ཚིག་མཛོད་འདིར་མ་ཚིག་འབུམ་གཉིས་དང་ཡིག་འབྲུ་ས་ཡ་དྲུག་ལས་བརྒལ་བ་དང་། དེ་ལས་བོད་ཡིག་ཚིག་མཛོད་ནི། དེ་སྔ་ཁྱབ་ཆེ་བའི་བོད་རྒྱ་ཚིག་མཛོད་ཆེན་མོ་དང་། དག་ཡིག་གསར་བསྒྲིགས་རྨང་གཞིར་བཞག་ནས་གྲུབ་ཡོད། དབྱིན་བོད་ཚིག་མཛོད་ནི་སྐུ་ཞབས་ཀརྨ་སྨོན་ལམ་གྱི་དབྱིན་བོད་ཚིག་མཛོད་གསར་མ་ཞེས་པ་རྨང་གཞིར་བཟུང་ཐོག་ཐ་སྙད་གསར་པའི་འགྲེལ་བཤད་གལ་ཆེ་བ་མང་དག་ཅིག་ཁ་སྣོན་བྱས་ཡོད་སྐོར་བསྟན་འདུག
དེ་རིང་ཕྱི་ཚེས་ ༡༤ ཉིན་གྱི་ཕྱི་དྲོའི་ཆུ་ཚོད་གཉིས་པའི་སྟེང་། གངས་སྐྱིད་བོད་གཞུང་དཔེ་མཛོད་ཚོགས་ཁང་དུ་གློག་ཀླད་ཆེད་མཁས་པ་གྲྭ་བློ་བཟང་སྨོན་ལམ་ལགས་ཀྱིས་༼ སྨོན་ལམ་ཚིག་མཛོད ༽ལེགས་གྲུབ་བྱུང་བའི་གསར་འགོད་གསལ་བསྒྲགས་ཤིག་བསྐྱངས་ཡོད་ཅིང་། ཐེངས་འདུའི་གསར་འགོད་ལྷན་ཚོགས་ཐོག་བོད་གཞུང་ཤེས་རིག་ལས་ཁུངས་ཀྱི་རྩོམ་སྒྲིག་པ་ཆུང་ཚེ་རིང་ལགས་དང་གྲྭ་བློ་བཟང་སྨོན་ལམ་ལགས་ཀྱི་ལས་རོགས་རྭ་རྒྱ་བློ་དབང་བཅས་ཕེབས་འདུག གྲྭ་བློ་བཟང་སྨོན་ལམ་ལགས་གཙོས་པའི་ལས་རོགས་ཁག་ཅིག་མཉམ་རུབ་ཐོག་ལོ་ཡི་འཁོར་མོ་ཧྲིལ་བོ་གཅིག་རིང་དཀའ་སྤྱད་འབད་འབུངས་ལྷོད་མེད་བརྒྱུད་ད་ཆར་སྨོན་ལམ་ཚིག་མཛོད་ལེགས་པར་གྲུབ་སྟེ། རིན་མེད་ཐོག་སྤྱི་ཚོགས་ནང་དངོས་སུ་འགྲེམས་སྤེལ་བྱས་ཡོད་ཅིང་། ཚིག་མཛོད་དེར་མིང་ཚིག་ཉིས་འབུམ་ལྷག་བསྡུ་སྒྲིག་བྱས་ཏེ། བོད་ཡིག་ཚིག་མཛོད་དང་དབྱིན་ཡིག་ཚིག་མཛོད། བོད་དབྱིན་ཚིག་མཛོད། གསར་བྱུང་མང་མཛོད་བཅས་སྡེ་ཚན་བཞིར་དབྱེ་ཡོད། འདི་ནི་ཚིག་མཛོད་ཙམ་དུ་མ་ཟད། བོད་དབྱིན་གཉིས་ཀ་འབྲི་ཀློག་སྦྱོང་གསུམ་གང་བྱེད་ཀྱང་ཚིག་མཛོད་འདིས་རམ་འདེགས་བྱེད་ཐུབ་ལ། གློག་ཀླད་སྒེའུ་ཁུང་ xp དང་ vista སོགས་ལ་ཁྱད་མེད་བཀོལ་ཆོག གསར་བྱུང་ཚིག་མཛོད་འདི་ཕབ་ལེན་བྱ་འདོད་ཡོད་རིགས་ཚོས་འབྲེལ་ཐག་ http://www.4shared.com/get/0o_FOTWt/Monlam_Dictionary.html འདི་བརྒྱུད་དེ་ལེན་ཆོག
ཐེངས་འདིའི་གསར་འགོད་གསལ་བསྒྲགས་ནང་བསྟན་དོན། རང་རེའི་མི་རིགས་ནིི་ཤེས་རིག་གི་དར་རྒྱུན་རིང་ཞིང་། རིག་གནས་ཀྱི་ལྷུ་ལག་ཡོངས་སུ་རྫོགས་པའི་མི་རིགས་ཁྱད་ཆོས་ཅན་ཞིག་ཡིན། འདས་པའི་བྱུང་རབས་ཁྲོད་རང་རེའི་རིག་གནས་ཀྱིས་འཛམ་གླིང་དུ་ཤུགས་རྐྱེན་མི་དམན་པ་ཐེབས་མྱོང་ཞིང་། ལོ་ངོ་སྟོང་ཕྲག་རིང་མཁས་གྲུབ་གོང་མ་རྣམས་ཀྱིས་སྐུ་ངལ་དཔག་དཀའ་བས་འཛིན་སྐྱོང་སྤེལ་གསུམ་མཛད་པའི་རང་རེའི་གཙུག་ལག་རིག་པའི་གནས་ནི། དཔལ་ཡོན་ལྡན་པའི་རྒྱལ་ཁབ་དང་མི་རིགས་སུས་ཀྱང་བསྐྲུན་དཀའ་བའི་སྤུས་ཚད་དང་རིན་ཐང་ལྡན་པར་མ་ཟད། རིག་གནས་ཀྱི་སྒོ་མོ་སྣ་ཚོགས་ཆར་ཤུལ་གྱི་མྱུ་གུ་ལྟར་འབུས་པའི་དེང་གི་དུས་འདིར་ཡང་གནའ་རབས་ནས་བརྒྱུད་པའི་བོད་ཀྱི་རིག་གནས་ལ་བེད་སྤྱོད་དང་ཁྱབ་ཚད་ཀྱི་རིན་ཐང་སྔར་མུས་བཞིན་གསལ་ལ། དཔལ་འབྱོར་གྱི་མཐོ་རླབས་དྲག་ཏུ་འཕྱུར་བའི་ཟང་ཟིང་གི་ཀློང་རིམ་འདིར་མིའི་སྤྱི་ཚོགས་ཁྱོན་ཡོངས་ལ་གཞན་དྲིང་མི་འཇོག་པའི་ཞབས་འདེགས་བསྒྲུབ་ངེས་ཡིན། ཞེས་བཀོད་འདུག
གསལ་བསྒྲགས་དེར་བོད་སྐད་ཡིག་གནས་བབ་ལས་འཕྲོས་ཏེ་མུ་མཐུད་དུ་བསྟན་དོན། དེ་ལྟའི་རིག་གནས་ཀྱི་རྩ་བ་དང་རང་རེའི་མི་རིགས་ཀྱི་སྲོག་ཟུངས་ནི་བོད་ཀྱི་སྐད་ཡིག་ལས་མ་འདས་ཤིང་། སྐད་ཡིག་གི་སྤུས་ཚད་མཐོར་འདེགས་དང་བེད་སྤྱོད་ཇེ་ཆེ། ཁྱབ་ཚད་ཇེ་རྒྱས་སུ་གཏོང་རྒྱུ་ནི་བོད་མི་ཚོར་ལོ་རྒྱུས་ཀྱི་བསྩལ་བའི་འགན་འཁྲི་ལྡོག་དཀའ་བ་དེ་ཡིན་པས། གུས་པ་རང་ཉིད་ཀྱང་མི་རིགས་འདིའི་བུ་ཕྲུག་ཅིག་ཏུ་སྐྱེས་པའི་རང་རྟགས་དང་། ད་ལྟའི་བར་ལུས་སེམས་གསོ་སྐྱོང་མཛད་པའི་དྲིན་ཅན་དག་ལ་དྲིན་བཟོ་ཙམ་དུ་དམིགས་ཏེ། སྔ་ཕྱིར་སྨོན་ལམ་བོད་ཡིག་དང་པོ་དང་གཉིས་པ། གསུམ་པ། སྨོན་ལམ་བོད་ཀྱི་ཐུན་མོང་སྐད་གདངས་བཅས་བཟོ་བསྐྲུན་འགྲེམས་སྤེལ་ཞུས་ཟིན་པ་དང་། བོད་ཀྱི་སྤྱི་ཚོགས་དང་བོད་ཀྱི་སྐད་ཡིག་བེད་སྤྱོད་བྱེད་པོ་དག་ལ་ཕན་ཐོགས་མི་དམན་པ་བྱུང་བར་མ་ཟད། སྤྱི་ཚོགས་ཐོག་བསྔགས་བརྗོད་དང་རྒྱབ་སྐྱོར་རམ་འདེགས་ཀྱི་དགོངས་ཚུལ་མང་དུ་བསྟན་པར་སྤྲོ་བས་བརྟས་ཡོད། ཅེས་དང་།
