དོན་གཅོད་ཁང་གི་གྱོད་དོན།

ལྡི་ལི་བོད་གཞུང་སྐུ་ཚབ་དོན་གཅོད་ལས་ཁུངས་ལ་དུས་ཡུན་རིང་པོའི་རྩོད་རྙོག་ཅིག་ལྷག་ཡོད་པ་དེ། བདུན་ཕྲག་འདིའི་རེས་གཟའ་ཕུར་བའི་ཉིན་ཐག་གཅོད་བྱས་འདུག  

རྒྱ་གར་རྒྱལ་ས་ལྡི་ལི་གསར་པའི་བོད་གཞུང་སྐུ་ཚབ་དོན་གཅོད་ཁང་། དབྱིན་ཡིག་ཐོག་ ( Bureau of his Holiness The Dalai Lama) ཟེར་བ་དེར་ལོ་ངོ་ ༡༦ རིང་གི་ཁ་མཆུ་ཞིག་ལྷག་ཡོད་པ་དང་། དེ་ནི་ཕྱི་ལོ་ ༡༩༧༣ ལོའི་ཟླ་ ༡༡ ཚེས་ ༩ ཉིན་ལྡི་ལི་གསར་པའི་ལཱཇི་པཊི་ནཱ་གྷར་ Lajpat Nagar ས་གནས་ཀྱི་རྒྱ་གར་ཡུལ་མི་ཨོམ་པི་རཱ་ཀཱཤི་ Om Prakash Baldev ཟེར་བ་ཞིག་གིས་ས་ཁྱོན་ལ་སྤྱི་མི་གྲུབཞི་མ་ ༦༠༠ ཡོད་པའི་ཁོ་རང་གི་ཁང་པ་དེར་ཧིན་སྒོར་དྲུག་འབུམ་ ༦༠༠༠༠༠ བྱས་ཏེ། སྐབས་དེའི་བོད་གཞུང་སྐུ་ཚབ་དོན་གཅོད་ཕུན་ཚོགས་དོན་ལྡན་ལགས་སུ་བཙོང་ཡོད།

འོན་ཀྱང་། ཁྲིམས་ཐོག་ནས་རྒྱ་གར་ཡུལ་མི་ཞིག་གིས་ཕྱི་མི་ལ་ས་ཁང་ཉོ་ཚོང་གི་དབང་ཚད་མེད་སྟབས། སྐབས་དེར་ཕྱོགས་གཉིས་ཐད་ནས་ཁང་ཡིག་ཐོག་མཚན་རྟགས་བསྐྱོན་ཐུབ་མེད་ཡོད་མི་འདུག ཕྱི་ལོ་ ༡༩༨༤ ལོ་ནས་ཁང་བདག་རྒྱ་གར་བ་དེས་ངན་སེམས་བཅིངས་ཏེ། བསྐྱར་དུ་ས་གནས་ཁྲིམས་ཁང་ལ་གཏུག་བཤེར་བྱས་ཏེ། ཁང་པ་དེ་ཁོ་རང་གི་ཡིན་པ་མ་ཟད། དུས་ཡུན་རིང་པོར་གཞན་གྱིས་བེད་སྤྱོད་བཏང་དེ་ཁང་པར་སྐྱོན་ཆག་ཤོར་ཡོད་པའི་ཉེས་འཛུགས་བྱས་ཡོད། ཁྲིམས་ཁང་གིས་ཞིབ་བཤེར་ཡང་ཡང་བྱས་པ་བརྒྱུད་ཟླ་འདིའི་ཕྱི་ཚེས་ ༡༦ ཉིན་ས་གནས་རྫོང་གི་ཁྲིམས་དཔོན་སྐུ་ཞབས་རཱཇིན་ཌར་ Rajender Kumar Shastri ལགས་གྱིས་རྒྱ་གར་བ་དེའི་ཁྲིམས་གཏུག་ཞུ་ཡིག་རྩིས་མེད་བཏང་སྟེ། གཞུག་ཕྱོགས་ཁ་མཆུ་རྒྱག་མཆོག་གི་མེད་པའི་ཐག་གཅོད་བྱས་ཡོད་འདུག

གསར་འགོད་པ། བནྡེ་སྐྱབས།