སྐྱེ་དུས་སུ་ངའི་རང་ངོ་མི་ཤེས་ཟེར་ན་འགྲིག ད་དུང་། སྐད་ཆ་ཡང་བཤད་ག་ལ་ཤེས། གཅིག་ཤེས་པ་དེ་ནི་ངུ་རྒྱུ་དེ་རེད། ལྟོགས་པའི་ཚེ་ན་ངུ་། དགའ་བའི་ཚེ་ན་དགོད། དགའ་སྐྱོ་ཆགས་སྡང་ནི་རང་ལག་དུ་ཡོད་པ་རེད། གཅིག་མི་ཤེས་པ་དེ་ནི་རང་ངོ་རེད་ལ། སྐད་ཡིག་གང་གི་ཁུངས་སུ་ཡང་མི་གཏོགས་པའི་མི་བུ་ཞིག་རེད།
ལོ་ཟླ་རིམ་འདས་ཀྱི་རྗེས་སུ། ངས་སྐད་ཆ་བཤད་། སྐད་ཆ་དེ་ནི་བོད་སྐད་རེད། རྒྱུ་མཚན་ནི་ངའི་ཕ་མ་གཉིས་ཀ་བོད་མི་རེད། ཁོང་རྣམ་པ་གཉིས་ཀྱིས་ང་ལ་བསླབ་པ་དེ་ཡང་བོད་སྐད་ལས་གཞན་ཞིག་གང་དུ་ཡོད། དེ་ནས་བཟུང་ངས་བཤད་ཤེས་པའི་སྐད་ཐོག་མ་དེ་ནི་བོད་སྐད་ཡིན་ལ། ང་ལ་བོད་པའི་རྣམ་ཤེས་ཤིག་ཡོད་པ་དེ་ནས་བཟུང་ངེས་འཛིན་བྱས་ན་འགྲིག་པ་ཡིན།
ལོ་ཟླའི་གནས་བབ་དང་། བྱིས་པའི་ལོ་ཚད་དང་བསྟུན་ནས་ངའི་ཕ་མ་གཉིས་ཀྱིས་ང་རང་སློབ་གྲྭ་ཞིག་ལ་བསྔགས། སློབ་གྲྭ་དེ་ནས་ཀྱང་ངས་བོད་ཀྱི་སྐད་ཡིག་སྤྱངས། ང་རང་ཡང་བོད་ཀྱི་སྐད་ཡིག་ལ་དགའ་བའི་མི་བུ་ཆུང་ཆུང་ཞིག་དུ་གྱུར། དེ་ནས་བཟུང་། ང་རང་གི་ཤེས་པ་དེ་ནི་བོད་ཡིག་རེད། ངས་ཀྱང་རང་ཉིད་ལ་དབང་བའི་སྐད་ཡིག་ནི་བོད་ཀྱི་སྐད་དང་ཡི་གེ་ཡིན་པ་ཤེས་པའི་ལམ་ཕྲན་དང་བོ་དེ་ནས་བྱུང་།
ལམ་ཕྲན་དེ་ནས་ང་རང་ག་ལེར་སོང་དུས། ང་ལ་ང་ལས་ལྷག་པའི་རིན་ཐང་ཞིག་ཡོད་པ་ཤེས་སོང་། དེ་ནི་ང་རང་གི་སྐད་ཡིག་ལས་རྙེད་པའི་མི་བུའི་འདུ་ཤེས་དང་། མི་བུའི་བསམ་བློ། མི་བུའི་ནུས་པ། མི་བུའི་གོ་རྟོགས། མི་བུའི་མདུན་པ། དེ་དག་གི་གསང་དུ་ཡང་། གསང་བའི་ཡིག་འབྲུ་ལས་འབུར་བའི་བསྐལ་བ་སྟོང་གི་གསེར་སྲང་གི་བཞེང་བའི་གཙུག་ལག་གི་གླེག་བམ་ཆེས་མི་ཉུང་བ་ཞིག་མིག་ལམ་དུ་ཤར་ནས་འོང་དུས། རང་ཉིད་ཀྱི་འགན་འཁྲི་ནི་རང་གི་ཚེ་སྲོག་ལས་ཀྱང་ལྕི་བ་ཤེས་སུ་བཅུགས།
