ཟླ་འདིའི་ཕྱི་ཚེས་ ༡༢ ཉིན་མངའ་རིས་རྩྭ་མདའ་རྫོང་དུ། བོད་ལྗོངས་ཀྱི་ “ལོ་ལྔ་ཚན་བཅུ་གཅིག” པའི་གཙོ་གནད་རིག་དངོས་སྲུང་སྐྱོབ་ཀྱི་ལས་གཞི་མགོ་འཛུགས་མཛད་སྒོ་ཟེར་བ་ཞིག་ཚོགས་ཡོད་འདུག ཐེངས་འདིའི་རིག་དངོས་སྲུང་སྐྱོབ་ཀྱི་ནང་དུ་མངའ་རིས་གུ་གེ་རྒྱལ་རབས་ཀྱི་ཤུལ་བཞག་རིག་དངོས་ཁག་གཙོ་གནད་དུ་བཟུང་ཡོད་འདུག མཛད་སྒོ་དེའི་སྟེང་བོད་རང་སྐྱོང་ལྗོངས་དང་མངའ་རིས་ཁུལ། རྩྭ་མདའ་རྫོང་བཅས་ཀྱི་འབྲེལ་ཡོད་དཔོན་རིགས་ཁག་མཉམ་ཞུགས་བྱས་ཤིང་། མངའ་རིས་ས་ཁུལ་གྱི་ཏང་ཨུའི་ཧྲུའུ་ཅི་ཏུང་མེན་ཅོན་གྱིས། ཐེངས་འདིར་གུ་གེ་རྒྱལ་རབས་ཀྱི་གནའ་ཤུལ་སྲུང་སྐྱོབ་ཞིག་གསོ་བྱེད་པའི་ལས་གཞི་དེ་སྤུས་ཀ་བཟང་ཞིང༌འཆམ་མཐུན་ཡུན་གནས། སྐྱེ་ཁམས་དཔལ་ཡོན་ལྡན་པའི་འཛུགས་སྐྲུན་གྱི་ལས་གཞི་ཞིག་ཡིན་པའི་གཏམ་བཤད་བྱས་ཡོད་འདུག
གནས་ཚུལ་ཤེས་རྟོགས་བྱུང་བ་ལྟར་ན། ད་ལྟའི་ཆར་བོད་རང་སྐྱོངས་ལྗོངས་སུ་རྒྱ་ནག་རྒྱལ་ཡོངས་རིག་དངོས་སྲུང་སྐྱོབ་ཁྲོད་ཐོ་འགོད་བྱས་ཟིན་པའི་རིག་དངོས་ས་ཚིགས་ ༤༢༨༣ ཙམ་ཡོད་འདུག་ལ། ཐེངས་འདིའི་གུ་གེ་རྒྱལ་རབས་ཀྱི་གནའ་ཤུལ་སྲུང་སྐྱོབ་ཞིག་གསོ་བྱེད་པའི་ལས་གཞིའི་ནང་། གུ་གེ་རྒྱལ་རབས་ཀྱི་ཕོ་བྲང་དཀར་པོ་དང་ཕོ་བྲང་དམར་པོ། ཆོས་རྒྱལ་ལྷ་ཁང༌། སྒྲོལ་མ་ལྷ་ཁང༌། དུས་འཁོར་ལྷ་ཁང་སོགས་ལྷ་ཁང་ཆེན་པོ་ལྔའི་ལྡེབས་རིས་སྲུང་སྐྱོབ་ཞིག་གསོ་དང༌། གྱང་ཆག་གི་ཤུལ་དང༌། བྲག་ཁུང༌། མཐའ་འཁོར་རི་ངོས་སྲ་བརྟན་སོགས་ཚུད་ཡོད་འདུག
གསར་འགོད་པ། དོན་གོ
ས་ཆ་འདི་ནི་འུ་ཅག་གི་མི་བོ་ཆེ་ལམ་ལ་ཆས་ས་ཡིན། ད་དུང་ཡང་ས་འོག་ཏུ་གནའ་བོའི་རིག་གནས་ཀྱི་ངོ་གདོང་རེ་རེ་ལྷང་ལ་འབུད་ཀྱང་སྲིད་པ་ཡིན།