གྱོད་དོན་དེ་ཁྲིམས་ཁང་གིས་ཐག་གཅོད་གནང་གི་རེད།

ཁྲིམས་ཁང་ནས་བརྡ་ཐོ་འབྱོར་བ་ཡིན་ན་དེར་འགྲེལ་བཤད་རྒྱག་རྒྱུའི་གོ་སྐབས་ཤིག་ཡོད་པ་རེད། ཁྲིམས་ཁང་ལ་འགྲེལ་བཤད་ཅི་ཡང་མེད་པར་མི་འཇུས་སོང་ཟེར་བའི་སྐད་ཆ་ཞིག་ཡོང་ཐབས་ཡོད་པ་མ་རེད། གལ་སྲིད་བོད་པ་དེ་དག་ལ་ཁྲིམས་ཁང་ནས་ནག་ཉེས་ར་སྤྲོད་གསལ་བོ་བྱུང་བ་ཡིན་ན། བཀའ་ཤག་གིས་ཁྲིམས་མཐུན་མིན་མཁན་ཞིག་ལ་རྒྱབ་སྐྱོར་གནང་ཐབས་ཡོད་མ་རེད་ཟེར།

ཟླ་འདིའི་ཕྱི་ཚེས་ ༢༥ ཉིན་གྱི་ཧི་མ་ཅལ་མངའ་སྡེའི་ཧིན་རྡུ་ཉིན་རེའི་ཚགས་པར་སྟེང་། གནས་ཆེན་མཚོ་པདྨ་ཁུལ་དུ་སྡོད་མཁན་བོད་མི་ཁ་ཤས་ཀྱིས་ཡིག་ཆ་རྫུན་མའི་ཐོག་ནས་ས་ཆ་ཉོ་ཚོང་བྱས་པའི་ཁྲིམས་འགལ་གྱི་གྱོད་དོན་བཟོས་ཡོད་སྟབས། ད་ཆར་རྒྱ་གར་ཉེན་རྟོག་པས་བོད་མི་ ༣ འཛིན་བཟུང་བྱ་གཏན་འཁེལ་ཡོད་སྐོར་བཀོད་འདུག་ལ། གྱོད་དོན་དེ་ཐོག་མར་ ༢༠༠༥ ཙམ་ནས་རྒྱ་གར་ས་གནས་ཡུལ་མི་ཞིག་གིས་མན་ཌི་ Mandi རྫོང་ས་གནས་ཁྲིམས་ཁང་དུ་བོད་མི་ཚོས་ཁྲིམས་འགལ་ཐོག་ས་ཆ་ཉོ་ཚོང་བྱེད་ཀྱི་ཡོད་པའི་ཞུ་གཏུག་བྱས་པ་ལས་བྱུང་ཞིང་། ད་ལྟ་གནད་དོན་དེ་ཅུང་ཛ་དྲག་གི་ངོ་བོར་འགྱུར་བཞིན་ཡོད་འདུག

