ཟླ་འདིའི་ཕྱི་ཚེས་ ༡༩ ནས་ ༢༠ ཉིན་གཉིས་རིང་རྒྱ་གར་གྱི་རྒྱལ་ས་ལྡི་ལིའི་ཏཱ་ར་མགྲོན་ཁང་ཞེས་པར། བོད་ཀྱི་སློབ་གྲྭ་ཁག་ ༡༦ ཙམ་གྱི་སློབ་སྤྱི་དང་དགེ་ཆེ། སློབ་ཕྲུག་གི་འཐུས་མི་བཅས་མཉམ་འཛོམས་ཐོག བོད་ཀྱི་སློབ་ཕྲུག་ཚོས་མྱོས་རྫས་སྤྱོད་བཞིན་པའི་གནས་སྟངས་ཐོག་ཟབ་སྦྱོང་ཞིག་ཚོགས་ཡོད་ཅིང་། ཟབ་སྦྱོང་དེའི་སྐུ་མགྲོན་གཙོ་བོར་བོད་གཞུང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་ཕེབས་ཡོད། ཚོགས་འདུའི་ཉིན་དང་པོར་བོད་གཞུང་སྨན་རྩིས་ཁང་གི་སྨན་རམས་པ་པདྨ་རྡོ་རྗེ་ལགས་དང་རྒྱ་གར་གྱི་ཕྱི་ལུགས་སྨན་པ་ཁག་ཅིག་ཆེད་ཕེབས་ཀྱིས་བཟི་སྨན་གྱི་ཉེན་ཁ་དང་དཀའ་ངལ་སྐོར་ངོ་སྤྲོད་གནང་ཡོད་པར་མ་ཟད། ལྷག་དོན་དུ་བོད་ཀྱི་སློབ་གྲྭ་ཁག་གི་དགེ་ལས་ཚོས་བཟི་སྨན་གྱི་དཀའ་ངལ་ལ་ཇི་ལྟར་གདོང་ལེན་དང་སྔོན་འགོག་བྱ་དགོས་མིན་གྱི་གཏམ་བཤད་སྤེལ་ཡོད། ཉིན་གཉིས་པར་ཕྱི་ལོ་ ༢༠༠༦ ལོར་གཏན་འབེབས་བྱུང་བའི་ཚོགས་འདུའི་གྲོས་ཆོད་ཁག་ལ་བསྐྱར་ཞིབ་དང་། སློབ་གྲྭ་ཁག་གི་ལས་སྡོམ་ལ་བལྟས་ཏེ། འཕྲོད་བསྟེན་ལས་ཁུངས་དང་སློབ་གྲྭ་ཁག དེ་བཞིན་ཀུན་ཕན་ཚོགས་པ་བཅས་ཐུན་མོང་ཐོག བཟི་སྨན་སྔོན་འགོག་གི་སྤྱི་མོས་གྲོས་ཆོད་ཁག་ཅིག་འཇོག་ཐུབ་ཡོད། སྐབས་དེར་བཀའ་བློན་མཆོག་གིས་ལྡི་ལི་ས་གནས་མགོ་འཛིན་ལས་ཁུངས་དང་འཕྲོད་བསྟེན་སྨན་ཁང་བཅས་སུ་གཟིགས་སྐོར་གནང་སྟེ། ས་གནས་མགོ་ཁྲིད་ཚོར་བོད་རིགས་མང་ཚོགས་ཀྱི་འཕྲོད་བསྟེན་གནས་སྟངས་སྐོར་རྒྱུས་ལོན་གནང་ཡོད་འདུག
གསར་འགོད་པ། དཔལ་ལྡན།
