ཡིག་ནང་དུ་བསྒྱུར་དགོས་དུས་དང་པོ་pizzaཞེས་པ་འདི་ལ་མིང་ཞིག་འབྲི་དགོས་པས་སྒྲ་སོར་བཞག་བྱེད་ནས་གོ་སླ་ཡང་དེང་སང་སྤྱི་ཚོགས་ནང་དུ་སྒྲ་སོར་བཞག་པ་རྣམས་ལ་ངོས་ལེན་མེད་གསུངས་མཁན་མང་པོ་རེད།
བོད་མང་གི་མཁས་དབང་ཚོས་བོད་སྒྱུར་བྱས་པའི་ཚིག་མཛོད་རེ་གཉིས་ཡོད་ཀྱང་ལས་དོན་སྡེ་ཚན་ཞིག་བོད་ཡིག་ནང་དུ་བསྒྱུར་པ་ལ་ཕན་ནུས་ཆ་ཚང་བ་ཡོད་པ་གཅིག་ཀྱང་མེད། ལས་དོན་རིག་གནས་ཤེས་མཁས་ཚོས་བོད་ནས་བཏགས་པའི་ཐ་སྙད་གསར་པ་རྣམས་མ་ཤེས་པ་དང་བྱ་དངོས་གསར་པ་རྣམས་ལ་མིང་ལྷག་གཏགས་མཁན་ཚོས་ལས་དོན་རིག་གནས་མ་ཤེས། གལ་སྲིད་བྱ་དངོས་གསར་རྣམས་ལ་བོད་མིང་ཡིན་ཟེར་ནས་ཅིག་འདོགས་ཁུལ་བྱེད་པ་ཡིན་ན་ལས་དོན་རིག་གནས་བོད་ཡིག་ནང་དུ་བསྒྱུར་ཐུབ་པ་ཁག་པོ་རེད་འདུག
བཙན་བྱོལ་བོད་གཞུང་གིས་ངོས་ནས་ཐ་སྙད་གསར་པ་གཏན་འབེབས་ཀྱི་ཚིག་མཛོད་རྩ་བ་བརྟེན་ས་ཞིག་དང་ཆ་ཚང་བ་ཞིག་བཟོ་ཐུབ་པ་ཡིན་ན་ལས་དོན་སྡེ་ཚན་ཁག་བོད་ཡིག་ནང་དུ་བསྒྱུར་ཐུབ་སྙམ།
དེང་དུས་ཀྱི་ལས་དོན་རིག་གནས་བོད་ཡིག་ནང་དུ་བསྒྱུར་མཁན་ཞིག་གི་ངོས་ནས་ཚང་དགོས་པའི་ཆ་རྐྱེན་དང་པོ་རང་ཉིད་ཀྱི་ལས་དོན་རིག་གནས་དེར་ཤེས་དགོས། གཉིས་པ་སྐད་ཡིག་གཉིས་ཤེས་དགོས་ཀྱི་རེད་སྙམ།
Pizza བཟོ་ཤེས་པའི་མ་ཆེན་ལག་ཤེས་པ་ཞིག་ཡིན་ན་ཡུང་རོ་རྒྱལ་ཁབ་ཁག་གི་ནང་དུ་ལས་ཀ་མི་རག་པའི་སེམས་མེད། གཞན་རྒྱ་གར་བལ་ཡུལ་ནང་དུ་མཐོ་སློབ་ཕྱིན་པ་ཡིིན་ཟེར་མཁན་ཚོས་ལས་ཀ་གཙང་མ་བཟོ་ཡ་དང་སྡེར་མ་ཁྲིས་ཡ་ལས་ཀ་མ་གཏོགས་ཁག་པོ་རེད། མདོ་ན་དེང་དུས་ཀྱི་ལས་དོན་རིག་གནས་མེད་པའི་མི་ཞིག་གི་འཚོ་བ་པོ་ཞིག་ཡོང་བ་ཁག་པོ་རེད།
བརྩེ་བའི་རྒན་འཇམ་མགོན་ལགས། བདེ་མོ་ཡིན་ནམ།
ངའི་ཚོར་སྣང་ཞིག་ལ་ད་ནི་ ༡༩༧༠ དོན་གྲངས་ནང་གི་བྱིས་པ་ཚོས་སྐད་རྒྱག་གི་ཡོད་པའི་སྣང་བ་ཞིག་ཤར་གི་འདུག ཁྱོད་བདུན་ཅུ་ག་དུས་ཤིག་ལ་སྐྱེས་པ་རེད་དམ། ཕྱིར་འདང་མང་པོ་ཞིག་རྒྱག་དགོས་འཁེལ་གི་འདུག
