དང་པོ་ང་ཞེས་བདག་འཛིན་འཁོ་ན་ལ་གོམས་ནས།།
བར་དུ་གཞན་ཞེས་རིགས་པའི་གཞུང་ལུགས་ལ་སྤྱངས་དེ།།
ཐ་མར་གང་ཡང་མེད་པའི་བོད་པ་ཡི་ལུགས་ལ།།
ཞི་བདེ་ཁ་གཡང་ཞིག་གི་དུས་ཚོད་འདི་ཟད་སོང་།།
རིག་ན་སྙིང་རྗེ་ཁུལ་གྱིས་ལག་ཟུང་དེ་བསྲིངས་ཡོང་།།
མ་རིག་གཏིང་ནས་བརྗེད་པའི་སེམས་ཅན་འདིའི་རིགས་ལ།།
ཡར་རྗེས་འགྲོ་བའི་ལམ་ཁ་ཇེ་ཆུང་ནས་ཇེ་ཆུང་།།
དེ་ཉིད་མཐོང་དུས་སེམས་པ་འཁྱགས་རླུང་གིས་གཙབ་སོང་།།
རང་རིགས་རང་སྐད་ཟེར་ནས་བོད་ཡུལ་ནས་གླེང་སོང་།།
ཕྱི་ནས་ལད་ཟློས་ཙམ་གྱི་ཁ་གཡང་ཞིག་བོས་སོང་།།
དོན་ལ་ཕྱི་ནང་གཉིས་ལ་གནམ་ས་འདི་ཡོད་སྟབས།།
རེ་བ་ས་ནས་མི་སྐྱེས་སེམས་ཐག་ཞིག་གཅོད་བྱུང་།།
དྲིས་ན་ཡོད་ཚད་བཤད་པའི་མཁས་པ་ནི་མང་ལ།།
ལག་ལེན་དོན་ལ་སྟོང་བའི་དེང་རབས་ཀྱི་ང་ཚོས།།
རང་གི་འགྲོ་འདུག་་ཙམ་ལ་བོད་མི་ཡི་སྐྱིད་སྡུག།
ཁ་ཞེ་གཉིས་མེད་མིན་པའི་ངང་ཚུལ་འདི་སྐྱོ་བྱུང་།།
སྙན་ངག་སྙན་པོ་བྱུང་ལ།།
ནང་དོན་གནད་ལ་འཁེལ་བ།།
མ་གཞི་མཆན་བུ་བཏབ་པའི།།
སྤོབས་པ་རང་ལྟ་མེད་དོ།།
ང་དང་ཁྱེད་ཀྱི་ཁོག་ན་སེམས་སྡུག་རེ།།
སྡུག་གི་སྣེ་མོ་རེ་ན་བསམ་གཞིགས་རེ།།
བསམ་གཞིགས་དེ་ལ་འཐམ་ནས་བསྡོད་ལུགས་འདི།།
རང་ཉིད་བོད་པ་ཚང་གི་ཞབས་འདྲེན་རེད།།
དྲ་གྲོགས་ཁྱེད་ཀྱིས་གསུངས་ཅིས་མི་བདེན།།
ཁ་ནས་བཤད་མཁན་མང་བ་ང་ཡི་བོད།།
ལག་ལེན་བྱེད་མཁན་མེད་པ་ང་ཡི་ལུགས།།
ལྟ་བ་མཆོག་ཏུ་འཛིན་པ་རང་གིས་སྲོལ།།