བཙན་བྱོལ་གཞུང་གི་ཉེན་ཁ་བདུན། ཨ་འཇམ།

བཙན་བྱོལ་བོད་གཞུང་གི་མ་འོངས་པའི་ཉེན་ཁ་བདུན།

ཨ་འཇམ།

དང་པོ། ༸གོང་ས་མཆོག་གི་སྐུ་ཚེ་དང་འབྲེལ་བ།

ད་ལྟ་བོད་ཅེས་པ་འཛམ་གླིང་དུ་གྲགས་པར་གྱུར་བ་ཡང་སྐྱབས་མགོན་རིན་པོ་ཆེ་མཆོག་གི་བཀའ་དྲིན་ཉག་གཅིག་ཏུ་གཏོགས་པ་ཡང་ང་ཚོས་ཤེས་དགོས་པའི་གནད་དོན་གལ་ཆེན་ཞིག་ཏུ་གཏོགས་ལ། ད་ལྟའི་ཉག་ཕྲ་བའི་གནས་བབ་ཀྱི་ཆ་ནས་བརྗོད་ན་བོད་གནས་མིན་ཡང་གོང་ས་མཆོག་བཞུགས་མིན་དང་འབྲེལ་བ་ཤིན་ཏུ་དམ་པོ་ཡོད། དེ་ཡང་བོད་ནས་ཡོང་མཁན་གྱི་བརྒྱ་ཆའི་མང་ཤོས་ཀྱིས་གོང་ས་མཆོག་དང་གནས་མཇལ་དུ་འགྲོ་བ་ཙམ་ལས། གངས་ཅན་སྐྱིད་གཤོངས་མིག་གིས་མ་མཐོང་བའི་གྲངས་འབོར་བརྒྱ་ཆའི་མང་ཤོས་ཟིན་གྱི་ཡོད། གནས་ཚུལ་འདི་ལ་གཞིགས་ཚེ་གོང་ས་མཆོག་ནི་བོད་ཕྱི་ནང་གཉིས་ཀྱི་སྦྲེལ་ཐག་ལྟ་བུ་ཞིག་ཏུ་གྱུར་ཡོད་པས། ཁོང་བཞུགས་པར་ཡང་ང་ཚོས་བརྟན་བཞུགས་ཁྲི་སྟོང་མང་བོ་ཕུལ་བས་ཡོང་བ་ཞིག་མིན་པར། ཁོང་གི་གསུང་དང་ཁོང་གི་དགོངས་གཞི་མང་བོ་ཞིག་ང་ཚོས་དང་ལེན་བྱེད་མིན་ལ་རག་ལས་ཡོད་པར་སེམས། ཡང་གཞོན་སྐྱེས་མང་བོ་ཞིག་གི་སེམས་སུ་གསལ་ལེར་དྲན་ཡོང་བ་ནི། འཛམ་གླིང་གི་མི་སྣ་རླབས་ཆེན་གང་ཞིག་ཡིན་ཡང་དུས་ཀྱི་ཚད་ཅིག་ཡོད་པར་སེམས་པའི་ཆོས་ཉིད་ཀྱི་སྡོམ་ཚིག་ཅིག་ལ་ཁག་འཇོག་སྲིད་ནའང། ང་ཚོའི་ད་ལྟའི་གནས་བབ་ནི་དེ་ལྟ་བུའི་སྐད་ཆ་སྟབས་བདེ་ཞིག་གི་འོག་ནས་ཐག་གཅོད་ཐུབ་པ་ཞིག་མིན་ཏེ། འུ་ཅག་གི་ཆོལ་ཁའི་བར་གྱི་འབྲེལ་བ། ཆོས་བརྒྱུད་བར་གྱི་འབྲེལ་བ། ཆབ་སྲིད་ལངས་ཕྱོགས་བར་གྱི་འབྲེལ་བ། བོད་ཕྱི་ནང་བར་གྱི་འབྲེལ་བ། གསར་འབྱོར་དང་གཞིས་ཆགས་བར་གྱི་འབྲེལ་བ་སོགས་རྙོག་དྲ་སྐྱ་འཐབ་པ་ལྟ་བུའི་སྣང་ཚུལ་མང་བོ་ཞི་བར་བྱེད་ཐུབ་པ་ཞིག་དང། ཀུན་གྱིས་ཁས་ལེན་པ་ཞིག་ཁོང་ལས་གཞན་ཞིག་འཚོལ་རྒྱུ་ནི་ཤིན་ཏུ་དཀའ་བའི་གནས་ཚུལ་ཞིག་སྟེ། འདི་ཡང་ད་ལྟ་ནས་བསམ་གཞིགས་བགྱིད་མ་ཐུབ་ཚེ་ཤིན་ཏུ་ཛ་དྲག་པའི་དུས་ཚོད་ཤར་ཚེ་ལྡོག་ཏུ་མེད་པའི་གནས་སྟངས་ཡ་ང་བ་ཞིག་ཏུ་འགྱུར་བར་ངེས་སོ།།

