ང་ཚོས་ལས་རྒྱུ་འབྲས་བརྩི་དགོས་པ་རེད།

འདས་པའི་ལོ་ཤས་ནས་ཡུ་རོབ་ནང་བོད་དོན་རྒྱབ་སྐྱོར་ཚོགས་པ་དང་བོད་རིགས་ཚོགས་པ་ཁག་གི་བར་ལས་དོན་མཉམ་རུབ་ཡོང་མི་ཐུབ་པའི་དཀའ་ངལ་ཞིག་འཕྲད་ཡོད་ལ། དེ་དོན་བོད་དོན་རྒྱབ་སྐྱོར་ཚོགས་པ་ཁག་ཅིག་གིས་ཡིག་ངག་ཅི་རིགས་ནས་བོད་གཞུང་སྐུ་ཚབ་དོན་གཅོད་ལ་སྙན་གསེང་ཀྱང་ཕུལ་ཡོད། འདི་ག་གསར་ཁང་གིས་དེའི་སྐོར་ཆེད་དུ་ཡུ་རོབ་སྐུ་ཚབ་དོན་གཅོད་བཀྲ་ཤིས་དབང་འདུས་ལགས་སུ་བཅར་འདྲི་བྱས་པ་ཡིན།

བོད་ཀྱི་དུས་བབ། ད་ལྟའི་ཆར་ཡུ་རོབ་ནང་བོད་དོན་རྒྱབ་སྐྱོར་ཚོགས་པ་ག་ཚོད་ཅིག་ཡོད་པ་རེད།
སྐུ་ཚབ་དོན་གཅོད། འདིའི་སྐོར་ང་ལ་ཁ་གསལ་གྱི་གྲངས་ཀ་ཏག་ཏག་ཅིག་བཤད་རྒྱུ་མེད། ཕལ་ཆེར་སུམ་བརྒྱ་ཙམ་མེད་འགྲོ། པོ་ལན་ཌི་གཙོས་པའི་ཤར་ཡུ་རོབ་ནང་ལ་རྒྱབ་སྐྱོར་ཚོགས་པ་གང་ལ་གང་འཚམ་ཞིག་ཡོད་པ་རེད། གང་ལྟར་ཧྥ་རན་སིའི་ནང་མང་ཤོས་འདྲ་བོ་རེད། ཕལ་ཆེར་ཡུ་རོབ་ཚང་མའི་ནང་ལ་ཉིས་བརྒྱ་ནས་སུམ་བརྒྱ་མ་ཟིན་ཙམ་ཡོད་པ་རེད།

བོད་ཀྱི་དུས་བབ། ཡུ་རོབ་ནང་ཡོད་པའི་ས་གནས་ཁག་གི་བོད་རིགས་ཚོགས་པ་དང་། གནས་ཡུལ་རྒྱལ་ཁབ་ཁག་ནང་ཡོད་པའི་བོད་དོན་རྒྱབ་སྐྱོར་ཚོགས་པ་ཁག་གི་འབྲེལ་ལམ་གྱི་གནས་སྟངས་དེ་གང་འདྲ་ཡིན་ནམ།
སྐུ་ཚབ་དོན་གཅོད། ས་གནས་སོ་སོའི་ནང་འདྲ་མི་འདྲ་རེད་འདུག ནོར་ཝེ་ལྟ་བུ་ཡིན་ན་ཧ་ལས་པའི་འབྲེལ་ལམ་ཡག་པོ་འདུག ཧྥ་རན་སིའི་ནང་ལྟ་བུ་ལ་མཚོན་ན་བོད་དོན་རྒྱབ་སྐྱོར་ཚོགས་པ་མང་པོ་ཡོད་པ་རེད། བོད་དོན་རྒྱབ་སྐྱོར་ཚོགས་པ་ཁོང་ཚོའི་ནང་ལའང་ནང་ཁུལ་ཕན་ཚུན་མ་འཆམ་པ་དེ་འདྲ་འདུག དེའི་སྒང་ལ་ཁོང་ཚོས་ས་གནས་བོད་རིགས་ཚོགས་པས་འབྲེལ་ལམ་ཡག་པོ་གནང་གི་མི་འདུག་ཅེས་སྐད་ཆ་གང་ལ་གང་འཚམ་ཞིག་ཚུར་ལབ་ཡོང་གི་འདུག དོན་གཅོད་ལས་ཁུངས་ནང་ལའང་དེ་འདྲའི་བློ་ཕམ་དང་བསམ་ཚུལ་བཤད་མཁན་མང་ནས་མང་དུ་ཡོང་གི་འདུག ངའི་ཚོར་སྣང་ལ་བར་སྐབས་ཤིག་ནས་འབྲེལ་ལམ་དེ་ཐག་རིང་ནས་རིང་དུ་འགྲོ་གི་ཡོད་པའི་ཟོལ་ཞིག་འདུག དེ་ཡག་པོ་ཞིག་ཏུ་མཐོང་མ་སོང་།

