བཙལ་ཡང་མ་རྙེད་པའི་བརྩེ་དུང་། ལྔ་བ།

བུད་མེད་སྤྱི་མཚུངས་ལྟར། ངེད་གཉིས་ཀྱི་བྱིས་པ་དེ་བདེ་ལེགས་ངང་དུ་སྐྱེ་མ་བ་ཟད། བོད་མི་སྤྱི་མཚུངས་ལྟར་བུ་ཆུང་གི་མིང་དེ་ཡང་རྫོང་མཁར་དེ་ཡི་ཉེ་འདབས་སུ་ཡོད་པའི་འབྲུག་དཀར་དགོན་གྱི་བླ་མ་བདེ་ཆེན་ཚང་གི་དྲུང་ནས་ཚེ་རིང་དོན་འགྲུབ་ཀྱིས་མིང་ཞིག་ཀྱང་བླངས་འདུག བུ་ཆུང་གི་མིང་ལ་ཀུན་ཐར་སྐྱབས་ཟེར་བ་དང་། ཁོ་རང་སྐྱེ་ནས་བདུན་ཕྲག་གསུམ་གྱི་རྗེས་སུ། ད་གཟོད་ལོ་ངོ་གཅིག་དང་ཕྱེད་ལྷག་དུ་རིང་དུ་ཐུག་འཕྲད་བྱེད་མ་ཐུབ་པའི་རང་གི་བརྩེ་བའི་དྲིན་ཆེན་ཕ་མ་གཉིས་ལ་མཇལ་དུ་སོང་བ་ཡིན།

ཚེ་རིང་དོན་འགྲུབ་ཀྱིས་དངོས་ནས་ཁས་གང་བླངས་པ་དེ་ནི་ཁོ་རང་གིས་གང་ཐུབ་ཅི་ཐུབ་བྱེད་པ་དེ་ནི་ང་རང་ཁོ་ལ་ཆེས་དུངས་པའི་རྩ་བ་ཞིག་ཀྱང་དེ་ཡིན། འོན་ཀྱང་་ཟེར་ཞོར་མཚམས་དེ་ནས་བདེ་སྐྱིད་འཚོའི་མིག་མཐའ་རུ་མཆི་མའི་བསྐོར་སོང་ལ། ང་དང་འཚོ་ཁའི་མེ་ཏོག་གཉིས་ཀྱི་ཕྱོགས་སུ་མི་བལྟ་བར་རེ་ཞིག་ཆང་དཀར་ནང་གི་རྒུན་ཆང་དེ་འཐུང་ནས་ཁ་རོག་གེར་བསྡད་སོང་།

འཚོ་ཁའི་མེ་ཏོག་གིས་རང་གི་ཨམ་ཕྲག་ནང་གི་ཁ་པར་གྱི་སྒྲ་དབྱངས་སྙན་མོ། རྒྱང་རིང་གི་གྲོང་བརྡལ་ཆུང་ཆུང་། ངའི་ཡིད་སེམས་དྲངས་པའི་ཕ་ཡུལ། ཕ་ཡུལ་གྱི་ཕྱོགས་སུ་བཞུར་བའི་རྫ་ཆུ་བསིལ་མ། ང་ཁྱེད་ལ་དགའ་ཞིང་ཁྱེད་ལ་དུངས་ཟེར་བ་གོ་ནས། ངེད་གཉིས་ལ་ཁོ་མོ་མི་འགྲོ་ཐབས་མེད་ཆགས་སོང་། རྗེས་སུ་ཐུག་ཡོང་། ཁྱེད་གཉིས་ཀྱིས་ལྷོད་ལྷོད་བྱས་གསུངས་དེ་བུད་སོང་། ངས་སྐབས་དེར་བདེ་སྐྱིད་འཚོ་ལ་གང་ཞིག་བཤད་དགོས་མིན་ཡང་མ་ཤེས་པར་ལུས།

བདེ་སྐྱིད་འཚོས། ངས་ངང་ཚུལ་དེ་མཐོང་ནས། གློ་བར་དུ་གཉིད་ལས་སད་པ་ལྟར། ཨོ་རེད། བཤད་མཚམས་གང་ཡིན། ཨོ་རེད་བཅས་མུ་མཐུད་དུ་བཤད་རྩིས་གནང་དུས་སུ། ངས་ང་རང་གི་ལག་མགོའི་ཆུ་ཚོད་ལ་གཅིག་བལྟས་པ་ཡིན། དགོང་མོའི་ཆུ་ཚོད་བཅུ་བ་ཟིན་འདུག

བདེ་སྐྱིད་འཚོ། གཟའ་མཇུག་ལ་ཁྱེད་རང་རྟག་པར་འདི་ཁུལ་ཡོང་གི་ཡོད་དམ།
མེད། འོན་ཀྱང་། ཁྱེད་རང་ལ་བྲེལ་བ་ཡོད་ན་ངེད་གཉིས་རྗེས་སུ་ཐུག་ན་འགྲིག་རེད།

ངས་ཁོ་མོས་སྐད་ཆ་དེ་གོ་བ་དང་སེམས་གཏིང་ནས་དགའ་སོང་། རེ་ཞིག་འདི་ནས་མཚམས་འཇོག་བྱེད། ངས་བལྟས་ན་ཁྱེད་རང་ཡང་ལས་ཀ་གྲོལ་ནས་འདིར་ཡོང་བ་ཡིན་དུས་ཐང་ཆད་ཡཽད་རྒྱུ་རེད། ཁྱེད་རང་བསྡོད་ས་གང་ཡིན། ང་རང་རླངས་འཁོར་ཡོད། ངས་ཁྱེད་རང་ནང་དུ་བསྐྱེལ་ཆོག

