རང་ཉིད་དྲང་མོ་མདའ་འདྲ་ཞིག་ཡིན་ཁུལ་དང་རང་གི་གཞུང་དེ་ཡང་དེ་བས་དྲང་ཞེས་བསྟོད་པ་འཐེན་བསྡད་ན་མི་རུང་སེམས། ད་ནི་ང་ཚོས་ཀྱང་རིག་པ་བརྡར་ནས་རང་ཉིད་ལ་གཤག་བཅོས་བྱེད་རན་རེད། འདས་པའི་ལོ་ངོ་ལྔ་བཅུའི་རིང་རྒྱ་ནག་གིས་བོད་ཀྱི་རིག་གཞུང་དང་མི་རིགས་བཅས་རྩ་མེད་གཏོང་བའི་བྱེད་སྒོ་དངོས་ཤུགས་བརྒྱུད་གསུམ་ནས་སྤེལ་བ་ནི་རྫུན་གནམ་ལ་མི་གཤོང་བ་ཞིག་བཏབ་ཡོད། ད་དུང་ཡང་བྱེད་བབ་འདི་བྱས་དང་བྱེད་མུས་རེད།
མི་ལོ་ངོ་ལྔ་བཅུའི་རིང་ལ་རྒྱ་ནག་གིས་བོད་ཀྱི་རིག་གཞུང་གཏོར་མགོ་ཚུགས་པའི་ལོ་ ༡༩༤༩ ནས་བཟུང་ ༡༩༥༩ ལོ་ཡོངས་སུ་གཏོར་ཟིན་པ་ཡིན་ལ། དུས་ཡུན་ཐུང་ངུ་ཞིག་གི་ནང་སྲོལ་རྒྱུན་རིག་གནས་གང་མང་ཞིག་ཤུལ་མེད་དུ་བཅོམ་ཟིན་པ་དང་། དེ་ནས་བོད་ཀྱི་སྐད་ཡིག་ལ་བཅོས་བསྒྱུར་བྱ་མགོ་བཙུགས་ནས་ཕྲད་རྣམ་དབྱེ་ལ་སོགས་པ་གང་མང་བཟོ་བཅོས་བྱས་མོད། ༸པཎ་ཆེན་རིན་པོ་ཆེ་སྐུ་ཕྲེང་བཅུ་བ་གཙོས་མེས་པོ་དམ་པ་ཚོའི་འཛིན་སྐྱོང་དང་ཤུགས་སྣོན་ལ་བརྟེན་ནས་བོད་ཡིག་གི་སྲོག་རྔ་ཡང་བསྐྱར་སོས་ནས་དབུགས་རྔ་མ་ཆད་བར་དར་བ་རེད། དམ་པ་སྐུ་དྲིན་ཅན་ཚོས་འབད་འབུངས་ལས་བོད་ཀྱི་ས་ཕྱོགས་གང་སར་བོད་ཡིག་འཛིན་སྐྱོང་སྤེལ་གསུམ་གནང་བའི་མཐུས་ལས་བོད་ཁུལ་དུ་རྒྱ་ཡིག་ལས་བོད་ཡིག་དར་ཁྱབ་ཆེ་ལ། བོད་ཡིག་མ་ལག་འཐུས་ཚང་དང་བཀོལ་སྤྱོད་ལེགས་པ། ནང་དོན་ཟབ་པ། རྒྱ་ནག་ལའང་གནོན་ཤུགས་འཕར་མ་ཞིག་སྤྲད་ཐུབ་ཡོད།
