ཡུ་རོབ་བོད་རིགས་ཀྱི་ཚོགས་ཆེན་ཐེངས་གཉིས་པ།

ཅོ་རི་ལགས། ཉིད་ཀྱི་ན་ཚ་གསུམ་ངོས་འཛིན་བཅོས་ཐབས་གཤམ་གསལ།
ན་ཚ་གསུམ་ངོས་འཛིན།
དང་པོ། བཙན་བྱོལ་བོད་གཞུང་ཞེས་པའི་མིང་ཚིག་གི་ཐ་སྙད་འདི་བོར་སོང་བའི་སྡུག་བསྔལ་གྱི་ན་ཚ་དང་གཅིག
གཉིས་པ། རང་བཙན་ལག་དེབ་ཤི་སོང་བའི་སྡུག་བསྔལ་གྱི་ན་ཚ་དང་གཉིས།
གསུམ་པ། ནུབ་ཕྱོགས་རྒྱལ་ཁབ་མང་པོའི་ནང་དུ་བོད་ཀྱི་རྒྱལ་དར་ཡར་ལངས་བསྡད་ཡོད་པ་རྣམས་མར་ལོག་ཡོང་བསམ་པའི་འཇིག་སྐྲག་གི་སྡུག་བསྔལ་གྱི་ན་ཚ་དང་གསུམ་ཡིན་པ་དང་། ན་ཚ་གསུམ་པོ་འདིར་ངོ་སྤྲོད་དང་ན་ཚ་འདིར་གསུམ་ལ་ཕན་པའི་སྨན་ཞིག་གནང་རོགས་ཟེར་བ་དང་། ན་ཚ་འདི་འདྲ་ཡོད་པ་ང་གཅིག་པོར་མིན་པར་མི་མང་པོ་ཞིག་ལ་ཡོད་པའི་བཟོ་འདུག་པས་སྨན་གྲ་སྒྲིག་བྱས་ན་དགའ་ས་རེད་མ་གཏོགས་ཤི་མཁན་ང་གཅིག་པོ་ཡིན་ས་མ་རེད་སོགས་བརྗོད་འདུག་པས་ངས་བསམ་ན་དེ་ལ་སྨན་བཅོས་འདི་ལྟར་བྱས་ན་སྙམ།
ན་ཚ་གསུམ་གསོ་ཐབས།
༡༽ བཙན་བྱོལ་གཞུང་ཞེས་པའི་མིང་ཚིག་གི་ཐ་སྙད་བོར་སོང་སྙམ་པ་ནི་ཉིད་རང་ལ་ཚ་བ་ཤུགས་ཆེན་ཕོག་ཡོད་པས་འཆོལ་བ་ཡིན་གྱི་རེད། བཙན་བྱོལ་གཞུང་ནི་ད་ལྟ་ཕྲ་རོག་གེར་བཞུག་ཡོད་པ་མ་ཟད་རང་དབང་མང་གཙོའི་ལམ་དུ་བསྐྱོད་ནས་དེང་སང་སྐབས་བཅོ་ལྔ་པའི་གྲོས་ཚོགས་ཀྱི་སྤྱི་འཐུས་དང་། སྐབས་གསུམ་པའི་བཀའ་བློན་ཁྲི་པའམ་སྲིད་བློན་གྱི་སྔོན་འགྲོའི་འོས་བསྡུ་ཟིན་ནས་དངོས་གཞིར་འཇུག་ལ་ཉེ་བས་རྣམ་རྟོག་དང་འཕྲུལ་སྣང་ཞི་བར་བྱས་ནས་ཐུགས་བདེ་མོར་བཞུགས་དང་ནད་དང་པོ་དེ་སེང་དྲག་འགྲོ་ངེས།
༢༽རང་བཙན་ལག་དེབ་ཤི་སོང་བའི་སྡུག་བསྔལ་གྱི་ནད་ནི་གཞི་མེད་རང་རེད། ངས་བཀའ་འདྲི་ཞུ་རྒྱུར། ཁྱེད་ནས་ད་བར་དང་བླངས་དཔྱ་ཁྲལ་ལག་དེབ་ལྗང་ཁུ་དེ་བཟོས་ཡོད་མེད། བཟོས་ཡོད་ན།༡༩༧༢ལོ་ནས་ད་བར་ཆད་མེད་ཕུལ་ཡོད་དམ་མེད། གལ་སྲིད་ཕུལ་དང་འབུལ་བཞིན་པ་ཡིན་ན་རང་བཙན་ལག་དེབ་ཤི་ཡོད་མ་རེད། གལ་སྲིད་འབུལ་གྱི་མེད་ན་ཁྱེད་རང་སྒེར་ངོས་ལ་ཤི་བ་དང་མཚུངས་པས་འཕྲལ་དུ་ལག་དེབ་གསར་པ་ཞུས་ནས་བོད་རིགས་སྤྱི་འདྲེ་ལྟར་དང་བླངས་དཔྱ་ཁྲལ་ལེ་མེད་འབུལ་རྐྱང་གནང་ན་ལག་དེབ་ཤི་བའི་ན་ཚ་ལས་གྲོལ་ངེས། དང་བླངས་དཔྱ་ཁྲལ་ནི་བསམ་མེད་ཅོལ་ཆུང་རེ་གཉིས་ལས་བོད་རིགས་ཕལ་ཆེ་བས་འབུལ་བཞིན་པ་ཡིན། ཡང་ངས་ཤེས་ཚོད་ལ་རང་དབང་བདེན་པའི་ལས་འགུལ་དང་དང་བླང་དཔྱ་ཁྲལ་ཟེར་བ་ལས་རང་བཙན་ལས་འགུལ་དང་རང་བཙན་ལག་དེབ་ཟེར་བ་ཡིག་ཆའི་ཐོག་ཏུ་མཐོང་མ་མྱོང་། མང་ཚོགས་ཁྲོད་ཁ་རྒྱུན་ལ་རང་བཙན་ལག་དེབ་ཟེར་མཁན་ཡོད་པ་ངོ་མ་རེད།