ཡང་ཚིག་མཛོད་སྒྲིག་སྟངས་དང་དེའི་ཁྱབ་ཁོངས་སྐོར་ལ། དུས་ཀྱི་འགྱུར་བ་ཧ་ཅང་སྐྱེན་པའི་སྣང་ཚུལ་འོག་རང་རེའི་མི་རབས་གསར་པའི་འཁུར་དགོས་ངེས་ཀྱི་འགན་འཁྲི་མང་པོ་ཞིག་བདག་མེད་དུ་ལུས་ཡོད། སྐད་ཡིག་རིག་གནས་ཀྱི་དར་རྒུད་ཀྱང་བློ་འཚབ་སེམས་ངལ་སྐྱེ་བའི་རང་བཞིན་དུ་གནས་པ་དང་། ལྷག་པར་དུ་དེང་དུས་ལག་རྩལ་གྱི་ཐོན་འབྲས་ཁྲོད་ལྷག་པའི་རང་རེའི་སྐད་ཡིག་གི་སྟོང་ཆ་ནི་བསུབ་དཀའ་བའི་ཚད་དུ་ལྷུང་ཡོད་སྟབས། གུས་པས་རང་ནུས་འདོན་འཇལ་གྱིས་སྟབས་བདེའི་ཚིག་མཛོད་ཅིག་བཟོ་མགོ་བརྩམས་ཤིང་། ལོ་ངོ་ཧྲིལ་པོ་གཅིག་ལྷག་ལ་གཉིད་བཅག་ཟས་བརྗེད་ཀྱི་ངལ་བ་བསྟུད་མར་བརྒྱུད་ད་ལྟ་ཡོངས་སུ་ལེགས་གྲུབ་བྱུང་ཡོད། ཅེས་བཀོད་འདུག
ཡང་གསལ་བསྒྲགས་དེའི་ནང་ཚིག་མཛོད་དེའི་གྲུབ་ཆའི་སྐོར་བསྟན་དོན། ཚིག་མཛོད་འདིར་མ་ཚིག་འབུམ་གཉིས་ ༢༠༠༠༠༠ དང་ཡིག་འབྲུ་ས་ཡ་དྲུག་ ༦༠༠༠༠༠༠ ལས་བརྒལ་བ་དང་། དེ་ལས་བོད་ཡིག་ཚིག་མཛོད་ནི། དེ་སྔ་ཁྱབ་ཆེ་བའི་༼ བོད་རྒྱ་ཚིག་མཛོད་ཆེན་མོ ༽་དང་། ༼ དག་ཡིག་གསར་བསྒྲིགས ༽ རྨང་གཞིར་བཞག་ནས་གྲུབ་ཡོད་ཅིང་། དབྱིན་བོད་ཚིག་མཛོད་ནི་སྐུ་ཞབས་ཀརྨ་སྨོན་ལམ་གྱི་༼ དབྱིན་བོད་ཚིག་མཛོད་གསར་མ༽ཞེས་པ་རྨང་གཞིར་བཟུང་ཐོག་ཐ་སྙད་གསར་པའི་འགྲེལ་བཤད་གལ་ཆེ་བ་མང་དག་ཅིག་ཁ་སྣོན་བྱས་པ་དང་། བོད་དབྱིན་ཚིག་མཛོད་ལ་མ་ཚིག་གི་རྣམས་གྲངས་ ༩༠༠༠༠ ལྷག་ཡོད་པ་དང་། དེ་ཡང་བོད་དབྱིན་ཚིག་མཛོད་སྣ་ཚོགས་ལས་བཏུས་ཏེ་བོད་ཀྱི་རིག་གནས་ཀྱི་གལ་ཆེ་ས་དང་ཁྱབ་ཡངས་ས་ཤ་སྟག་གིས་གྲུབ་ཡོད། བོད་རྒྱ་དབྱིན་གསུམ་གྱི་རྒྱུན་བཀོལ་གསར་བྱུང་མིང་མཛོད་ལ་སྣོན་འཕྲི་གང་ཡང་མེད་པར་རང་སོར་བཞག་ཡོད། ཚིག་མཛོད་འདིར་སྤྱིར་བཏང་གི་ཐ་སྙད་ཕལ་མོ་ཆེར་ཡིག་སྒྱུར་གྱི་ཆ་རྐྱེན་ཡང་འཐུས་ཚང་དུ་ཡོད་སྟབས། བོད་དབྱིན་འབྲི་ཀློག་སྦྱོང་གསུམ་དང་། ཡིག་སྒྱུར་བཅས་ལ་ཕན་ཐོགས་མི་དམན་པ་འབྱུང་ངེས་ཤིང་། རྩོམ་སྒྲིག་ཚན་པ་དང་། ཡུལ་སྐོར་རང་བཞིན་གྱི་རིག་གནས་ལས་རིག་པ་དག་ལ་སྟབས་བདེ་ཞིང་ཆ་རྐྱེན་འཛོམས་པའི་ཞབས་འདེགས་ཆེན་པོ་ཞུ་ཐུབ་ངེས་ཡིན། དེ་སྔ་ཚིག་མཛོད་འདིའི་ཐད་མཁས་པའི་བགྲོ་གླེང་སྐོང་ཚོགས་ཐོག་སྤྱན་འབུལ་གྱིས་བསམ་ཚུལ་བསྡུ་ལེན་དང་། ཤེས་ལྡན་པ་མང་པོ་ཞིག་དང་ལྷན་དུ་གྲོས་བསྡུར་རིམ་པར་བྱས་ཡོད། ཅེས་མདོ་བསྡུས་སུ་བཀོད་འདུག
གཞན་ཡང་ཐེངས་འདིའི་གསར་འགོད་གསལ་བསྒྲགས་དང་སྟབས་བསྟུན་ཏེ། སྨོན་ལམ་ཡིག་གཟུགས་ཀྱི་འགྱུར་ལྡོག་སྐོར་ངོ་སྤྲོད་བྱས་དོན། སྨོན་ལམ་བོད་ཡིག་ ༣༌༡ ནི་དེ་སྔའིོ་སྨོན་ལམ་བོད་ཡིག་གསུམ་པར་བསྐྱར་བཅོས་དང་ཁ་སྣོན་བྱས་ཡོད་པར་མ་ཟད། ཟླ་ཤས་གོང་དེའི་ཐད་བགྲོ་གླེང་སྐོང་ཚོགས་དང་འབྲེལ་སྔགས་ཡིག་དང་། དབུ་མེད་ཚུགས་རིང་ཐུང་གི་དབྱངས་དང་འདོགས་ཅན་བཅས་སྟབས་བདེར་བཟོས་ཡོད་ལ། གཙོ་བོར་བོད་ཡིག་གི་འབྲི་ཚུལ་ཆ་ཚང་བ་ཞིག་ཡོང་བར་འབད་བརྩོན་གནང་ཡོད། ཅེས་དང་།