ལྷག་པར་དུ་བོད་ཡིག་དེ་རྒྱལ་སྤྱིའི་རང་བཞིན་ཅན་ཞིག་གྱུར་བར་བརྟེན་ནས་བོད་པའི་བོད་ཀྱི་གནས་ཚུལ་མཁོ་སྤྲོད་དང་། རང་ཉིད་ཀྱི་འཛིན་སྐྱོང་སོགས་རང་ཉིད་ཀྱི་འཐུས་ཕྱིན་པ་ཞིག་འཁྱེར་བཞིན་པའི་མངོན་གསལ་གྱི་ཡར་བསྐྱེད་ཞིག་ཕྱིན་པས། རྒྱ་ནག་གི་མགོ་གཙོ་ཚོའི་སེམས་ལ་བོད་ཡིག་རྩ་མེད་གཏོང་བ་ལས་འཕེལ་རྒྱས་ཕྱིན་པ་དང་། འཕེལ་རྒྱས་ཕྱིན་པ་ལས་བཀོལ་སྤྱོད་འཐུས་ཚང་ཅན་ཞིག་ཏུ་གྱུར་བ་མཐོང་ཡོད་ལ། དེ་དག་མཐོང་ནས་བོད་མི་རྣམས་བོད་ཡིག་གིས་བཀོད་སྤྱོད་བརྒྱུད་རླབས་ཆེན་གྱི་བྱ་གཞག་ཅིག་གནང་བཞིན་པ་ཡང་རྩོམ་བྲིས་དང་། གླུ་གཞས། བཞད་གར། ཞབས་བྲོ་ལ་སོགས་པ་ནས་བོད་མི་རྣམས་ལ་བརྡ་ལན་གསལ་བོར་ཞིག་སྤྲོད་བཞིན་པ་མཐོང་། ད་ལྟ་ཁ་ཡོད་ལག་ཡོད་ཀྱིས་བོད་ཡིག་རྩ་མེད་གཏོང་རྒྱུའི་ངན་སེམས། དབང་ཤུགས་དང་ཁྲིམས་གཞིའི་ཁྱབ་བསྒྲགས་ཀྱིས་བོད་ཡིག་བཙོན་དུ་དངོས་སུ་བཅུག་པ་རེད། འདི་ནི་རྒྱ་ནག་གི་བྱེད་བབ་ཡིན་ལ་བོད་རྩ་མེད་དུ་བཟོ་རྒྱུའི་གྲ་སྒྲིག་དེ་ཡང་འདི་ཡིན། འདི་ནི་མི་ལོ་ལྔ་བཅུའི་ཁྲོད་ནས་གཏོར་བཤིག་བཏང་བ་ལས་ཤུགས་ཆེ་བའི་གཏོར་སྐྱོན་དེ་ཡིན།
འོ་ན་བོད་ཕྱི་ཕྱོགས་ན་འདི་ལྟར་བཙན་གནོན་གཏོང་མཁན་མེད་མོད། མི་རེ་ངོ་རེ་ངོས་ནས་རང་བཞིན་གྱི་རྐང་འོག་ཏུ་བོད་ཡིག་བརྫིས་བཞིན་ཡོད། ང་ཚོ་ཚང་མ་ཁ་གཡར་ས་ཞིག་ཡོད་པ་ནི་ཁོར་ཡུག་གི་དབང་ཞེས་ལས་འདེད་འདི་ལ་མ་གཏོགས་མེད། དོན་ངོ་མ་རིག་གཞུང་གཏོར་བཤིག་གཏོང་མཁན་ང་ཚོ་ཡིན། ང་ཚོས་ཁ་ཕྱི་ཕྱོགས་སུ་གཡེང་ནས་རྒྱ་ནག་གིས་བོད་ཀྱི་རིག་གཞུང་གཏོར་བཤིག་གཏོང་བཞིན་འདུག བོད་མི་རྣམས་རང་སྐད་སྦྱོང་དབང་མི་འདུག ཚན་རིག་ལ་སོགས་རང་གི་སྐད་ཡིག་ནང་སྦྱོང་ཆོག་གི་མི་འདུག བོད་ཡིག་ཙམ་ལས་གཞན་ཚང་མ་རྒྱ་ཡིག་ཐོག་སྦྱང་དགོས་པ་འདུག་ཞེས་སྡིག་ར་བྱེད་བཞིན་པ་ནི། དོན་དངོས་རང་ཉིད་ལ་མཛུབ་མོ་ཞིག་འཛུགས་སྐབས་ཁ་བཤད་དང་ལག་ལེན་གཉིས་འདིར་སྐྱག་རྫུན་ལྟ་བུ་ཞིག་མངོན།