དངོས་གནས་མ་འོངས་པའི་བོད་ཀྱི་སོན་རྩ་དག་གིས་དུག་རྫས་ཀྱི་རིགས་བེད་སྤྱོད་བྱེད་བཞིན་པ་འདི། ངེས་པར་དུ་མཚམས་འཇོག་བྱེད་དགོས་པའི་བཅའ་ཁྲིམས་དང་།དགེ་ལས་ཁག་གིས་འགན་ཁུར་གཙང་ལེན་བྱེད་དགོས་པ་རེད། དེང་སང་གི་སློབ་གྲྭའི་ནང་དེ་འདྲའི་རིགས་གཏན་ནས་བེད་སྤྱོད་བྱེད་མི་ཆོག་པའི་བཀའ་རྒྱ་དང་རང་འགུལ་གྱིསདམ་བཅའ་བྱེད་དུ་འཇུག་དགོས་པ་སོགས། མདོར་ན་ཐབས་ཤེས་གང་ཡོད་ཀྱིས་བོད་ཀྱི་སྤྱི་ཚོགས་ནང་ལ་དེ་འདྲའི་གཏན་ནས་མེད་པ་བཟོ་བའི་འབད་བརྩོན་བྱེད་དགོས་པ་དེ་ཡིན། དེ་ཡང་དགེ་ལས་ཁ་ཤས་ཤིག་དང་ལྷག་བསམ་གྱིས་ཕྱུག་པའི་མི་བུ་ཁ་ཤས་ཤིག་གིས་དེ་ཙམ་གྱི་འབྲས་བུ་འབྱུང་དཀའ་བས་སྤྱི་ཚོགས་སྟེང་གི་བོད་མི་ཚང་མས་འབད་པ་བྱེད་རོགས་ཞེས་འབོད་བསྐུལ་ཞུས་པ་ཡིན།
ཁོ་བོ་གཏན་ཉིན་སློབ་གྲར་སྡོད་རིང་བཟི་སྨན་བེད་སྤྱོད་བྱེད་མཁན་མང་པོ་མཐོང་མྱོང་ལ་དེས་རང་ཙམ་མ་ཡིན་པར་ནང་མི་དང་སྤྱི་ཚོགས་དེ་བཞིན་རྒྱལ་ཁབ་ལ་ཡང་གནོད་ཀྱི་ཡོད་པ་ནི་བརྗོད་མི་དགོས་པ་ཞིག་ཡིན་ དེར་བརྟེན་བཟི་སྨན་འགོག་ཐབས་ཀྱི་ཟབ་སྦྱོང་དེར་རྗེས་སུ་ཡི་རངས་ཞུ་རྒྱུ་ཡིན།
ཐུགས་རྗེ་ཆེ་།།
བཟི་སྨན་ནི་མི་ཞིག་གི་མི་ཚེ་ཙམ་མ་ཡིན་པ་ང་ཚོའི་བོད་མི་རིགས་གནས་སྟངས་ཀྱི་ངོ་བོ་རུ་སྐྱོན་ཆེན་ཡོང་གི་ཡོད། དེ་ནི་ཚོགས་འདུ་བཀང་པ་ཙམ་མ་ཡིན་པ་ལག་ལེན་ཁེལ་ཐུབ་པའི་རེ་འབོད་བྱེད་ཀྱིན་ཡིན།
ཡག་པོ་རེད་ལས་མགུལ་སྤེལ་བར་བསྔགས་བརྗོད་ལོས་ཞུ། འོན་ཀྱང་ལས་མགོ་བརྕམས་པར་སླ་མོད་བཟང་མཐའ་འཁྱོལ་བར་ཧ་ཅང་དཀའ་འོན་ཀྱང་ཅུང་ཞིག་པན་ཀྱང་སྤྱི་ཚོགས་ཀྱི་ཞབས་ཞུ་རང་རེད་ད།
ད་རེས་ཡག་པོ་དཔེ་མི་སྲིད་པ་བྱུང་འདུག་སློབ་ཕྲུག་དེ་ཚོ་ལ་བཟི་སྨན་གནོད་སྐྱོན་གྱི་སྐོར་ལ་ཟབ་སྦྱོང་མང་ཙམ་སྤྲོད་རོགས་གནང།
དེང་སང་སློབ་གྲྭ་ཁག་གི་ནང་ལ་བཟི་སྨན་བེད་སྤྱོད་བྱེད་མཁན་མང་པོ་འདུག་ཟེར་གྱིན་འདུག
ཟབ་སྦྱོང་སྤྲད་པ་ཙམ་མིན་པར་དགེ་རྒན་ཚོས་རྒྱུན་དེའི་ཐོག་ལ་རྒྱུན་ནས་འགན་འཁུར་མང་ཙམ་བཞེད་རོགས་ཞེས་འབུལ་སྐུལ་ཞུ་བཞིན་ཡིན།