བོད་ཀྱི་དུས་བབ། བོད་དོན་རྒྱབ་སྐྱོར་ཚོགས་པ་ཚོའི་ངོས་ནས་བོད་རིགས་ཚོགས་པ་ཁག་དང་འབྲེལ་ལམ་ཡག་པོ་མི་ཡོང་བའི་དཀའ་ངལ་ཆེ་ཤོས་ག་རེ་སྒང་ལ་བཤད་ཡོང་གི་འདུག
སྐུ་ཚབ་དོན་གཅོད། གཙོ་བོ་མཉམ་རུབ་ཡོང་གི་མི་འདུག་ཟེར་བ་དེ་རེད། ང་ཚོས་ནུས་ཤུགས་དང་དུས་ཚོད་བཏང་ནས་ལས་འགུལ་སྤེལ་སྐབས་བོད་པ་ཚོ་ཡོང་གི་མི་འདུག ལས་འགུལ་སྐབས་བོད་རིགས་ཚོགས་པ་ཁག་ལ་དུས་ཐོག་ཡིག་འབྲེལ་བྱས་ནའང་ཚུར་ཡིག་ལན་ཙམ་ཡང་ཡོང་གི་མི་འདུག ང་ཚོས་ལས་འགུལ་གང་སྤེལ་བ་དེ་བོད་པ་ཚོའི་ཆེད་དུ་ཡིན་ཟེར་བ་འདྲ་བོ་མང་པོ་ཞིག་ལབ་ཡོང་གི་འདུག ཁོང་རང་ཚོས་བཤད་པ་དེ་དངོས་ཡོད་གནས་ཚུལ་རང་རེད། བློ་ཕམ་དང་བསམ་ཚུལ་འདི་རིགས་ཧྥ་རན་སི་གཅིག་པུའི་ནང་མིན་པར་བོད་དོན་རྒྱབ་སྐྱོར་ཚོགས་པ་གང་འཚམ་ཡོད་པའི་ལུང་པ་ཁག་གི་ནང་གཅིག་མཚུངས་འདྲ་བོ་བྱས་ནས་ཡོང་གི་འདུག

བོད་ཀྱི་དུས་བབ། བོད་རིགས་ཚོགས་པ་ཚོས་དཀའ་ངལ་ཆེ་ཤོས་ག་རེ་སྒང་ནས་བཤད་ཡོང་གི་འདུག
སྐུ་ཚབ་དོན་གཅོད། བོད་རིགས་ཚོགས་པ་ཁ་ཤས་ཀྱིས་འདི་འདྲ་བཤད་ཡོང་གི་འདུག རྒྱབ་སྐྱོར་ཚོགས་པ་ཁོ་ཚོ་ནང་ཁུལ་འཆམ་པོ་མི་འདུག ཚོགས་པ་འདི་དང་འདིས་དངུལ་བཟོ་བའི་ཆེད་དུ་ལས་ཀ་བྱེད་གི་ཡོད་པ་རེད། ཡང་ཚོགས་པ་འདི་དང་འདིས་ཆབ་སྲིད་ཀྱི་ལྟ་བ་དང་ལངས་ཕྱོགས་ཡག་པོ་མི་འདུག དེ་འདྲའི་རིགས་ལ་འབྲེལ་ལམ་འཛིན་རྒྱུར་དཀའ་ལས་འདུག ཕལ་ཆེ་བ་ཚོས་དེ་འདྲ་བཤད་ཡོང་གི་འདུག