དེ་རིང་འདི་གའི་གསར་འགོད་པ་བཀའ་ཤག་ཏུ་བསྐྱོད་དེ་བཀའ་དྲུང་མི་འགྱུར་རྡོ་རྗེ་ལགས་སུ། གནད་དོན་དེའི་སྐོར་ལ་མཁྱེན་རྟོགས་ཡོད་མེད་བཀའ་དྲི་ཞུས་སྐབས་ཁོང་གིས། གནད་དོན་དེ་ནི་ས་གནས་རྒྱ་གར་ཡུལ་མི་པཱ་ཝན་ཀོ་མར་ Pawan Kumar ཟེར་བ་ཞིག་གིས། བོད་པས་ཁྲིམས་མཐུན་མིན་པའི་ས་ཆ་བདག་གཉེར་བྱེད་བཞིན་ཡོད་པ་དང་། བོད་ཀྱི་དགོན་སྡེ་ཁག་དང་ལས་ཁུངས་ཁག་ཏུའང་བོད་ཀྱི་རྒྱལ་དར་སྒྲེང་འཛུགས་བྱེད་ཀྱི་ཡོད་པ་རྣམས་གཞི་རྩའི་རྒྱ་གར་གྱི་ཁྲིམས་ལུགས་དང་འགལ་ཡོད་སྟབས། མངའ་སྡེ་དང་དབུས་གཞུང་གིས་གནད་དོན་དེའི་ཐོག་དགོས་ངེས་ཀྱི་ཁྲིམས་ལུགས་ལག་བསྟར་བྱ་དགོས། ཞེས་སྙན་ཞུ་ཞིག་ཧི་མ་ཅཱལ་མངའ་སྡེའི་ཁྲིམས་ཁང་ལ་ཕུལ་ཡོད་སྐོར་གསར་ཤོག་ནང་ཐོན་ཡོད་པ་རེད། སྙན་ཞུ་དེ་རྒྱ་གར་དབུས་གཞུང་དང་མངའ་སྡེ་གཞུང་ལ་འབྱོར་ཡོད་ངེས་ཡིན་ཡང་། བོད་གཞུང་བཀའ་ཤག་ལ་ད་བར་འབྱོར་ཡོད་པ་མ་རེད། གནས་ཚུལ་དེ་ཐོན་མ་ཐག་རྒྱ་གར་གྱི་གསར་འགོད་པ་ཁག་ཅིག་གིས་ཀྱང་གནད་དོན་འདིའི་ཐད་བཙན་བྱོལ་བོད་གཞུང་ལ་གཟིགས་ཚུལ་ག་རེ་ཡོད་མེད་དྲིས་བྱུང་། སྐབས་དེར་ངས་གནད་དོན་དེའི་ཐད་བཙན་བྱོལ་བོད་གཞུང་ལ་དགོངས་ཚུལ་གསུང་རྒྱུ་གང་ཡང་མེད། དེ་ནི་ཁྲིམས་ཁང་གི་བརྡ་ཡིག་ཅིག་ཆགས་ཡོད་དུས། བརྡ་ཡིག་མ་མཐོང་ན་དེའི་ནང་གི་གནས་ཚུལ་མང་པོ་ཞིག་རྒྱུས་ལོན་ཐུབ་ཀྱི་མེད་པས་བསམ་ཚུལ་བཤད་ན་འོས་འཚམ་མིན། གལ་སྲིད་ཡི་གེ་འབྱོར་ཡོད་ན་སྐབས་བསྟུན་གྱི་བརྡ་ལན་གསལ་པོ་ཞིག་སྤྲོད་ཀྱི་ཡིན་ཞེས་བཤད་པ་ཡིན། ཞེས་གསུངས་སོང་།

ཁོང་ལ་བོད་མི་ ༣ གྱི་གནད་དོན་དེ་ ༢༠༠༥ ལོར་མཚོ་པདྨར་བྱུང་བའི་ས་ཆ་ཉོ་ཚོང་གི་རྙོག་དྲ་དེར་འབྲེལ་བ་ཡོད་མེད་དྲིས་པར། ས་ཆའི་གནད་དོན་ནི་ལོ་བདུན་བརྒྱད་གོང་གི་གནད་དོན་ཡིན་པ་ལས་གསར་པ་གང་ཡང་མ་རེད། མངའ་སྡེ་འདིའི་མི་སེར་ཡིན་ན་མི་སེར་ཆགས་སྟངས་དེ་ཡང་མ་འདྲ་བ་ཞིག་ཡོད། དེ་ཁྲིམས་ཐོག་ཏུ་གནས་སྟངས་ཐ་ཐད་ཅིག་ཆགས་ཀྱི་ཡོད། དཔེར་ན། མི་ཞིག་དངོས་ཡོད་ཐོག་མངའ་སྡེ་འདིའི་མི་སེར་ཡིན་ཚེ། མི་སེར་གྱི་ཐོབ་ཐང་ལེན་ཆོག་གི་ཡོད་ཀྱང་། མི་དེ་རྒྱལ་ཁབ་དེའི་མི་སེར་དང་མངའ་སྡེའི་ཆབ་འབངས་ཡིན་མིན་ཐད། ཁྲིམས་ཐོག་ནས་ཁུངས་ལྡན་ར་སྤྲོད་གསལ་པོ་མ་ཆགས་པར་གནད་དོན་དེ་རྩོད་གཞིའི་ངོ་བོར་གནས་རྒྱུ་ཡིན་སྟབས། དེ་ལ་འགྲེལ་བཤད་རྒྱག་རྒྱུ་གང་ཡང་ལྷག་མེད་པ་རེད་ཟེར།