དེང་སྐབས་དྲ་ཐོག་ན་བོད་ཡིག་འབྲི་མཁན་དང་། དྲ་ཐོག་ལ་བོད་ཡིག་འབྲི་སའི་ཁོར་ཡུག་སྐྲུན་མཁན། གཞི་རིམ་ནས་བོད་ཡིག་སློབ་ཁྲིད་བྱེད་མཁན། རྩོམ་ཡིག་འབྲི་མཁན། རྩོམ་ཡིག་ཀློག་མཁན། རྩོམ་ཡིག་གླེང་མཁན། རྩོམ་སྒྲིག་བྱེད་མཁན། བོད་ཡིག་གི་ཆེད་དུ་རང་སྲོག་འབེན་ལ་འཇོག་ལ་ཁལ་བྱེད་ཀྱིན་པ་འདི་དག་ཕལ་ཆེ་བ་ཞིག་ ༧༠ དོན་གྲངས་ནང་གི་བྱིས་པ་སྣབ་ལུག་དེ་ཚོ་རེད་འདོད།
ང་ཚོ་གད་པ་དང་ནེའུ་གསིང་། ནགས་མཐའ། རྡོ་ར་བཅས་ཀྱི་ནང་དུ་རྩེད་མོ་རྩེས་སྐབས་འདི་ཚོ་གང་ནས་དྲན། ངས་ཚོད་ཚོད་མེད་པར་འདི་འདྲ་ཡང་དྲན་ཡོང་གི་འདུག
དེ་ནས་་་་་་དེང་སྐབས་གྲྭ་ས་ཁག་ནའང་ ༧༠ དོན་གྲངས་ནང་གི་མི་རབས་དེ་ཚོ་ཤུགས་ཆེ་ཤོས་མིན་འགྲོ། ཕལ་ཆེར་ཡིན་འགྲོ།
མི་རིགས་ཀྱི་གནད་དོན་ཞེས་པ་འདི་མི་རབས་ནས་མི་རབས་བར་དུ་རྩོད་དགོས་པའི་དབང་དུ་བཏང་ན། དེང་སྐབས་ང་ཚོའི་སྤྱི་ཚོགས་ནང་གི་དར་མ་དང་ཤེད་ཤུགས་གཙོ་བོ་དེ་བདུན་ཅུ་དོན་གྲངས་ནང་གི་མི་རབས་དེ་ཚོ་ཡིན་ས་རེད།
ཁྱོས་དེ་རུ་མུ་མཐུད་ནས་སྐད་རྒྱག་གི་ཡོད་པ་འདི་གོ་ནས་ཧ་ཅང་དགའ་ཡོད། ཁྱོད་རང་ང་ཚོའི་ཚབ་མཚོན་ཡིན། ངས་བལྟས་ན་ཁྱོའི་མཐའ་འཁོར་དང་། དྲ་ངོས་ན་ད་སྐབས་ང་ཚོའི་མི་རབས་དེས་ཁེངས་བསྡད་འདུག ང་ཚོས་མུ་མཐུད་ནས་སྐད་རྒྱག
དང་ཐོག་ངས་རྒན་འཇམ་མགོན་ལགས་ལ་རྩོམ་ཡིག་འདི་འདྲ་ཞིག་སྤེལ་བར་ཐུགས་རྗེ་ཆེ། དེ་ནི་ངོ་མ་གནད་དོན་གལ་ཆེན་ཞིག་རེད་ལ། ང་ཚོས་ཀྱང་བརྗེད་རྒྱུ་མེད་རེད། སྐད་ཡིག་ཤི་སོང་ན། རིག་གཞུང་ཟེར་བ་དེ་བདག་གཅེས་སམ་གནས་ཐུབ་རྒྱུ་ནི་ཉིན་མོའི་སྐར་མ་བཞིན་མི་སྲིད་པའི་ཤེས་བྱ་རུ་འགྱུར་ངེས་པས། ཤེས་ལྡན་པ་རྣམས་ཀྱི་དེའི་ཐོག་བསམ་གཞིགས་ནན་མོ་བྱས་ནས། ལས་འགུལ་ཆེ་འབྲིང་ཆུང་གསུམ་སྤེལ་དགོས་པ་ཡིན།
