རྒྱ་ནག་གི་རྩ་ཆེའི་དུས་ཚོད།

ཁ་སང་ཕྱི་ཚེས་ ༢༥ ཉིན་གྱི་ཕྱི་དྲོར་བོད་གནས་ཉམས་ཞིབ་པ་གྷ་བྷི་རེལ་ Gabriel Lafitte ལགས་ཀྱིས་སླར་ཡང་། ༼ རྒྱ་ནག་གི་རྩ་ཆེ་བའི་དུས་བབ༽ ཞེས་པའི་བརྗོད་གཞིའི་ཐོག དོན་ཚན་ ༩ ཅན་གྱི་ཉམས་ཞིབ་དཔྱད་བརྗོད་རིང་མོ་ཞིག་འགྲེམས་སྤེལ་དང་སྦྲགས་གཏམ་བཤད་གནང་སོང་།

ཁོང་གི་དཔྱད་བརྗོད་དེའི་དོན་ཚན་ཁག་ནི། ༼ ཐད་འཕུར་གནམ་གྲུའི་གྲངས་ཚད་འཕེལ་བཞིན་པའི་རྒྱ་ནག ༽ཞེས་པ་དང་། ༼ རྒྱ་གར་གྱི་མིག་ཤེལ་བརྒྱུད་རྒྱ་ནག་གི་འཕེལ་རྒྱས་ལ་ལྟ་བ། ༽ཞེས་པ། ༼ ལྷ་སའི་མགྲོན་ཁང་གཉིས་ཀྱི་གཏམ་རྒྱུད།༽༼ རྩ་མེད་འགྲོ་བཞིན་པའི་དོམ་ཁྲ་དང་བོད་མི། ༽༼ དམར་ཤོག་ཚོགས་པའི་གཏིང་རིམ་གྱི་སྒྲོམ་གཞི། ༽༼ རྒྱ་ནག་གི་རྩ་ཆེ་བའི་དུས་བབ་ནང་གི་བོད།༽༼ རྒྱ་ནག་གིས་ངོས་ཟིན་མེད་པའི་འབོད་སྒྲ ཁུ་སིམ་སིམ་གྱི་མང་ཚོགས།༽༼ རྩ་ཆེ་བའི་དུས་བབ། འགལ་འདུ་ཆེ་བའི་མཁའ་དབུགས། ༽༼ གསེར་མདོག་གི་ཉི་མ་ནུབ་མགོ་ཚུགས་སོང་། ༽ བཅས་རེད།

གྷ་བྷི་རེལ་ལགས་ཀྱིས་ད་ལྟའི་རྒྱ་ནག་གི་དབང་ཤུགས་དང་དཔལ་འབྱོར་གྱི་སྟོབས་ཤུགས་སོགས་ཀྱིས་རྒྱལ་སྤྱིའི་སྡིངས་ཆའི་གནས་བབ་ག་འདྲ་བཟུང་ཡོད་མེད་དང་། སྣང་ཚུལ་དེ་དང་རྒྱ་ནག་ནང་ཁུལ་གྱི་དོན་དངོས་གཉིས་ལ་ཧེ་བག་གང་འདྲ་ཡོད་མེད། ཧེ་བག་དེ་དག་གི་ཐོག་མའི་འབྱུང་རྐྱེན་དང་ད་ལྟའི་གནས་བབ། མ་འོངས་པའི་འཇིགས་ཉེན་སོགས་ཀྱི་སྟེང་ནས་ད་ལྟའི་དུས་བབ་འདི་རྒྱ་ནག་ལ་རྩ་ཆེན་པོ་དང་དམ་འཛིན་བྱ་དགོས་པའི་གལ་ཆེའི་རིང་བཞིན། དུས་བབ་འདི་དང་བསྟུན་ཏེ། བོད་མི་ཚོས་ཁ་ཕྱོགས་ཇི་ལྟར་འཛིན་དགོས་མིན་སོགས་ངོ་སྤྲོད་གནང་སོང་།

སྐབས་དེར་ཁོང་གིས་བརྗོད་དོན། རྒྱ་ནག་དཔོན་རིགས་ཚོའི་སེམས་པར། གལ་སྲིད་ཁོ་ཚོའི་དམ་དྲག་ལ་ལྷོད་གཡེང་ཤོར་ཚེ་ཆེས་ཉེན་ཁ་ཆེ་བ་ནི་དམངས་ཀྱི་ན་ཟུག་གི་མཐིལ་བརྟོལ་ཏེ། དམངས་ཁྲོད་ནས་ཟིང་འཁྲུག་བསླང་ངེས་ཡིན་པའི་འཇིགས་སྣང་ཞིག་ཡིན། དེ་ནི་གྲངས་ཉུང་མི་རིགས་ཙམ་མིན་པར། ཞིང་པ་དང་གྲོང་ཁྱེར་དུ་གནས་སྤོ་གཏན་སྡོད་པ་སོགས་དབུལ་ཕོངས་རིགས་ཚང་མར་གཅིག་མཚུངས་ཀྱིས་ན་ཟུག་འདི་ཡོད། གང་ལྟར་རྒྱ་ནག་གི་རྩ་ཆེ་བའི་དུས་བབ་འདི་མི་རིང་བར་མཇུག་རྫོགས་རྒྱུ་ཡིན་པ་ནི་གཡོལ་དུ་མེད་པའི་འགྱུར་འགྲོས་ཤིག་རེད། ཅེས་བརྗོད་སོང་ལ། མཇུག་ཏུ་མང་ཚོགས་དང་དྲི་བ་དྲིས་ལན་ཡང་གནང་ཡོད།

ཟླ་འདིའི་ཕྱི་ཚེས་ ༢༨ ཉིན་རེས་གཟའ་ཉི་མའི་དགོང་དྲོའི་ཆུད་ཚོད་ ༥ དང་ཕྱེད་ཀའི་སྟེང་གྷ་བྷི་རེལ་ལགས་ཀྱིས་ཡང་བསྐྱར། ཉེ་ཆར་བོད་ནང་གི་རི་མོ་བ་སྐོར་ཞིག་གིས་ལྷ་ས་དང་པེ་ཅིན་སོགས་ནས་སྒྱུ་རྩལ་རི་མོའི་བརྩམས་ཆོས་མང་དག་ཅིག་འགྲེམས་སྟོན་བྱས་ཡོད་པ་དེ་དག་གཟིགས་འབུལ་བྱ་རྒྱུ་ཡིན་འདུག

གསར་འགོད་པ། བནྡེ་སྐྱབས།