བོད་ཀྱི་དུས་བབ། སྐུ་ཚབ་དོན་གཅོད་ཁྱེད་རང་གི་ངོས་ནས་ཕྱོགས་གཉིས་ཀའི་དཀའ་ངལ་དེ་ག་འདྲ་ཞིག་ལ་ངོས་འཛིན་གནང་གི་ཡོད།
སྐུ་ཚབ་དོན་གཅོད། དཀའ་ངལ་གཙོ་བོ་དེ་དུས་རྒྱུན་ནས་ཕྱོགས་གཉིས་ལ་འབྲེལ་ལམ་མེད་པ་དེ་རེད། ལས་འགུལ་གཅིག་པུའི་སྐབས་མིན་པར་ནམ་རྒྱུན་ནས་བོད་པ་ཚོས་ལོ་གསར་དང་། འཁྲུངས་སྐར་དུས་ཆེན། གང་ལྟར་མཛད་སྒོ་འདྲ་བོ་དེ་འདྲའི་སྐབས་ལ་བོད་དོན་རྒྱབ་སྐྱོར་ཚོགས་པ་དེ་ཚོ་ལ་མགྲོན་ཤོག་ཕུལ་ནས་འབྲེལ་བ་བཟུང་བསྡད་པ་ཡིན་ན་དཀའ་ངལ་འདི་རིགས་ཡོང་གི་མ་རེད་བསམ། ཁོ་རང་ཚོས་ལོ་མང་པོའི་རིང་ལ་བོད་ལ་རྒྱབ་སྐྱོར་གྱི་ཕྱག་ལས་གནང་བ་རེད། ང་ཚོ་བོད་པ་ཚོས་དེ་ལ་དགའ་ཚོར་དང་ཐུགས་རྗེ་ཆེ་ཞེས་པའི་རྣམ་པ་ཞིག་བསྟན་པ་ཡིན་ན་ཕར་ཕྱོགས་དེ་ཡང་མི་ཡིན་དུས་བསམ་བློ་ཞིག་ཏན་ཏན་འཁོར་གི་རེད། འདི་གཅིག་རེད། ལོ་བཅུ་བཅོ་ལྔའི་སྔོན་ལ་ཡིན་ན་ལས་འགུལ་ག་རེ་ཡིན་ནའང་མང་ཤོས་དེ་བོད་དོན་རྒྱབ་སྐྱོར་ཚོགས་པ་ཚོས་འགན་གཙོ་བོ་བཞེས་ནས་གནང་བསྡད་ཡོད་པ་རེད། ད་ལྟ་ཡིན་ན་ས་གནས་ཚང་མར་བོད་པ་མང་དུ་སོང་ཡོད་དུས་ལས་འགུལ་ཡིན་ན་རེད། ག་རེ་སྒང་ལ་ཡིན་ན་བོད་པ་ཚོས་འགན་ཤུགས་ཆེན་པོ་འཁུར་ཡོང་གི་ཡོད་པ་རེད། དེ་ལ་རྒྱབ་སྐྱོར་ཚོགས་པ་དེ་ཚོར་ལྟ་སྣང་མཐོང་ཚུལ་འདྲ་ཡོང་གི་ཡོད་ས་རེད། འདི་ཡང་ཁོ་ཚོའི་བར་གྱི་དཀའ་ངལ་འདྲ་བོ་ཞིག་རེད། ལས་འགུལ་ནང་མཉམ་ཞུགས་བྱེད་སྐབས་གཅིག་གཅིག་གི་གདོང་ལ་ཐོན་མ་ཐོན་པའི་གནས་སྟངས་ཐོག་ནས་ཕན་ཚུན་མཐུན་ལམ་རིང་དུ་འགྲོ་གི་ཡོད་ས་རེད། དེ་མིན་ཁོ་རང་ཚོས་བཤད་པ་ལྟར་རེད།