འཇམ་མགོན་ལགས། ཁྱེད་ཀྱིས་བོད་ཀྱི་སྐད་ཡིག་དང་། རིག་གཞུང་། ཡུལ་སྲོལ་གོམས་གཤེས་བཅས་ལ་བསྟོད་བསྔགས་དང་། མཐོང་ཆེན་བྱས་པ་འདི་ནི། དངོས་གནས་བོད་མི་རིགས་ལ་ཤ་ཞེན་ཆེ་བ་དང་། བོད་ཀྱི་རིག་གནས་ལ་རྒྱུས་ལོན་བྱས་ཡོད་པའི་རྟགས་ཞིག་རེད། མ་ཟད་གོས་ས་མཆོག་གིས་ཀྱང་བོད་མི་རིགས་འདི་ནི། འཚེ་མེད་ཞི་བ་དང་། གཞན་ཕན་གཞུང་དྲང་། ཁྲེལ་དང་ངོ་ཚ་ཡོད་མཁན་ཞིག་ཡིན་ཞེས་ཕྱིའི་རྒྱལ་ཁབ་ཁག་ཏུ་འུར་འུར་བསྒྲགས་ཀྱིན་ཡོད་ལ། རྒྱ་ཆེའི་སྤྱི་ཚོགས་ཀྱིས་ཀྱང་དེ་ལ་ཡིད་ཆེས་བྱེད་མྱོངས།
འོན་ཀྱང་དོན་དངོས་ཐོག་ནས་བཤད་ན་ད་ལྟའི་བོད་མི་ཕར་ཆེ་བའི་ཀུན་སྤྱོད་ནི་གོས་དུ་བཤད་པ་དང་དངོས་འགལ་དུ་གྱུར་ཚར་ཡོད་པ་མངོན་གསལ་རེད། དཔེར་ན་རྒྱ་བལ་ན་ཡོད་པའི་བོད་རིགས་དང་། མ་ཟད་སྤྱི་རྒྱལ་ཡུལ་གྲུ་ཁག་གི་བོད་རིགས་ཀྱི་བྱ་སྤྱོད་ནི་ནང་ཕན་ཚུན་བར་ལ་ཕྲག་དོག་ཧ་ཅིང་ཆེ་བས་བརྩོད་ལེན་ཤིན་ཏུ་མང་བ་དང་།
མ་ཟད་རྒྱ་ནག་དང་ཐེ་ཝན་སོགས་ན་ཡོད་པའི་བོད་ཀྱི་བླ་སྤྲུལ་གྲགས་ཅན་ཚོས་ཕན་ཚུན་དགྲ་ལྟར་དུ་མཐོང་བ་དང་། གལ་སྲིད་བླ་སྤྲུལ་་གསར་པ་ཞིག་འབྱོར་ན་རོགས་རམ་ཕར་ཞོག དེའི་མདུན་ལམ་ལ་སྔོན་འགོག་ཅི་ཐུབ་བྱ་བ་སོགས་ངོ་ཚ་འོས་པ་དང་ཡིད་ཆད་རུང་བའི་གནས་ཤིན་ཏུ་མང་པོ་དངོས་སུ་ཐོན་ཚར་ལ། ད་དུང་ཡང་ཆུ་བོའི་རྒྱུན་བཞིན་འབྱུང་དང་འབྱུངས་བཞིན་པ་རེད།
གནས་ཚུལ་འདི་རིགས་ལ་བརྒྱུར་བཅོས་དང་ཡར་རྒྱས་འོངས་ཐབས་གང་ཡོད་མེད་ཐད་ལ་བགྲོ་གླེང་དང་ཐུགས་བསམ་བཞེས་རོགས།
གལ་སྲིད་མུ་མཐུད་ནས་འདི་ལྟར་བྱས་བསྡན་ན། འབྱུང་འགྱུར་ལོ་བཅུ་ནང་ལོག་ནས་བོད་མི་རིགས་ཞེས་པ་དེ་འཛམ་གླིང་གི་མི་རིགས་ཐ་མ་ཉིད་དུ་ཆགས་རྒྱུར་ངེས་ཅན་རེད། བོད་མི་ཕོན་ཆེན་གནས་པའི་སྤྱི་རྒྱལ་ཁག་གི་ས་གནས་སོགས་ལ་ད་ནས་བོད་མི་ཞེས་པ་དེ། འོ་དེ་ཙམ་རེད་སྙམས་པའི་ལྟ་བ་སེམས་ལ་ཆགས་བཞིན་ཡོད།