༣༽ ནུབ་ཕྱོགས་རྒྱལ་ཁབ་མང་པོའི་ནང་དུ་བོད་ཀྱི་རྒྱལ་དར་ཡར་ལངས་བསྡད་ཡོད་པ་རྣམས་མར་ལོག་ཡོང་བསམ་པའི་འཇིག་སྐྲག་གི་སྡུག་བསྔལ་གྱི་ན་ཚ་དེར་ཁྱེད་ནུབ་ཕྱོགས་རྒྱལ་ཁབ་ཏུ་ཡོད་པའི་ཆ་ནས་ལངས་བསྡད་ཡོད་པའི་རྒྱ་དེ་མར་མི་ལོག་པའི་ཐབས་ཤེས་བོད་རིགས་སྤྱི་འདྲེ་ལྟར་རང་ནུས་ཕུང་ལྔས་གང་ལྕོགས་འབད་བརྩོན་གནོངས་དང་བརྟན་དུ་འགྲོ་བ་ལས་མར་ལོག་གི་མ་རེད། དེ་ལས་ལྡོག་སྟེ་ག་ས་ག་ལ་ཚིག་ངན་དང་གཞི་མེད་སྐྱོན་བརྗོད་དང་དཀྲུག་ཤིང་ཁོ་ན་བྱེད་པ་དང་། ལངས་བསྡད་ཡོད་པའི་རྒྱ་དར་རྣམས་མར་འཐེན་གང་ཐུབ་བྱས་ན་ཁྱེད་ཀྱི་ན་ཚ་དྲག་ཐབས་གཏན་ནས་མེད་ལ་ལམ་སེང་མ་ཤི་བར་སྡུག་པོ་སྣ་དགུ་མཐོང་ངེས། འདི་ནི་ལས་འབྲས་ཀྱི་རང་གཤིས་ལགས།

ནུབ་ཕྱོགས་ཕོ་ཉ་ལགས།

བཙན་བྱོལ་བོད་གཞུང་ཞེས་པའི་ཚིག་གི་ཐ་སྙད་འདི་བོར་འགྲོ་ས་བཀའ་བློན་ཁྲི་པའི་ཁ་ནས་རེད། དེ་ཙམ་ཡང་ཤེས་མ་སོང་ངམ།

རང་བཙན་ལག་དེབ་ཤི་ནས་ཡང་སྲིད་དངས་བླངས་བཅའ་ཁྲལ་ཟེར་བའི་ཕྲུ་གུ་ཞིག་སྐུ་བདག་བརྒྱབས་ནས་མི་ལོ་འགའ་རེ་འགྲོ་ཚར་བ་རེད། རང་བཙན་ལག་བདེ་བསད་མཁན་ང་དང་ང་འདྲ་བའི་བོད་མི་ཚོ་རེད་ཟེར་བའི་སྐད་ཆ་འདིར་སྨྱོན་གཏམ་ཞིག་རེད་འདུག་་་་་ཧཧཧ

བོད་ཀྱི་རྒྱལ་དར་ཡར་ལངས་དགོས་ས་གཙོ་བོ་འཛམ་གླིང་མཉམ་འབྲེལ་རྒྱལ་ཚོགས་ནང་དུ་རེད། གཉིས་ནས་ནུབ་ཕྱོགས་སྟོབས་ཆེན་རྒྱལ་ཁག་གི་ནང་དུ་རེད། དེ་ཙམ་ཡང་ཤེས་ཀྱི་མེད་པར་ང་ཅོ་རི་ལ་ཟུར་ཟ་མ་བྱེད་རོགས་གྲོགས་པོ།

བོད་ནང་གི་རྡོག་རྩ་གཅིག་སྒྲིལ་དགོས་པའི་གླུ་ཚིག་འདིར་ཉན་དགོས་མཁན་གཙོ་བོ་མདོ་ཁམས་བཞི་ཆུ་སྒང་དྲུག་དང་འབྲེལ་བ་མི་བྱེད་པའི་གྲོས་ཆོད་བཞག་མཁན་དབུས་གཙང་གི་རྒྱུན་ལས་མི་ངན་དེ་ཚོ་ལ་སྤྲོད་ལྭོ།

གསར་འགོད་པ་ཟླ་ཚེ་ལགས། བཀའ་དྲིན་ཆེས། ད་ཚོགས་འདུ་འདིར་དོ་སྣང་ཡོད་མཁན་ཚོས་གྲོས་ཆོད་ཀྱི་ངོ་གདོང་མ་ཐོས་མ་རིག་ཟེར་ས་མེད་པ་ཆགས་འདུག