བོད་ཀྱི་དུས་བབ། ད་ལྟ་ཕྱོགས་གཉིས་ཀས་ལས་འགུལ་མཉམ་རུབ་ཡོང་གི་མི་འདུག་ཟེར་གི་ཡོད་པ་རེད། ཁྱེད་ཀྱི་དགོངས་ཚུལ་བྱས་ན་ལས་འགུལ་མཉམ་རུབ་ཡོང་སའི་ཕྱོགས་གང་དག་འདུག
སྐུ་ཚབ་དོན་གཅོད། ནམ་རྒྱུན་ལས་འགུལ་མ་སྤེལ་བའི་སྔོན་ནས་ཕན་ཚུན་གཉིས་ཀས་གོ་བསྡུར་ཡག་པོ་བྱས་ནས་སོང་བ་ཡིན་ན་དཀའ་ངལ་འཕྲད་ཀི་མ་རེད། དེ་མིན་ང་ཚོས་རང་བཙན་རྩོད་གི་ཡོད་ཟེར་བ་དང་། ང་ཚོ་དབུ་མའི་ལམ་ལ་འགྲོ་གི་ཡོད་ཟེར་བ་འདྲ་བོ་བརྩད་བསྡད་ན་ཡོང་རྒྱུ་ཡོད་པ་མ་རེད། གསུམ་བཅུའི་དུས་དྲན་དང་། དམངས་གཙོའི་དུས་ཆེན། དེ་དང་ནང་བཞིན་རྒྱ་ནག་གི་དཔོན་རིགས་ཚོ་ཡོང་སྐབས་ཡིན་ན་རེད། འགྲོ་བ་མིའི་ཐོབ་ཐང་དང་། ད་ལྟའི་ཆ་ལ་བོད་ནང་དམ་དྲག་ཆེན་པོ་རེད། རྒྱ་ནག་གཞུང་གིས་༧རྒྱལ་བ་རིན་པོ་ཆེ་དང་བཀའ་མོལ་གནང་དགོས་ཞེས་ལས་འགུལ་ག་ཚོད་ཅིག་སྤེལ་བ་ཡིན་ནའང་མཉམ་རུབ་དང་མཉམ་ཞུགས་ཡོང་མི་ཐུབ་པའི་དཀའ་ངལ་ཞིག་ངས་མཐོང་གི་མི་འདུག འདི་དག་མཉམ་རུབ་ཡོང་སའི་ཕྱོགས་འདྲ་བོ་རེད། མཚམས་ལ་ལར་བོད་པ་རང་གིས་སྤེལ་དགོས་པའི་ལས་འགུལ་ཡོད་པ་རེད། བོད་པ་ལས་རྒྱབ་སྐྱོར་བ་ཚོས་སྤེལ་བ་ཡིན་ན་ལས་འགུལ་གྱི་ཤུགས་ཆེ་རུ་འགྲོ་བ་དེ་འདྲ་ཡང་ཡོད་པ་རེད། དེ་འདྲའི་རིགས་ཡིན་གཅིག་མིན་གཉིས་མཉམ་རུབ་གནང་དགོས་དོན་ཡོད་མ་རེད།

བོད་ཀྱི་དུས་བབ། ཁྱེད་རང་གི་དགོངས་ཚུལ་བྱས་ན་དཀའ་ངལ་འདི་རིགས་སེལ་ཐབས་ཀྱི་ལམ་ཁ་ག་རེ་ཡོད་པ་རེད།
སྐུ་ཚབ་དོན་གཅོད། བོད་རིགས་ཚོགས་པ་ཚོར་མཚོན་ན་ད་ལྟ་ད་དུང་བུ་གུ་ཆུང་ཆུང་ནང་བཞིན་གོམ་པ་ཐ་རེ་ཐོ་རེ་བརྒྱབ་བསྡད་པའི་སྒང་རེད། ཚོགས་པའི་ནང་ལས་ཀ་བྱེད་མཁན་ཡིན་ནའང་ལུང་བ་གསར་པ་ཞིག་གི་ནང་སླེབས་ཡོང་དུས་དང་པོ་སོ་སོའི་ལས་ཀ་དང་ལྟོ་གོས་གནས་སྟངས་འགྲིག་མ་འགྲིག་ཡོད་པ་རེད། སོ་སོའི་ནང་མི་ལ་ལྟ་རྟོག་བྱེད་དགོས་ཀྱི་ཡོད་པ་རེད། དེ་འདྲའི་ཞོར་ལ་ཚོགས་པའི་ལས་ཀ་བྱས་ཡོང་དུས། བོད་དོན་རྒྱབ་སྐྱོར་ཚོགས་པ་ཁག་དང་ཡུལ་མི་ཚོ་ནང་བཞིན་དུས་ཚོད་ཏག་ཏག་སྒང་ལ་ཡོང་ཐུབ་རྒྱུ་གནས་སྟངས་ཁག་པོ་རེད། ངས་དུས་རྒྱུན་ནས་རྒྱབ་སྐྱོར་ཚོགས་པ་ཚོར་ག་རེ་ལབ་གི་ཡོད་ཟེར་ན། ད་ལྟ་ཡུ་རོབ་ནང་ལ མཚོན་ན་བོད་པ་སླེབས་ནས་དུས་ཚོད་ཞེ་དྲག་མ་རེད། བོད་པ་ཚོ་གསར་བ་སོང་ཙང་སྒྲིག་འཛུགས་ལྷིང་ལ་འཇགས་དགོས་པའི་གནས་སྟངས་ཤིག་གི་སྒང་ནས་འགྲོ་གི་ཡོད་པ་རེད། གནས་སྟངས་འདི་འདྲ་ཞིག་གི་སྒང་ལ་ཕར་བོད་པ་ཚོར་འབྲེལ་བ་གནང་ཡོང་དུས་ཁྱེད་རང་ཚོའི་རེ་བ་ནང་བཞིན་མ་ཡོང་བ་རེད་མ་གཏོགས་རྐྱེན་གཞན་པ་ཡོད་པ་མ་རེད་ཅེས་ཞུས་སྡོད་ཀྱི་ཡོད། ཅེས་དང་།