གཉིས་པ། བཙན་བྱོལ་གྱི་སློབ་གསོ་དང་འབྲེལ་བ།

སློབ་གསོའི་ལོག་ལམ་ནི་མི་རབས་དང་མི་རིགས་དེའི་མདུན་ལམ་གྱི་གྱོང་གུད་ཚབས་ཆེན་བསུབ་ཐབས་བྲལ་བ་ཞིག་ཏུ་འགྱུར་ངེས་ལ། ད་ལྟ་འུ་ཅག་བཙན་བྱོལ་བའི་སློབ་གསོ་ཡང་དུས་རབས་གཅིག་གི་ཕྱེད་ཙམ་ཕྱིན་རྗེས་གཞི་ནས་མི་རིགས་རང་ལུགས་ཀྱི་སྐད་ཡིག་སློབ་གསོའི་སྟེང་གི་ཉམས་ཉེས་ཤིག་ཚོར་ཡོད་ཀྱང། འདི་ལྟར་དུ་མི་རབས་གསུམ་འདས་ཟིན་པའི་ལོ་རྒྱུས་རང་བཞིན་གྱི་ཕྱིར་མིག་འདིས་བརྗོད་མི་ཤེས་པའི་ཤེས་ཡོན་སྲིད་ཇུས་སྟེང་གི་ཉེན་ཁ་ཞིག་མཐོང་ཐུབ་ཀྱི་འདུག་ལ། ད་ལྟ་ཡང་མུ་མཐུད་དུ་དེ་ལྟ་བུའི་ལམ་གར་ཤར་བསྐྱོད་བྱེད་ཚེ། ང་ཚོའི་མ་འོངས་པའི་མི་རབས་ཀྱང་གཡང་དུ་བརྡབ་མི་སྲིད་པའི་ངེས་པ་མེད་པས། ད་ལྟ་བཙན་བྱོལ་གྱི་སློབ་གསོའི་ཕྱོགས་ནས་བརྗོད་ཚེ་ཆེས་ཉེན་ཁ་མང་བོ་ཞིག་འབྲེལ་ཏེ་ཡོད་པ་ནི། ཉིས་སྟོང་བརྒྱད་ནས་བཟུང་བོད་ནས་ན་གཞོན་སླེབས་ཚད་ཀྱི་གྲངས་འབོར་བརྒྱ་ཆའི་དྲུག་ཅུ་བདུན་ཅུ་མར་ཆག་ཟིན་པས། ད་ལྟ་ང་ཚོའི་སློབ་གྲྭ་ཁ་ཤས་སྒོ་རྒྱག་དགོས་ཐུག་པའི་གནས་སྟངས་ཤིག་འབྱུང་བཞིན་ཡོད། ཡང་གཞན་ཞིག་ནས་བཙན་བྱོལ་གྱི་གཞོན་སྐྱེས་མང་བོ་ཞིག་ཐབས་ལམ་འདྲ་མིན་གྱི་བཙན་བྱོལ་དུ་གནས་ཐུབ་པར་འབད་བརྩོན་བྱེད་ཀྱི་ཡོད་ཀྱང། ད་ལྟ་ཉིན་རེ་ལས་ཉིན་རེར་ཐབས་ཤེས་འདྲ་མིན་གྱི་སྒོ་ནས་ནུབ་ཕྱོགས་རྒྱལ་ཁབ་ཁག་ཏུ་གཤར་གྱི་ཡོད། དེ་ལྟར་ནུབ་ཕྱོགས་ཀྱི་བོད་མིའི་གྲངས་འབོར་འཕར་ཚད་ནི་ལོ་རེ་ནས་ལོ་རེར་ཆེས་མགྱོགས་པ་འདིས། ང་ཚོས་བཙན་བྱོལ་གཞུང་སྲ་བརྟན་གྱི་རྩ་ཚིག་ཅིག་གི་ཕྱིར་དུ་སློབ་གསོའི་ཟུར་སྣེ་མང་བོ་ཞིག་བློས་གཏོང་བྱེད་པ་ཡང་དུས་དང་འཚམ་པའི་བསམ་བློ་གཏོང་སྟངས་ཤིག་ཏུ་སྙམ་དཀའ་སྟེ། དེ་བས་ད་ལྟ་ནས་ནུབ་ཕྱོགས་སུ་བཙན་བྱོལ་གཞུང་གི་སློབ་གྲྭ་མང་བོ་འཛུགས་དགོས་པར་འདོད་དེ། མ་འོངས་པར་ཡང་དུས་རབས་ཕྱེད་ཀའི་ཁྲོད་ནས་ཡང་བསྐྱར་འགྱོད་གདུང་ཞིག་གམ་ངོས་ཟིན་ཞིག་ཐོབ་དུས་ཤིན་ཏུ་འཕྱིས་དྲགས་པ་ཡིན། དེ་དུས་དེ་བས་ཀྱང་ཉེན་ཁའི་གནས་སྟངས་མང་བོའི་འགལ་རྐྱེན་གཞི་གཅིག་ཏུ་འཛོམས་ཡོད་པས། ཉེན་ཁ་ཧ་ཅང་མང་བོ་ཞིག་དུས་གཅིག་ཏུ་དང་ལེན་བྱེད་དགོས་པའི་གནས་ཚུལ་ཡང་འབྱུང་མི་སྲིད་པ་ཞིག་མིན་པའི་གནས་བབ་དེ་ད་ལྟ་ནས་གསལ་བོར་ཤེས་དགོས་པར་འདོད་དོ།

