ཟླ་འདིའི་ཕྱི་ཚེས་ ༡༩ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་རྒྱལ་སྤྱིའི་བུད་མེད་གསར་འགོད་ཐེབས་རྩ་ཁང་གིས། འདི་ལོའི་གསར་འགོད་ལས་རིགས་ཀྱི་ཆེ་བསྟོད་གཟེངས་རྟགས་དེ་བོད་རིགས་བུད་མེད་ཚེ་རིང་འོད་ཟེར་ཚུད་པའི་རྒྱལ་ཁབ་འདྲ་མིན་གྱི་བུད་མེད་གསུམ་ལ་སྤྲད་ཡོད་ཅིང། ཐེངས་འདིའི་མཛད་སྒོའི་སྟེང་གསར་འགོད་ལས་རིགས་པ་དང་འབྲེལ་ཡོད་ལས་བྱེད་མི་སྣ་བཅས་ཁྱོན་མི་ ༧༠༠ ལྷག་མཉམ་ཞུགས་བྱས་ཡོད་འདུག
མཛད་སྒོའི་ཐོག་གཟེངས་རྟགས་ཚོགས་ཆུང་དེའི་ཚོགས་གཙོས་བརྗོད་དོན། རྒྱལ་སྤྱིའི་བུད་མེད་གསར་འགོད་ཐེབས་རྩ་ཁང་གི་ངོས་ནས། ལོ་ལྟར་འཛམ་གླིང་ཡུལ་གྲུ་ཁག་ཏུ་རང་གི་དཀའ་ངལ་དང་ཉེན་ཁར་མ་འཛེམས་པར་གནས་ཚུལ་འཚོལ་ཞིབ་དང་གསར་འགོད་གནང་མཁན་བུད་མེད་སྙིང་སྟོབས་ཅན་གསུམ་རེར་ཆེ་བསྟོད་གཟེངས་རྟགས་རེ་འབུལ་སྲོལ་ཡོད་པ་བཞིན། འདི་ལོའི་གཟེངས་རྟགས་དེ་རང་ལོ་ ༤༣ ཙམ་ཡིན་པའི་བོད་རིགས་བུད་མེད་ཚེ་རིང་འོད་ཟེར་ལགས་དང་། ཨ་ཧྥི་རི་ཁ་ཤར་མའི་རྒྱལ་ཁབ་ཀྱི་རང་ལོ་ ༥༣ སོན་པའི་གསར་འགོད་པ་ཝེ་ཁུ་ལགས། དེ་བཞིན། ཨ་མི་རི་ཁ་ལྷོ་མའི་རྒྱལ་ཁབ་ཀྱི་རང་ལོ་ ༣༩ ཡིན་པའི་ཁེའུ་ལོ་ཊི་ཡ་བཅས་ལ་ཕུལ་བ་ཡིན་ཞེས་དང་། བུད་མེད་འདི་དག་གིས་སོ་སོའི་རྒྱལ་ཁབ་ནང་འགྲོ་བ་མིའི་ཐོབ་ཐང་རྡོག་རོལ་དུ་
གཏོང་བཞིན་པའི་གནས་ཚུལ་ཕྱིར་བསྒྲགས་བྱས་པར་འཛིན་བཟུང་བཙོན་འཇུག་བྱས་པར་མ་ཟད། ཁོང་ཚོར་ཚེ་སྲོག་གི་ཉེན་ཁ་ཡང་ཡོད། ཅེས་བརྗོད་ཡོད།
རྒྱ་གཞུང་གིས་འོད་ཟེར་ལ་ཕྱིར་བསྐྱོད་ལག་ཁྱེར་མ་སྤྲད་པའིོ་སྟབས་ཀྱིས་ཁོ་མོ་ཐེངས་འདིའི་མཛད་སྒོར་བཅར་ཐུབ་མེད་ནའང་། འོད་ཟེར་གྱིས་ཐེངས་འདིའི་མཛད་སྒོའི་ཐོག་ཕུལ་བའི་ཁོང་གི་བརྙན་ཕབ་དུམ་བུ་དེའི་ནང་། བོད་ནང་དུ་ད་ལྟའང་མི་ཆོས་དང་འགལ་བའི་གནས་ཚུལ་རིགས་འདྲ་མིན་འབྱུང་བཞིན་ཡོད་པར་མ་ཟད། རྒྱ་གཞུང་གིས་ཉེས་མེད་གཉོམ་ཆུང་གི་བོད་མི་ཚོ་དྲང་བདེན་མིན་པའི་ཐོག་ནས་མུ་མཐུད་འཛིན་བཟུང་བཙོན་འཇུག་བྱེད་ཀྱིན་ཡོད་ཅེས་དང་། གུས་མོས་རང་ཉིད་ཀྱི་ནུས་པར་བརྟེན་ནས་གནས་ཚུལ་འདོན་སྤེལ་གྱི་ལས་ཀ་མཇུག་སྐྱོང་གི་ཡིན་ཞེས་བརྗོད་ཡོད་པ་རེད།
གསར་འགོད་པ། དཔལ་ལྡན།
བོད་ཀྱི་བུད་མེད་རྩོམ་པ་པོ་ཚེ་རིང་འོད་ཟེར་ལ་རྒྱལ་སྤྱིའི་རང་བཞིན་ལྡན་པའི་གཟེངས་རྟགས་ཐོབ་པར་བཀྲ་ཤིས་བདེ་ལེགས་ཞུ། ཁྱོད་ཀྱི་ལྷག་བསམ་རྒྱལ་ལོ། ཁྱོད་ཀྱི་སྙིང་སྟོབས་རྒྱལ་ལོ། ཁྱོད་ཀྱི་ཕུག་བསམ་རྒྱལ་ལོ། །
ཚེ་རིང་འོད་ཟེར་ལ་བཀྲ་ཤིས་བདེ་ལེགས།
ཁྱེད་ནི་བོད་ཀྱི་བུ་མེད་འཛངས་མ་དངོས་ཏེ་དུས་ནམ་ཡང་ཁྱེད་ལ་བཀྲ་ཤིས་སྨོན་ཚིགས་ཡོད།
བྱ་བ་ལམ་འགྲོ་ཡང་བར་སྨོན
འཛངས་མིང་སྐམ་པོ་ཁྱེར་བའི་རྡ་རམ་ས་ལའི་བུད་མེད་དག་ནི་
འོད་ཟེར་ནི་བོད་ཀྱི་མཛངས་མའི་མཛངས་མའི་གྲས་ཤིག་རེད།ཡིན་ནའང་བློ་ཡིད་དཔོག་དཀའ་བ་ཞིག་ནི་ཁོ་མོ་རང་རྒྱ་ནག་གི་རྒྱལ་སར་བསྡད་ཡོད་ཀྱང་ད་ལྟའི་བར་དྲ་ཐོག་ཏུ་བོད་དོན་སྐོར་གྱི་གནས་ཚུལ་མཐའ་དག་ལ་བལྟ་ཐུབ་པས་མ་ཟད།བོད་ཕྱི་ལ་གནས་ཚུལ་མང་པོ་འདོན་སྤྲོད་བྱེད་ཐུབ་པ་འདུག རྒྱ་ནག་གཞུང་གིས་མོ་ལ་ཚོད་འཛིན་མི་བྱེད་པའམ་བྱེད་དཀའ་བ་གཏན་ནས་དཔེ་མི་སྲིད།མོ་རང་རྒྱ་ནག་གི་ཆབ་སྲིད་ཉེས་ཅན་དུ་གྱུར་ནས་མིང་གྲགས་མ་རྒྱས་པའི་སྣྔོན་ལ་མོ་ནི་སྤྱིར་བཏང་གི་གསར་འགོད་པ་ཞིག་རེད།མོའི་བྲིས་པའི་བོད་ལྗོངས་ཟིན་བྲིས་ཞེས་པའང་བོད་ཀྱི་རང་དབང་དྲིལ་སྒྲོག་བྱས་པ་ཙམ་ལས་སྒྱུ་རྟྩལ་དང་རྟྩོལ་རྟྩལ་གཉིས་ཀའི་ཐད་ནས་བྲོ་བ་ཅི་ཡང་མི་འདུག ངས་བསམ་ན་མོ་ནི་ཨ་རིའི་Paris Hiltonལྟ་བུ་ཞིག་རེད།
འོད་ཟེར་ལགས་སུ་ཐུགས་རྗེ་ཆེ་ཚད་མེད་དང་་ བཀྲིས་བདེ་ལེགས་གྲངས་མེད་ཞུ།