མཐར་མར་ཁོང་གིས་འབོད་སྐུལ་དང་སྦྲགས་བརྗོད་དོན། ལས་རིམ་འདི་བསྒྲུབས་པའི་སྔ་ཕྱིར་བརྩེ་བའི་གྲོགས་པོ་དང་ལས་རོགས་བཅས་ཀྱིས་དཀའ་སྡུག་མཉམ་མྱོང་གི་བརྩོན་པ་རྒྱུན་བསྐྱེད་སྟབས། ཡིག་འབྲུ་ས་ཡ་འགའི་ཚིག་མཛོད་འདི་བཞིན་དུས་འགྱངས་མ་བྱུང་བར་སྤྱི་ཚོགས་ཐོག་འགྲེམས་སྤེལ་བྱེད་ཐུབ་བྱུང་། ཚིག་མཛོད་འདི་རིན་མེད་ཐོག་འགྲེམས་སྤེལ་ཞུ་རྒྱུ་ཡིན་པས་སྤྱི་ཚོགས་སྟེང་གི་ཤེས་ཡོན་ཅན་དང་དང་གསར་འགོད་པ་རྣམས་ཀྱིས་ཚིག་མཛོད་གཙོས་སྐད་ཡིག་དང་འབྲེལ་བའི་མཉེན་ཆས་འདི་དག་འགྲེམས་སྤེལ་དང་། བེད་སྤྱོད་གཏོང་ཕྱོགས་ཐད་མང་ཚོགས་ལ་ངོ་སྤྲོད་གནང་རོགས་ཞེས་བརྗོད་བྱུང་།
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྤྱིར་བཏང་བཤད་ན། Win 7 དང Vista གཉིས་ཀར་དཀའ་ངལ་མེད་ཚོད་རེད། གལ་ཏེ་Windows XP ནང་ལ་འཇུག་སྐབས་དཀའ་ངལ་བྱུང་ན། http://www.lobsangmonlam.org དྲ་རྒྱ་འདིའི་་ནང་ལྟོས་དང་མཉེན་ཆས་ཤིག་ཕབ་ལེན་བྱ་རྒྱུ་ཡོད། དེ་ཕབ་ལེན་དང་ནང་འཇུག་བྱས་ན་ཁྱེད་ཀྱི་དཀའ་ངལ་སེམས་ཐུབ་ངེས་ཡིན།
སྐུ་ཞབས་སྨོན་ལམ་མཆོག་ལ་སྙིང་ནས་ཐུགས་རྗེ་ཆེ་ཞུ་བ་ཡིན།
མཆོག་ཉིད་ཀྱིས་སྐུ་ངལ་འཛེམ་མེད་ལ་མ་ལྟོས་པར་ལྷག་བསམ་ལྡན་པའི་སྒོ་ནས་རང་མི་རིགས་ཀྱི་རིགས་གཞུང་དེ་གོ་ལ་འདིའི་ཐོག་ནས་མི་རིགས་ག༷༷ཞན་པའི་ཡར་ཐོན་ཅན་གྱི་རྒྱལ་ཁབས་དང་ལྷན་དུ་འགྲོ་ཐུབ་པ་དེ་མཆོག་ཉིད་ཀྱིས་ཐུགས་རྗེ་བཀའ་དྲིན་ཁོ་ན་ཡིན་པས་སྙིང་ནས་ཐུགས་རྗེ་ཆེ་ཞུ་བ་ཡིན།
འོན་ཀྱང་མཆོག་ཉིད་ཀྱིས་ཚིག་མཛོད་དེ་ཀུ་ཤི་རྟག་ཅན་གྱི་རྩེས་འཕྲུལ་ལ་བེད་སྤྱོད་གང་འདྲ་གཏོང་དགོས་མིན་ཧ་གོ་མ་བྱུང་བས་བས་མཆོག་ཉིད་ཀྱིད་དེ་ལ་གསལ་བཤད་གསལ་བོ་ཞིག་གནང་བར་ཐུགས་རྗེ་མ་ཆུང་ཞུ་བ་ཡིན།
སྐུ་ཞབས་སྨོན་ལམ་ལགས། ཐུགས་རྗེ་གཟིགས། ཚིག་མཛོད་འདི་གློག་ཀླད་ནང་ཇི་འདྲ་བྱས་ནས་ཤུ་དགོས་མིན་དང་། བཤུས་བསྒྲུབས་རྗེས་གློག་ནང་ཇི་ལྟར་འཇུག་དགོས་པའི་ལམ་སྟོན་གསལ་པོ་ཞིག་གནང་རོགས་མཁྱེན།
དེ་རིང་ངོས་ཀྱི་དྲ་འབྱེད་གཉེན་ཆས་མི་འདྲ་བ་ཁག་གསུམ་ནས་ཐེང་རེ་རེ་བྱས་བསྡོམས་ཐེང་གསུམ་བཤུས་པ་ཡིན། འོན་ཀྱང་དེ་རྣམས་གློག་ཀླད་ནང་ཙ་ནས་བླུག་ཐུབ་ཀྱི་མི་འདུག
ཁྱེད་ནས་ལམ་སྟོན་གསལ་པོ་ཞིག་གནང་རོགས་ཞུ།
སྐུ་ཞབས་སྨོན་ལམ་ལགས་སྙིང་ནས་ཐུགས་བརྗེ་ཞུ་
འདི་ནི་ང་ཚོའི་སྐད་ཡིག་ཡར་རྒྱས་འགྲོ་བྱེད་ཀྱི་ཕྱག་ལས་ཞིག་རེད་ལ་ཅི་འདྲའི་དགའ་བ་ལ
སྐུ་ཞབས་བློ་བཟང་སྨོན་ལམ་ལགས་ལ་ཞུ་རྒྱུར། ཐོག་མར་བདག་གིས་སྨོན་ལམ་ཚིག་མཛོད་ཀྱི་མ་ལག་བླངས་པ་མ་ཟད། ཆ་ཚང་གློག་ཀླད་དུ་བླུགས་ཐུབ་པ་བེད་སྤྱོད་ཡང་གཏོང་ཐུབ་པ་བྱུང། རྗེས་ནས་གློག་ཀླད་དུ་འཇུག་སྐབས་བརྡ་འདི་ལྟ་བུ་ཞིག་མངོན་གྱི་འདུག་པས། ག་འདྲ་བྱས་ནས་གློག་ཀླད་དུ་འཇུག་དགོས་པ་ལམ་སྟོན་ཞིག་གནང་རོགས།
( An error occurred while installing system components for Monlam Dictionary.Setup can’t continue until all system components have been successfully installed.) འདིའི་སྐབས་སུ་གློག་ཀླད་དུ་ག་འདྲ་བྱས་ཏེ་འཇུག་དགོས་སམ། ཐུགས་རྗེ་ཆེ།
འདི་ནི་ཧ་ཅང་ཡར་རྒྱས་དང་མདུན་བསྐྱོད་ཀྱི་རྣམ་པ་ཞིག་རེད་ལ་ཅི་འདྲའི་དགའ་བ་ལ།
རྗེས་སུ་ཡི་རངས་ཞུ། ཡིན་ན་འང་ཀུ་ཤུ་རྟགས་ཅན་གྱི་གློག་གླད་ནང་དུ་ཡོང་གི་མི་འདུག་པས་ཀུ་ཤུ་རྟགས་ཅན་གྱི་གློག་གླད་ནང་དུའང་ཡོང་ན་ཡག་ཐོག་ལ་ཡག་རེད།
རྒན་བློ་བཟང་སྨོན་ལམ་ལགས་ནས་ཚིག་མཛོད་བཟོས་པ་དང་རིན་མེད་ཐོག་གནང་བར་སྙིང་ནས་ཐུགས་རྗེ་ཆེ།
ཚིག་མཛོད་དེ་ལག་ཐོག་ཁ་པར་ཐོག་བེད་སྤྱོད་ཡོད་པ་བཟོ་ཐུབ་ན་བེད་སྤྱོད་བྱེད་མཁན་མང་བས་ཕན་པ་དེ་བས་ཆེ་བ་ཡོད་པ་སྨོས་མེད་རེད། དེ་ལྟར་བཟོ་ཐུབ་པའི་རེ་བ་རྒྱབ་བཞིན།
ཁྱེད་ཀྱི་ལས་དོན་གང་འདྲ་ཞིག་གནང་ཡང་ལམ་སློང་ཡོང་བའི་སྨོན་འདུན་ཡོད།
ཐུགས་རྗེ་ཆེ་གྲྭ་སྨོན་ལམ་ལགས ངོ་མ་སྙིང་ཁོང་རུས་པའི་གཏིང་ནས་ཐུགས་རྗེ་ཆེ།
བཀྲ་ཤིས་བདེ་ལེགས། ཐུགས་རྗེ་བླ་མེད་ཆེ། གྲུབ་འབྲས་རླབས་ཆེན་ཐོན་འདུག
ལས་དོན་དེ་མུ་མཐུད་ཡར་རྒྱས་གཏོང་བའི་སྨོན་འདུན་ཞུ། ངས་ཤར་མར་ཚོད་བལྟ་ཞིག་བྱས་པས་འདི་དག་མཐོང་བྱུང་། དཔེར་ན་བོད་དབྱིན་ཚིག་མཛོད་དུ་ དེ་རིང་ གི་ཚིག་འགྲེལ་མི་འདུག དབྱིན་བོད་ཚིག་མཛོད་དུ་ counterproductive གི་ཚིག་འགྲེལ་མི་འདུག བོད་ཡིག་ཚིག་མཛོད་དུ་ དྲན་ཤིང་ གི་ཚིག་འགྲེལ་མི་འདུག གསར་བྱུང་རྒྱུན་བཀོལ་མིང་མཛོད་དུ་ ཡི་གེ་བཏགས་པ ་ཡི་ཚིག་འགྲེལ་མི་འདུག རྒྱ་ཡིག་ལ་ནི་བལྟ་མི་ཤེས། ད་དུང་རིམ་བཞིན་ཡར་རྒྱས་གཏོང་འཆར་ལོས་མོད་རི་མོ་དང་སྒྲ་གདངས་ཡང་ཡོད་པ་བཟོས་ན་ཧ་ཅང་ལེགས།
བཀའ་ཁྲིའི་ཕྱག་ལས་བཟང་བ་རང་གཞན་གཉིས་ཕན་རེད། རྗེས་སུ་ཡི་རང་ངོ་། །
སྐུ་ཞབས་སྨོན་ལམ་ལགས་སུ་བཀྲ་ཤིས་སྨོན་འདུན་དང་ཆབ་ཅིག་བཀའ་དྲི་བཞུ་རྒྱུར་ཚིག་མཛོད་འདི་བཞིན་ཀུ་ཤུའི་གློག་ཀླད་ནང་ག་དུས་ཐོན་ཐུབ་བམ་ ཁྱེད་ཀྱི་གནང་བའི་ཡིག་གཟུགས་གསུམ་པ་དེ་ཡང་གུས་པ་བེད་སྤྱོད་གཏོང་བཞིན་ཡོད་པས་ཧ་ཅང་ཕན་པ་འདུག་པས་ཐུགས་རྗེ་ཆེ་། སླད་ཁྱེད་བྱ་བ་ལེགས་འགྲུབ་ཡོང་བའི་སྨོན་འདུན་བཞུ།།
མཁྱེན་རླབས་མཚུངས་མེད་ལགས་ནས་སྐུ་ངལ་དུ་མ་ཞིག་ཁྱད་དུ་བསད་ནས་ད་བཟོད་རིན་ཐང་ཆེ་བའི་ཚིག་མཛོད་ཞིག་གསར་སྐྲུན་གནང་བ་མངགས་བརྗོད་དང་ཐུགས་རྗེ་ཆེ། ཚིག་མཛོད་དེ་བཞིན་བདེ་བླག་ངང་ངའི་གློག་ཀླད་དུ་བཅུག་སྟེ་སྟེབས་བདེའི་ངང་ལས་ཀ་བྱེད་མུས་ཡིན།
འོན་ཀྱང་ཡིག་གཟུགས་༣་༡ཅན་དེ་ཉིད་སྔར་བཞིན་CorelDRAW X4དང་Adobe Photoshop CS3ནང་བེད་སྤྱོད་སྐབས་འཐོར་བཞིན་འདུག་པས་ནང་འཇུག་བྱེད་སྟངས་ལ་ཁྱད་པར་འདྲ་ཡོད་ན་སློབ་སྟོན་གནང་རོགས།
གྲྭ་སྨོན་ལམ་ལགས་བཀྲ་ཤིས་བདེ་ལེགས་སེམས་གཏིང་ནས་ཞུ། སྨོན་ལམ་ལགས་ཁྱོད་ལྟ་བུའི་གསར་བཏོད་ཀྱི་དཔའ་བོ་འགའ་བོད་མི་རིགས་ཀྱི་ནང་དུ་ཡོད་ཀྱི་ན།
རྗེས་ལས་ཀྱི་ཞ་མོ་རྙིང་པ་རང་མི་རིགས་ཀྱི་གོན་དགོས་ཀྱི་མ་རེད། མཐར་ཁྱོད་དང་ཁྱོད་ཀྱི་ལས་རོགས་རྣམས་ཀྱི་སྐུ་ཚེ་ཡུན་རིང་དུ་བརྟན་པའི་སྨོན་འདུན་ཡང་སེམས་གཏིང་་ནས་་ཞུ།-
སྐུ་ཞབས་སྨོན་ལམ་ལགས་ཐུགས་བརྗེ་ཆེ་ཞུ་རྒྱུ་ཡིན།
འོན་ཀྱང་ཚིག་མཛོད་དེའི་ལྗིད་ཚད་ཆེ་ཙམ་འདུག་པས་ད་དུང་ཕབ་ལེན་ཐུབ་མ་སོང་།
བཀུར་འོས་བློ་བཟང་སྨོན་ལམ་མཆོག་ལ།
ངས་ཚིག་མཛོད་ད་དུང་ཕབ་ལེན་བྱེད་བཞིན་པ་ཡིན། ཁྱེད་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།
ཐོག་མར་གྲྭ་སྨོན་ལམ་ལགས་ལ་ཐུགས་རྗེ་ཆེ་ཞུ།
སྤྱིར་ང་ཚོས་སྐད་ཡིག་སྲུང་སྐྱོབ་ཅེས་ཁ་ནས་མ་ནིའི་བཞིན་སྐྱོར་ཡང་དོན་དག་སྐད་ཡིག་འདི་དེང་རབས་དང་མཐུན་པའི་མིའི་ཉིན་རེའི་འཚོ་བའི་དགོས་མཁོ་སྐོང་ཐུབ་པའི་སྟབས་བདེ་ཕྱོགས་ལ་འདི་ལྟ་བུར་ཁ་ཕྱོགས་ན་གཞི་ནས་སྐད་ཡིག་སྲུང་སྐྱོབ་ཅེས་ནམ་རྒྱུན་སྐྱོར་བཞིན་པའི་ཞལ་འདོན་དེ་ཡང་ཡང་སྐྱོར་མི་དགོས།
གྲྭ་སྨོན་ལམ་ལགས་ཀྱིས་མུ་མཐུད་དེ་ཡིག་བསྒྱུར་ཚིག་མཛོད་ཅིག་བཟོ་ཐབས་ལ་འབད་འབུངས་ལྷོད་མེད་གནང་རོགས།
དེ་འདྲའི་ཡིག་བསྒྱུར་ཚིག་མཛོད་ཅིག་བཟོ་ཐུབ་སོང་ན་གཞི་ནས་གཞན་སྐད་གྱི་སྒང་ན་ཡོད་པའི་ཤེས་བྱ་མང་པོ་ཞིག་གཞན་སྐད་ལ་བརྟེན་མི་དགོས་པར་བོད་ཡིག་རང་གི་སྒང་ནས་བོད་ཡིག་ཤེས་མྱི་ཞིག་ཡིན་ཕྱིན་བསྒྱུར་ཀློག་ཐུབ་པའི་དུས་སྐབས་ཤིག་ཤར་སོང་ན་སྐད་ཡིག་རང་བཞིན་གྱི་བེད་སྦྱོད་ཀྱི་ཁོར་ཡུག་ཆེ་རུ་འགྲོ་བར་ངེས།
ཐུགས་རྗེ་ཆེ། སྨོན་ལམ་ལགས། ལས་རིམ་འདི་ལས་ཁྱད་དུ་འཕགས་ཤིང་དུས་རབས་ཀྱི་དགོས་མཁོ་དང་འཚམ་བའི་བྱ་བ་ཞིག་གཏན་ནས་མེད་པས་ཐུགས་རྗེ་ཆེ།
