དེ་རིང་འདི་གའི་གསར་འགོད་པས་ངྷ་ས་བདེ་དོན་ལས་ཁུངས་ནས་ཤེས་རྟོགས་བྱུང་བ་ལྟར་ན། བཞུགས་སྒར་ངྷ་ས་ཁུལ་དུ་ཟླ་སྔོན་མའི་ཕྱི་ཚེས་ ༣༠ ཉིན་ནས་དེ་རིང་སྔ་དྲོ་བར་མི་ ༡༡༢ ཙམ་གྱིས་གསར་དུ་དེབ་སྐྱེལ་བྱས་འདུག་ཅིང་། ཁོང་ཅག་ཕྱི་ལོ་ ༢༠༡༡ ལོའི་བཀའ་སྤྱི་གཉིས་ཀྱི་སྔོན་འགྲོའི་འོས་བསྡུའི་ཁྲོད་ཞུགས་ཐུབ་མེད་ཀྱང་། དངོས་གཞིའི་སྐབས་འོས་ཤོག་འཕེན་རྒྱུའི་ཆ་རྐྱེན་ཚང་ཡོད་པ་རེད།
ངྷ་ས་དབུས་འོས་བསྡུ་ལྷན་ཁང་གིས་བཀའ་མངགས་གནང་བ་ལྟར། བཙན་བྱོལ་བོད་མི་གནས་སྡོད་ཀྱི་ས་གནས་ཁག་ཚང་མར་བཀའ་སྤྱིའི་སྔོན་འགྲོའི་འོས་བསྡུའི་སྐབས་དེབ་སྐྱེལ་བྱས་མེད་རིགས་ལ། ཟླ་སྔོན་མའི་ཕྱི་ཚེས་ ༣༠ ནས་ཟླ་ ༡ ཚེས་ ༡༧ བར་བསྐྱར་དུ་དེབ་སྐྱེལ་བྱ་རྒྱུའི་གོ་སྐབས་འཕར་མ་གནང་བ་ལྟར། བཞུགས་སྒར་ངྷ་ས་ཁུལ་དུ་ད་བར་གསར་དུ་དེབ་སྐྱེལ་བྱེད་མཁན་མི་ ༡༡༢ བྱུང་ཡོད་འདུག
འདིའི་སྐོར་ལ་ངྷ་ས་བདེ་དོན་ཚེ་རིང་ཕུན་ཚོགས་ལགས་ཀྱིས་གསར་འགོད་པར་བརྗོད་དོན། དེང་སྐབས་ངྷ་ས་བདེ་དོན་ལས་ཁུངས་སུ་རང་བཙན་ལག་དེབ་དང་འབྲེལ་བའི་ལས་ཀ་བྱེད་དུ་ཡོང་མཁན་དག་ལ་འོས་བསྡུར་དེབ་སྐྱེལ་བྱས་ཡོད་མེད་ལ་ཞིབ་བཤེར་བྱས་ཏེ། དེབ་སྐྱེལ་བྱས་མེད་ཡོངས་རྫོགས་ལ་འདི་ག་ལས་ཁུངས་ནས་དེབ་སྐྱེལ་བྱེད་མུས་ཡིན།
མི་མང་བོ་ཞིག་གིས་དེབ་སྐྱེལ་མ་བྱས་ན་བཀའ་སྤྱིའི་དངོས་གཞིའི་འོས་བསྡུའི་ནང་ཞུགས་ཆོག་གི་མེད་པ་ཤེས་མི་འདུག འདིར་ཡོང་མཁན་མི་རེ་ངོ་རེ་ལ་ང་ཚོས་འགྲེལ་བཤད་རྒྱག་གི་ཡོད། ཅེས་བརྗོད་སོང་ལ། གསར་འགོད་པ་ཁོང་གི་སར་བཅར་སྐབས་ཀྱང་། ཏག་ཏག་བུད་མེད་ཅིག་གི་རང་བཙན་ལག་དེབ་དེབ་སྐྱེལ་བྱས་ཏེ། ཁོང་མོར། ད་ཁྱེད་ལ་འོས་ཤོག་ལྡུག་རྒྱུའི་ཆ་རྐྱེན་ཚང་ཡོད། བཀའ་སྤྱིའི་དངོས་གཞིའི་འོས་བསྡུའི་ནང་ཞུགས་ཆོག་གི་རེད། ཅེས་ལན་སྟོན་གནང་སོང་།
འདི་ལྟར་དབུས་འོས་བསྡུ་ལྷན་ཁང་གིས་བཀའ་སྤྱི་གཉིས་ཀྱི་སྔོན་འགྲོའི་འོས་གྲངས་གསལ་བསྒྲགས་བྱས་པའི་ཉིན། སྔོན་འགྲོའི་འོས་བསྡུའི་སྐབས་འོས་ཤོག་ལྡུག་རྒྱུའི་ཆ་རྐྱེན་ཚང་ཡོད་ཀྱང་། དེབ་སྐྱེལ་མ་བྱས་པའི་དབང་གིས་སྔོན་འགྲོའི་འོས་བསྡུའི་སྐབས་ཆ་ཤས་ལེན་ཐུབ་མེད་མཁན་དག་ལ་བསྐྱར་དུ་གོ་སྐབས་ཕུལ་ཏེ། ཕྱི་ཟླ་ ༡༡ པའི་ཚེས་ ༣༠ ནས་ཟླ་ ༡ ཚེས་ ༡༧ བར་ཁྱོན་ཉིན་གྲངས་ ༤༩ ཡི་ནང་ཚུད་དུ་དེབ་སྐྱེལ་བྱས་མེད་རིགས་དག་གིས་ས་གནས་འོས་བསྡུ་ལྷན་ཁང་ཁག་ལ་དེབ་སྐྱེལ་བྱ་དགོས་པའི་གསལ་བསྒྲགས་གནང་ཡོད།
གསར་འགོད་པ། ཨ་རིག་འགྱུར་མེད།