ཀླུ་མཁར་བྱམས་གྱིས་རེ་སྐུལ་དང་། ཐུགས་སྣང་ཅན་ཚོར་ཕན་ཕྱིར་ཐེངས་འདིའི་ཚོགས་ཆེན་སྟེང་ཐག་གཅོད་བྱུང་བའི་གྲོས་ཆོད་ཁག་འགོད་རྒྱུ་ཡིན། གྲོས་ཆོད་རྣམས་བོད་དབྱིན་ཡིག་རིགས་གཉིས་ནང་ཡོད་པ་དང་། གྲོས་དོན་རེ་འགའ་དང་རྗོད་ཚིག་འགའ་ཤས་ལ་སྐད་ཡིག་གཉིས་བར་ཁྱད་པར་ཤོར་འདུག་མོད། ཚོགས་ཆེན་གཙོ་སྐྱོང་བས་དེ་རིགས་མཐའ་མའི་ཁུངས་བཅོལ་ས་དང་ཐོ་གཏུགས་ས་བོད་ཡིག་གི་ཆོད་དོན་ཁག་ཡིན་པའི་གསལ་བཤད་གནང་བ་ལྟར་འདིར་དེ་དོན་གསལ་འདེབས་ཞུ་བ་ཡིན། ༄༅། །ཡུ་རོབ་བོད་རིགས་མི་མང་ཚོགས་ཆེན་ཐེངས་གཉིས་པའི་གྲོས་ཆོད།

སྔོན་གླེང༌།
ཡུ་རོབ་བོད་རིགས་མི་མང་ཚོགས་ཆེན་ཐེངས་གཉིས་པ་ཕྱི་ལོ་ ༢༠༡༠ ཟླ་བ་ ༡༠ ཚེས་ ༡༦ དང་ ༡༧ ཉིན་གཉིས་རིང་པེ་རི་སི་གྲོང་ཁྱེར་གྱི་རྫོང་ཁག་ ༡༡ གི་གཞུང་འབྲེལ་མཛད་སྒོ་ཚོགས་ཁང་དུ་ཚོགས། ཡུ་རོབ་བོད་རིགས་མི་མང་ཚོགས་ཆེན་འདི་བཞིན་ལོ་གཉིས་ནང་བོད་རིགས་ཚོགས་པ་ཡོངས་རྫོགས་ཀྱི་སྤྱི་ཁྱབ་ཚོགས་འདུ་ཞིག་སྟེ། དེའི་རྩ་བའི་དམིགས་ཡུལ་ནི། བོད་ཀྱི་མཐུན་མོང་མ་ཡིན་པའི་ཕ་ནོར་རིག་གཞུང་རྒྱུན་འཛིན་དང་དར་ཁྱབ། ཡུ་རོབ་ནང་གནས་བཞུགས་བོད་རིགས་ཡོངས་ལ་བོད་ཀྱི་སྐད་ཡིག་དང་རིག་གཞུང༌། ལེགས་བྱང༌། མང་གཙོའི་ལམ་ལུགས། ཁྲིམས་ཀྱི་དབང་བསྒྱུར་གོ་རྟོགས། གནས་སྡོད་ཡུལ་ལུང་གི་ཡུལ་མི་དང་བོད་རིགས་དབར་མཐུན་ལམ་ཡོང་བ་སོགས་ཀྱི་ལས་སྒོའི་མཐུན་རྐྱེན་བསྐྲུན། ཡུ་རོབ་བོད་རིགས་མི་མང་ཚོགས་ཆེན་ཐེངས་དང་པོའི་གྲོས་ཆོད་ཁག་དང༌། ལས་དོན་འཆར་འགོད་ཁག་ལ་བསྐྱར་དུ་ཐུགས་སྣང་གཞེན་བསྐུལ།

