བོད་མདོ་ཁམས་ཏྲེ་ཧོར་ཁུལ་བཀྲ་ཤིས་དར་རྒྱས་དགོན་གྱི་ཉེ་འཁོར་ཉ་རྒྱས་དགོན་གྱི་བཙུན་མ་བཀྲ་ཤིས་དབྱངས་མཚོ་ལགས། རྒྱ་ནག་གིས་བཙོན་ཁང་ནང་ཉེས་རྡུང་ཚབས་ཆེན་བཏང་བའི་རྐྱེན་གྱིས་ཛ་དྲག་གི་སྨན་བཅོས་གནང་དགོས་བྱུང་ཡོད་འདུག
ལྷོ་ཕྱོགས་སེར་བྱེས་ཏྲེ་གྲྭ་དཀར་མཛེས་པདྨ་ཚེ་དབང་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། བཙུན་མ་བཀྲ་ཤེས་དབྱངས་མཚོ་འམ་༼མཚན་གཞན་བཀྲ་དགའ་༽དང་ཁོང་གི་ཆོས་གྲོགས་གསེར་ཆོས་སྐྱིད་དང་། ཨ་ཆོས་གསུམ་གྱིས་ཕྱི་ལོ་ ༢༠༠༨ ལོའི་ཕྱི་ཟླ་ ༥ པའི་ཚེས་ ༢༠ ཉིན་གྱི་མཚན་མོའི་བོད་ནང་གི་ཆུ་ཚོད་དང་པོ་ཙམ་ལ་དར་རྒྱས་ནས་བརྩམས་ཏེ། དཀར་མཛེས་རྗོང་ཐོག་བར་སྤྱི་ལེ་ ༢༠ ཙམ་གྱི་སར་གོམ་བགྲོད་ཀྱིས་ཞོགས་པ་ནམ་ལངས་ཁར་དཀར་མཛེས་རྫོང་ཐོག་ཏུ་འབྱོར་ཡོད་ཅིང་། དེའི་རྗེས་ཆུ་ཚོད་༩ པ་ཡས་མས་ཤིག་ལ་དཀར་མཛེས་རྫོང་གི་ཁྲོམ་གཞུང་དུ་མི་མང་འདུ་འཛོམས་ཆེ་སར་ཞི་རྒོལ་གྱི་འབོད་ཚིག་སྒྲོག་བཞིན་རྒྱ་ནག་ལ་ངོ་རྒོལ་ཤུགས་ཆེན་བྱས་པར་བརྟེན། དྲག་ཆས་ཉེན་རྟོག་པས་ས་དེ་ནས་བཅར་རྡུང་ཚད་མེད་བཏང་མཐར་འཛིན་བཟུང་གིས་་དཀར་མཛེས་རྫོང་འབྲིང་རིམ་མི་དམངས་ཁྲིམས་ཁང་དང་། རྒྱ་ནག་ཁྲིན་ཏུའུ་ནས་ལམ་ཐག་ཉེ་བའི་སར་བཙོན་ཁང་ཞིག་བཅས་སུ་བཀག་ཉར་བྱས་འདུག་པ་དང་། ལོ་གཅིག་ཙམ་གྱི་རྗེས་བཙུན་མ་བསོད་ཆོས་སྐྱིད་དང་བཙུན་མ་ཨ་ཆོས་གཉིས་གཟུགས་པོ་ནད་གཅོང་ཆགས་ཏེ། རྒྱ་གཞུང་ནས་འཆི་ཉེན་ལ་འགན་ལེན་མ་ཐུབ་པར་ཀློད་གྲོལ་བཏང་ཡོད་འདུག
བཙུན་མ་བཀྲ་ཤིས་དབྱངས་མཚོ་ལགས་ལོ་ངོ་གཉིས་དང་ཟླ་བ་དྲུག་ཙམ་བཀག་ཉར་བྱས་མཐར་ད་ལོའི་ཕྱི་ཟླ་ ༡༡ ཚེས་༡༩ ཉིན་བཙོན་ཁང་ནས་ཀློད་གྲོལ་བཏང་འདུག་ཀྱང་། ཁོང་རྒྱ་ནག་གི་བཙོན་ཁང་ནང་ལོ་གཉིས་ལྷག་བཀག་ཉར་བྱས་རིང་ལ་རྒྱ་དམར་ནས་ཡ་ང་སྙིང་རྗེ་མེད་པར་མི་སྤྱོད་ལས་འདས་པའི་ཉེས་རྡུང་ཚད་མེད་བཏང་བའི་རྐྱེན་གྱིས་ཁོང་གི་སྐུ་གཟུགས་ཕྱི་ནང་གཉིས་ཀར་སྐྱོན་ཆེན་པོ་བཟོས་ཏེ། ད་ལྟ་རྒྱ་ནག་གི་གྲོང་ཁྱེར་ཁྲིན་ཏུའུ་རུ་སྨན་བཅོས་བྱེད་བཞིན་ཡོད་པ་དང་། དེ་ཡང་ཁོང་ལ་ཉེས་རྡུང་འདྲ་མིན་བཏང་བའི་རྐྱེན་གྱིས་ཁོང་མོའི་མཁྲིས་པར་གནོད་སྐྱོན་ཚབས་ཆེན་བཏང་ཡོད་པ་མ་ཟད། ལག་པ་གཡོན་པ་ཐེངས་གཉིས་ལ་བཅག་ཧྲུག་བཏང་ཡོད་པ་དང་། ཨ་ཅོག་གཡོན་པ་སྐྱོན་ཅན་ཆགས་ཏེ་སྒྲ་རྩ་བ་ནས་མི་ཐོས་པར་གྱུར་ཅིང་། ཤ་པགས་གཉིས་ཀྱི་མཚམས་ལ་ཤ་རྡོག་རྡོག་ཆགས་པ་དང་། གློ་ནད་ཊི་བི་ན་ཚ་སོགས་ཀྱི་དཀའ་སྡུག་ཚད་མེད་མྱོང་བཞིན་ཡོད་འདུག