སྐབས་འདི་འདྲ་ཞིག་ལ། བར་ཆད་ཀྱི་རླུང་འཚུབ་ཅིག་གིས། སྡོང་ལཽ་འདྲ་བའི་ང་ཡི་མི་ཚེ་ལ་སྐད་ཅིག་རེ་རེ་བཞིན། མི་འདོད་ཀྱང་ལྡོག་དུ་མེད་པའི་འགྱུར་བ་ཆེན་པོ་བྱུང་། དེ་ནས་བཟུང་། ངས་བཤད་དགོས་པ་དེ་ཡང་རང་ཉིད་ཆུང་ནས་བསླབ་པའི་སྐད་ཡིག་དེ་མིན་ལ། རང་ཉིད་ཆུང་ནས་འདྲིས་པའི་ཤ་གསེང་རུས་གསེང་ལ་འཇར་བའི་རྩམ་དྲི་འཐིལ་བའི་བོད་སྐད་དེ་མིན། ཡིན་ཡང་། ངས་ཉིན་རེ་བཞིན་སྤྱོད་ཀྱིན་པ་དེ་ནི་མི་བུ་གཞན་ཞིག་གི་ཐོབ་ཐང་དང་བདག་དབང་ཡོད་པའི་སྐད་ཡིག་ཞིག་དུ་གྱུར་ཡོད་ཀྱང་། དེ་ཡིས་ང་ལ་བརྩེ་བ་སྟེར་ཐུབ་ཀྱི་མི་འདུག་ལ། དེ་ཡིས་ང་ལ་ནམ་ཡང་སེམས་པ་བརླན་ཐུབ་ཀྱི་མི་འདུག ད་དུང་། དེ་ཡིས་ང་རང་བོད་མི་ཡིན་པའི་བདེན་དབང་དེ་ཡིན་བྱེད་ཐུབ་མ་སོང་།
སྤུན་ཟླ་ལགས། ཁྱེད་ཀྱི་ཟིན་བྲིས་འདིས་ངའི་ཡིད་དབང་འཕྲོགས་སོང་།
སྤུན་ཟླ་ཁྱེད་ཅག་རེ་རེ་བཞིན་ཕེབས་ནས། ང་དང་སེམས་ངོགས་ཀྱི་གཏམ་རྒྱུད་ལ་བསམ་ཚུལ་རེ་གསུངས་པ་དེར་དགའ་གུས་ཡོད། སྤུན་ཟླ་ཁྱེད་ཅག་གིས་ཀྱང་དེ་ལྟར་གསུང་དང་། ངས་ཀྱང་དགའ་གུས་ཚད་མེད་ཞུ་ཆོག
བོད། ཤ་ཁྲག་རུས་གསུམ་ལགས་།
བཀླགས་ཟིན་ཡག་པོ་འདུག
ཨོ་ང་ཡང་མགྲོན་པོ་གསར་བ་ཞིག་ཡིན། རྩོམ་ཡིག་བཀླགས་ཟིན་པ་ཡིན། ངའི་ཟིན་བྲིས་སུ་ཕེབས་ནའང་དགའ་བསུ་ཞུ་བཞིན་ཡོད།
གཞན་རྟེན་གྱི་འཚོ་བ་པང་དུ་ལངས་ཤུལ་ན།
ང་ཚོ་ལ་རང་ཉིད་གྱི་མིན་པའི་འཚོ་སྟངས་ཤིག་དང།
ང་ཚོ་ལ་རང་ཉིད་གྱི་མིན་པའི་བཤད་སྟངས་ཤིག
འདི་དག་བདེན་དཔང་མིན་ལ།
འདི་དག་གིས་བདེན་དཔང་ཡང་བྱེད་མི་ཐུབ།
འོན་ཀྱང་ཁྲག་རྒྱུན་ན་ཡོད་པའི་རྒྱུ་བ་རྣལ་མ་དེ་དང།
སེམས་ཁོང་ཡོད་པའི་འདུ་ཤེས་རྣལ་མ་དེ་གཉིས།
ཁྱེད་རང་ཁྱེད་རང་ཡིན་པའི་བདེན་དཔང་ཡིན་ལ།
ང་རང་ང་རང་ཡིན་པའི་བདེན་དཔང་ཡང་ཡིན།
བདེན་དཔང་འདི་ནི་འུ་གཉིས་ཀྱི་ཐུན་མོང་བའི་འཇུ་ཐག་ཡིན།
དཔའ་ཆེན་དོན་གྲུབ་ལགས། ཕེབས་པ་དགའ་ཡོད། ཉིད་རང་སྐུ་མགྲོན་གསར་བ་ཞིག་རེད། དུས་རྒྱུན་དུ་ཕེབས་རྐྱང་བྱོས། སྒོ་ཕྱེ་ནས་བཞག་ཡོད།
བཀླགས་པ་ཡིན། ཅིག་གོ་འདུག