ཆབ་སྲིད་དང་འབྲེལ་བའི་སྐོར།
༡ ཧྥ་རན་སིའི་རྒྱལ་ས་པ་རེ་སིར་ཡུ་རོབ་བོད་རིགས་མི་མང་ཚོགས་ཆེན་ཐེངས་གཉིས་པའི་ཚོགས་འདུར་ངོ་བཅར་རྒྱལ་ཁབ་བཅུ་གཉིས་ནས་ཕེབས་པའི་སྐུ་ཚབ་ཚང་མས་བློ་སེམས་མགྲིན་དབྱངས་གཅིག་གི་སྒོ་ནས་བསྒྲགས་དོན། བོད་གངས་ཅན་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་༸སྐྱབས་མགོན་ཆེན་པོས་དབུ་ཁྲིད་པའི་མང་གཙོའི་ལམ་ལུགས་སུ་བསྐྱོད་བཞིན་པའི་བཙན་བྱོལ་བོད་གཞུང་ནི་བོད་རྒྱལ་ཁབ་དང་མི་མང་གིས་ངོས་འཛིན་ལྡན་པའི་ཁྲིམས་མཐུན་གྱི་སྲིད་གཞུང་ཁོ་ན་ཡིན། སྤྱི་མོས།
༢ དབུ་མའི་ལམ་གྱི་སྲིད་བྱུས་ནི་བོད་གཞིས་བྱེས་གཉིས་སུ་འཁོད་པའི་བོད་མི་མང་གི་འཕྲལ་ཕུགས་ཀྱི་མངོན་འདོད་སྒྲུབ་པར། ༸གོང་ས་མཆོག་གིས་དབུ་ཁྲིད་པའི་རང་གཞུང་གི་བོད་ཆོལ་ཁ་གསུམ་གྱི་བོད་རིགས་ཡོངས་ལ་མིང་དོན་མཚུངས་པའི་རང་སྲིད་རང་སྐྱོང་གི་ཁེ་དབང་སྒྲུབ་ཐབས་ཀྱི་སྲིད་བྱུས་ཞིག་ཡིན་སྟབས། ཡུ་རོབ་གནས་སྡོད་བོད་རིགས་ཚང་མས་སྲིད་བྱུས་དེར་ལྷག་བསམ་འགྱུར་མེད་ཀྱིས་རྒྱབ་སྐྱོར་ཞུ་རྒྱུ། སྤྱི་མོས།
༣ ཡུ་རོབ་བཅར་བཞུགས་བོད་རིགས་མི་མང་ཀུན་གྱིས་རྡོག་རྩ་ཆིག་སྒྲིལ་སྒོ་ནས། རང་གཞུང་གི་དབུ་ཁྲིད་འོག་ཤར་བསྐྱོད་བྱ་རྒྱུར་སླར་ཡང་དམ་བཅའ་བརྟན་པོ་ཞིག་འཇོག་རྒྱུ། སྤྱི་མོས།
༤ བོད་གཞུང་མང་གི་གནས་སྐབས་ཀྱི་ཁ་གཏད་གཅོག་ས་ནི་རྒྱ་དམར་གཞུང་གི་རྒྱ་རིགས་ཆེན་པོའི་ལྟ་སྤྱོད་ལ་གཞི་བཅོལ་བའི་བོད་ལ་འཛིན་པའི་མི་རིགས་དབྱེ་འབྱེད་ཀྱི་སྲིད་བྱུས་དང་། དཔལ་འབྱོར་བཤུ་ཞོགས་ཀྱི་སྲིད་བྱུས། དེ་མིན་འདས་པའི་ལོ་ངོ་ ༥༠ ལྷག་རིང་བོད་ཀྱི་ཞི་བའི་མི་སེར་ཚོར་མཇུག་རྫོགས་རྒྱུ་མེད་པའི་དྲག་གནོན་གྱི་སྲིད་བྱུས་དེ་དག་ཡིན་སྟབས། བོད་མི་ཚོས་ཕྱི་ནང་གི་དགྲ་གཉེན་དབར་གྱི་ཁྱད་པར་ལེགས་པར་ཕྱེས་ཏེ་མི་མང་གི་ཆིག་སྒྲིལ་གྱི་ནུས་སྟོབས་གོང་མཐོར་བཏང་སྟེ། རྒྱ་གཞུང་གིས་བོད་ལ་ཉམས་རྒུད་གང་བྱས་དང་ བྱེད་བཞིན་པ་དག་ལ་མཐའ་གཅིག་ཏུ་ཆོད་སེམས་བརྟན་པོས་ངོ་རྒོལ་བྱ་རྒྱུ། སྤྱི་མོས།
༥ དེང་སང་བོད་མིའི་སྤྱི་ཚོགས་ཁྲོད་མང་གཙོར་གོ་བ་ལོག་སྒྲུབ་དང་། ༸གོང་ས་༸སྐྱབས་མགོན་ཆེན་པོ་མཆོག་དང་མང་གཙོ་དབར་གདམ་ཀ་ཟེར་བའི་ཀླད་མེད་ཀྱི་འཆལ་གཏམ་སྤེལ་མཁན་དེའི་རིགས་ལ་མང་ཚོགས་ཀྱིས་རྩ་བ་ཉིད་ནས་མགོ་འཁོར་མི་རུང་། མང་མོས།
༦ རྒྱ་ནག་གཞུང་གིས་བོད་པའི་སྤྱི་ཚོགས་ནང་གསང་འཛུལ་བྱས་ཏེ་བོད་གཞུང་དང་མི་མང་དབར། ཡང་ན་མི་མང་ཕན་ཚུན་དབར་ཁ་བྲལ་གྱི་ལས་འགུལ་བརྩམས་དང་རྩོམ་བཞིན་པའི་སྐབས་འདིར། ཡུ་རོབ་ཁུལ་དུ་རྒྱ་དམར་གཞུང་ཚབ་ཁག་གིས་བོད་དབང་བསྒྱུར་རྒྱུན་འཁྱོངས་ཀྱི་ཆབ་སྲིད་ཀྱི་དགོས་མཁོ་དང་བསྟུན་པའི་དྲིལ་བསྒྲགས་ལོག་པའི་མཛད་སྒོ་དང་ཐུགས་སྤྲོར་བོད་རིགས་མཉམ་ཞུགས་བྱེད་མཁན་ལ་སྔོན་འགོག་དང་མང་ཚོགས་ཀྱིས་མཐའ་གཅིག་ཏུ་ངོ་རྒོལ་བྱ་རྒྱུ། སྤྱི་མོས།
༧ བོད་རིགས་ཚོགས་པ་ཁག་དང་སྦིར་སལ་རང་གཞུང་སྐུ་ཚབ་དོན་གཅོད། དེ་བཞིན་རྒྱལ་སྤྱིའི་བོད་ཀྱི་ལས་འགུལ་ཁང་མཉམ་རུབ་ཀྱིས་ལོ་གཅིག་ནང་ཡུ་རོབ་གྲོས་ཚོགས་འཐུས་མི་ཚོའི་སར་བོད་དོན་ཆེད་ཞུ་གཏུགས་ཀྱི་ལས་འགུལ་ཞིག་དངོས་སུ་སྤེལ་རྒྱུ། སྤྱི་མོས།

