གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༡༣ ཉིན་དཔལ་ས་སྐྱ་བདག་ཁྲི་རིན་པོ་ཆེ་མཆོག་དབུ་བཞུགས་ཐོག སྟོན་པ་ཤཱཀྱ་ཐུབ་པ་སྐུ་བལྟམས་པའི་གནས་མཆོག་བལ་ཡུལ་ལུམྦཱིའི་ཚུལ་དུ་དཔལ་ས་སྐྱ་པའི་སྨོན་ལམ་ཆེན་མོ་དབུ་འཛུགས་གནང་ཡོད་འདུག་ལ། དེར་ཕོ་བྲང་རྣམ་གཉིས་ཀྱི་འཁོན་གདུང་སྐུ་བགྲེས་གཞོན་རྣམ་པ་དང་ས་ངོ་ཚར་རྫོང་དབུས་པའི་གདན་ས་ཁག་གི་དབུ་ཁྲིད་མཁན་པོ་རྣམ་པ་བཅས་གཙོས་པའི་རྒྱལ་བལ་འབྲུག་གསུམ་ཁུལ་གནས་པའི་ས་སྐྱ་ཆོས་བརྒྱུད་རྗེས་འཛིན་ཡོངས་ཀྱི་གྲྭ་བཙུན་དང་། གཞན་ཕྱོགས་མཐའ་ཁག་ནས་ཕེབས་པའི་སྐྱ་སེར་ཕོ་མོ་དང་སྨོན་ལམ་ཆེན་མོའི་དད་སྦྱིན་བདག་ཁག་ཅིག་བཅས་ཁྱོན་མི་སྟོང་ཕྲག་ཁ་ཤས་ལྷན་འཛོམས་བྱུང་ཡོད་འདུག སྨོན་ལམ་ཆེན་མོ་ཉིན་བཅུའི་རིང་ཚོགས་གཏན་འཁེལ་ཡོད་ཅིང་། ཉིན་དགུ་པ་དང་བཅུ་པ་གང་རུང་ཞིག་ལ་དཔལ་ས་སྐྱ་༧གོང་མ་བདག་ཁྲི་རིན་པོ་ཆེ་མཆོག་ལ་ཇི་ལྟར་གསོལ་འདེབས་ཞུས་པ་བཞིན་ཚེ་དབང་ཞིག་ཀྱང་གནང་འཆར་ཡོད་འདུག
དཔལ་ས་སྐྱའི་༸གོང་མ་བདག་ཁྲི་རིན་པོ་ཆེའི་ཞབས་ཟུང་རྡོ་རྗེ་རྟག་བརྟན་གྱི་ངོ་བོར་ཇི་སྲིད་བར་དུ་བརྟན་པར་བཞུགས་སུ་གསོལ་བ་དང་ཁོང་གི་མཐུ་དང་ནུས་པ་ལ་བརྟེན་ནས་གངས་ཅན་སྐྱེ་འགྲོ་ཡོངས་ལ་བདེ་སྐྱིད་ཀྱི་ཉི་འོད་འཕྲོ་བར་ཤོག །
ད་དུང་ཕྱི་ཚེས་༡༧ཉིན་འཛམ་གླིང་གང་སར་དང་ལྷག་ཏུ་འདི་ལོ་བོད་ནང་རང་བྱུང་ས་ཡོམ་གྱི་རྐྱེན་པས་དུས་མིན་རྐྱེན་འདས་སུ་སོང་བའི་ཚེ་འདས་རྣམས་ཀྱི་ཆེད་་སྐྱབས་མཆོག་༧གོང་མ་བདག་ཁྲི་རིན་པོ་ཆེ་དབུ་བཞུགས་ཐོག་ཚོགས་ཡོངས་ནས་ཀུན་རིགས་བྱང་ཕྱོགས་དང་འབྲེལ་ནས་གཤིན་པོ་རྣམས་ལ་སྡིག་སྦྱོང་གནང་ཡོད་འདུག
༸སྐྱབས་མཆོག་སྐུ་ཚེ་ཁྲི་ལོར་བརྟན་ཅིང་དཔལ་ལྡན་ས་སྐྱ་པའི་བསྟན་པ་དྲི་མེད་ཕྱོགས་བཅུར་ཁྱབ་ཅིང་ནད་མུག་འཁྲུག་རྩོད་ཞི་གྱུར་ཅིག