གསུམ་པ།   བཙན་བྱོལ་གྲོས་ཚོགས་དང་འབྲེལ་བ།

ཉེ་སྔོན་འུ་ཅག་གི་གྲོས་ཚོགས་ནང་གི་གླེང་ཉོག་དེ་ནི་མཐོ་རིམ་ནས་དམའ་རིམ་དུ་མཆེད་པ་ནི་ཁྲག་རྩའི་སྦུབས་སུ་ཁྲག་བརྒྱུད་པའི་སྣང་ཚུལ་ལྟར་བྱུང་ཡོད་ལ། དེ་དང་བསྟུན་ནས་སྤྱི་ཚོགས་སུ་ལུང་ཚན་རིས་གཅོད་ཀྱི་ནད་གཞི་བསྐྱར་ལངས་བྱེད་པའི་དུས་ཚིགས་གསར་བ་ཞིག་ཀྱང་རེད་ལ། དེ་ནི་དམའ་རིམ་མི་སྣས་ཡིད་ཆེས་ཀྱིས་བདམས་པའི་གོང་རིམ་མི་སྣའི་ཁྲོད་དུ་སྐྱོ་སྣང་དང་ཡི་ཆད། ཕངས་སེམས་མང་བོ་བྱུང་སྟེ། ད་ལྟ་བར་དུ་གསལ་ལ་མི་སྣང་བའི་མཐོང་ཐོས་ཀྱི་བཤད་ཡམས་མང་བོ་ར་འཕྲོད་པར་གྱུར་བ་དང། མི་མང་གིས་གྲོས་ཚོགས་ལ་ལྟ་སྟངས་གསར་བ་སླེབས་པའི་དཀྱོགས་མཚམས་ཤིག་ཀྱང་རེད། ཁོ་ཚོས་དུས་འདི་ནས་བཟུང་སྔར་གྱི་བསམ་བློ་གཏོང་སྟངས་ལ་འགྱུར་བ་ཐེབས་ཏེ་ཕྱི་རྒྱལ་དུ་འགྲོ་བའི་འདུན་པ་ཇེ་དྲག་ཏུ་ཕྱིན་ཡོད། བོད་དུ་རང་སྲོག་བློས་གཏོང་བྱེད་བཞིན་འཚོ་བའི་རྒྱལ་གཅེས་པ་མང་བོ་ཞིག་གི་སེམས་ཤུགས་ཀྱང་འདི་དང་རྐྱེན་བྱས་ཏེ་ཉམས་པར་བྱས་པས། ཁོ་ཚོས་ཀྱང་ཨམ་གཙིགས་བསྡམས་ཏེ་སྡོད་མ་བཟོད་པར་འཕྲིན་ལམ་བརྒྱུད་ནས་གནས་ཚུལ་དེར་ཕངས་སེམས་སྟོན་པ་ནི་ཤིན་ཏུ་མང་བས། རང་ཉིད་བཙན་བྱོལ་བ་དཀྱུས་མ་ཞིག་གི་ངོ་གདོང་ཡང་ཚ་བེར་བེར་བྱས་སོང་། དེ་དང་བསྟུན་ནས་ད་ལྟ་ཡང་བཀའ་ཁྲི་དང་སྤྱི་འཐུས་འཚང་ཁ་རྒྱག་བཞིན་པའི་སྣང་ཚུལ་མཐོང་མ་ཐག ཁོ་བོའི་གྲོགས་པོ་མང་བོ་ཞིག་ཡིད་མུག་པའི་སྣང་ཚུལ་ཞིག་འབྱུང་བཞིན་འདུག་སྟེ། རང་ཉིད་ཁོ་ན་བསམ་ནས་འདུར་རྒྱུག་ལ་བྲེལ་བཞིན་པ་མང་བོ་ཞིག་ད་ལྟ་རྩིག་ལྡེབས་ཀྱི་པར་རིས་སུ་གྱུར་ནས་སང་ཉིན་གྱི་སྤྱི་འཐུས་སུ་འགྱུར་བཞིན་འདུག་ཅེས་བརྗོད་ལ། ཁ་ཤས་ཀྱིས་ད་ནི་སེམས་སྐྱིད་པོ་མི་འདུག་ཅེས་ཨ་རག་འཐུང་བཞིན་པ་དང་། ཡང་འགའ་རེས་ངར་ཁོ་ཚོའི་ཕྱོགས་ཀྱི་སྐད་ཆ་གོ་འདོད་མི་འདུག སྒོ་གཏན་ཡོད་ཟེར་མཁན། ཡང་འགའ་རེས། ཨེ། མུ་མཐུད་འདི་ལྟར་སྔོན་འགྲོའི་འོས་གཞི་དུས་ཡུན་རིང་དུ་བཏང་ཚེ་བོད་པ་ཚང་མ་སྤྱི་འཐུས་སུ་འཚང་བར་ངེས་ཞེས་སྐད་ཆ་མང་བོ་འདིའི་འཕྲོ་ནས་བརྙེད་ཐུབ་པ་ནི་ང་ཚོའི་དམངས་གཙོའི་ཁྱད་ཆོས་རེད་སྙམ་ནས་དགའ་བ་དེ་མ་ཡིན་པར། ང་ཚོའི་སྤྱི་འཐུས་ཀྱི་སྤུས་ཚད་དེ་མུ་མཐུད་དུ་དེ་ལྟར་ཉེན་ཁའི་ངོ་བོར་གནས་སྲིད་པའི་སེམས་ཁྲལ་དེའོ།།