བོད་ཀྱི་སྐད་ཡིག་ལ་བརྟེན་ནས་ཕྱི་ལོག་གི་ས་སྒོ་ཆེན་པོ་ཞིག་མི་ཆོད་པ་དངོས་བདེན་རེད། དོན་དངོས་འདི་ང་ཚོས་ངོས་ལེན་མི་བྱེད་རང་བྱེད་རེད། འོན་ཀྱང་རྒྱུ་མཚན་དེ་ལ་བརྟེན་ནས་བོད་ཀྱི་སྐད་ཡིག་ལ་མཐོང་ཆུང་དང་ཁྱད་གསོད་བྱེད་མི་འོས། ཅིའི་ཕྱིར་ཞེ་ན་ས་སྒོ་མི་ཆོད་པའི་གནད་དོན་འདི་མིའི་ནུས་ཤུགས་ཀྱི་གནད་དོན་ཡིན་པ་ལས་སྐད་ཡིག་རང་ངོས་ཀྱི་གནད་དོན་ཞིག་མ་རེད། སྐད་ཡིག་རང་ངོས་ནས་བཤད་ན་རྒྱ་ཡིག་ལས་ལྡབ་འགྱུར་གྱིས་བོད་ཡིག་གི་ནུས་པ་ཆེ་བ་དང་བཀོལ་སྤྱོད་བདེ་བ་ཡོད། དེང་འཛམ་གླིང་སྤྱིའི་སྐད་ཡིག་ཏུ་འབོད་པའི་དབྱིན་ཡིག་འདི་ཡང་རང་ངོས་ཀྱི་ནུས་པ་བོད་ཡིག་ལས་ལྷག་ཅིག་མེད། དབྱིན་ཇི་བས་མིའི་ནུས་ཤུགས་ཚན་རྩལ་དང་དཔལ་འབྱོར་གྱི་ཐོག་ཏུ་ཕུད་པའི་རྐྱེན་གྱིས་དེའི་ཕྱོགས་ཀྱི་ཐ་སྙད་ཧ་ཅང་ཕྱུག་པ་དང་། བོད་ཀྱིས་མིའི་ནུས་ཤུགས་ཆོས་གཞུང་གྱི་ཐོག་ཏུ་ཕུད་པས་དེའི་ཕྱོགས་ཀྱི་ཐ་སྙད་དབྱིན་ཇི་བ་ལས་ཕྱུག་པའི་སྣང་ཚུལ་དེས་གནད་འགག་གི་གསལ་བཤད་ཆེན་པོ་ཞིག་བྱས་ཡོད།
Dawai Shonu ཁོ་རས་ཁྱོད་འདིར་ལྟོས་དང་།
དེ་ཡང་རྣམ་དཔྱོད་ཀྱི་གཟིགས་པ་རྣོ་བའི་འཛམ་གླིང་གི་མཁས་པའི་ སྐྱེ་བོ་ཚང་མས། སྐད་ཡིག་རིག་གནས་ནི་མི་རིགས་ཤིག་ཏུ་འགྱུར་བའི་རྒྱུ་རྐྱེན་དང་རྟགས་མཚན་ཉག་ གཅིག་ཡིན་པ་དང་། མི་རིགས་རང་གི་སྐད་ཡིག་གཙིགས་ཆེར་བྱེད་པ་མི་རིགས་དེའི་མི་མང་གི་གོ་རྟོགས་ སད་རྟགས་དང་། མི་རིགས་ཀྱི་འདུ་ཤེས་དང་རིག་གནས་ཀྱི་འདུ་ཤེས་རྒྱས་རྟགས་ཡིན་ཞེས་སྨྲས་ཤིང་། སྐད་ཡིག་རིག་གནས་ལ་གཙིགས་ཆེར་མི་བྱེད་པ་ནི་བསམ་བློ་རྗེས་ལུས་ནོར་འཁྲུལ་གྱི་ རྟགས་དང་། མི་རིགས་ཉམས་རྒུད་དུ་སོང་བའི་ཐན་རྟགས་སུ་འཛིན་གྱི་ཡོད། གལ་ཏེ་རྒྱལ་ཁབ་ཅིག་དང་མི་རིགས་ཤིག་གིས་རིག་གནས་སློབ་གསོ་གཙིགས་འཛིན་མི་ བྱེད་པ་ཡིན་ན། དེ་ལྟ་བུའི་རྒྱལ་ཁབ་དང་མི་རིགས་དེ་ནི་ལོག་ལམ་དུ་འཕྱན་པ་ཡིན་ལ། གཞི་ནས་རེ་བ་མེད་པའི་ས་ལ་ལྷུང་བ་ཡིན་པར་སྔོན་བྱོན་དང་ད་ལྟར་གྱི་གནས་ཚུལ་ལས་ ཤེས་སོ།། རང་རེ་བོད་མི་རིགས་ལ་མཚོན་ན། དེང་རབས་ཀྱི་བཟོ་ལས་ཚོང་ལས་དངོས་རྫས་སྐྲུན་པའི་ཚན་རིག་ལག་རྩལ་སོགས་ཀྱི་ཐད་ ནས་རྗེས་ལུས་ཡིན་པ་ནི་ཉམས་འཇོག་བྱ་དགོས་པའི་ཕྱོགས་གཅིག་ཡིན་ཀྱང་། རླབས་ཆེན་གཟི་བརྗིད་དང་ལྡན་པའི་རིག་གནས་ཀྱི་བང་མཛོད་རྒྱ་ཆེན་པོ་ཡོད་པས། ལོ་རྒྱུས་རིག་གནས་དང་བསམ་བློ་ཀུན་སྤྱོད་ཕྱོགས་ནས་ནམ་ཡང་དབུལ་བོའི་གྲལ་དུ་ ལྷུང་དོགས་མེད། བོད་རིགས་ནི་བསམ་བློ་རིག་གནས་ཀྱི་ཆ་ནས་མི་རིགས་ཆེན་པོ་དང་མི་རིགས་ཕྱུག་པོ་ ཡིན་ཞེས་ཁོ་བོས་མགྲིན་པ་གཟེངས་སུ་བསྟོད་ནས་སྨྲ་བར་སྤོབས། དེང་སང་ལྟ་བ་དང་འདུ་ཤེས་ལོག་པ་ཁ་ཤས་ཀྱིས་མི་རིགས་ལ་ཤ་ཚ་ཁུལ་དང་བསམ་བློ་ བཅིངས་འགྲོལ་ཡིན་ཁུལ་གྱིས། མི་རིགས་རང་གི་རིག་གནས་ལ་ཁབ་འགྲོ་འབིགས་འགྲོའི་ཚུལ་གྱིས་སྐྱོན་འཚོལ་བ་དང་། མི་རིགས་གཞན་པའི་དུག་རྫས་ཕྱགས་ལུད་ཡན་ཆད་སྡུད་ལེན་བྱེད་པ་ལ་མཛངས་པར་རློམ་པ་ ནི་ཤེས་རྒྱ་ཆུང་བའི་རང་མཚང་སྟོན་པ་ལས། གཞན་ཇི་སྲིད་འཛམ་གླིང་གི་མི་རིགས་གང་གི་རིག་གནས་ལའང་ཡོན་ཏན་ཡོད་ལ། སྐྱོན་གྱི་ཆེར་འགྱུར་བའི་རིགས་ཀྱང་མེད་མི་སྲིད་མོད། སྐྱོན་ཡོན་གང་ཡང་འཇིག་རྟེན་ན་འཇལ་བྱེད་ཚད་མ་གཅིག་མཐུན་མེད་པས་ཅིག་ཤོས་ཀྱིས་ སྐྱོན་དུ་མཐོང་བའི་མི་ཚང་མར་སྐྱོན་དུ་འགྲོ་བ་ག་ལ་སྲིད། དེའི་སྟབས་ཀྱིས་རིག་གནས་གང་ཡང་རིག་གནས་དེ་བསྐྲུན་ཅིང་བེད་སྤྱོད་པའི་མི་ རིགས་དེའི་འཚོ་བའི་གནས་ཚུལ་དང་མཐུན་ཞིང་འདོད་པའི་རེ་བ་སྐོང་ཐུབ་པ་ཡིན་པས། མི་རིགས་རང་རང་གི་བསམ་བློ་ལྟ་སྤྱོད་མཚོན་པ་ཞིག་ལས་ལག་རྩལ་ལྟར་སྔོན་ཐོན་དང་ རྗེས་ལུས་ཀྱི་ཁྱད་པར་མེད་པ་འཛམ་གླིང་མཁས་པའི་ཁྲོད་དུ་རླུང་ལྟར་གྲགས་པ་ཡིན་ མོད། ཐོས་ཆུང་རྐྱལ་སྟོང་རྣམས་ལ་ཅི་ཆ། མཁས་དབང་ལུའུ་ཞུན་ནས་ཀྱང་བྱིས་པ་བཀྲུས་པའི་ཆུ་འཕོ་འདོད་ནས། མི་ཁ་ཤས་ཀྱི་བྱིས་པ་ཡང་ཐང་ལ་འཕོ་བར་བྱས་ཞེས་སྨྲས་པ་དེ་ཤིན་ཏུ་གནད་ཆེ། ཕྱོགས་གཞན་ཞིག་ནས་བཤད་ན། དེང་སང་རྒྱལ་ཁབ་ཕྱི་ནང་ཀུན་ཏུ་བོད་ཀྱི་ནང་བསྟན་རིག་གནས་དང་ལོ་རྒྱུས་རིག་ གནས་ཀུན་ལ་མཐོང་རྩིས་ཞིབ་འཇུག་བྱེད་མཁན་ལོ་རེར་ཟླ་རེར་ཇེ་མང་དུ་འགྲོ་ཀིན་ ཡོད་ལ། དུས་རབས་ཉེར་གཅིག་པ་ནི་བོད་ཀྱི་རིག་གནས་ཞིབ་འཇུག་གི་དུས་རབས་ཡིན་ཞེས་རྒྱལ་ ཁབ་ཕྱི་ནང་ཀུན་ཏུ་གྲགས་ཤིང་། བོད་ཀྱི་ནང་བསྟན་དང་བོད་སྨན་ས་ཁྱད་ཏུ་དར་བ་ཡང་དེའི་བདེན་རྟགས་གཅིག་རེད། རྒྱལ་ཁབ་ཕྱི་ནང་གི་མི་རིགས་གཞན་པས་ཀྱང་བོད་ཀྱི་སྐད་ཡིག་རིག་གནས་ལ་དགའ་བ་དང་ དང་བ་སྐྱེས་ཤིང་གཙིགས་ཆེར་བྱེད་པའི་དུས་འདིར་མི་རིགས་རང་གིས་དེ་ལ་ལྷག་པར་ རྩིས་མཐོང་བྱེད་པ་དང་། ཁྱབ་བརྡལ་དུ་གཏོང་དགོས་པ་ནི་སྨོས་མ་དགོས་སོ།། བྱ་བ་འདི་འདྲའི་སྟེང་ན་སྒྲིམ་པ་ནི་བསྟོད་བསྔགས་ཀྱི་མེ་ཏོག་གཏོད་ས་ཡིན་ནོ།།
འཇམ་མགོན་ལགས་
གསུངས་པ་ཤིན་ཏུ་བདེན་པ་འདུག འོན་ཀྱང་ཁ་ཆུང་དཔང་ཆུང་ཚོའི་སྐད་ངན་རེ་བསྒྲོགས། ཞེན་ཆགས་རེ་བྱས་ སྐད་ཡིག་འདི་རྩ་ཆེན་ཡིད་སྐད་རེ་བསྒྲགས
ད་དུང་དེའི་ཆེད་དུ་ཅི་ཞིག་བྱས་ཀྱང་། བོད་ཀྱི་སྐད་ཡིག་གིའི་ངོ་བོ་གནས་པ་དང་འཕེལ་བསྐྱེད་སོགས་ལ་ཕན་པ་ཆེར་མི་འདུག་ཉམས། རྒྱུ་མཚན་གཉིས་བཤད་ན
རྒྱ་ཡིག་མི་ཤེས་ན་རྒྱ་གཞུང་ལས་བྱེད་ལ་རེ་བ་མེད ལས་བྱེད་ཞིག་མ་ཉན་ན་ཡོན་ཏན་སྦྱང་བ་དོན་མེད་དུ་སེམ་བཞིན་ཡོད། སྐྱབས་བཅོལ་གཞུང་གིས་ལས་བྱེད་ཞིག་བྱེད་འདོད་ན་དབྱིན་ཡིག་ཤེས་དགོས་།་དེ་མ་ཤེས་ན ཁྱོད་ཀྱི་བོད་ཡིག་་གྱིས་གུང་ཚད་ཀྱི་གཞུང་ཞབས་ཀྱིས་རྐུབ་བཅག་ཉོ་མི་ཐུབ། བོད་ཡིག་ལ་མཐོང་བྱེད་མཁན་དང་དེའི་དགོས་མཁོ་ཡོད་པས་གཞུང་ལས་ཁང་ཞིག་མེད་པས་ ་་་་་ད་ཁྱེད་ཀྱི་དབྱིན་ཡིག་སྦྱོང་་། ཁ་ནས་བཤད་ན་འགོ་བཀའ་ཁྲི་ནས་སྐད་ཡིག་སྐད་ཡིག་ཞེས་བཤད་གིན་ཡོད་མོད དོན་ལ་ངའི་བཤད་པ་འདི་ལག་ལེན་རེད་། ་ མ་རེད་དམ་།