གློག་ཀླད་ཆེད་མཁས་པ་སེར་སྨད་གྲྭ་བློ་བཟང་སྨོན་ལམ་མཆོག་ལ་འཚམས་འདྲི་དང་སྨོན་ལམ་ཚིག་མཛོད་ལེགས་གྲུབ་བྱུང་བས་མ་ཚད་རིན་མེད་ཐོག་འགྲེམས་སྤེལ་བྱེད་པ་ལ་བཅོས་མིན་གྱི་རྗེས་སུ་ཡི་རང་དང་བསྔགས་བརྗོད་ཡོད། འདི་ནི་དུས་ཀྱི་འགྱུས་འགྲོས་དང་འཚམས་ཞིང་ཁ་ཡོད་ལག་ཡོད་ཀྱི་དགོས་ངེས་ཞིག་ཏུ་མཐོང་བས་བོད་གཞིས་བྱེས་གཉིས་སུ་རང་མི་རིགས་ཀྱི་སྐད་ཡིག་འདི་ཉིད་འཛམ་གླིང་གང་སར་ཁྱབ་ཚད་ཇེ་རྒྱས་ཐུབ་པའི་དམིགས་བསལ་གྱི་ཕན་རླབས་ཆེན་པོའི་ནུས་པ་ལྡན་ཡོད། སྐུ་ཉིད་ཀྱིས་སྨོན་ལམ་དང་པོ་འགོ་བརྩམས་ནས་ད་བར་གཉིད་བཅག་ཟས་བརྗེད་ཀྱི་ངལ་བ་བསྟུད་མར་བྱེད་འབྲས་སུ་དུས་ད་ཆ་སྨོན་ལམ་བོད་ཡིག་དང་གཉིས་གསུམ་དང་ཚིག་མཛོད་སོགས་མཇུག་ཡོངས་སུ་གྲུབ་ཡོད་པ་འདིའི་བོད་མི་རིགས་ཀྱི་སྐད་ཡིག་སྲུང་སྐྱོབ་ཆེད་ཁ་ཚ་དགོས་བཏུགས་ཀྱི་རྒྱབ་སྐྱོར་ཞིག་དུ་འགྱུར་ཡོད་པས་མ་ཚད་ཉིད་ཀྱིས་མི་ཚེའི་རླབས་ཆེན་གྱི་བྱས་རྗེས་དྲུད་ཤུལ་ཞིག་ཀྱང་ཡིན་ལགས།
སྨོན་ལམ་ལགས བཀྲ་ཤིས་བདེ་ལེགས་ཡོད།
སྨོན་ལམ་མཆོག་ལ་བཀྲ་ཤིས་བདེ་ལེགས་ཡོད། ཁྱེད་ཀྱིས་བོད་རྒྱ་ཚིག་མཛོད་གཞི་ལ་བཞག་པར་བརྟེན་ཁྱེད་ལ་རྒྱབ་སྐྱོར་ཡོད། ཁྱེད་ཚིག་མཛོད་འདིས་བོད་འགྲོ་བ་ཡོངས་ཕན་ཐོགས་རླབས་ཆེན་ཞིག་ཡོང་རྒྱུ་ཡིན།
མཁྱེན་ཟབ་ཡངས་པའི་བློ་སྨོན་ལགས་ཀྱིས་གསར་དུ་བཏོད་པའི་སྨོན་ལམ་ཚིག་མཛོད་ལེགས་གྲུབ་བྱུང་བར་རྗེས་སུ་ཡི་རང་དང་འདི་ནི་དེང་རབས་སྤྱི་ཚོགས་གསར་བའི་ཁྱད་ཆོས་དང་མཐུན་པའི་ཚིག་མཛོད་ཅིག་དང་ཡུན་རིང་གི་ལོ་རྒྱུས་ལྡན་པའི་བོད་ཀྱི་སྐད་ཡིག་གཉིས་ཀྱི་བང་མཛོད་ཀྱི་ཆ་ཤས་ཤིག་ཏུ་གྱུར་ཡོད་པས་བོད་ཀྱི་སྐད་ཡིག་རྒྱལ་སྤྱི་ཅན་དུ་འགྱུར་བར་ཕན་རླབས་ཆེ་ཞིང་རང་རེའི་སྐད་ཡིག་ལ་དུངས་ཞེན་ཆེ་བའི་ཕྱི་ནང་གི་ལས་རིགས་མང་བོའི་དགོས་མཁོའི་རེ་འདུན་བསྐང་ཐུབ་ངེས་ལགས།
གློག་ཀླད་ཆེད་མཁས་པ་གྲྭ་བློ་བཟང་སྨོན་ལམ་ལགས་ཀྱིས་དཀའ་སྤྱད་སྡུག་རུས་ལ་བརྟེན་ནས་གསར་གཏོད་ཀྱི་རང་བཞིན་ཅན་གྱི་སྨོན་ལམ་ཚིག་མཛོད་རིན་མེད་ཐོག་འགྲེམས་སྤེལ་ཞུ་བཞིན་ཡོད། ཁོང་གི་ཐུགས་རེ་ལ་ཚོང་བསྒྱུར་མི་བྱེད་པར་བོད་ཕྱི་ནང་ཡོངས་སུ་འགྲེམས་སྤེལ་རྒྱ་ཆེར་ཡོང་པར་འབོད་སྐུལ་ཞུ་བཞིན་ཡོད། འདི་ནི་ཁོང་གིས་བོད་མི་རིགས་དང་རིག་གཞུང་ལ་བཅིངས་པའི་རླབས་ཆེན་གྱི་བསམ་གཞིགས་གཏོང་སྟངས་ཤིག་རེད། ཚིག་མཛོད་འདིས་བོད་ཕྱི་ནང་ཀུན་ནས་རང་གི་རིག་གཞུང་ལ་ཞབས་འདེགས་རླབས་ཆེན་བསྒྲུབ་ཐུབ་པ་མ་ཟད། རླབས་ཆེན་གྱི་ལས་དོན་འདིས་བོད་མི་རིགས་ཀྱི་རིག་གཞུང་གི་སྟོང་ཆ་ཆེན་པོ་ཞིག་ཁ་གསུབ་བྱས་ཡོད་པ་མ་ཟད་དེང་རབས་དང་མཐུན་པའི་གོམ་སྟབས་ཆེན་པོ་ཞིག་ཁོང་གི་བཀའ་དྲིན་ལ་བརྟེན་ནས་ང་ཚོ་སྤོ་ཐུབ་ཡོད་པ་རེ། ཁོང་གིས་ད་དུང་མུ་མཐུད་ནས་བོད་ཀྱི་བརྡ་སྤྲོད་དང་མཐུན་པའི་ཚིག་མཛོད་ཆེན་མོ་ཞིག་བསྡུ་སྒྲིག་གནང་རྒྱུའི་ཐུགས་རེ་གནང་བཞིན་ཡོད་འདུག བྱ་བ་ལམ་ལྷོང་ཡོང་བའི་སྨོན་འདུན་དང་བཅས། ཁ་བྲོ་བཀྲ་ཤིས།
གློག་ཀླད་མཁན་པོ་གྲྭ་བློ་བཟང་སྨོན་ལམ་ལགས་ནི་བོད་མི་རིགས་ཀྱི་སྤྱི་ཚོགས་ཁྲོད་དུ་དེ་སྔ་བྱུང་མ་མྱོང་བའི་བོད་ཀྱི་སྐད་ཡིག་གི་ཚེ་སྲོག་རྒྱུན་བསྲིངས་དང་དེང་རབས་ཅན་དུ་བསྒྱུར་མཁན་གྱི་ཆེད་མཁས་པ་ཉག་གཅིག་པོ་ཡིན། ཁོང་གི་བཀའ་དྲིན་ལ་བརྟེན་ནས་བོད་མི་རིགས་ཀྱི་སྐད་ཡིག་འདིས་དུས་རབས་ཀྱི་རྗེས་ཟིན་བཞིན་ཡོད་ལ། བོད་མི་ཀྱི་སྐད་ཡིག་འདིའི་འཐུས་སྒོ་ཇེ་ཚང་དུ་འགྲོ་བཞིན་ཡོད། སྨོན་ལམ་ཚིག་མཛོད་ངོ་མ་ཡག་པོ་བཟོས་འདུག བེད་སྤྱོད་གཏོང་སྟངས་ཧ་ཅང་གི་སྟབས་བདེ་པོ་འདུག དབྱིན་བོད་དང་བོད་དབྱིན་སོགས་གང་དགོས་ཀྱང་འཚོལ་སྟངས་ཞེ་དྲགས་སྟབས་བདེ་བོ་འདུག འདིས་བོད་ཡིག་སྦྱོང་མཁན་གཅིག་བུ་ཙམ་མ་ཟད་དབྱིན་ཡིག་སྦྱོང་མཁན་ཚོར་ཡང་ཕན་ཐོགས་ཆེན་པོ་འདུག སྐུ་ཞབས་སྨོན་ལམ་ལགས་ལ་སླར་ཡང་ཐུགས་རྗེ་ཆེ་ཞེས་ཞུ།
