དེ་རིང་ཕྱི་ཚེས་ ༡༤ ཉིན་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཨི་རན་སྲིད་འཛིན་མཱཧ་མོའུ་ཌི་ Mahmoud ཡིས་སྒེར་གྱི་དབང་ཚད་བེད་སྤྱད་དེ། ཨི་རན་ཕྱི་སྲིད་བློན་ཆེན་སྐུ་ཞབས་མཱ་ནོ་ཆར་ Manouchehr Mottaki ལགས་ལས་གནས་ལས་གནས་དབྱུང་བཏང་སྟེ། ཁོང་གི་ཚབ་ཏུ་ཨ་ལེ་ཨག་བྷར་ Ali Akbar Aslehi ཞུ་བ་དེ་གསར་དུ་བསྐོ་བཞག་བྱས་ཡོད་འདུག
སྐུ་ཞབས་མཱ་ནོ་ཆར་ལགས་ ༢༠༠༥ ལོར་ཨི་རན་གྱི་ཕྱི་སྲིད་བློན་ཆེན་དུ་བསྐོ་བཞག་བྱས་ཡོད་ཅིང་། ཨི་རན་གྱི་རྡུལ་ཕྲན་ལས་རིགས་ཀྱི་སྤྱི་ཁྱབ་འགན་འཛིན་ཡང་ཡིན་འདུག འོན་ཀྱང་། ཐེངས་འདིར་ཨ་ལེ་ཨག་བྷར་ཕྱི་སྲིད་བློན་ཆེན་ལ་གསར་དུ་བསྐོ་བཞག་བྱས་པ་དང་མཉམ་དུ་རྡུལ་ཕྲན་ལས་རིགས་ཀྱི་སྤྱི་ཁྱབ་འགན་འཛིན་གྱི་གོ་གནས་དེ་ཡང་ཁོང་ལ་སྤྲད་ཡོད་འདུག
ཐེངས་འདིར་ཨི་རན་སྲིད་འཛིན་གྱིས་ཕྱི་སྲིད་བློན་ཆེན་མཆོག་གནས་དབྱུང་བཏང་པའི་ཐག་གཅོད་དེར། རྒྱུ་མཚན་དང་གསལ་བཤད་གང་ཡང་མེད་པར། སྐུ་ཞབས་མཱ་ནོ་ཆར་ལ་ཡི་གེ་ཞིག་ཕུལ་ཡོད་པའི་ནང་། ཁྱེད་ཀྱིས་ད་བར་ཨི་རན་ཕྱི་སྲིད་བློན་ཆེན་གྱི་ལས་འགན་ཐོག་འབད་བརྩོན་ཆེན་པོ་བྱས་ཏེ་རྒྱལ་ཁབ་དང་མི་མང་ལ་ཞབས་འདེགས་ཆེན་པོ་ཞུས་པར། ངས་བསྔགས་བརྗོད་དང་ཡི་རངས་ཞུ་བཞིན་ཡོད། ཅེས་བཀོད་ཡོད་འདུག
ཆབ་སྲིད་དཔྱད་བརྗོད་པ་དག་གིས། ཐེངས་འདིར་སྐུ་ཞབས་མཱ་ནོ་ཆར་ཕྱི་སྲིད་བློན་ཆེན་གྱི་གོ་གནས་ནས་བློ་བུར་དུ་གནས་དབྱུང་གཏོང་དགོས་པའི་རྒྱུ་མཚན་ནི། ཨི་རན་གཞུང་གི་མཐོ་རིམ་དཔོན་རིགས་ནང་ཁུལ་གྱི་དབང་ཆའི་འཐབ་རྩོད་ཅིག་ལས་བྱུང་བར་ངོས་འཛིན་བྱེད་ཀྱི་ཡོད་ཀྱང་། སྲིད་འཛིན་དང་ཕྱི་སྲིད་བློན་ཆེན་གཉིས་བར་དེ་སྔོན་ནས་འགལ་བ་ཁ་ཤས་བྱུང་ཡོད་པའི་གནས་ཚུལ་ཡང་འདུག
གསར་འགོད་པ། བནྡེ་སྐྱབས།