འཇམ་དགོན་ལགས།
ཁྱེད་རང་གིས་བོད་ཀྱི་སྐད་ཡིག་ཐོག་ལ་བསམ་ཚུལ་བཏོན་པ་ལེགས། འོན་ཀྱང་བོད་ཡིག་ལ་དེ་ཙམ་དོ་སྣང་མ་བྱེད་མཁན་ཚོར་ཁ་བརྡུང་དྲག་པོ་གཏོང་བ་ནི་ཡག་པོ་རང་མ་རེད།ཁྱེད་རང་སྐད་ཡིག་མ་ཤེས་པའི་ངར་རྒྱལ་ཡིན་སྲིད། སློབ་ཕྲུག་ཚང་མར་སོ་སོ་སོའི་ཁམས་དང་མོས་པར་མཐུན་པའི་སློབ་མཚན་ཞིག་ཡོད་པ་རེད། ཁོང་ཚོར་སོ་སོར་རང་གི་དགའ་བའི་སློབ་མཚན་དེ་ལ་ཤུགས་རྒྱགས་རྒྱུུའི་རང་དབང་ཡོད་པ་རེད། སློབ་གྲྭ་དང་མཐོ་སློབ་ནང་སློབ་མཚན་མི་འདྲ་བ་མང་པོ་ཡོད། བོད་ཡིག་ཀྱང་ཀྱང་བྱང་བསྡད་ན་སློབ་མཚན་གཞན་དག་སུས་སྦྱང་གི་རེད།
རྟག་པར་རིག་གཞུང་དང་སྐད་ཡིག་ཀྱང་ཀྱང་སྐོར་བཤད་ཡ་མ་གཏོགས་གཞན་ཡོད་པ་མ་རེད་པས། རིག་གནས་གསར་པའི་སྐོར་ལ་མིན་འདུག་གས། ལྷག་པར་དུ་ངའི་སྐད་ཡིག་དང་ང་ཚོའི་རིག་གཞུང་ཞེས་བློ་ཆུང་བྱེད་མི་རིགས། ཁྱེད་རང་སྐད་ཡིག་ག་ར་བེད་སྤྱོད་བྱེད་ན་འགྲིག སུས་ཀྱང་གང་ཡང་ལབ་ཀྱི་མ་རེད། ཁྱེད་རང་དབྱིན་སྐད་ཤེས་ཀྱི་ཡོད་ན་དབྱིན་སྐད་བེད་སྤྱོད་བྱེད་ཆོག ཇར་མན་སྐད་ཡིག་ཤེས་ཀྱི་ཡོད་ན་དེ་བེད་སྤྱོད་བྱེད་ན་འགྲིག གནས་སྟངས་དང་མཐུན་པའི་ཐོག་ནས་སོ་སོས་སྐད་ཡིག་སྦྱང་དགོས་པ་རེད། རྒྱ་གར་ནང་ཡིན་ན་ཧིན་སྐད་དང་དབྱིན་ཇི་གཙོ་བོ་རེད།་་དེ་མིན་དཀའ་ངལ་འཕྲད་རྒྱུ་རེད
རེད་རེད། བོད་དགེ་རྣམས་ཀྱི་ནོར་རེད་ལ། ཤེས་རིག་ལས་བྱེད་ཚོ་ནས་ཀྱང་ནོར་བ་རེད། འོ་ན་སུ་འགྲིག་པ་རེད་བརྗོད་ན། འཇམ་མགོན་ཁྱེར་རང་གཅིག་པུ་འགྲིག་པ་རེད། ང་ཚོའི་བཙན་བྱོལ་སྤྱི་ཚོགས་ཆུང་ངུ་འདིའི་ནང་ཕན་ཚུན་སྐྱོན་འཛུགས་རང་བྱེད་པ་ལས། མིང་དོན་མཚུངས་པའི་ཐབས་ལམ་ཡང་དག་པ་རེ་འདོན་མཁན་ཞེ་དྲག་གི་ཉུང་ཉུང་རེད་འདུག འཇམ་མགོན་ལགས། རྩོམ་རྗེས་མའི་ནང་གོང་དུ་གསལ་བའི་སྐྱོན་བརྗོད་ཚབ་ལས་ཐབས་ལམ་འདོན་པའི་རེ་བ་ཡོད།