བཞི་བ།  བཙན་བྱོལ་གྱི་ཤེས་ཡོན་པ་དང་འབྲེལ་བ།

ལོ་ཁ་ཤས་ཀྱི་སྔོན་དུ་ཆབ་སྲིད་བཙོན་མ་ཕྱི་རྒྱལ་དུ་གཏོང་བའི་འོས་བདམས་ཀྱི་སྐབས་སུ་ཡང་། བཙན་བྱོལ་གྱི་མཁས་པ་དང་རྩོམ་པ་པོ་དང་རྩོམ་སྒྲིག་པ། ཉམས་ཞིབ་སོགས་མང་བོ་ཞིག་འཚང་ག་ཤིག་ཤིག་གིས་ཕྱི་རྒྱལ་དུ་འགྲོ་བར་ཐོ་འགོད་བྱེད་བཞིན་འདུག་ཟེར། དེ་བཞིན་དུ་ཕྱི་རྒྱལ་དུ་རྩོམ་རིག་གི་འདུ་འཛོམས་དང་བོད་རིག་པའི་དཔྱད་གླེང་གང་ཞིག་འཚོགས་ན་ཡང་དེ་ལས་རྩོམ་པ་པོ་མང་བོ་ཞིག་བོར་བརླགས་སུ་འགྲོ་བ་ནི་རྒྱུན་ལྡན་གྱི་སྣང་ཚུལ་ཞིག་རེད། འདི་ལྟར་གྱུར་བས་གོང་གི་མཁས་པ་དེ་དག་ལ་གྱོང་ཡོད་དམ་ཞེ་ན་མེད་པའི་ཚོད་དུ་སྣང་ཡང་། ཁོ་ཚོའི་ཤེས་ཡོན་གྱི་ལས་ཀ་མང་བོ་ཞིག་ད་ལྟའི་བརྡ་འཕྲིན་སོགས་བརྒྱུད་ནས་ནུས་པ་འདོན་ཐུབ་པ་དང། ཡང་བཙན་བྱོལ་གཞུང་ལ་མཚོན་ན་གྱོང་གུད་ཚབས་ཆེན་ཞིག་ཏུ་འདོད་དེ། ད་ལྟ་གཞུང་གི་ཤེས་ཡོན་གྱི་ལྟེ་གནས་མང་བོ་རྒྱ་གར་ནང་ཡོད་པས། ཁོ་ཚོ་ཕེབས་ཟིན་པས་དགེ་རྒན་གྱི་སྤུས་ཚད་ཉམས་པ་དང་། རྩོམ་སྒྲིག་ཁང་སྒོ་རྒྱག་པ། དུས་དེབ་དང་ཚགས་པར་གྱི་ཁ་གྲངས་ཉུང་དུ་ཕྱིན་པ། ཚད་ལྡན་བརྩམས་ཆོས་འབྱུང་དཀའ་བ། ཕྱོགས་ཡོངས་ནས་ཤེས་ཡོན་གྱི་ཁོར་ཡུག་གཉོམ་དུ་འགྲོ་བཞིན་པའི་ཐན་ལྟས་ཀྱི་སྣང་ཚུལ་མང་བོ་ཞིག་འབྱུང་བཞིན་པ་ནི་དངོས་ཡོད་གནས་ཚུལ་ཞིག་རེད། འདི་ཡང་གཞུང་ངོས་ནས་བསམ་ན་ཤེས་ཡོན་པའི་དཔུང་སྡེ་ཞིག་ཁ་འཐོར་དུ་ཕྱིན་པའི་འགོ་ཚུགས་པ་ཞིག་ཡིན་པས། ཆེས་གྱོང་གུད་ཚབས་ཆེན་ཞིག་ཏུ་འདོད་དོ།།