ཀློག་ཀླད་མཁན་པོ་གྲྭ་བློ་བཟང་སྨོན་ལམ་ལགས་ཀྱིས་སྨོན་ལམ་ཚིག་མཛོད་ལེགས་འགྲུབ་བྱུང་སྟེ་རིན་མེད་ཐོག་འགྲེམས་སྤེལ་ཞུས་པར་བོད་ཕྱི་ནང་གཉིས་ཀའི་ཚབ་བྱས་ནས་བཅོས་མིན་གྱི་ཐུགས་རྗེ་ཆེ་ཞེས་ཞུ་བཞིན་ཡོད།
ཚིག་མཛོད་ཕབ་ལེན་བྱེད་ཐུབ་ཀྱི་མི་འདུག་པས་ལམ་སྟོན་གནང་རོགས།
The file link that you requested is not valid.ཟེར་བ་འདི་ཐོན་གྱི་འདུག།
དྲ་བ་དེར་དེབ་སྐྱེལ་སོགས་དགོས་ངེས་ཚང་མ་བྱས་ཀྱང་ཕབ་ལེན་བྱེད་ཐུབ་མ་སོང་།
སྐུ་ཞབས་བློ་བཟང་སྨོམ་ལམ་ལ་བསྟོད་བསྔགས་འབུལ། རིན་མེད་གནང་བར་ཐུགས་རྗེ་ཆེ། སྔོན་མ་རྡ་ས་དེ་བར་དང༌། ཚོགས་པ་འགའ་རེས་བོད་ཡིག་གི་ཡིག་གཟུགས་འགའ་རེ་བཟོས། ཕལ་ཆེར་སམ་བྷོ་ཊ་དང་གཡུ་མཚོ་དང་ད་དུང་འགའ་ཞིག་ཡོད། ཁོང་ཚོས་གསེར་ནང་བཞིན་རིན་གོང་མཐོན་པོ་མ་སྤྲད་ན་མི་ཚོང༌། ཚོང་དང་ཁེ་སང་རང་གི་བསམ་བློ་ལས་བོད་ཀྱི་སྐད་ཡིག་དར་སྤེལ་ཟེར་བ་དེ་ཚོའི་ཀླད་པ་ནང་གཏན་ནས་མེད། དེ་ཚོ་དྲན་སྐབས་སྐུ་ཉིད་ལ་ལྷག་ཡང་བཀའ་དྲན་ཆེ་ཞེས་བརྗོད་འདོད་བྱུང༌།
སྨོན་ལམ་ལགས། སྐུ་ཉིད་ཀྱིས་ངལ་བ་ཁྱད་དུ་བསད་དེ་བོད་མི་རིགས་ཀྱི་རིག་གཞུང་དེང་རབས་དང་མཐུན་པ་ཞིག་ཡོང་བར་འབད་བརྩོན་ལྷོད་མེད་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་བ་ལགས།
ཡེས་ཤེས་ཆོས་ལུགས་པ་ཞིག་ཡིན་ན་བློ་སྨོན་ལགས་དཀོན་མཆོག་གིས་ཆེད་དུ་བཏང་བ་རེད་ཟེར་རྒྱུ་རེད།
སྟབས་བདེ་ལ་ཁ་ཡོད་ལག་ཡོད་ཀྱི་ཕན་ཐོག་པ་ཞིག་འདུག་པས་ཡི་རིང་དང་ཐུགས་རྗེ་ཆེ་ཞུ་རྒྱུ་ཡིན།
དེ་མིན་་་་མི་་ཞེས་པའི་འབུ་ཆུང་ལ་ཞུ་རྒྱུར་་་་་ས་བོན་རུལ་བ་ལ་འབྲས་བུ་མེད་མེད་པ་རེད་ཞུ་རྒྱུ་ཡིན
འདིའི་སྐོར་ལ་རྩོམ་རེ་འབྲི་གིན་ཡོད་ན་བཟང་གི ་་་་་་ཞུ་རྒྱུ་ཞིག་ལ་་་་་ཁྱེད་ཀྱི་རྩོམ་དེ་བྲིས་ནས་དེབ་གཟུགས་སུ་བཀོད་སྐབས་་་་འདི་ལྟར་བྱོས་་་་་་ནག་ཚ་ཉོས་དེ་ཤོག་བུའི་རྒང་ལ་ལག་པའི་བྲིས་་་་དེ་ནས་ཅོ་ཤིང་ཞིག་ཉོས་ནས་ཡིག་འབྲི་རེ་རེ་བཞིན་རྐོས་རྒྱོབ་་་་་དེ་ནས་ཤོག་བུ་རེ་རེ་བཞིན་པར་དུ་བཤོས་་་་་་་་་་འཚམས་དེ་ནས་ཁྱེད་ཀྱི་ཀློག་ཀླད་དང་བློ་སྨོན་ཀྱི་ཐོག་མཐའ་བར་གསུམ་གྱི་བྱ་བཞག་སོགས་ལ་དད་པ་སྐྱེ་ངེས་་་་་་ཧ་ཧ་་་་་་་
རྡ་སའི་བཙན་བྱོལ་སྒྲུག་འཛུགས་ཀྱིས་ཐ་སྙད་གསར་པའི་ཚིག་མཛོད་རིན་མེད་ཐོག་བོད་མི་རྣམས་ལ་མ་སྤྲད་ཀྱང་ཨ་ཁུ་སྨོན་ལམ་སྒེར་ངོས་ནས་ཚིག་མཛོད་ཤིག་རིན་མེད་ཐོག་གནང་བར་བཀའ་དྲིན་ཆེ་ཞུ་རྒྱུ་ཡིན།
ཁྱེད་ལྟ་བུའི་མི་བུ་བཅུ་ཙམ་ཡོད་ན་བོད་ཀྱི་སྐད་ཡིག་འདི་དེང་རབས་ཀྱི་གློག་ཀླད་ནང་དུ་ཁྱིམ་གཞི་རྩ་བ་བཙུགས་ཐུབ་པའི་རེ་བ་ཆེན་ཙམ་འདུག
ཁྱེད་ཀྱི་བཀའ་དྲིན་བོད་མི་རྒྱལ་ཞེན་པ་ཚོས་ནམ་བརྗེད་མི་སྲིད། རྒྱལ་ཁབ་མཁོ་བའི་མི་རྣམས་ལ་སྐད་ཡིག་ངེས་པ་ཏུ་མཁོ། སྐད་ཡིག་བདག་པོ་མི་བརྒྱབ་མཁན་ཚོ་ལ་རྒྱལ་ཁབ་མི་མཁོ་བའི་རྟགས་རེད།
སྐད་ཡིག་ནི་མི་རིགས་ཀྱི་བླ་སྲོག་རེད་ཞེས་གོ་མྱོང་ཡོད།
མི་རིགས་ནི་རྒྱལ་ཁབ་ཀྱི་སྲོག་རྩ་རེད་ཞེས་ཐོས་མྱོང་ཡོད།
མི་རིགས་ཀྱི་བླ་སྲོག་སྲུང་སྐྱོབ་བྱས་པར་བཀའ་དྲིན་ཆེན་ཞེས་ཁ་སྟོང་པའི་བརྗོད་དགོས་ནའང་ངོ་ཚ་ཡོང་བ་འདྲ་ཞིག་རེད་འདུག་ལགས།
ཁྱེད་ཀྱི་ཚིག་མཛོད་ཕབ་ལེན་བྱས་ནས་ལྟ་བཞིན་པ་ཡིན།