རང་ལོ་ ༣༠ ཡིན་པའི་བཙུན་མ་བཀྲ་ཤེས་དབྱངས་མཚོ་ལགས་ནི་དཀར་མཛེས་རྫོང་འདན་མ་ཤང་།༼འདུས་ཡར་དར་རམ་བདེ་སྐྱིད ༽གྲོང་ཚོའི་ཕ་བློ་བཟང་རིན་ཆེན་དང་མ་བདེ་ཆེན་མཚོ་མོ་གཉིས་ཀྱི་བུ་མོ་ཡིན་ཡང་། ཕ་མ་གཉིས་འདས་གྲོངས་སུ་སོང་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཨ་ནེ དེང་སང་ཁྱོད་ཅི་འདྲའི་སེམས་པ་ཆེ་བ་ལ ངའི་བསམ་པར ཁྲོད་ད་དུང་ནམ་ཡང་ཞུམ་པར་མེད་ཆེད་སེམས་སྔར་བཞིན་དང་དེ་ལས་ཀྱང་ལྷག་པར་གནས་ཡོད ཁྱོད་ཀྱི་སྨན་བཅོས་ལ་བར་ཆེད་མེད་པར་སྨོན ང་ཚོ་ཡིག་ཆོས་ཡོད་ཁྱོད་མན་ཡང་བདེ་ཐང་ངང་འཚོ་ཐུབ སེམས་མ་སྡུག་ཨ ང་ཚོ་སྐྱི་སྡུག་མཉམ་མྱོང་ཡིན དྲང་པོར་བཤད་ན་ནི་ཁྱོད་ཀྱི་སྤུན་མཆེད་གཅིག་ཡིན དེང་སང་ལྷོ་ཕྱོགས་རྒྱ་མཚོའི་ཉེ་འགྲམ་དུ་ཁྱོད་ཀྱི་བདེ་ཐང་གི་གཏམ་བཟང་ལ་རེ་སྒུག་བྱེད་བཞུན་དུ་རྒྱང་ལྟ་བྱེད་བཞིན་དུ་ཡོད ང་དང་ང་ཚོའི་ལས་དབང་མ་བརྗེད་ཨ།
མི་རིགས་ཀྱི་དཔའ་མོ་ལགས། ཁྱེད་ལ་གདུང་སེམས་མཉམ་སྐྱེད་དང་། ཁྱེད་རང་སྐུ་གཟུགས་བདེ་ཐང་ཡོང་བའི་སྨོན་འདུན་ཞུ། ཁྱེད་ཀྱིས་བཞག་པའི་ཞབས་རྗེས་ནི་བསྟན་སྲིད་ཀྱི་གངས་རིའི་ངོས་སུ་ནམ་ཡང་ཟུབ་མེད་ཅིག་ཡིན་པས། ཁྱེད་རང་བློ་བདེ་བག་ཕེབས་ངང་བཞུགས་ཆོག
མི་རིགས་ཀྱི་དཔའ་མོ་ལགས། ཁྱེད་མྱུར་དུ་བདེ་ཐང་ངང་བསམ་དོན་ཆོས་བཞིན་འགྲུབ་པའི་སྨོན་འདུན་ཞུ། ཁྱེད་ཀྱིས་བཞག་པའི་ཞབས་རྗེས་ནི་བསྟན་སྲིད་ཀྱི་གངས་རིའི་སྟེང་ན་ནམ་ཡང་ཟུབ་མེད་ཅིག་ཡིན་པས། ཁྱེད་རང་བློ་བདེ་བག་ཕེབས་གྱིས།
ཨ་ནེ་བཀྲ་ཤིས་དབྱངས་མཚོ་ལགས་ཁྱེད་ཀྱི་སྐུ་གཟུགས་བདེ་ཐང་ཡོང་བའི་སྨོན་འདུན་གྲངས་མེད་ཞུ་་་་་་ཞུ།
ཨ་ནི་བཀྲ་ཤིས་དབྱངས་མཚོ་ལགས་ཁྱོད་མྱུར་དུ་བདེ་ཐང་ངང་སྔར་བཞིན་བཙུན་དགོན་དུ་འབྱོར་བར་སྨོན།་
ཨ་ནེ་ལགས་མགྱོགས་ནས་མྱུར་དུ་དྲག་སྐྱེས་ཡོང་བ་མ་ཚད་རྒྱལ་བ་མཆོག་གི་ཞལ་མཇལ་གསུང་ཐོས་ནས་བདེ་སྐྱིད་ཀྱི་ཉི་མ་ཤར་བའི་སྨོན་ལམ་ཞུ།
མགྱོགས་ནས་མྱུར་དུ་ནད་གཞི་དྲག་སྐྱེས་ཡོང་བར་སྨོན་ནོ།
ཨ་ནེ་ལགས་སུ་གདུང་སེམས་མཉམ་སྐྱེད་ཡོད།