གང་ཡིན་ཞེ་ན། ང་ཚོས་ལོ་ངོ་ལྔ་བཅུ་རིང་རྒྱ་ནག་གིས་འགྲིག་མ་སོང་བའི་ལོ་རྒྱུས་རྐྱང་ལས་རང་གི་སྐད་ཡིག་དང་རིག་གཞུང་ལ་ཅི་ཙམ་གྱི་ཡར་བསྐྱེད་དང་། ཅི་ཙམ་གྱི་ཞབས་འདེགས་ཞུས་ཡོད་པ་རེད། རང་གི་སྐད་ཡིག་གི་གནས་བབ་དང་ཆེ་མཐོང་བཙན་བྱོལ་སྤྱི་ཚོགས་ནང་ཚད་འཛིན་གང་འདྲ་ཞིག་བཞག་ཡོད་དམ། ༸གོང་ས་མཆོག་གིས་གསུངས་གསུངས་བས་འབྲས་པའི་ངོ་སོ་ལྟ་བུ་བོད་ཡིག་ཞིག་ལས་དོན་དངོས་ཐོག་བོད་ཡིག་གི་གནས་བབ་གང་འདྲ་ཡིན་མིན་ཚང་མའི་ཤེས་གསལ་རེད། གཞུང་འཛིན་ལས་ཁུངས་ཁག་ནང་དབྱིན་ཡིག་མ་ཤེས་ན་ལས་ཀྱི་སྣེ་མོ་བ་དག་གིས་ཕྱི་ཕྱོགས་འབྲེལ་བ་དང་། གང་ཅིས་ལས་གནས་ཚགས་ཚུད་མེད་པའི་དབང་དུ་ཐོངས། སློབ་གྲྭ་ཁག་གི་ནང་དགོས་པ་རྒྱུ་མཚན་གང་གིས་ཐོག་ནས་བོད་ཡིག་སྐད་ཡིག་རྣམས་ཀྱི་མཐའ་གྲལ་ཏུ་ལྷུང་བ་ཡིན། དཔེ་མཚོན་ཙམ་ཞིག་ཞུས་ན་བོད་ཀྱི་ལོ་རྒྱུས་ཡོད་ཚད་དགོས་པ་གང་ཞིག་ལ་བརྟེན་ནས་དབྱིན་ཡིག་ནང་འཁྲིད་དགོས་པ་རེད། རང་ཉིད་ཀྱི་ལོ་རྒྱུས་དགོས་པ་གང་ཞིག་གི་ཐོག་ནས་དབྱིན་ཡིག་ནང་བསླབ་དགོས་པ་ཆགས་རེད།
དེ་ལས་ཀྱང་འཚབ་ཆེ་བ་ཞིག་ནི་༸གོང་ས་མཆོག་གི་མཛད་རྣམ་ཡང་དབྱིན་ཡིག་ནང་འཁྲིད་བཞིན་ཡོད་པ་རེད། འདི་ལྟ་བུའི་གནས་ཚུལ་གང་མང་ཡོད་སྟབས་ཕྲུ་གུའི་བསམ་བློའི་ནང་རང་བཞིན་གྱིས་བོད་ཡིག་ནི་ཕན་མེད་ཀྱི་གདོན་རྫས་ལྟ་བུ་ཞིག་ཏུ་སྣང་བཞིན་ཡོད། འདི་སྐོར་ངས་དབྱིན་ཡིག་དགེ་རྒན་ཞིག་ལ་བརྗོད་སྐབས་ཁོང་གིས་ཀྱང་བོད་ཀྱི་རྒྱལ་རབས་དང་མཛད་རྣམ་སོགས་དབྱིན་ཡིག་ནང་བསླབ་ན་བསླབ་བདེ་བ་དང་། དོན་གོ་སླ་བ་འདུག་ཞེས་བརྗོད་བཞིན་འདུག