ཟླ་འདིའི་ཕྱི་ཚེས་ ༡༨ ཉིན་བཀའ་ཁྲི་ཟམ་གདོང་རིན་པོ་ཆེ་མཆོག་གིས་བོད་གཞུང་བཀའ་ཤག་གི་ཚབ་ཞུས་ཏེ། ཉེ་ཆར་འདས་གྲོངས་སུ་སོང་བའི་བོད་ཀྱི་གྲོགས་པོ་དང་བོད་རིག་པའི་མཁས་དབང་སྐུ་ཞབས་ཇིན་སི་མི་ཐི་ E.Gene Smith ལགས་ཀྱི་ནང་མིར་ཐུགས་གསོའི་འཚམས་འཕྲིན་ཞིག་ཕུལ་ཡོད་ཅིང་། འཕྲིན་ཡིག་དེའི་ནང་དུ་འཁོད་དོན། སྐུ་ཞབས་ཇིན་སི་མི་ཐི་ལགས་ནི་བོད་ཀྱི་གྲོགས་པོ་དང་བོད་རིག་པའི་མཁས་དབང་ཞིག་ཡིན་པ་མ་ཟད། ཁོང་གིས་དུས་ཡིན་རིང་པོར་བོད་ཀྱི་རིག་གཞུང་སྐོར་གྱི་གནའ་དཔེ་སྟོང་ཕྲག་དུ་མ་འགྲེམས་སྤེལ་དང་། གནའ་དཔེ་རིགས་རྩ་ཆེའི་རིགས་གློག་ཀླད་འཕྲུལ་ཆས་ digital format ཐོག་བཅུག་ཡོད་སྟབས། བོད་ཀྱི་རིག་གཞུང་སྲུང་སྐྱོབ་ཐོག་ཕན་ནུས་ཆེན་པོ་ཐོན་ཐུབ་ཡོད་ལ་འཕྲུལ་ཆས་ཀྱི་དཔེ་མཛོད་དེ་ནི་འཛམ་གླིང་ཐོག་རྒྱ་ཆེ་ཤོས་ཤིག་ཆགས་ཡོད། ཁོང་གློ་བུར་དུ་འདས་གྲོངས་སུ་ཕྱིན་པ་ནི་འགྲོ་བ་མིའི་རིགས་སྤྱི་དང་ཁྱད་པར་དུ་བོད་མི་རིགས་ལ་གྱོང་གུན་ཆེན་པོ་ཞིག་ཕོག་ཡོད། འདིར་ང་ཚོས་སྐུ་ཞབས་ཇི་ནི་སི་མི་ཐི་མཆོག་ལ་རྗེས་དྲན་དང་སྨོན་ལམ་ཞུ་རྒྱུ་ཡིན། ཞེས་འཁོད་ཡོད་འདུག
དཔལ་ལྡན་གྱིས་བསྡུ་སྒྲིག་བྱས།