ཡང་ཁོང་ལ་འཛིན་བཟུང་བྱ་འཆར་གྱི་བོད་མི་དེ་གསུམ་གྱི་ལོ་རྒྱུས་དང་། ཁོང་ཚོར་ཉེས་མིང་གཙོ་བོ་ག་རེ་བཏགས་ཡོད་མེད་དྲིས་སྐབས། གཙོ་བོ་བོད་མི་དེ་དག་གིས་ཁྲིམས་འགལ་གྱི་ཐོག་ནས་གཞན་གྱི་ས་ཆ་ཉོས་ཟེར་བ་དེ་ཡིན་པ་འདྲ། ཁོང་ཚོའི་གྱོད་དོན་དེ་ནི་ཁྲིམས་ཁང་ནས་ཐག་གཅོད་གནང་རྒྱུ་ཞིག་ལས་ང་ཚོ་སུས་ཀྱང་རྒྱུས་ལོན་ཐུབ་ཀྱི་མེད། ཁྲིམས་མཐུན་ཐོག་ས་ཆ་ཉོ་ཚོང་བྱས་ཡོད་མེད་དེ་ཁྲིམས་ཁང་གིས་ཁོ་ནས་ཐག་གཅོད་བྱེད་ཀྱི་རེད། སྤྱིར་བཏང་བོད་པ་ཚོར་ཁྲིམས་མཐུན་གྱི་ཐོག་ནས་ས་ཆ་ཉོ་རྒྱུའི་ཐོབ་ཐང་ཡོད་ཀྱང་། དྲང་བདེན་དང་ལུགས་མཐུན་གྱི་ངོ་བོར་སོང་མེད་ན་ཁྲིམས་འགལ་ཆགས་ཀྱི་ཡོད། ཡིན་ནའང་། ཁྲིམས་འགལ་ཡིན་མིན་དེ་གསར་འགྱུར་འགོད་མཁན་དང་སྙན་ཞུ་ཕུལ་མཁན་གཉིས་ཀྱིས་ཐག་ཆོད་པ་ཞིག་གཏན་ནས་མ་རེད། དེའི་སྟབས་ཀྱིས་ཁྲིམས་འགལ་ཡིན་མིན་གྱི་གནད་དོན་དེ་མཐའ་མར་ཞུ་གཏུགས་བྱེད་སའི་ཁྲིམས་ཁང་གིས་ཐག་གཅོད་གནང་གི་རེད། ཅེས་གསུངས་བྱུང་།

བཀའ་དྲུང་མཆོག་ལ་ས་གནས་གཞན་དུ་ས་ཆ་ཉོ་ཚོང་གི་རྙོག་དྲ་དེ་འདྲ་ཡོད་མེད་དང་། བོད་པ་སྐྱབས་བཅོལ་བ་ཚོར་ས་ཆ་ཉོ་རྒྱུའི་ཐོབ་ཐང་ཡོད་མེད་དྲིས་པར། ངས་ཤེས་གསལ་ལྟར་ན། ད་བར་བོད་པའི་སྤྱི་ཚོགས་ནང་ཁྲིམས་འགལ་གྱི་ས་ཆ་ཉོས་པའི་གནས་ཚུལ་གང་ཡང་བྱུང་མྱོང་མེད་ལ། ཧི་མ་ཅལ་དང་དེ་མིན་གྱི་བོད་པའི་གཞིས་ཆགས་ཁུལ་དུ་རྒྱ་གར་དབུས་གཞུང་གིས་སྤྲད་པའི་ས་ཆ་དེ་དག་བེད་སྤྱོད་བྱེད་བཞིན་ཡོད་པ་དང་། བོད་རིགས་ཤིག་ནས་ས་ཆ་ཉོ་དགོས་པ་དེ་ཚོའང་རྒྱ་གར་ནང་སྲིད་ལྷན་ཁང་བརྒྱུད་  Reserve Bank of India བཀའ་འཁྲོལ་ཞུ་དགོས་ཤིང་། བཀའ་འཁྲོལ་ཞུ་ཡིག་ནང་ས་ཆ་ཉོ་བ་དང་བེད་སྤྱོད་གཏོང་ཕྱོགས་ཐོག་ལུགས་མཐུན་གྱི་འགྲེལ་བཤད་ཆ་ཚང་ཞིག་བརྒྱབ་ན་འགྲོ་ལམ་གཅིག་ཡོད་པ་རེད། ཅེས་ལན་བསྐྱོན་སོང་།