འདི་ལྟར་བསམ་བློ་རེ་བཏང་ཚེ་རྒྱ་ནག་གིས་བོད་ཡིག་ལས་གཞན་ཚང་མ་རྒྱ་ཡིག་ནང་འཁྲིད་བཞིན་པ་དགོས་དབང་དང་དམིགས་ཡུལ་ཡིན་དུ་བཏང་ཡང་། བཙན་བྱོལ་ནང་བོད་ཀྱི་སྐད་ཡིག་ཁོ་ན་ལས་གཞན་བོད་ཀྱི་ལོ་རྒྱུས་དང་༸གོང་ས་མཆོག་གི་མཛད་རྣམ་སོགས་དབྱིན་ཡིག་ནང་ཅི་ཕྱིར་བརྡ་འཕྲོད་མི་འཕྲོད་ངང་ཨུ་ཚུགས་ཀྱིས་སློབ་བཞིན་ཡོད། གནད་དོན་འདི་འདྲ་བ་ཞིག་གོ་མེད་ཚོར་མེད་དུ་འཇོག་མི་རུང་ལ། བོད་མི་ཞིག་ཡིན་ན་རང་ཉིད་ནས་མགོ་བཙུགས་ཏེ་བོད་མི་རྣལ་མ་ཞིག་ཡོང་བར་གཤག་བཅོས་བྱེད་རན་རེད།
གྲོགས་ཅོ་རི་ཉི་མ་ལགས། ཕེབས་ནས་གསུངས་གླེང་གནང་བ་ཐུགས་རྗེ་གནང་། རྒྱུན་ཏུ་ངེད་ཚང་ལ་ཕེབས་ནས་ངའི་ཇ་ཚ་མེད་འཐུང་བ་ངོ་མ་དགའ་ཡོད།
འཇམ་མགོན་ལགས་་་ད་གཤག་བཅོས་བྱེད་རན་གྱི་ཡོད་ན་དང་པོར་ཁྱེད་གཤག་དང་ང་གཤག་སུ་གཤག་དགོས་པ་ཡིན་ཡང་ཡག་པོ་ཞིག་ཤེས་མ་སོང་། ཤ་སུ་རྒྱས་བལྟས་ནས་གཤག་ན་ཕལ་ཆེ་བཙན་བྱོལ་ནང་གི་རྒྱུ་ཆེན་དེ་ཚང་མིན་འགྲོ་སྙམ།
རྒན་འཇམ་མགོན་འདིས་གཅིག་གཤག་ནི་གཤག་ཐག་ཆོད་ཡིན་ས་རེད། སྐུ་རྩེད་ཡིན་ད།
ངས་བལྟས་ན་གཤག་བཅོས་བྱེད་པ་ལས་ལྷན་པ་རྒྱབ་པ་ཡིན་ན་ཏོག་ཙམ་དབྱིན་རླུང་གྲང་མོ་དེ་དང་རྒྱ་རླུང་བཙོག་པ་དེས་ཤུགས་རྐྱེན་འགོག་ཐུབ་པ་མི་ཡོང་ངམ།
གཞན་གཤག་བཅོས་འདྲ་བྱེད་ནའང་སུ་གཤག་འདིར་གཤག་མེད་པ་འདྲ་གཅིག་དང་གཤག་རན་དུས་མི་ཚང་མས་ང་མ་གཤག་དང་ང་མ་གསོད་གསུང་མཁན་མ་གཏོགས་ཨེ་ཡོད་སྙམ།
སྨན་པ་མཁས་པ་འདྲ་ཡོད་ན་ཕེབས་རན་ཚར་འདུག ངོ་མ་གཤག་བཅོས་བྱེད་ནའང་འདྲ་ལྷན་པ་རྒྱབ་ནའང་འདྲ་ཅིག་བྱེད་རན་ཚར་བ་ནི་བདེན་པ་རེད་དོ་ཞེས་ཞུ་རྒྱུ་ལས་མེད།