འཇམ་མགོན་ལགས་ཁྱེད་ཀྱིས་གསུངས་པ་དེ་དེ་བཞིན་རེད།
ཤེས་རིག་གི་ལས་བྱེད་མིང་འཛིན་པ་ཚོས་ཤེས་ཡོན་གྱི་ཁ་ཕྱོགས་གསལ་པོ་ཞིག་སྟོན་མི་ཐུབ་པའི་ཉེ་ལེན་ལ་བརྟེན་ནས་ད་ལྟ་བར་བཙན་བྱོལ་ནང་ནས་རང་གི་རིག་གཞུང་ཐོག་རང་སྐྱ་འཕེལ་བའི་མི་ཞིག་གསོ་སྐྱོང་བྱེད་ཐུབ་མེད།
རེད་་་རེད་་ གཙོ་བོ་ཁྱོད་ཚོ་བོད་དགེ་རྣམ་པའི་ཤུགས་ཅིག་རྒྱོབས་དང་་་མ་གཞི་
གོ་ལ་གཅིག་གྱུར་གྱི་འུར་ཟིང་ཁྲོད་ནས་སྐད་ཡིག་ཆུང་ཆུང་ཚང་མ་ཁག་པོ་ཆགས་འདུག་་ཡིན་ན་་་་
འཇམ་མགོན་ལགས་ནས་དངོས་གནས་རྩོམ་ཡག་པོ་འདི་བདེན་པ་རེད། དེ་བདེན་པ་འདུག་བསམ་པ་རྐྱང་རྐྱང་གསུངས་འདུག ཕལ་ཆེར་ལོ་མང་རིང་ཉམས་མྱོང་བསགས་པ་ལས་བྱུང་བའི་ངག་ཡིན་པ་གོར་མ་ཆག་ཀྱང་ངའི་བལྟས་ན་ཁྱེད་ཀྱི་འདིར་རྩོམ་ཐུང་རེ་ལྷག་བསམ་གྱི་བྲིས་པ་བཟང་ཡང་། དོན་དངོས་ཐོག་ད་དུང་བོད་ཡིག་འདི་སྤྱི་ཚོགས་ནང་ཁྱབ་བརྡལ་སྤུས་གཙང་ཞིག་འགྲོ་བ་ལ་སྐུ་ཉིད་ནས་ཐབས་ལམ་མང་པོ་ཞིག་ནས་དེའི་ཐོག་ཤུགས་སྣོན་གནང་རྒྱུ་ཧ་ཅང་གལ་ཆེ་སྙམ། དཔེར་ན། སྐབས་རེ་སྤྱི་འཐུས་ཀྱི་རྒྱུན་ལས་དང་ཤེས་རིག་ལས་ཁུངས་དེ་བཞིན་འབྲེལ་ཡོད་ཁག་ལ་དུས་དང་དུས་སུ་དེའི་སྐོར་རྩོམ་དང་ཡིག་ངག་གཉིས་ཐོག་ནས་དྲན་གསོ་དང་འབོད་སྐུལ་ཆུ་བོའི་རྒྱུན་བཞིན་བྱས་གལ་ཆེའོ།
ལོ་མང་རིང་དགེ་རྒན་གྱི་ཉམས་མྱོང་གི་སྟེང་ནས་འདི་འདྲའི་རྒྱུས་ཡོད་ཀྱི་བསླབ་བྱ་གནང་བར་ཐུགས་རྗེ་ཆེ། རྒན་འཇམ་མགོན་གྱིས་ལོ་ངོ་དུ་མོར་གཞི་རིམ་གྱི་སློབ་མ་ཚོར་གསེར་ཆུ་དང་དངུལ་ཆུ་ལུད་པ་རེད། དེའི་སྟབས་ཀྱིས་གོང་གི་རྩོམ་ཡིག་དེ་ཡང་ཁོང་གི་འདས་པའི་ཉམས་མྱོང་ལས་བྱུང་བ་འབའ་ཞིག་ཡིན་པས་ཐུགས་རྗེ་ཆེ་ཞུ།