ཤེས་ཡོན་དང་འབྲེལ་བའི་སྐོར།
༡ ཡུ་རོབ་རྒྱལ་ཁབ་འདྲ་མིན་ནང་འཚར་ལོངས་བྱེད་བཞིན་པའི་མི་རབས་གསར་པ་ཚོ་བོད་ཡིག་སློབ་སྦྱོང་སྤྲོད་ཕྱོགས་ཐད། བོད་རིགས་ཚོགས་པ་ཁག་གི་འགན་འཛིན་དང་། སློབ་གསོ་དང་འབྲེལ་ཡོད་དགེ་རྒན་དང་ལས་བྱེད་སོགས་ལོ་གཉིས་ནང་སྤྱི་ཁྱབ་ཚོགས་འདུ་ཞིག་འཚོགས་ཏེ་ལས་དོན་ཡར་རྒྱས་དང་ཚགས་ཚུད་ཡོང་ཕྱིར་འབད་བརྩོན་བྱ་རྒྱུ། སྤྱི་མོས།
༢ བོད་ཡིག་སྦྱོང་བཞིན་པའི་སློབ་ཕྲུག་ཚོའི་བར་ལ་བོད་ཡིག་འབྲི་ཀློག་དང་གཞས་སྣ་འགྲན་བསྡུར་གྱི་དུས་སྟོན་དེ་འདྲ་གོ་སྒྲིག་བྱ་རྒྱུ། སྤྱི་མོས།
༣ བོད་ཡིག་སྦྱོང་བཞིན་པའི་སློབ་ཕྲུག་ཚོར་དབྱར་ཁའི་སློབ་གྲྭའི་གུང་གསེང་སྐབས་དང་སྟབས་བསྟུན་ཏེ། བོད་ཀྱི་རིག་གཞུང་ཟབ་སྦྱོང་གི་ལས་རིམ་བདུན་ཕྲག་གཉིས་ལས་མི་ཉུང་བ་གོ་སྒྲིག་བྱ་རྒྱུ།
༤ ཡུ་རོབ་བོད་རིགས་མི་མང་ཚོའི་ཆེད་དུ་བོད་ཚོགས་དང་བོད་བརྒྱུད་ནང་བསྟན་ཆོས་ཚོགས་ཁག་ཟུང་འབྲེལ་གྱིས་སྒོ་ནས་བོད་ཀྱི་ནང་ཆོས་ངོ་སྤྲོད་དང་བགྲོ་གླེང་གི་ལས་གཞི་བང་རིམ་བསྒྲིགས་ཏེ་མང་ཚོགས་ཁྲོད་ནང་ཆོས་གོ་རྟོགས་གོང་མཐོར་གཏོང་རྒྱུ། སྤྱི་མོས།

དཔལ་འབྱོར་སྐོར།
༡ ཡུ་རོབ་བོད་རིགས་ཚོགས་པ་ཁག་གི་དཔལ་འབྱོར་ཡར་རྒྱས་ཐད་ཚོགས་པ་ཚང་མས་ལོ་རེར་ཚོགས་དངུལ་གཏན་འབེབ་ལྟར་ངེས་པར་དུ་བསྡུ་རྒྱུ། སྤྱི་མོས།
༢ ཡུ་རོབ་བོད་རིགས་ཚོགས་པའི་ཚོགས་དངུལ་བསྡུ་རུབ་ལས་སླ་བོའི་ཡོང་ཆེད། དངུལ་ཁང་བརྒྱུད་བོད་རིགས་ཚོས་དངུལ་ཁང་འཛིན་བྱང་ཨང་ཀིའི་སྟེང་ཚོགས་མི་ཚོས་དྭངས་བླངས་ཀྱིས་ཐད་གཏོང་བྱ་རྒྱུ། སྤྱི་མོས།
༣ ཡུ་རོབ་བོད་རིགས་ཚོགས་པས་ས་གནས་ཀྱི་གཞུང་དང་། རྫོང་སྡེ་ཁག་གཙོ་བོ་བྱས་ཏེ་འབྲེལ་ཡོད་ཚན་པ་བཅས་ཀྱིས་འཆར་གཞི་མཉམ་སྒྲིག་བྱས་ཏེ་དཔལ་འབྱོར་འདུ་འགོད་བྱ་རྒྱུ། སྤྱི་མོས།
༤ བོད་གཞུང་གི་ལས་འཆར་ངེས་གཏན་ལ་གཞིགས་ཏེ་ལོ་རེར་ཡུ་རོབ་བོད་རིགས་མི་རེའི་ངོས་ནས་བོད་གཞུང་ལ་ཡུ་སྒོར་རེའི་ཞལ་འདེབས་འབུལ་རྒྱུ། སྤྱི་མོས།
༥ ཡུ་རོབ་བོད་རིགས་ཚོགས་པའི་ངོས་ནས་ས་གནས་མི་འབོར་ལ་གཞིགས་ཏེ་ལོ་རེར་མི་རེས་ཡུ་སྒོར་རེ་འབུལ་རྒྱུ། མང་མོས།
༦ བོད་རིགས་ཚོགས་པའི་དཔལ་འབྱོར་འདུ་འགོད་ཆེད་ས་གནས་སོ་སོའི་དུས་ཆེན་སྐབས་ཚོང་ཟོག་དང་ཟས་རིགས་ཚོང་བསྒྱུར་བྱ་རྒྱུ། སྤྱི་མོས།
༧ ས་གནས་བོད་རིགས་ཚོགས་པས་བོད་གཞུང་གི་དཔལ་འབྱོར་ལ་དམིགས་ཏེ་མཛད་སྒོ་ཞིག་གོ་སྒྲིག་བྱས་ཏེ་ཁེ་འབེབ་ཡོངས་རྫོགས་བོད་གཞུང་ལ་འབུལ་རྒྱུ། སྤྱི་མོས།