རྒྱལ་སྤྱིའི་བུད་མེད་གསར་འགོད་ཐེབས་རྩ་ཁང་གི་ལོ་འཁོར་ཆེས་བསྟོད་གཟེངས་རྟགས་ཐོབ་པའི་བུད་མེད་གསུམ་གྱི་གྲས་སུ་བོད་རིགས་བུད་མེད་མཁྱེན་ལྡན་མ་ཚེ་རིང་འོད་ཟེར་ལགས་ཚུད་པ་འདི་ལ་རང་ཉིད་བོད་རིགས་བུད་མེད་ཅིག་ཡིན་པའི་ཆ་ནས་རྗེས་སུ་ཡི་རང་བྱ་ཞིང་བསྟོད་བསྔགས་ཀྱི་འཚམས་འདྲི་ཞུ་རྒྱུ་དང་། འདིས་བོད་ཕྱི་ནང་གི་བུད་མེད་རྣམས་ཀྱིས་མི་རིགས་ཀྱི་ལས་དོན་ལ་ཧུར་བརྩོན་གནང་བའི་གྲུབ་འབྲས་ཀྱི་དཔེ་མཚོན་དུ་གྱུར་པར་མ་ཟད། མ་འོངས་པར་དེ་ལས་ལྷག་པར་ལས་དོན་བསྒྲུབ་དགོས་པར་སྐུལ་མ་བཏང་བ་ཞིག་ཡིན། ཡིན་ནའང་མཁྱེན་ལྡན་མ་ཚེ་རིང་འོད་ཟེར་ལགས་གཟེངས་རྟགས་འབུལ་བཞེས་ཀྱི་མཛད་སྒོར་དངོས་སུ་ཞུགས་པར་རྒྱ་ནག་གཞུང་གིས་བཀག་འགོག་བྱས་པ་དེར་རང་ཉིད་བློ་ཕམ་པོ་བྱུང་སོང་། །
སྤྱིར་བོད་དང་། སྒོས་བོད་པའི་བེུད་ཚོ་འཛམ་གླིང་ཐོག་མཐའ་བར་གསུམ་ནང་གཟེངས་སུ་ཐོན་པར་ཁྱེད་ཉིད་ལ་སེམས་ཁམས་རུས་པའི་གཏིང་ནས་མཚམས་འདྲི་
བཀྲ་ ཤིས་བདེ་ལེགས་གྲངས་མེད་ཞུ།
ངས་ཀྱང་མཛངས་མ་ཚེ་རིང་འོད་ཟེར་ལགས་གཙོ་པས་བྱ་དགའ་བཞེས་མཁན་གསུམ་གར་རྟེན་འབྲེལ་དང་། ལྷག་པར་ཚེ་རིང་འོད་ཟེར་བཀྲ་ཤིས་བདེ་ལེགས་ཞུ། ཁྱེད་བོད་མི་མངས་ཀྱིས་དུས་ནམ་ཡང་བརྗེད་མི་སྲིད།
ཚེ་རིང་འོད་ཟེར་ལ་བཀྲ་ཤིས་བདེ་ལགས་ཡོད།
མཛངས་ཆོས་ཀྱི་དཔལ་ཡོན་འབར་བའི་ཁ་བ་ཅན་གྱི་བུ་མོ་ཚེ་རིང་འོད་ཟེར་ལགས་སུ།
ཆེས་བསྔགས་བརྗོད་ཀྱིས་རྒྱན་པའི་གཟེངས་བསྟོད་བྱ་དགའ་ཐོབ་དེར་ཕྲན་གྱིས་སྙིང་ཐག་པ་ནས་འཚམས་འདྲི་དང་བཀྲ་ཤིས་བདེ་ལེགས་ཞུ་ཡི་ཡོད། བོད་ཀྱི་ན་གཞོན་བུ་མོ་ཚོས་དུས་རབས་ཀྱི་རྗེས་ཟིན་པའི་བུད་མེད་འདིའི་རིགས་སུ་དམིགས་དཔེ་ལྟ་རོགས། བོད་ཀྱི་ཁ་རྒྱུན་དུ་་་་་་བྱ་ཆུ་འཐུང་ཁ་མིག་ཡར་བལྟ། །བོང་བུ་ཆུ་འཐུང་ཁ་མིག་ཐུར་བལྟ། །ཞེས་པ་ཞིག་སྔ་ས་ནས་བཤད་མྱོང་བ་རེད།
མཛངས་མ་ཚེ་རིང་འོད་ཟེར་ལགས་གཙོ་གྱུར་བའི་བྱ་དགའ་བཞེས་མཁན་བུ་མོ་གསུམ་གར་རྟེན་འབྲེལ་ཞུ།