སྤྱི་ནོར་༧གོང་ས་མཆོག་གིས་བདུན་ཕྲག་གསུམ་རིང་གི་ཨ་རི་ཁུལ་དང་ཁེ་ན་ཌ་བཅས་ཀྱི་རླབས་ཆེན་གྱི་མཛད་འཕྲིན་ཡོངས་ལེགས་པར་གྲུབ་སྟེ། དེ་རིང་ཉིན་གུང་ཆུ་ཚོད་ ༡ སྟེང་ཕྱིར་བཞུགས་སྒར་ངྷ་རམ་ས་ལར་ཞབས་སོར་བཀོད་ཡོད།
༧གོང་ས་མཆོག་གིས་ཟླ་འདིའི་ཕྱི་ཚེས་ ༡༢ ནས་ ༢༢ བར་ཨ་རི་ཁུལ་དང་། ཕྱི་ཚེས་ ༢༢ ནས་ ༢༤ བར་ཁེ་ན་ཌ་ཁུལ་བཅས་སུ་ཆོས་ཕྱོགས་དང་རིག་གནས་ཐད་ཀྱི་འཛད་འཕྲིན་བསྐྱངས་ཡོད་ཅིང་། ཕྱི་ཚེས་ ༢༦ ཉིན་ཨ་རིའི་སི་ཨནཨན་ (CNN) བརྙན་འཕྲིན་གྱི་ཆེད་གཉེར་གསར་འགོད་པ་ཧ་ལ་གྷོ་ར་ནིས་༧གོང་ས་མཆོག་གི་ཐེངས་འདིའི་ཆིབས་སྒྱུར་དང་འབྲེལ་རྒྱ་ནག་རྒྱལ་སྤྱི། བྱམས་བརྩེ་ཉམས་ལེན་སྐོར། དེ་བཞིན་སྐུ་ཞབས་ལིག་ཞོ་པོ་བཅས་ཀྱི་ཐད་བཅར་འདྲི་ཞུས་ཡོད།
ཕྱི་ཚེས་ ༢༧ ཉིན་ཨ་རིའི་ནེའུ་ཡོག་གྲོང་ཁྱེར་ནས་མཁའ་ལམ་བརྒྱུད་ཕྱིར་རྒྱ་གར་ལྡི་ལིར་ཆིབས་ཐོན་གནང་ཡོད། དེ་རིང་ཉིན་གུང་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་དང་བཞུགས་སྒར་ཁུལ་གྱི་སེར་སྐྱ་མི་དམངས་སྟོང་ཕྲག་མང་པོའི་ཕེབས་བསུའི་དབུས་བཞུགས་སྒར་ཕོ་བྲང་དུ་ཞབས་སོར་བདེ་བར་བཀོད་ཡོད།
ད་ཐེངས་གོང་ས་༸སྐྱབས་མགོན་མཆོག་གིས་ཨ་རི་དང་ཁེ་ན་ཏྲའི་ཁུལ་དུ་རླབས་ཆེ་བའི་ཆོས་ཕྱོགས་ཀྱི་མཛད་འཕྲིན་ཁག་ལེགས་པར་བསྐྱངས་ཏེ་བཞུགས་སྒར་ངྷ་རམ་ས་ལར་ཚེས་ཉེར་བདུན་ཉིན་ཕྱིར་ཞབས་སོར་བདེ་བར་འཁོད་པ་ལ་དྲྭ་གྲོགས་རྣམས་ཀྱིས་འཚམས་འདྲིའི་བཀྲ་ཤིས་བདེ་ལེགས་ཞུ་མི་ཐུབ་པའི་རྒྱུ་མཚན་ག་རེ་ཡིན་ནམ།