དྭང་བླངས་དཔྱ་ཁྲལ་ལག་དེབ།
༡ ཡུ་རོབ་སྐུ་ཚབ་དོན་གཅོད་དང་བོད་རིགས་ཚོགས་པ་ཟུང་འབྲེལ་གྱིས་འགན་འཁུར་ནས་དཔྱ་ཁྲལ་འབུལ་མི་མང་དུ་གཏོང་ཐབས། སྤྱི་མོས།
༢ དྭང་བླངས་དཔྱ་ཁྲལ་འབུལ་མཁན་ཇེ་མང་ཡོང་ཐབས་སུ་བཙན་བྱོལ་གཞུང་ནས་ད་ཡོད་ཀྱི་དཔྱ་ཁྲལ་དཀའ་ངལ་སེལ་ཆེད་དམིགས་བསལ་ཐུགས་སྣང་ཡོང་རྒྱུར་རེ་སྐུལ་ཞུ་རྒྱུ། སྤྱི་མོས།
༣ དཔྱ་ཁྲལ་དངུལ་འབོར་བྱུང་སོང་ཅི་ཡིན་བོད་རིགས་ཡོངས་ཀྱི་ཤེས་རྟོགས་གཙང་མ་ཡོང་ཆེད་བོད་རིགས་ཚོགས་པའི་ཚོགས་གཙོ་རྣམ་པས་མི་མང་ཚོར་གསལ་བཤད་གཙང་མ་ཡོད་པ་བཟོ་རྒྱུ། སྤྱི་མོས།
༤ དྭང་བླངས་དཔྱ་ཁྲལ་མི་འབུལ་མཁན་ཚོ་གསལ་ཁ་གཙང་མ་ཡོང་སླད། དུས་དྲན་དང་དུས་ཆེན་སྐབས་དྲན་གསོའི་ཆེད་མིང་ཐོ་ཟུར་འདོན་བྱ་རྒྱུ། སྤྱི་མོས།

ལས་འགུལ་མཉམ་འབྲེལ་གོང་འཕེལ།
༡ ཡུ་རོབ་བོད་རིགས་ཚོགས་པའི་འབྲེལ་ལམ་དང་ལས་འགུལ་གོང་འཕེལ་ཡོང་སླད་ཚོགས་གཙོ་ཁག་གིས་དྲ་ལམ་skypeབརྒྱུད་ཟླ་རེར་ལས་དོན་ཐད་འབྲེལ་བ་གཏིང་ཟབ་གནང་རྒྱུ། ༼འདི་ཡུ་རོབ་བོད་རིགས་མི་མང་ཚོགས་ཆེན་སྐབས་གཉིས་པའི་གོ་སྒྲིག་ཚོགས་ཆུང་གི་ཉམས་མྱོང་གཞིར་བཞག་པ་ཞིག་ཡིན། ༽སྤྱི་མོས།
༢ ཕྱི་ལོ་༢༠༡༡་ལོའི་ཡུ་རོབ་བོད་རིགས་ཚོགས་པའི་ཚོགས་གཙོའི་ཚོགས་འདུ་བྷེལ་ཇམ་དུ་ཚོགས་སྐབས་བོད་དོན་ལ་དོ་སྣང་ཡོང་ཆེད་ཡུ་རོབ་མཉམ་འབྲེལ་མཐུན་ཚོགས་ཀྱི་གྲོས་ཚོགས་འཐུས་མིར་ཐུགས་སྣང་གཞེན་བསྐུལ་ཞུ་རྒྱུ། སྤྱི་མོས།
༣ དབྱར་ཁའི་སློབ་མའི་གུང་གསེང་སྐབས་སུ་ས་གནས་རང་ནས་བྱིས་པའི་རིག་གཞུང་དུས་སྟོན་གོ་སྒྲིག་དང་། ཡང་ན་ཡུ་རོབ་བོད་རིགས་ཚོགས་པ་ཁག་རེས་མུས་མཉམ་འབྲེལ་གྱིས་ས་གནས་གཅིག་ཏུ་འཛོམས་ནས་བྱིས་པའི་རིག་གཞུང་དུས་སྟོན་གོ་སྒྲིག་བྱ་རྒྱུ། སྤྱི་མོས།
༤ ཡུ་རོབ་བོད་རིགས་ཚོགས་པ་ཚང་མའི་འགན་འཛིན་ལྷན་ཚོགས་ཀྱི་ལས་ཡུན་ལོ་གསུམ་རིང་གཅིག་གྱུར་ཡོང་བ་བྱ་རྒྱུ། མང་མོས།