ལྔ་པ།  བཙན་བྱོལ་སྤྱི་ཚོགས་ཀྱི་གནས་སྟངས་དང་འབྲེལ་བ།

ད་ལྟ་དངོས་ཡོད་གནས་ཚུལ་གྱི་སྟེང་ནས་གཞིགས་ཚེ་རྒྱ་གར་གཙོ་བྱས་ཏེ་བལ་འབྲུག་ས་ཁུལ་གྱི་མི་གྲངས་ཀྱང་མར་འགྲིབ་བཞིན་མཆིས་ལ། དེ་ཡང་རྒྱུ་རྐྱེན་མང་བོ་ཞིག་ཡོད་དེ། གཅིག་ནི་ཆབ་སྲིད་ཀྱི་གནོན་ཤུགས་གང་ཡང་མེད་པར་མི་མང་རང་གིས་བུ་ཕྲུག་ཚོད་འཛིན་གྱིས་སྐྱེས་རྒྱུན་འགོག་བཞིན་པའི་སྣང་ཚུལ་ལས་བྱུང་བ་ཞིག་ཡིན་ལ། ལྷོ་ཕྱོགས་ཀྱི་གཞིས་ཆགས་ཆེ་ཁག་ཏུ་ཡང་ལོ་ངོ་དྲུག་གི་རིང་ལ་བྱིས་པ་བཅུ་ཙམ་ལས་མ་བྱུང་བའི་གནས་ཚུལ་ཡང་མཆིས་པ་དང། གཉིས་པ་ནི་ནུབ་ཕྱོགས་ཡུལ་གྲུ་ཁག་ཏུ་འགྲོ་བཞིན་པའི་བོད་རིགས་ཀྱི་གྲངས་འབོར་གྱི་འཕར་ཚད་ཤིན་ཏུ་མྱུར་བ་དེ་ཡིན། དེ་ལྟར་བོད་པ་ཚོས་ཕྱི་རྒྱལ་ལ་ཐར་ཕྱིར་སྲིང་མོ་གཉེན་སྒྲིག་གི་ཚུལ་གྱིས་འགྲོ་བ་དང་། མི་སྐྱ་ཚོས་གཟན་ཤམ་གྱོན་ནས་འགྲོ་བ། ཧིན་སྒོར་འབུམ་ཕྲག་མང་བོ་སྤྲད་ནས་ཐབས་ལམ་འདྲ་མིན་གྱིས་ལོ་དང་ཟླ་མཐུད་ནས་འགྲོ་བཞིན་ཡོད་པས། བཙན་བྱོལ་ལྟེ་གནས་ཀྱི་མི་གྲངས་མར་འགྲིབ་ཚད་ཇེ་མགྱོགས་སུ་འགྲོ་བཞིན་མཆིས། གསུམ་པ་ནི་རྒྱ་ནག་གི་སྲིད་བྱུས་ཀྱི་ཐབས་ལམ་གསར་བ་ཞིག་བརྒྱུད་ནས་རྒྱ་ནག་གཞུང་ཚབ་ཁང་དུ་བོད་དུ་ལོག་པའི་ཐོ་འགོད་ཀྱི་འཚང་ཁ་རྒྱུན་ཆད་མེད་པའི་གནས་ཚུལ་ཞིག་དང། འཚང་ཁ་འདིའི་ཁྲོད་དུ་བླ་ཆེན་མི་ཆེན་ཚོ་དང་བཙན་བྱོལ་མི་སྣ་གལ་ཆེན་ཚོའི་ནང་མི་སོགས་ཀྱང་ཐེ་བ་ཡིན། དེ་ལྟར་ཁོ་ཚོ་རྒྱ་མིའི་གཞུང་ཚབ་ཁང་གི་སྒོ་འགྲམ་དུ་ཉལ་ཏེ་རེ་སྒུག་བྱེད་བཞིན་པ་ཡང་མང་དུ་འགྲོ་བཞིན་ཡོད། བཞི་བ་ནི་ཧི་མ་ལ་ཡའི་སྐྱབས་བཅོལ་ལམ་བུ་མཐའ་སྲུང་དམག་གིས་ཡོངས་སུ་བསྐོར་ཏེ་བཀག་སྡོམ་གྱི་ནུས་ཤུགས་རྒྱ་བསྐྱེད་བྱས་པས་བཙན་བྱོལ་དུ་ཐར་དཀའ་བ་སོགས་ཀྱིས་རྐྱེན་བྱས་ཏེ། རྒྱུན་ལྡན་དུ་ལོ་གཅིག་ལ་ཉིས་སྟོང་ནས་སུམ་སྟོང་ཙམ་བཙན་བྱོལ་དུ་འོང་བཞིན་པ་གློ་བུར་དུ་བརྒྱ་ཕྲག་ཁ་ཤས་ལས་མེད་པར་གྱུར་ཡོད། ལྔ་བ། ད་ལྟ་བཙན་བྱོལ་ཁྲོད་དུ་ཨེ་ཙི་སོགས་ཛ་དྲག་གི་ནད་རིགས་འབྱུང་བཞིན་པ་ཡང་མི་གྲངས་ཀྱི་ཉེན་ཁའི་རྒྱུ་རྐྱེན་ཞིག་ཏུ་གྱུར་ཡོད་པས། ད་ལྟ་རྒྱ་གར་གཙོ་བྱས་པའི་བཙན་བྱོལ་གྱི་གནས་སྟངས་འདི་ཡང་མི་གྲངས་ཀྱི་ལྟག་ཆུ་ཆད་པའི་རྫིང་བུ་བཞིན་དུ་ཧ་ཅང་ཉེན་ཁའི་ཚད་ཅིག་ཏུ་སླེབས་ཡོད་དེ། སྔོན་ཆད་སྦེང་ལོར་དང་ཁ་ཐག་ཉེ་བའི་ས་གནས་འདི་གར་བོད་པ་གཞིས་ཆགས་ཆུང་ཆུང་ཞིག་ཡོད་ཀྱང་། ད་ལྟ་ཁང་བ་ཙམ་ཡོངས་སུ་སྟོང་སོང་བ་དང། དེ་བཞིན་སྦེལ་ཀོབ་སོགས་གཞིས་ཆགས་ཆེ་ཁག་དག་ཏུ་ཡང་ཁང་སྟོང་དུ་འགྱུར་བཞིན་པའི་གཞིས་གྲོང་མང་བོ་ཞིག་འབྱུང་བཞིན་ཡོད་ལ། དེ་ཙམ་དུ་མ་ཟད། ད་ལྟ་དགོན་པ་ཆུང་ཆུང་མང་བོ་ཞིག་ཏུ་བོད་རིགས་སྟོང་བར་གྱུར་ཏེ་གཞན་རིགས་ལ་ནང་ཆོས་སྤེལ་བཞིན་པའི་གནས་ཚུལ་གསར་བ་མང་བོ་ཞིག་འབྱུང་བཞིན་ཡོད་ལ། འདི་དག་ནི་ནང་ཆོས་སྤེལ་ཡུལ་གྱི་ཁྱབ་ཁོངས་ནོར་བ་ཞིག་ཏུ་ངོས་འཛིན་བཞིན་མེད་དེ། སྐྱབས་བཅོལ་བོད་ཀྱི་མ་འོངས་པའི་སྲ་བརྟན་དང་རྒྱུན་འཁྱོངས་ཀྱི་ཁོར་ཡུག་ཅིག་ལ་བསམ་ན་ཆེས་ཛ་དྲག་གི་ངོ་བོར་འཕེལ་བཞིན་པ་མཚོན་ཐུབ་དང་། ག་ལེར་གཞིས་གྲོང་དུ་ཁང་སྟོང་མང་དུ་འགྲོ་བ་དང་དགོན་པ་རུ་གྲྭ་རྒྱུན་ཉུང་བར་འགྱུར་བ། སློབ་གྲྭ་རུ་སློབ་ཕྲུག་གི་གྲངས་ཚད་ཀྱང་གློ་བུར་དུ་ཆག་སྲིད་པས། འདི་ལྟ་བུའི་གནས་ཚུལ་ནི་ཤིན་ཏུ་ཉེན་ཁ་ཞིག་ཏུ་སྣང་བས། ད་ལྟའི་བཀའ་ཁྲི་གསར་བ་དང་སྤྱི་འཐུས་གསར་བའི་ཚོགས་ཀྱིས་གནས་ཚུལ་དང་གནད་དོན་འདི་དག་ལ་གདོང་ལེན་བྱེད་པའི་གྲ་སྒྲིག་ཅིག་ངེས་པར་དགོས་པར་སྙམ། དེ་མིན་སྔར་བཞིན་དུ་སྤྱི་ཚོགས་ནི་འགྱུར་འགྲོས་ཀྱི་རང་བཞིན་ཞིག་ཏུ་སྙམ་སྟེ་བསྡད་ཚེ། རང་ཉིད་ཀྱི་དུས་ཐོག་དེ་ལྟར་དུ་འཁྱོལ་སྲིད་ཀྱང་མ་འོངས་པའི་གནས་སྟངས་ཤིན་ཏུ་ཉེན་ཁ་ཕྱོགས་སུ་བསྐྱོད་པ་ལས་དེ་ལྟར་དུ་འཁྱོལ་ཐབས་ནམ་ཡང་མི་སྲིད་དོ།།