སྨོན་ལམ་ལགས་ལ་བསྔག་བརྗོད་ཡོད། སོ་སོའི་སྐད་ཡིག་སོ་སོའི་འཛིན་ཐུབ་རྒྱུ་གལ་ཆེ། གཞན་ལ་སྐད་ཅོར་བརྒྱབ་པས་རང་གི་སྐད་ཡིག་འཛིན་མི་ནུས།
དྲ་གྲོགས་རྣམ་པར་ཞུ་རྒྱུ་ལ། སྐུ་ཞབས་ཆུང་ཚེ་རིང་ལགས་ནི། གསར་འགོད་གསལ་བསྒྲགས་ཀྱི་འདུ་འཛོམས་སར་རྒྱབ་སྐྱོར་རམ་འདེགས་ཀྱི་སླད་དུ་ཕེབས་པ་ལས། ཁོང་ནི་རྒན་བློ་བཟང་སྨོན་ལམ་གྱི་ལས་རོགས་མ་རེད། དེ་ལུགས་གསལ་བོར་མཁྱེན་རྟོགས་ཡོང་བ་ཞུ།
རྗེས་སུ་ཡི་རངས་བྱེད་འོས་པ་འདུག ཡིན་ཡང་། གསར་འགོད་པ་འདིས་ཀྱང་གངས་སྐྱིད་ནས་བོད་གཞུང་དཔེ་མཛོད་ཅིག་རེག་འདུག གུས་ལོ་ངོ་བཅུ་གྲངས་རིང་གངས་ཅན་སྐྱིད་ལྔོངས་སུ་བསྡད་རིང་བོད་ཀྱི་དཔེ་མཛོད་ཁང་ཞེས་པ་ལས་བོད་གཞུང་དཔེ་མཛོད་ཁང་ཞེས་པ་མཐོང་ཐོས་ཀྱི་ཡུལ་དུ་མ་གྱར།
བཀུར་འོས་བའི་རྒན་བློ་བཟང་སྨོན་ལམ་ལགས་ཉིད་ཀྱིས་འབད་པ་ལྷུར་ལེན་ངང་མི་རིགས་ཀྱི་མིག་འམ་ཡང་ན་ལྡེ་མིག་ཞིག་གསར་བ་ཞིག་བསྐྱར་དུ་བཟོས་ཟིན་པས་སྟོང་ལ་ཉེ་བའི་རང་མི་རིགས་འདིའི་བླ་སྲོག་ཁོ་ན་ཞིག་ཏུ་འགྱུར་ཐུབ་པའི་རེ་བ་དང་ཡིད་ཆེས་གཙང་མ་ཡོད།
ཐུགས་རྗེ་བླ་ལྷག་ཏུ་ཆེའོ།
དེ་མིན་ལས་རོགས་གཙོ་བོ་རྭ་བློ་དབང་དང་ཆུང་ཚེ་རིང་གཉིས་ལ་ཡང་དམིགས་གསལ་བཀའ་དྲིན་ཆེ།
ལྷག་བསམ་གྱིས་ཕྱུགས་ཤིང་རིག་རྒོལ་གྱི་སྐྱེས་མཆོག་དམ་པ། གློག་ཀླད་ཆེད་ལས་མཁས་དབང་ཨ་ཁུ་སྨོན་ལམ་ལགས་ཀྱིས་ཚིག་མཛོད་ལེགས་གྲུབ་བྱུང་པར་སྙིང་ཐག་པ་ནས་བཀྲ་ཤིས་བདེ་ལེགས་ཞུ་བ་དང་ཆབ་ཅིག་ཁྱེད་ཀྱི་དོན་དོན་ཐམས་ཅད་འགྲུབ་པའི་སྨོན་མདུན་ཡོད། ཐུགས་རྗེ་དང་བཀའ་དྲིན་ཤུན་ཏུ་ཆེ། འདི་མི་ང་ཚོའི་མི་རིགས་ཀྱི་སྐད་ཡིག་སྲུང་སྐྱོབ་ཀྱི་སྲོག་རྩ་རེད་ཞེས་ཞུས་ནའང་མ་ཆོག་མི་འདུག
ངོ་མ་དགའ་འོས་པཔའི་གཏམ་ཞིག་ཡིན་ བློ་སྨོན་ལགས་ལ་ཐུགས་རྗེ་ཆེ་ཞུ། བོད་མི་རྣམས་ནི་དབྱིན་ཇི་དང་རྒྱ་རིགས་ལགས་ནས་རོགས་རམ་ལེན་པ་ལ་གོམས་ཆེས་ནས་རིན་མེད་ལ་ཐུགས་མཉེས་མཁན་ཞིག་ཏུ་འགྱུར་ཡོད་ འདི་ནི་འགྱུར་བ་གཏོང་དགོས་པའི་ང་ཚོའི་གོམས་གཤིས་ཤིག་ཡིན་ ཕྱིའི་མི་ལ་ལག་པ་བརྐྱངས་ནས་ལོ་ཇི་ཙམ་འཚོ་བ་རྐྱལ་རྒྱུ་ཡིན་ནམ་
རྒན་བློ་བཟང་སྨོན་ལམ་དང་གྲོགས་བློ་དབང་གཉིས་ལ་བཀའ་དྲིན་ཆེ་ཞུ། འདི་ལ་བརྟེན་ནས་བོད་ཀྱི་སྐད་ཡིག་གི་ཚེ་སྲོག་ཇེ་བརྟན་དུ་འགྲོ་ངེས་རེད་ལ། དྲ་བའི་རིག་གནས་དར་ཁྱབ་འགྲོ་རྒྱུ་ལ་ཕན་པས་དགའ་ཡོད།
ཕར་ཆེར་འབྲི་བཞིན་པའི་རྩོམ་དེ་ལ་རེ་བ་བྱེད་མཁན་ཞིག་ཉིན་སྐར་ཙམ། བརྒྱ་ལ་ཡོད་ན་འབྲས་ལྡན་གྱི་རྩོམ་དེ་ལྕགས་སྒྲོག་གྲོལ་བྱེད་ཅིག་ཡིན་ངེས། འོན་ཏེ་ལྕགས་སྒྲོག་འདི་གྲོལ་མ་ཐུབ་ཀྱང་སྐྱོན་མི་འདུག མུན་ནག་ནང་ཏུ་མ་གཞུག་རང་གི་སྒེར་སེམས་ལ་དབང་ཆ་མི་སྤྲད་པར་སྤྱི་བའི་གོ་རྒྱུ་ཞིག་གལ་ཆེ།
རྒན་བློ་བཟང་སྨོན་ལམ་འཚམས་འདྲི་བཀྲིས་བདེ་ལེགས་ཞུ།
སྐུ་ཞབས་སྨོན་ལམ་ལ་རེ་ཞིག་བརྒྱབས་པ་ཡིན། ཡིན་ནའང་རེ་བ་འབྲས་མེད་རེད།
རྒྱུ་མཚན།
བོད་རྒྱ་ཚིག་མཛོད་ཆེན་མོ་དང་དག་ཡིག་གསར་བསྒྲིགས་གཉིས་ནི་བོད་ཀྱི་རིགས་གནས་ཀྱི་རྐང་ལག་སྡོམ་བྱེད་ཀྱི་ལྕགས་སྒྲོག་གཉིས་ཡིན་པའི་ཕྱིར།
འདི་སྐོར་ལ་རྩོམ་རེ་འབྲི་བཞིན་ཡོད།
http://www.4shared.com/get/IFsD-IqP/Monlam_Dictionary.html
སྨོན་ལམ་ཚིག་མཛོད་ཕབ་ལེན་བྱེད་འདོད་ཡོད་པ་རྣམས་ཀྱིས་གནས་སྐབས་གོང་གི་སྦྲེལ་ཐག་འདིའི་སྟེང་མནན་ན་ཕབ་ལེན་བྱ་ཐུབ། རྩོམ་སྒྲིག་པ་ལགས་ནས་སྦྲེལ་ཐག་འདི་གསར་འགྱུར་ནང་འགོད་པའི་རེ་བ་ཞུ།
སྐུ་ཞབས་སྨོན་ལམ་ལགས་ཀྱི་ཚིག་མཛོད་ལེགས་གྲུབ་བྱུང་བར་དགའ་སྤྲོ་ཆེན་པོས་འཚམས་འདྲི་ཞུ།བོད་ཀྱི་སྐད་ཡིག་གཅིག་གྱུར་གྱི་ཐད་ཐུགས་བསམ་ཆེ་བཞེས་གནང་ཡོད་པའི་སྨོན་འདུན་ཞུ།