དེ་ག་ནང་བཞིན་ཁོང་ཚོ་ལ། ཁྱེད་རང་ཚོས་བོད་པའི་དོན་དག་ལ་རྒྱབ་སྐྱོར་གནང་གི་ཡོད་པ་རེད། བོད་པའི་བསམ་ཚུལ་དང་བོད་པའི་རེ་འདུན་དེ་ཚོ་མཁྱེན་པ་བྱས་ནས་ལས་འགུལ་སྤེལ་རྒྱུ་གལ་ཆེན་པོ་རེད། དེ་འདྲ་སོང་ཙང་ལས་འགུལ་གཅིག་པུའི་སྐབས་མིན་པར་དུས་རྒྱུན་ནས་བོད་པ་ཚོར་འབྲེལ་བ་གནང་རྒྱུ་གལ་ཆེན་པོ་རེད་ཅེས་ཞུས་སྡོད་ཀྱི་ཡོད། དེ་ནས་བོད་པ་ཚོར། བོད་དོན་རྒྱབ་སྐྱོར་ཚོགས་པ་ཚོར་མཚོན་ན་ལོ་མང་པོའི་སྔོན་ནས་བོད་དོན་ཐོག་ལ་དཀའ་ལས་མང་པོ་བརྒྱབ་ཚར་བ་རེད། དེ་ཚོ་སྣང་མེད་བྱས་ནས་མ་བཞག་པར་ཕར་གུས་བརྩི་ཞུ་དགོས་པ་རེད། ཁོང་ཚོ་ཁ་ཤས་ཀྱིས་དངུལ་བཟོ་གི་ཡོད་ན་རེད། ལྟོ་གོས་ཀྱི་ཆེད་དུ་ལས་འགུལ་སྤེལ་གི་ཡོད་ན་རེད། ནང་ཁུལ་ལྟ་བ་མཐུན་མི་མཐུན་དང་། ལངས་ཕྱོགས་ཡག་མི་ཡག་གང་ཡིན་ཡང་དེ་གལ་ཆེན་པོ་མ་རེད་ལ། ང་ཚོ་ལ་ཁྱད་པར་ཡང་འགྲོ་གི་མ་རེད།  ཁོང་ཚོས་བོད་དོན་ཐོག་སེམས་ཁུར་བླངས་ནས་རྒྱབ་སྐྱོར་གནང་གི་ཡོད་པ་རེད། བོད་དོན་ཐོག་རྒྱབ་སྐྱོར་བྱེད་མཁན་ཞིག་ཡིན་ན་ལྟ་བ་གཡས་ལ་ཕྱོགས་ཡོད་ན་རེད། གཡོན་ལ་ཕྱོགས་ན་རེད། དངུལ་དང་ལྟོ་གོས་ཆེད་ཡིན་ན་རེད། བོད་དོན་དེ་བདེན་པའི་འཐབ་རྩོད་རེད། རྒྱ་ནག་གིས་ད་ལྟ་བོད་ལ་བཟུང་བའི་སྲིད་བྱུས་དེ་དྲང་བདེན་མ་རེད་ཅེས་བསམ་ཚུལ་བཤད་མཁན་དང་རྒྱབ་སྐྱོར་གནང་མཁན་ཡོད་ན། ང་ཚོས་རྒྱབ་སྐྱོར་བ་ཚང་མར་གཅིག་གྱུར་གྱི་ལྟ་སྟངས་དང་འབྲེལ་ལམ་འཛིན་དགོས་པ་གལ་ཆེན་པོ་རེད་ཅེས་ཞུས་བསྡད་ཡོད། འདི་ངས་བོད་པ་ཚོར་ཁ་གང་མཁས་བྱས་ནས་ཞུས་མེད། ང་རང་གིས་མྱངས་པའི་དངོས་ཡོད་གནས་ཚུལ་ཐོག་ནས་ཞུ་གི་ཡོད། ཅེས་གསུངས་སོང།