རྒྱ་གར་ཉེན་རྟོག་པས་འཛིན་འཆར་ཡོད་པའི་བོད་མི་དེ་དག་གི་ཐད། བཙན་བྱོལ་བོད་གཞུང་ལ་གནང་ཕྱོགས་གང་འདྲ་ཡོད་མེད་དྲིས་སྐབས། ཁྲིམས་ཀྱི་འགྲོ་ལུགས་ལྟར་ན། ཁྲིམས་ཁང་ནས་བརྡ་ཐོ་འབྱོར་བ་ཡིན་ན་དེར་འགྲེལ་བཤད་རྒྱག་རྒྱུའི་གོ་སྐབས་ཡོད་པ་རེད། དེ་མིན་ཁྲིམས་ཁང་ལ་འགྲེལ་བཤད་ཅི་ཡང་མེད་པར་མི་འཇུས་སོང་ཟེར་བའི་སྐད་ཆ་ཞིག་ཡོང་ཐབས་ཡོད་པ་མ་རེད། གལ་སྲིད་བོད་པ་དེ་དག་ལ་ཁྲིམས་ཁང་ནས་ནག་ཉེས་ར་སྤྲོད་གསལ་བོ་བྱུང་བ་ཡིན་ན། བཀའ་ཤག་གིས་ཁྲིམས་མཐུན་མིན་མཁན་ཞིག་ལ་རྒྱབ་སྐྱོར་གནང་ཐབས་ཡོད་མ་རེད་ལ། གལ་སྲིད་རྒྱབ་སྐྱོར་བྱས་ཀྱང་ཁྲིམས་མཐུན་ཆགས་ཐབས་མེད་པར་བརྟེན། ནམ་ཡང་ཁུངས་འཁྱོལ་བ་ཞིག་ཡོང་ཐབས་ཡོད་པ་མ་རེད། ཅེས་གསུངས་སོང་།

མཇུག་ཏུ་རྒྱ་གར་ཡུལ་མི་ཁ་ཤས་ཀྱིས་ཁྲིམས་ཁང་ལ་ཞུ་གཏུགས་བྱས་པ་དེས་ས་གནས་ཧིན་བོད་མང་ཚོགས་བར་བར་ཤུགས་རྐྱེན་ངན་པ་ཐེབས་མིན་སྐོར་དྲིས་པར། ང་རང་གིས་ཧི་མ་ཅལ་རྒྱ་གར་ཡུལ་མི་དང་བོད་མིའི་བར་མཐུན་ལམ་མེད་པ་ཞིག་ལ་ངོས་འཛིན་བྱེད་ཀྱི་མེད། སྤྱིར་བཏང་ང་ཚོའི་ནང་མི་དང་བཟའ་ཚང་བར་ལའང་གླེང་གཞི་ཆུང་ཚགས་རེ་ཡོང་གི་ཡོད་པ་ཆོས་ཉིད་ཡིན་ལ། མངའ་སྡེ་འདིའི་ནང་མཚམས་རེར་མི་རེ་ཟུང་བར་བསམ་ཚུལ་མི་མཐུན་པ་ཕྲན་བུ་རེ་འབྱུང་བཞིན་ཡོད་ཀྱང་། དེ་ནི་རྒྱུན་ལྡན་གྱི་སྣང་ཚུལ་ཞིག་ཡིན་པ་ལས་རྩོད་རྙོག་ཆེན་པོ་གང་ཡང་མ་རེད། དཔེར་ན། ཉེ་ཆར་ཚགས་པར་ནང་ཐོན་པའི་ཁྲིམས་ཁང་གི་གནད་དོན་སྐོར་དེ་དག་ཀྱང་། མཐར་གཏུགས་ན་མི་སྒེར་བ་ཞིག་གི་སྙན་ཞུ་ཡིན་པ་ལས། ཡུལ་མི་ཁྱོན་ཡོངས་དང་ཡུལ་མིའི་སྐུ་ཚབ་མཚོན་ཐུབ་པའི་སྙན་ཞུ་གང་ཡང་མ་རེད། དེ་ཡིན་དུས་༧གོང་ས་མཆོག་དང་བོད་གཞུང་བཀའ་ཤག་གིས་དུས་རྒྱུན་བོད་རིགས་མང་ཚོགས་ལ། རྒྱ་གར་ཡུལ་མི་དང་མཐུན་ལམ་ཡག་པོ་དགོས་རྒྱུ་དང་། ཡུལ་ཁྲིམས་གཙང་མ་འཁུར་དགོས་པའི་སྐོར་བཀའ་སློབ་རིམ་པར་གནང་ཡོད་སྟབས། བོད་རིགས་ཚང་མས་ལག་ལེན་འཁེལ་རྒྱུ་གལ་ཆེན་པོ་རེད། ཅེས་གསུངས་སོང་།

གསར་འགོད་པ། དཔལ་ལྡན།