དྲུག་པ།  བོད་གཞིས་བྱེས་དང་འབྲེལ་བ།

སྔོན་ཆད་བོད་ནང་གི་གནས་སྟངས་མང་བོ་ཞིག་བཙན་བྱོལ་ནས་ཁྱབ་བསྒྲགས་དང་རམ་འདེགས་ཀྱི་མགྲིན་ཚབ་ལྟ་བུ་བྱེད་ཀྱི་ཡོད་ལ། ད་ལྟ་དེ་ལས་ལྡོག་སྟེ་བོད་ནང་གི་རྒྱལ་ཞེན་པ་དང་མི་མང་གི་འདོད་བློ་བཙན་བྱོལ་བས་སྐོང་མ་ཐུབ་པའི་གནས་སྟངས་ཧ་ཅང་གསལ་བོར་འབྱུང་བཞིན་ཡོད་དེ། གཞིས་ལུས་བོད་པའི་ཞི་རྒོལ་ཆེན་མོ་དང་ས་ཡོམ་དོན་རྐྱེན། སྟག་གཟིག་སྲམ་ལྤགས་སྲེག་སྦྱོར་གྱི་ལས་འགུལ་སོགས་རྒྱ་ནག་གི་གནོན་ཤུགས་གང་ལ་ཡང་མ་བརྟེན་པར་ཤུགས་ཆེར་སྤེལ་ཏེ། བོད་ནང་གི་གནས་ཚུལ་མང་བོ་ཞིག་ཕྱི་རོལ་གྱི་ཁྱབ་བསྒྲགས་ཙམ་མིན་པར། ཐད་ཀར་རྒྱལ་སྤྱིའི་སྡིངས་ཆའི་སྟེང་གི་གནད་དོན་ཞིག་ཏུ་འགྱུར་བཞིན་ཡོད་པས། བོད་ནང་གི་མི་མང་ཚོས་བཙན་བྱོལ་གྱི་རླུང་འཕྲིན་དང་གསར་འགྱུར་བརྒྱུད་ལམ་ཁྲོད་ཀྱི་ཆབ་སྲིད་ལངས་ཕྱོགས་དང་ཆོལ་ཁའི་འཐེན་འཁྱེར་རྩོད་པ་སོགས་ཐོས་པས། ཁོ་ཚོས་ཡང་དང་ཡང་དུ་བཙན་བྱོལ་དུ་རྗོད་བཞིན་པ་ནི། ང་ཚོས་བོད་ནང་དུ་རང་སྲོག་བློས་གཏོང་གིས་ཕྱི་རྒྱལ་གྱི་རླུང་འཕྲིན་སོགས་ལ་ཉན་གྱི་ཡོད། ཁྱོད་ཚོས་མི་སྒེར་བའི་བསམ་ཚུལ་ཕྱོགས་རིས་པ་རྐྱང་རྐྱང་གཏོང་གིན་འདུག་ཅེས་ཆེས་ཡིད་མུག་པའི་བསམ་ཚུལ་སླེབས་ཀྱི་ཡོད་པ་འདིས་གཞིས་བྱེས་གཉིས་ཀྱི་འབྲེལ་བ་དེ་གཉོམ་དུ་འགྲོ་བའི་རྟགས་མཚན་ཞིག་ཡིན་ལ། འདི་ལྟར་བརྙན་འཕྲིན་སོགས་སུ་ཐད་ཀར་དགག་པ་རྒྱག་མཁན་བྱུང་མྱོང་བ་དེ་ལྟར་རེད། ཡང་རྒྱལ་གཅེས་པ་འགའ་རེས་ད་བར་དུ་ཕྱི་ལོགས་སུ་རེ་བ་བརྒྱབ་པ་ཡིན་མོད། ལོ་ངོ་འདི་འདྲ་རིང་བོ་ཞིག་ལ་གྲག་འགུལ་ཅི་ཡང་མ་བྱུང་བས་ང་ཚོ་ཡང་འུ་ཐུག་སྟེ་རང་ཉིད་ཀྱི་ནུས་པ་གཅིག་པུར་རེ་སྟེ་ཚེ་སྲོག་འབེན་ལ་བཞག་ནས་མི་རིགས་ཀྱི་འཐབ་རྩོད་བྱེད་དགོས་བྱུང་ཞེས་ཟེར་བཞིན་པར་མ་ཟད། ཁྱོད་ཚོ་ཕྱི་ཕྱོགས་སུ་ཡོད་པས་སྐབས་རེར་ང་ཚོའི་གནས་སྟངས་ལ་བསམ་གཞིགས་མི་བྱེད་པར་གནས་ཚུལ་ཡོད་ཚད་ཁྱབ་བསྒྲགས་བྱེད་རྐྱང་བྱས་པས། ང་ཚོའི་ཕུགས་རྒྱང་རིང་བའི་དམིགས་འདུན་མང་བོ་ཞིག་འཕྲོ་བརླག་ཏུ་གཏོང་བཞིན་པར་མ་ཟད། ཡང་ཕྱི་ཕྱོགས་སུ་འབྲེལ་བ་ཡོད་པར་སྙམ་ནས་གཅར་རྡུང་དང་བཙོན་འཇུག་གི་གནས་ཚུལ་བསམ་ཡུལ་ལས་འགོངས་པ་འབྱུང་བཞིན་འདུག་ཅེས་འཆད་མཁན་ཡང་མཆིས། ད་ལྟ་བོད་ནས་ལས་འགུལ་སྤེལ་བ་དག་ཅུང་ཞིབ་ཚགས་པ་དང་ཁྱབ་ཆེ་བའི་དྲིལ་བསྒྲགས་ཀྱི་རང་བཞིན་པར་ལྡན་འགྱུར་བཞིན་ཡོད་པས། ང་ཚོས་ནམ་ཡང་ཁོར་ཡུག་ཆུང་ཆུང་ཞིག་ནས་གཞིས་ལུས་མི་མང་གི་ཚབ་བྱེད་པར་དཀའ་ངལ་ཞིག་འཕྲད་མི་སྲིད་པའི་ངེས་པ་མ་མཆིས་སོ།།

