ཟླ་འདིའི་ཕྱི་ཚེས་ ༡༢ ཉིན་བལ་ཡུལ་སྤོག་ར་བོད་མིའི་གཞིས་ཁག་གི་ལས་འགུལ་ཚོགས་ཆུང་གིས་གོ་སྒྲིག་ཞུས་པ་ལྟར། སྤོག་ར་བཀྲ་ཤིས་གླིང་ཚོགས་ཁང་འདོད་རྒུ་འཁྱིལ་དུ་༼ ལོ་ ༦༢ འཁོར་བའི་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་འགྲོ་བ་མིའི་ཐོབ་ཐང་དང་སྐྱབས་བཅོལ་བ ༽ ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་ཚོགས་ཡོད་འདུག
ཉིན་གུང་ཆུ་ཚོད་ ༡ དང་ཕྱེད་ཀ་ཙམ་ལ་སྐུ་མགྲོན་གཙོ་བོ་བལ་གཞུང་འགྲོ་བ་མིའི་ཐོབ་ཐང་ལྷན་ཚོགས་ས་གནས་ལས་ཁུངས་ཀྱི་གཙོ་འཛིན་སྐུ་ཞབས་ཡཀྱ་པྲས་ཨ་དྷི་ཀ་རི་དང༌། གཞུང་འབྲེལ་མ་ཡིན་པའི་ཚོགས་པ་སམབྷད་ནེ་པལ་ཚོགས་གཙོ་ནིལ་ཀནྟ་ཤར་མ། བལ་ཡུལ་རྒྱལ་ཡོངས་གསར་འགོད་ཚོགས་པའི་ས་ཁུལ་གྱི་སྤྱི་ཁྱབ་ཚོགས་གཙོ། བལ་ཡུལ་འགྲོ་བ་མིའི་ཐོབ་ཐང་ཚོགས་པའི་ས་གནས་ཚོགས་གཙོ། གཞན་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་བཅས་ཡུལ་མི་ ༢༠ ཙམ་ཕེབས་ཡོད་འདུག་ལ། གཞན་ཞིས་ཆགས་ཁག་གི་ས་གནས་འཐུས་ཚོགས་ཀྱི་ཚོགས་གཙོ་རྣམ་པ་གཙོ་བྱས་པའི་ལས་སྣེ་རྣམ་པ་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་གཙོ་དང་རྒྱུན་ལས་སོགས་མི་ ༨༠ ལྷག་བཅས་ཁྱོན་མི་གྲངས་བརྒྱ་སྐོར་ཚང་འཛོམས་གནང་ཡོད་འདུག
མཛད་སྒོའི་ཐོག་མར་སྐུ་མགྲོན་རྣམ་པར་ཕེབས་བསུའི་མཇལ་དར་སྒྲོན་འབུལ་དང་། སྐུ་མགྲོན་གཙོ་བོ་ཡིས་སྣང་གསལ་ཞལ་འབྱེད་གནང་རྗེས། གོ་སྒྲིག་ཚོགས་ཆུང་གི་ཚོགས་མི་བསོད་ནམས་བཟང་པོ་ལགས་ཀྱིས་ཚོགས་འདུའི་བརྗོད་གཞི་ངོ་སྤྲོད་གནང་། དེ་ནས་སྐུ་མགྲོན་རྣམས་ཀྱིས་རང་རང་གི་དགོངས་འཆར་གསུངས་བཤད་གནང༌། ཚོགས་འདུའི་ཐོག་བལ་ཡུལ་གཞུང་གིས་རྒྱལ་སྤྱིའི་སྐྱབས་བཅོལ་བའི་གྲོས་ཆོད་ལ་མིང་རྟགས་བཀོད་མེད་པའི་དབང་གིས་འཛིན་སྐྱོང་གི་སྣང་མེད་ཐོག ཕྱི་ལོ་ ༡༩༩༤ ཚུན་ཆད་དུ་བོད་མི་ན་གཞོན་རྣམས་ལ་སྐྱབས་བཅོལ་ལག་འཁྱེར་སྤྲད་མེད་སྟབས། ན་གཞོན་རྣམས་ལ་མཐོ་རིམ་སློབ་སྦྱོང་གི་གོ་སྐབས་དང༌ལས་ཀའི་གོ་སྐབས། ཐ་ན་རླངས་འཁོར་ཁ་ལོ་བའི་ལག་འཁྱེར་བཟོ་རྒྱུ་ཚུན་ཆད་མ་རག་པའི་དཀའ་ངལ་སྣ་ཚོགས་འཕྲད་བཞིན་ཡོད་སྐོར་དང༌། སྤྱིར་བལ་གཞུང་གི་ཁྲིམས་ལུགས་ནང་། ཡུལ་མི་སྤྱི་མཚུངས་བདམ་བྱ་འདེམས་བྱེད་ཀྱི་ཐོབ་དང༌། གཞུང་གི་ལས་བྱེད་ནང་ཞུགས་རྒྱུའི་ཐོབ་ཐང་མ་གཏོགས་དེ་མིན་འཚོ་བའི་འདུ་འགོད་དང༌། ལས་རིགས་གང་ལའང་ཞུགས་ཆོག་པའི་ཐོབ་ཐང་ཡོད་སྐོར་སོགས་བརྗོད་ཡོད་པ་དང་།
ཡང་འགྲོ་བ་མིའི་ཐོབ་ཐང་ནི་རྒྱལ་མཚམས་ཀྱིས་རིས་སུ་མ་ཆད་པའི་གང་ཟག་ཀུན་ལ་ཐོབ་ཐང་འདྲ་མཉམ་ཡོད་སྐོར་སོགས་ཀྱི་འགྲེལ་བཤད་ཀྱང་གནང་ཡོད་འདུག དེའི་རྗེས་ཚོགས་འདུའི་གཙོ་སྐྱོང་བ་ཚེ་རིང་སྲི་བརྟན་ནས་མཇུག་བསྡོམས་དང་ཐུགས་རྗེ་ཆེ་ཞུས་པ་དང་སྦྲགས་མཛད་རིམ་གྲོལ་ཏེ་སྐུ་མགྲོན་ཡོངས་ལ་གསོལ་ཇ་ཞལ་ཏོག་ཕུལ།
༼ གནས་ཚུལ་མཁོ་གཏོང་བ་ཚེ་རིང་སྲི་བརྟན། དོན་འགྲུབ་བཀྲ་ཤིས་ཀྱིས་བསྡུ་སྒྲིག་བྱས། ༽