ཆབ་སྲིད་ལས་དོན།
༡ ལོ་གཉིས་རེའི་མཚམས་སུ་ཡུ་རོབ་བོད་རིགས་ཚོགས་པ་ཁག་མཉམ་འབྲེལ་གྱིས་ས་གནས་གང་རུང་ཞིག་ཏུ་ལྷན་འཛོམས་ཀྱི་གསུམ་བཅུའི་དུས་དྲན་བརྩི་སྲུང་བྱ་རྒྱུ་དེ་རྒྱུན་འཁྱོངས་བྱ་རྒྱུ། སྤྱི་མོས།
༢ ཡུ་རོབ་ས་གནས་ཁག་ཏུ་བོད་རྒྱ་མཐུན་ཚོགས་གསར་འཛུགས་ཆེད། ས་གནས་ཀྱི་རྒྱ་རིགས་མི་སྣ་ཁག་དང་འབྲེལ་ལམ་གོང་འཕེལ་བཏང་སྟེ། བོད་དོན་གོ་རྟོགས་འཕེལ་རྒྱས་དང་། རིག་གཞུང་བརྗེ་རིས་སོགས་བྱ་རྒྱུ། སྤྱི་མོས།
༣ ཡུ་རོབ་བོད་རིགས་ཚོགས་ཆེན་སྐབས་གསུམ་པའི་མཇུག་བསྡོམས་མཛད་སྒོའི་སྐབས་སུ་ཚོགས་བཅར་བ་ཡོངས་ཀྱིས་ས་གནས་རང་ནས་ལས་དོན་དྲིལ་བསྒྲགས་ཆེད་མར་མེ་ཁྲོམ་སྐོར་བྱ་རྒྱུ། སྤྱི་མོས། བཅས་ཕྱི་ལོ་༢༠༡༠ ཟླ་བ་ ༡༠ པའི་ཚེས་ ༡༧ ཉིན་ཡུ་རོབ་བོད་རིགས་ཚོགས་ཆེན་ཐེངས་གཉིས་པ་ཕ་རན་སིའི་རྒྱལ་ས་པ་རེ་སིར་གྲོས་ཆོད་དུ་གཏན་ལ་ཕབ་པ།

སྔོན་ཐོན་དང་རྗེས་ལུས།
སྔོན་ཐོན།
རྩོད་སྙོག་དང་ནང་མཁོན་སྔོན་ཐོན།
ཕྲག་དོག་དང་ཟུར་ཟ་སྔོན་ཐོན།
འཐེན་ཁྱེར་དང་ཕྱོགས་འཛིན་སྔོན་ཐོན།
གཡོ་རྒྱུ་དང་རྫུན་གཏམ་སྔོན་ཐོན།
དུས་ནམ་ཡང་སྔོན་ཐོན།
ཕྱོགས་གང་ཐད་སྔོན་ཐོན།

རྗེས་ལུས།
བསམ་བློ་དང་ལྟ་བ་རྗེས་ལུས།
སྤྱོད་པ་དང་འཆར་གཞི་རྗེས་ལུས།
མདུན་བསྐྱོད་དང་ཁ་ཕྱོགས་རྗེས་ལུས།
ལྷག་བསམ་དང་རོགས་སྐྱོར་རྗེས་ལུས།
དཔལ་འབྱོར་དང་འཛུགས་སྲུན་རྗེས་ལུས།
དུས་ནམ་ཡང་ང་ཚོ་རྗེས་ལུས་།
ཕྱོགས་གང་ཐད་ནས་ང་ཚོ་རྗེས་ལུས།

དེ་རིང་རེབ་གོང་ན་མི་རིགས་འདྲ་མཉམ་དང་སྐད་ཡིག་མཐོང་ཆེན་དགོས་ཚུལ་གྱི་སློབ་མའི་ཁྲོམ་སྐོར་ཞིག་བྱེད་ཀྱི་ཡོད་ཚུལ་བརྗོད་ཀྱི་འདུག་པས། དེ་བདེན་མིན་མ་ཤེས་མོད། གལ་སྲིད་རེབ་གོང་བ་རེ་ཡོད་ན་མྱུར་དུ་ཕ་ཡུལ་ལ་འབྲེལ་བ་བྱེད་ན་ལེགས་ཚོད་རེད།

ཚོགས་འདུ་ནི་འདི་ནི་རླབས་ཆེ་བ་ཞིག་རེད། གྲོས་ཆོད་དག་ཀྱང་ཤོག་བུའི་སྟེང་གི་སྟག་ཏུ་མི་འགྱུར་བར་ལག་ལེན་འདེབས་ཐུབ་པའི་རེ་བ་སྙིང་ནས་ཞུ།

ཧྥ་རན་སི་ཡི་རྫོང་མཁར་བཅུ་གསུམ་ཙམ་གྱི་སྟེང་ན་བོད་ཀྱི་རྒྱལ་དར་ཡོད་པ་དེ་ཡང་བོད་དོན་རྒྱབ་སྐྱོར་མཚོན་བྱེད་གལ་ཆེན་ཞིག་རེད། ད་དེ་མར་ཕབ་དགོས་སྐོར་བཤད་ཀྱིན་ཡོད་ན་དེ་ཡང་དོ་སྣང་དང་གཟབ་ནན་བྱེད་དགོས་ས་ཞིག་རེད་འདོད་ཀི བོད་གཞུང་ལ་ཁ་གཏོང་བ་དེ་ཡང་དོ་སྣང་ངང་རྒྱུ་མཚན་ལ་གཞོལ་བའི་གཏམ་ཡིན་མིན་དཔྱོད་དགོ

ཡོ་རོབ་ཀྱི་བོད་རིགས་ཚོགས་ཆེན་ཐེངས་གཉིས་པ་ཚོགས་པར་བསྔགས་བརྗོད་ཡོད།

ཡོ་རོབ་ས་ཁུལ་དུ་ཚོགས་འདུ་མང་པོ་ཚོགས་གི་འདུག་ཀྱང་གྲོས་ཆོད་བཞག་པ་དེ་ཚོ་ལག་ལེན་ལྟར་བའི་ལུགས་སྲོལ་མེད། ད་དུང་ཚོགས་འདུ་ཚོགས་ཨ་་་་་ཡོ་རོབ་བོད་རིག་ཚོགས་པའི་ཚོགས་འདུ་་་་་་བོད་རྒྱ་མཛའ་འབྲེལ་ཚོགས་པའི་ཚོགས་འདུ་་་་་ཡོ་རོབ་གཞོན་ནུའི་ཚོགས་འདུ་་མང་གི་ཡ་རྗེས་སུ་གྲོས་ཆོད་བཞག་པ་དེ་ཚོ་ལག་ལེན་ཡོད་པ་གནང་རོགས་ཞེས་འབོད་སྐུལ་ཞུ་བཞིན་ཡོད།