ད་དུང་ང་ཚོའི་བཙན་བྱོལ་གྱི་ཚིག་སྦྱོར་སྤེལ་སྟངས་དང་བརྡ་ཆད་སོགས་ཀྱི་བར་དུ་ཡང་གཞིས་ལུས་པའི་བར་དུ་ཧེ་བག་མང་བོ་ཞིག་འཆོར་བཞིན་འདུག་པས། དུས་ཀྱིས་བར་ཐག་རིང་དུ་ཕྱིན་པ་དང་བསྟུན་ནས་འདི་ཡང་ཕྱི་ནང་གཉིས་སྐད་ཡིག་ཁྲོད་དུ་བར་ཆད་ཆེན་པོ་ཞིག་གི་རྒྱུ་རྐྱེན་དུ་མི་འགྱུར་བའི་ངེས་པ་མེད་པས། ད་ལྟ་ནས་གནས་སྐབས་ཀྱི་ཁེ་ཕན་ལས་མཐར་ཐུག་གི་ཕུགས་རེ་དང་རྒྱལ་ཁའི་ཕྱོགས་སུ་བསམ་གཞིགས་བྱ་རྒྱུ་ནི་གཞིས་བྱེས་ཀྱི་འབྲེལ་བ་དམ་དུ་གནས་ཐུབ་པའི་ལམ་བུ་ཞིག་ཏུ་འཁུམས་སོ།།

བདུན་པ། བཙན་བྱོལ་ནང་ཁུལ་གྱི་འགལ་དང་འབྲེལ་བ།

ད་ལྟ་ཆེས་མི་མངོན་པའི་སྣང་ཚུལ་གྱི་ཁྲོད་དུ་འཐིམ་ཞིང་ཞི་འཇགས་ཀྱི་རྣམ་པར་གྱུར་བ་ནི་ང་ཚོ་ཐུན་མོང་གི་ཁས་ལེན་པའི་རླབས་ཆེ་བའི་མགོན་སྐྱབས་ཤིག་ཡོད་པས་ཡིན་ཏེ། གལ་སྲིད་ཁོང་གི་རྗེས་ནས་ང་ཚོའི་ཁྲོད་ཀྱི་འགལ་བ་ནི་ཞིབ་ཚགས་ཤིང་རྣམ་གྲངས་མང་བ་ཞིག་ཏུ་གྱུར་བས། གོང་དུ་བརྗོད་པ་བཞིན་ཆོལ་ཁའི་བར་གྱི་འགལ་བ་དང་། ཆོས་བརྒྱུད་བར་གྱི་འགལ་བ། ཆབ་སྲིད་ལངས་ཕྱོགས་བར་གྱི་འགལ་བ། གསར་འབྱོར་གཞིས་ཆགས་བར་གྱི་འགལ་བ། གྲྭ་བ་དང་མི་སྐྱའི་སྲིད་སྟེགས་ཀྱི་འགལ་བ། རྒན་རབས་དང་གཞོན་སྐྱེས་བར་གྱི་འགལ་སོགས་སྤྱི་ཚོགས་ཀྱི་ཁོར་ཡུག་ཆུང་ཆུང་ཞིག་ལ་མཚོན་ན་ཆེས་ཉེན་ཁའི་སྣེ་མང་བོ་ཞིག་འཛིང་སྟེ་ཡོད་པས། མ་འོངས་པར་སྣེ་འདི་དག་གཅིག་ཏུ་སྡོམ་མཁན་གྱི་རླབས་ཆེན་ཞིག་ང་ཚོའི་ཁོར་ཡུག་འབྱུང་དཀའ་བས་ན། ད་ལྟ་ནས་མ་འོངས་པའི་གནས་སྟངས་དེ་དག་སྲུང་སྐྱོབ་ཀྱི་ཕྱིར་དུ་བསམ་གཞིགས་བྱ་དགོས་པར་ཤིན་ཏུ་གལ་ཆེ་བར་སྙམ་པ་ལས། རྒྱུ་མཚན་མེད་པ་ཞིག་ཏུ་སྙམ་སྟེ་རྣམ་རྟོག་གི་མགོ་སློང་བའི་དཀྲོགས་གཏམ་ཞིག་ཏུ་འདོད་མི་རུང་སྟེ། ང་ཚོ་ཡང་འདས་པའི་ཉམས་མྱོང་གིས་མ་འོངས་པར་ཚོད་དཔག་བྱ་ཐུབ་པའི་རྒྱུ་ཆ་མང་བོ་ཞིག་ཐོབ་པས་ཡིན།

                                              མཇུག་བསྡུ་བ།

བདག་གིས་འདི་ལྟར་བརྗོད་པ་ནི་རང་རིགས་ལ་དུང་ཞེན་གྱིས་མ་བཟོད་པར་བརྗོད་དུ་ཐལ་བས། གལ་སྲིད་ནོར་འཁྲུལ་དང་ཕོག་ཐུག་གི་ཆ་རེར་བྱུང་ཚེ་ལག་ཟུང་ཐལ་མོའི་ངང་དུ་དགོངས་དག་ཞུ་རྩིས་ཡོད། ཡིན་ཡང། བསམ་ཚུལ་འདི་ནི་གཞན་སྐུལ་གྱི་བསམ་ཚུལ་ཞིག་མ་ཡིན་པར། རང་སེམས་ཀྱི་ཤ་ཚ་ལྡོག་ཏུ་མེད་པར་བཞུར་བ་ཞིག་གོ།

                                                           ༢༠༡༠ ལོའི་ཟླ་ ༡༠ ཚེས་ ༢༥ ལ་བྲིས

༼ གོང་གི་རྩོམ་ཡིག་དེ་རྩོམ་པ་པོའི་ཟིན་བྲིས་ལས་བདམས་བཀོད་བྱས ༽