གྲོགས་མི་ནག་ལགས། འདི་ལྟར་གློ་བུར་དུ་ཡོང་གི་རེད་བསམ་བསམ་མ་བྱུང་། ངོ་མ་དགའ་བས་སྒོམ་མི་ཐུབ་གི ཁྱོད་འདི་ལྟར་སླེབས་ན་དོན་མེད་མིན་ལ་ལབ་གླེང་དང་སྦྲེལ་ནས་ལམ་སྟོན་གནང་བ་ནི་དེ་བས་ཀྱང་རིན་ཐང་ཆེ་ལ། བློ་གསལ་ཡང་མི་དམན་པ་བྱུང་། ད་དུང་ཡང་ར་འོར་གི་སླེབས་ནས་ལམ་སྟོན་དང་སྣེ་འཁྲིད་བྱེད་རྒྱུ་བརྗེད་མི་ཉན།
གྲོགས་ངོས་པོའི་ལྷ་སྲས་ལགས། སྐུ་ཉིད་འདི་ལྟར་ཕེབས་ནས་རྒྱབ་སྐྱོར་དང་གནད་ལ་འཁེལ་བའི་དོན་ཞིག་གླེང་འདུག་པས། ཉིད་ཀྱི་བརྗོད་བཞིན་པའི་དོན་འདི་རྒྱ་ཁྱབ་དང་ཁ་ཇེ་གསལ་དུ་བཏང་ནས་འདོན་དགོས་པ་འདུག སྐུཉིད་ནས་མུ་མཐུད་ལམ་སྟོན་དང་སྣེ་འཁྲིད་གནང་རོགས།
གྲོགས་གཟུ་གནས་བློ་ལྡན་དང་ཁྲ་གླག་སྤྱང་གསུམ་ལགས་གཉིས་ནས་འདི་ལྟར་ཕྲན་ལ་དགའ་འོས་པའི་འཕྲིན་བཟང་ཞིག་འཁྱེར་ཡོང་པ་ཧ་ཅང་དགའ་ཡོད་ལ། ང་ཚོའི་སྐད་ཡིག་འདི་དང་མི་རིགས་འདི་དོན་མེད་ཤི་མི་ཐུབ་པ་དང་ཤི་མི་རུང་བ་ཡང་གསལ་འདོན་གནང་འདུག་པས་ཤིན་ཏུ་བཀའ་དྲིན་ཆེ་ཞུ།
ད་ཡིན་ན་ང་ཚོས་ཅི་ཞིག་དང་སུ་ཞིག་ཡིན་དང་མིན་བཤད་པའི་དུས་ཚོད་ནས་ཕར་གོམ་པ་གང་སྤོས་ཏེ། ཇི་ལྟར་དང་གང་ནས་ཞེས་པ་དེའི་ཕྱོགས་ནས་གླེང་དགོས་པར་འདོད།
དཔེར་ན། སུ་ལན་པ་དང་སུ་ནོར་བ། ཅི་ཞིག་ནོར་བ་སོགས་མིན་པར། འོ་ན། ད་གང་ཞིག་ཇི་ལྟར་བྱ་རྒྱུ་ཡིན་ཅེས་པའི་ཐབས་ཀྱི་ཕྱོགས་ལ་འབད་པའི་དུས་རེད།
སྐྱོན་ངོས་འཛིན་གྱི་རིམ་པ་ནས་བརྒལ་ཏེ་སྐྱོན་ཡོ་བསྲང་ཇི་ལྟར་བྱེད་པའི་སྐབས་ལ་བབ་འདུག