ཁོང་གིས་མུ་མཐུད་དུ་གསུངས་དོན། ཡུ་རོབ་ནང་ང་ལ་ཆ་རྒྱུས་ཡོད། སྔོན་མ་ང་རང་གཞོན་དུས་སློབ་སྦྱོང་ཡུ་རོབ་ནང་བྱས་པ་རེད། བོད་དོན་ཆེད་གཞུང་དང་ཚོགས་པ་དེ་འདྲ་ལ་འབྲེལ་བ་བཟུང་བ་རེད། སྔོན་མ་ང་ཧྥ་རན་སི་ནང་ཐེངས་དང་པོར་ཡོང་སྐབས་ཕྱི་སྲིད་ལས་ཁུངས་དེ་འདྲའི་སྒོ་ནང་ལ་འཛུལ་ས་ག་བ་ཡོད་པ་རེད། ཕྱི་སྲིད་ལས་ཁུངས་ཀྱི་གཤམ་འོག་གཤམ་འོག་གི་ལས་ཁུངས་ཤིག་གི་ལས་བྱེད་ཅིག་ལ་ཐུག་དགོས་ནའང་། ཟ་ཁང་དེ་འདྲའི་ནང་ཐུག་དགོས་གི་རེད། དེ་ཡང་དུས་ཚོད་བཟོས་པ་ལྟར་ཁོ་རང་སྔོན་ལ་ཟ་ཁང་ནང་ལ་ཡོང་། ཐུག་ཚར་རྗེས་ཡང་ཁོ་རང་སྔོན་ལ་ཐོན་གི་རེད། ཐོན་ཁར་ཚུར་ཁྱོད་ད་དུང་མར་མ་ཐོན་རོགས་ཞེས་བཤད་གི་རེད། ང་རང་ཡིན་ནའང་ཁོ་རང་ཐོན་ནས་གང་འཚམ་རྗེས་ལ་མ་གཏོགས་ཐོན་གི་མེད། དེ་འདྲ་རེད། དེང་སང་དེ་འདྲའི་དཀའ་ངལ་མེད་པར་ལས་ཁུངས་མཐོ་རུ་མཐོ་ཚད་དང་མི་སྣ་ཆེ་རུ་ཆེ་ཚད་ཚང་མར་ཐུག་ཆོག་ཆོག་ཅིག་ཡོད་པ་རེད། དེ་སུའི་བཀའ་དྲིན་ལས་བྱུང་བ་རེད། བོད་དོན་རྒྱབ་སྐྱོར་ཚོགས་པ་དེ་ཚོ་ལ་བརྟེན་ནས་བྱུང་བ་རེད། ང་ཚོས་ལས་རྒྱུ་འབྲས་བརྩི་དགོས་པ་རེད། སོང་ཙང་ཕན་ཚུན་གཉིས་བར་གུ་ཡངས་དང་བསམ་ཤེས། རྒྱུས་ལོན་ཐུབ་པའི་ཐོག་ནས་ནམ་རྒྱུན་གྱི་འབྲེལ་བ་ཡག་ཏུ་གཏོང་ཐུབ་པ་ཡིན་ན་དཀའ་ངལ་དེ་རིགས་ག་ལེ་ག་ལེར་སེལ་འགྲོ་གི་རེད།

གསར་འགོད་པ། ཟླ་བ་ཚེ་རིང་།