དངོས་གནས་དྲང་གནས་ཐུགས་རྗེ་ཆེ་ཞུ།
གང་མགྱོགས་ཚིག་མཛོད་དེ་བེད་སྤྱོད་དང་ཁྱབ་སྤེལ་བྱ་རྒྱུ་ཡིན།
སྨོན་ལམ་ལགས་ཀྱིས་ཡང་ང་ཚོར་སྟབས་བདེ་ཞིག་བསྐྲུན་སོང་།
ཐུགས་རྗེ་ཆེ།
བཀའ་དྲིན་ཆེ་གྲྭ་བློ་བཟང་སྨོན་ལམ་ལགས།
འཆི་ལ་ཉེ་བའི་ང་ཚོའི་སྐད་ཡིག་གཤིན་རྗེའི་ཁ་ནས་སྐྱབས་པ་བཀའ་དྲིན་ཆེ།
བདག་མེད་དུ་ལུས་ང་བའི་ང་ཚོའི་སྐད་ཡིག་ལ་བདག་སྐྱོང་གནང་བ་བཀའ་དྲིན་ཆེ།
ད་དུང་ཁྱེད་དང་ཁྱེད་ཀྱི་ལས་རོགས་བཀའ་དྲིན་ཆེ།
མི་འཐུད་བཀའ་དྲིན་གྱིས་སྐྱངས་རོགས།
བྱ་བ་ལེགས་གྲུབ་ཡོང་བར་རྟེན་འབྲེལ་ཞུ། ཕྱི་རྒྱལ་ཡུལ་གྲུ་ཁག་ནས་མཉེན་ཆས་དེ་ཅི་ལྟར་རེག་ཐུབ་བམ།
བཀུས་འོས་བློ་བཟང་སྨོན་ལམ་ལགས་ཀྱི་དཀའ་སྤྱད་འབད་བརྩོན་གྱིས་འདི་ལྟར་རིམ་པ་བཞིན་བོད་སྐད་ཡིག་གི་ལས་ཡར་རྒྱས་གོང་སྤེལ་དང་བོད་ཀྱི་རིག་གནས་ལ་བླ་ལྷག་ཏུ་ཕན་པའི་ལས་དོན་རིམ་པར་སྤེལ་གནང་བར་སྙིང་ཐག་པ་ནས་བཀའ་དྲིན་ཆེ་ཞུས་པ་དང་། ཁོང་གི་འབྱུང་འགྱུར་གྱི་ལས་དོན་རྣམས་ལའང་བགེགས་བར་ཕྲ་མོ་ཙམ་ཡང་མེད་པར་བདེ་ལེགས་ངང་འགྲུབ་པའི་རེ་བ་སྨོན་ལམ་འདེབས།
‘འདིར་ཐོག་མར་གློག་ཀླད་ཆེད་མཁས་པ་གྲྭ་བློ་བཟང་སྨོན་ལམ་ལགས་ཀྱིས་ཚིག་མཛོད་ལེགས་འགྲུབ་ཐུབ་པར་བཀྲི་ཤིས་བདེ་ལེགས་ཞུ་བ་དང་ཆབས་ཅིག་འདི་ལྟ་བུའི་ཚིག་མཛོད་ཆེན་པོ་ཞིག་གསར་བསྐྲུན་པ་མ་ཟད།་ རིན་མེད་ངང་འགྲེམས་སྤེལ་བྱས་བ་ལ་སྙིང་ཐག་པ་ནས་འདིར་བོད་རིགས་སྤུན་ཟླ་ཡོངས་ཀྱི་ཚབ་བྱས་ཏེ་ཐུགས་རྗེ་ཆེ་ཞུ་རྒྱུ་ཡིན། ད་དུང་བོད་མི་རིགས་ལ་བཅངས་བའི་ལྷག་བསམ་དྭངས་མར་རྗེས་སུ་ཡི་རངས་དང་། ད་དུང་ཡང་འདི་ལྟ་བུའི་བྱས་རྗེས་མི་ཉུང་བ་ཞིག་འཇོག་པར་རེ་སྐུལ་ཞུ་ཞུ།
གྲོགས་མཆོག་དམ་པ།
ཁྱེད་ཀྱིས་དཀའ་སྡུག་གི་རྔུལ་ཁྲག་དང་ལུས་བཏང་གི་བྱ་བཞག་ཁྲོད་ནས་ཁྱད་དུ་འཕགས་པའི་གྲུབ་འབྲས་འདི་ལ་ངས་སྙིང་ཐག་པ་ནས་བཀྲ་ཤིས་བདེ་ལེགས་ཞུ།
མ་ཟད་ཁྱེད་དང་ཁྱེད་ལྟ་བུ་མི་རིགས་འདིའི་ཚེ་སྲོག་གི་དྭངས་མར་གྲུབ་པའི་སྐད་དང་ཡི་གེ་ལ་དུས་རབས་དང་སྟུན་པའི་ཚེ་སྲིག་སྐྲུན་པའི་ལས་ལ་བྲེལ་བའི་ལས་རོགས་ཚོ་ལ་ཡང་ཐུགས་རྗེ་ཆེ་ཞུ་རྒྱུ་ཡིན། ད་ཐང་གི་གྲུབ་འབྲས་འདིས་གཞིས་ལོས་མང་ཚོགས་སྤྱི་དང་ལྷག་དོན་དུ་སློབ་ཕྲུག་ཚོ་ལ་སེམས་ཤུགས་གསར་བ་ཞིག་དང་སྐུལ་ལྕག་སྣོན་མ་ཞིག་བྱེད་ཐུབ་པར་མ་ཟད། རང་གི་སྐད་ཡིག་ནུས་མེད་དུ་འདོད་མཁན་དང་ཁ་སེམས་ཡ་བྲལ་དུ་སོང་བའི་སྐུ་ངོ་ཚོ་ལ་ཡང་བསམ་བློ་གསར་བ་ཞིག་ཀྱང་བསྐྲན་ངེས་རེད། ཐུགས་རྗེ་ཆེ་་་་་་་་་་།
སྐུ་ཞབས་སྨོན་ལམ་ལགས་ཁྱེད་ནི་ང་ཚོ་བོད་ཀྱི་དུས་རབས་གསར་པའི་ལམ་ཁྲིད་པ་ཞིག་རང་རེད།ཐུགས་ཆེ་ཞུ།ད་རིང་ཡང་སྨོན་ལམ་ཚིག་འཛོད་ལེགས་གྲུབ་བྱུང་བ་བཀྲ་ཤིས་བདེ་ལེགས་དང་དེ་ཡང་རིན་མེད་ཐོག་སྤྱི་ཚོགས་ནང་དུ་འགྲེམས་སྤེལ་གནང་རྒྱུ་ཡིན་པ་ནི་ངོ་མ་སྐུ་ཞབས་ཁྱེད་ལ་ག་འདྲ་བྱེད་དེ་ཐུགས་ཆེ་ཞུ་དགོས་པ་ཡང་ཤེས་ཀྱིན་མི་འདུག།
ངས་ལག་ཟུང་སྙིང་ཁ་སྦྱར་དེ་སྐུ་ཞབས་ཁྱེད་ལ་ཐུགས་ཆེ་ཞུ་རྒྱུ་དང་ཉིད་ཀྱི་སྐུ་ཚེར་བར་ཆད་མེད་པའི་སྨོན་ལམ་དང་བཅས་ཞུ་རྒྱུ་ཡིན།
སྐུ་ཞབས་སྨོན་ལམ་ལགས་ཁྱེད་ནི་ང་ཚོ་བོད་ཀྱི་དུས་རབས་གསར་པའི་ལམ་ཁྲིད་པ་ཞིག་རང་རེད།ཐུགས་ཆེ་ཞུ།ད་རིང་ཡང་སྨོན་ལམ་ཚིག་འཛོད་ལེགས་གྲུབ་བྱུང་བ་བཀྲ་ཤིས་བདེ་ལེགས་དང་དེ་ཡང་རིན་མེད་ཐོག་སྤྱི་ཚོགས་ནང་དུ་འགྲེམས་སྤེལ་གནང་རྒྱུ་ཡིན་པ་ནི་ངོ་མ་སྐུ་ཞབས་ཁྱེད་ལ་ག་འདྲ་བྱེད་དེ་ཐུགས་ཆེ་ཞུ་དགོས་པ་ཡང་ཤེས་ཀྱིན་མི་འདུག།
ངས་ལག་ཟུང་སྙིང་ཁ་སྦྱར་དེ་སྐུ་ཞབས་ཁྱེད་ལ་ཐུགས་ཆེ་ཞུ་རྒྱུ་དང་ཉིད་ཀྱི་སྐུ་ཚེར་བར་ཆད་མེད་པའི་སྨོན་ལམ་དང་བཅས་ཞུ་རྒྱུ་ཡིན།