ཐབས་ཤེས་གཅིག་ཤོད། ཐབས་ཤེས་གཉིས་ཤོད། ཐབས་ཤེས་གསུམ་ཤོད། ང་ཚོ་རེ་རེས་ཐབས་ཤེས་རེ་རེ་བཤད། ཐབས་ཤེས་དེ་དག་གི་ནང་ནས་ཐབས་ཤེས་ཡག་ཤོས་དེ་ཚོ་འདེམ། དེ་ནས་ལག་ལེན་ལ་བསྟར་བ་ཡིན་ན། མི་རབས་ནས་མི་རབས་བར་གྱི་ཆོ་ངེ་དང་ཀི་ཧོ་དེ་དག་དགོས་དོན་ཡོད་པ་མ་རེད། མ་རེད་དམ།
དངོས་གནས་ང་ཚོའི་ངོ་ཚ་དགོས་པ་ཞིག་རེད།
གཞུང་གི་ལས་བྱེད་གསར་བསྡུ་སྐབས་བོད་ཡིག་གི་བརྒྱ་ཆ་མཐོ་བོ་ལོན་ན་ཡང་དབྱིན་ཡིག་གི་བརྒྱ་ཆ་དམའ་བོ་ཡིན་ན་ལས་གནས་འཛིན་རྒྱུར་རྒྱུགས་མི་འཕྲོད་པ་རྩིས་པ་དང།
དབྱིན་ཡིག་བརྒྱ་ཆ་མཐོ་བོ་ཡིན་ན་བོད་ཡིག་བརྒྱ་ཆ་དམའ་བོ་ཡིན་ནའང་རྒྱུགས་འཕྲོད་པ་རྩིས་པ་སོགས་བྱེད་ཀྱིན་འདུག
དེ་ནི་རང་གི་སྐད་ཡིག་ཡར་རྒྱས་གཏང་རྒྱུར་བཀག་རྡོ་ཆེན་པོ་ཞིག་རེད་བསམ།
ཀུ་ཤུ་རྟགས་ཅན་གྱི་ཁ་པར་ནང་བོད་ཡིག་སྙིང་རྗེ་མོ་བཅུག་འདུག ད་ངས་ཀྱང་ཀུ་ཤུ་རྟགས་ཅན་ཞིག་ནོས་ན་མ་གཏོགས། མི་དེ་ཚོའི་ལག་རྩལ་ལ་ཡ་མི་འདུག གཅིག་དེ་བོད་ཡིག་ཁོ་རང་ཚན་རིག་དང་མཐུན་པ་ཡོད་ཙང་རེད། རྒྱ་ཡིག་དང་འཇར་པན་ཡི་གེ་འདྲ་པོ་ཡོད་ཅིང༌། འཇར་པན་གྱིས་ཚན་རིག་པ་ཚོས་རང་གི་ཡི་གེ་གློག་ཀླད་ནང་སྤྱོད་ཐུབ་པ་བཟོས་པ་ལ་དཔེ་བཤུ་བྱས་པ་རེད་མ་གཏོགས། རྒྱ་རྒན་ཁོ་རང་ཚོ་ཡིན་ན་ད་དུང་ཡང་རང་གི་ཡི་གེ་གློག་ཀླད་ནང་སྤྱོད་ཐུབ་ཡོད་མ་རེད་ཟེར་མཁན་འདུག
ཀུ་ཤུ་རྟགས་ཅན་ཁ་པར་ནང་བོད་ཡིག་བེད་སྤྱོད་བཏང་བའི་དཔེ་རིས་དང་བཅས།
http://www.tibetcm.com/html/news/201011252715.html
བོད་རང་ཉིད་ཀྱི་སྐད་ཡིག་གཅེས་སྐྱོང་དང་དར་སྤེལ་ཟེར་ན་འདི་འདྲ་བ་ཞིག་ཡིན་པ་ལས། བཙན་འབྱོལ་བོད་གཞུང་གིས་ད་བར་བོད་ཡིག་ཡར་རྒྱས་གཏོང་གི་ཡིན་ཞེས་པའི་ཁ་གཡང་ཁོ་སྟོང་མང་པོ་བསྒྲགས་པས་ཅི་ཕན།