ཟླ་འདིའི་ཚེས་ ༢༦ ཉིན་ཀན་ལྷོ་བོད་རིགས་རང་སྐྱོང་ཁུལ་བསང་ཆུ་རྫོང་ཙཱ་ཡུས་ཞང་སློབ་ཆུང་གི་སློབ་ཕྲུག་དང་། ས་གནས་མང་ཚོགས་ ༣༠༠ ཙམ་གྱིས་ཞང་སྲིད་གཞུང་གི་མདུན་ནས་མི་རིགས་འདྲ་མཉམ་དང་སྐད་ཡིག་འདྲ་མཉམ། ཁྲིམས་ལུགས་ཁེ་དབང་ལོངས་སྤྱོད་བཅས་ཀྱི་སྐད་འབོད་བརྒྱབ་ཡོད་འདུག འདིའི་ཐད་ངྷ་སར་གནས་སྡོད་བོད་ཀྱི་ཡིག་སྒྱུར་ཁང་གི་ལས་བྱེད་ཙཱ་ཡུས་ཕུན་ཚོགས་ཀྱིས་བརྗོད་ན། ཐོག་མར་ཕྱི་ཚེས་ ༢༥ ཉིན་ཙཱ་ཡུས་ཞང་སློབ་ཆུང་གི་སློབ་ཕྲུག་ ༢༠ ཙམ་ཞང་སྲིད་གཞུང་གི་སྒོ་ཁར་སོང་སྟེ་ངོ་རྒོལ་སྐད་འབོད་བྱས་འདུག་ལ། དགོང་མོར་དེར་སློབ་ཕྲུག་ཚོས་གྲོས་བསྡུར་བྱས་ཏེ། ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༨ གྱི་སྟེང་བསྐྱར་དུ་སློབ་ཕྲུག་དང་ས་གནས་མང་ཚོགས་ ༣༠༠ ཙམ་གྱིས་ཆུ་ཚོད་ ༡ ཙམ་རིང་ཞང་སྲིད་གཞུང་གི་སྒོ་ཁར་ཕྱིན་ཏེ། ངོ་རྒོལ་སྐད་འབོད་ཤུགས་ཆེན་བྱས་འདུག ཅེས་བརྗོད་སོང་། ཉིན་འདི་འགར་རྒྱ་གཞུང་གི་གཏན་འབེབས་བྱས་པའི་སྐད་གཉིས་བཅོས་བསྒྱུར་གྱི་ཤེས་ཡོན་སྲིད་བྱས་གསར་པ་དེར་རེབ་གོང་ཁུལ་དང་ཆབ་ཆ། མགོ་ལོག ཁྲི་ཀ རྩི་གོར་ཐང་། གཅན་ཚ། ཐེམ་ཆེན་དང་པེ་ཅིང་མི་རིགས་སློབ་ཆེན་བཅས་ཀྱི་སློབ་ཕྲུག་ཚོས་ཁྲོམ་སྐོར་སྐད་འབོད་བྱས་དེ་བྱེད་མུས་ཡིན་འདུག
གསར་འགོད་པ། དཔལ་ལྡན།
དེ་རིང་མཚོ་སྔོན་དགེ་ཐོན་སློབ་ཆེན་གྱི་ནང་དུ་ཞིང་ཆེན་གྱི་གཙོ་འཛིན་གཞོན་པ་ཀའོ་ཡུན་ལུང་ཕེབས་ཏེ་བསམ་འཆར་བསྡུ་ལེན་བྱས་པར། དགེ་རྒན་སྐོར་ཞིག་གིས་སྦ་གསང་མེད་ཅིང་དངོས་དོན་ལ་རྒྱབ་བརྟེན་ནས་བསམ་འཆར་བཏོན་འདུག ལྷག་པར་དུ། སློབ་གྲྭ་དེར་དགེ་རྒན་གྱི་བྱ་བ་གཉེར་བཞིན་པའི་ན་གཞོན་འབུམ་རམས་པ་རྨེ་རུ་ཡུལ་ལྷ་ཐར་ལགས་ནས་ཞིང་ཆེན་གྱི་སློབ་གསོའི་འཆར་འགོད་རྩ་གནད་དེ་ཀྲུང་དབྱང་གི་དགོངས་དོན་དང་མི་མཐུན་ལ་རྒྱལ་ཁབ་ཀྱི་འབྲེལ་ཡོད་རྩ་ཁྲིམས་དང་བཅའ་ཁྲིམས་ཁག་ལའང་འགལ་ཞིང་། བོད་ཀྱི་དོན་དངོས་དང་ཡང་མི་འཚམ་པའི་འགྲེལ་བརྗོད་གནང་ཡོད་ཚུལ་རྒྱ་ཡིག་དྲ་ངོས་ནས་གསལ་རྟོགས་བྱུང་།
ཞེས་དྲ་ཚིགས་ཤིག་ཏུ་བཀོད་འདུག