ཁོ་མོས། རེད་རེད། དེས་ན་འགྲིག་གི ང་རང་རླངས་འཁོར་འབབ་ཚིགས་འགྲམ་གྱི་ཚོང་རྭ་ཆེན་མོའི་རྒྱབ་ལོག་དུ་ཡོད། ཁྱེད་རང་འགྲོ་ས་ལམ་ཁ་རུ་འཁེལ་མེད་པ་ཡིན་ན། ནང་དུ་སོང་ན་འགྲིག་གི་རེད། ང་རང་འདི་ནས་སྤྱི་སྤྱོད་རླངས་འཁོར་ནང་དུ་བསྡད་ན་འགྲིག་གི་རེད།

ངས་ཁོ་མོ་ལ་ང་རང་ལམ་ཁར་འཁེལ་ཡོད་རབས་བཤད་ནས། ཁོ་མོ་ཡོད་སར་བསྐྱལ་རྒྱུ་བྱས། ལམ་བར་དུ་ཁོ་མོ་ང་རང་ཨ་རི་ལ་སླེབས་ནས་ལོ་ངོ་ག་ཚོད་འགོར་ཡོད་མེད་དྲིས་པིའ་ལན་དུ། ངས་རང་ཉིད་ཨ་རི་ལ་ག་དུས་སླེབས་མིན་དང་། ད་ལྟ་ག་རེ་བྱེད་ཀྱི་ཡོད་མེད་སོགས་ཞིབ་དུ་ཞུས་པ་ཡིན།

ཁོ་མོས་ང་རང་བསྐཽར་ལ་ཡིད་སྨོན་དང་། གཟའ་འཁོར་རྗེས་མ་ནས་བཟུང་ཁོ་མོའི་མི་ལོ་མང་བོའི་རིང་གི་སྐྱིད་སྡུག་གི་གཏམ་རྒྱུད་མུ་མཐུད་དུ་བཤད་རྒྱུས་ཁས་ལེན་གནང་སོང་བ་དེ་ཡིས་ང་རང་གི་རེ་འདོད་ཡོངས་སུ་འགྲུབ་སོང་།

གཟའ་སྤེན་པའི་ཕྱི་དྲོ་ང་རང་ལས་ཁུངས་ནས་སྒོ་བུད་མ་ཐག བདེ་སྐྱིད་འཚོ་ལ་ཁ་པར་བཏང་བ་ཡིན། ཁོ་མོ་རང་གི་ནང་དུ་ང་ལ་སྒུག་ནས་བསྡད་ཡོད་གསུངས་སོང་།

བདེ་སྐྱིད་འཚོས། ཁ་སང་སྔོན་མ་གང་བར་དུ་བཤད་སོང་།

ངའི་རང་གི་དྲན་པའི་ནང་དུ་གསལ་ལེར་ཡོད་ཀྱང་། ཁོ་མོའི་ལོ་རྒྱུས་དེ་དག་ཡིག་ཐོག་དུ་ཕབ་བཞིན་ཡོད་པ་ངེས་སུ་མིག་གི་མཐོང་དུ་འཇུག་ཆེད་དུ། བདེ་སྐྱིད་འཚོའི་སྐད་ཆ་ཞེས་པའི་ཟིན་དེབ་ལག་དུ་བླངས་ནས།

བདེ་སྐྱིད་འཚོས། ཨོ་རེད། དེ་ནས་བུ་ཆུང་ཀུན་མཐར་དོན་འགྲུབ། ཁྱོ་ཀ་ཚེ་རིང་དོན་འགྲུབ། ངེད་གསུམ་གྱིས་ངེད་ཚང་གི་རླངས་འཁོར་ཆུང་ཆུང་དེ་སྐོར་ནས་ཕ་ཡུལ་དུ་ཕ་མ་གཉིས་ལ་ཐུག་འཕྲད་དུ་སོང་བ་རེད། ཡིད་སྐྱོ་བ་ཞིག་ལ་ལོ་ངོ་གཅིག་དང་ཕྱེད་ཀའི་རིང་དུ་ཁ་ངོ་མ་ཐུག་པའི་ཕ་མ་གཉིས་ནི་དངོས་ནས་རྒས་འདུག ང་ཚོ་མཐོང་བ་དང་ཐོག་མ་ངོ་ཡང་ཤེས་ཀྱི་མི་འདུག

སྡེ་བའི་ནང་གི་མི་ཚོས་རླངས་འཁོར་གྱི་མཐའ་རུ་བསྐོར་ནས། བདེ་སྐྱིད་འཚོ་བཟའ་མི་གཉིས་རེད་འདུག ད་དུང་བྱིས་པ་ཞིག་སྐྱེ་འདུག་ཟེར་ནས་མཚར་མཚར་ངས་ངེད་བཟའ་མི་གསུམ་ལ་བལྟས། སྐབས་དེ་འདྲ་ཞིག་ལ་ངའི་མ་རྒན་དྲིན་ཆེན་མ་འདས་པོ་དེ་སྐད་ཤུགས་ཆེན་པོས་ངུབཞིན། བདེ་སྐྱིད་འཚོ། ཨ་མའི་གཅེས་ཕྲུག་མ་ཟེར་ནས་ང་ལ་འཐམ་བྱུང་།