སྔོན་མ་གྲོས་མཐུན་དོན་ཚན་ཅུ་བདུན་རྒྱ་དཔོན་ཚོའི་བཙན་དབང་འོག་ཏུ་བཞག་བཅུག་པ་རེད། ད་ལན་བོད་རང་བཙན་ཐོབ་ཀྱང་བོད་ལ་ལོག་འདོད་མེད་པའི་བོད་རིགས་ཚོགས་པའི་ཁག་གི་ཚོགས་མི་ཡིན་ཟེར་མཁན་འདིར་ཚོ་ལ་གྲོས་ཆོད་འདི་འདྲ་སུ་ཡི་བཙན་དབང་བཏང་ནས་འཇོག་བཅུག་པ་ཡིན་ནམ། གནས་ཚུལ་ཤེས་མཁན་འདྲ་ཡོད་ན་གསལ་བཤད་ཤིག་གནང་རོགས་ཞུ།

དེང་སང་བོད་མིའི་སྤྱི་ཚོགས་ཁྲོད་མང་གཙོར་གོ་བ་ལོག་སྒྲུབ་དང་། ༧གོང་ས་༧སྐྱབས་མགོན་ཆེན་པོ་མཆོག་དང་མང་གཙོ་བར་དབར་གདམ་ཀ་ཟེར་བའི་ཀླད་མེད་ཀྱི་འཆལ་གཏམ་སྤེལ་མཁན་དེ་རིགས་ལ་མང་ཚོགས་ཀྱིས་རྩ་བ་ཉིད་ནས་མགོ་འཁོར་མི་རུ། ༼མང་མོས ༽ཞེས་འདི་ཡང་ད་རབ་ཀྱི་ཚོགས་འདུའི་ཆབ་སྲིད་དང་འབྲེལ་བའི་གྲོས་ཆོད་ཅིག་རེད།

ཉེ་སྔོན་ནས་བརྒྱུད་ལམ་ཁག་ནས་རྒྱལ་བ་རིན་པོ་དང་མང་གཙོ་གཉིས་ལས་གང་གལ་ཆེ་ཞེས་པའི་གླེང་གཞི་ཞིག་བྱུང་བ་རེད། དེ་ཡང་དང་པོ་བསམ་ཚུལ་བསྡུ་ལེན་གྱི་ཚུལ་ཡོང་བ་རེད། དེ་ལ་མི་སྒེར་རེ་ཟུང་གི་རྩོམ་ཡིག་སྤེལ་བ་དེ་འདྲ་བྱུང་ཡོད་པ་རེད། ཡིན་ནའང་དེ་དག་གོང་གསལ་གྲོས་ཆོད་ནང་འཁོད་པ་ལྟར་༼ མང་གཙོར་གོ་ལོག་སྒྲུབ་༽ དང་༼ སྐྱབས་མགོན་རིན་པ་ཆེ་དང་མང་གཙོའི་དབར་གདམ་ཀ ༽ ཕྱེས་པའམ། ཡང་ན་༼ ཀླད་མེད་ཀྱི་འཆམ་གཏམ་སྤེལ་ ༽བ་ཡིན་ནམ།

རྒྱལ་ཁག་བཅུ་གཉིས་ནས་ཕེབས་པའི་སྐུ་ཚབ་ཚོས་འདི་འདྲའི་བརྗོད་ཚིག་རྩུབ་པའི་གྲོས་ཆོད་ཅིག་བཞག་པ་དེར་ཅུང་མ་བདེ་བ་འདྲ་ཞིག་བྱུང་། སྐུ་ཚབ་མང་ཤོས་ཤ་དར་ཁྲག་དར་གྱི་གཞོན་སྐྱེས་རྐྱང་རེད། མང་གཙོ་དང་འགྲོ་བ་མིའི་ཐོབ་ཐང་། ཁྲིམས་ཀྱི་དབང་བསྒྱུར་གྱི་མིག་དཔེར་རུང་བའི་ཡུ་རོབ་རྒྱལ་ཁབ་ཁག་ནས་ཕེབས་པ་རེད། མ་མཐར་ཡང་གོ་བ་ལོག་སྒྲུབ་བྱས་མིན་དང་། གདམ་ཀ་ཕྱེས་མིན། འཆལ་གཏམ་ཡིན་མིན་གསལ་བོར་མཁྱེན་ཡོད་ཀྱི་རེད་བསམ།

ད་ཐེངས་ཡུ་རོབ་བོད་རིགས་ཚོགས་ཆེན་ཐེངས་གཉིས་པ་ལེགས་གྲུབ་བྱུང་པར་བཀྲ་ཤིས་བདེ་ལེགས་ཞུ། མུ་འཐུད་ཚོགས་ཆེན་འདིའི་རིགས་གངས་མང་འཚོགས་ཐུབ་པར་རེ་བ་ཡོད་ལ། ཚོགས་ཆེན་ཚོགས་པ་ཙམ་མིན་པར་དེ་རིགས་ཀྱི་ལས་འགུལ་གང་མང་སྤེལ་ཐུབ་པ་དང་། གྲོས་མཐུན་ཆ་རྐྱེན་དེ་ཚོ་ལག་ལེན་ཐོག་ལེགས་བསྟེར་ཐུབ་པའི་རེ་བའང་ཡོད།