དབུ་མའི་ལམ་ཞིག་ཡོད་དམ། – ལུང་རིགས་རྒྱལ།

༧སྐུ་མདུན་གྱིས་ནམ་རྒྱུན་ཁོང་གི་ཐུགས་རེ་ཆེན་པོ་རེ་གསུང་གི་ཡོད། ཐུགས་རེ་གང་ཡིན་ནའང་ཁོང་གིས་ཡེ་ཤེས་དབྱིངས་དཔྱད་ནས་གཟིགས་ཏེ་གསུང་གི་ཡོད་སྟབས་བླ་ན་མེད་པ་རེ་ཡིན་ལ། དེ་དུས་བོད་པ་ཚོས་ལག་པ་སྙིང་ཁར་བཅིངས་ཤིང་། གང་ནུས་ཅི་ཐུབ་ཀྱིས་ཁོང་གི་བཀའ་གསུང་ཇི་བཞིན་སྒྲུབ་ཀྱིན་ཡོད། ལྟོས་འཇོག་གིས་བཤད་ན། དེང་སང་། སྐུ་མདུན་གྱི་མཛད་པ་འཕྲིན་ལས་རྒྱས་ཤིང་། བོད་མི་རིགས་ཀྱི་ཁ་ལས་རླུང་རྟ་དར་བཞིན་པ་འདི་ཡང་རྟེན་འབྲེལ་འདི་ལ་འབྲེལ་བ་མེད་ཅེས་སུས་སྨྲ་ཐུབ།

ཡིན་ཡང་། སྐུ་མདུན་གྱི་ཐུགས་རེ་གཅིག་ནི་བོད་མི་རིགས་ཀྱིས་ད་བར་དུ་དང་ལེན་བྱས་མེད་ལ། གནད་དོན་དེ་སྐུ་མདུན་དང་བོད་མི་རིགས་གཉིས་ཀྱི་བར་ན་མུ་མཐུད་ནས་ལྷག་བསྡད་ཡོད། ད་དུང་བར་འདི་ན་སྣང་བར་འགྲོ་ས་རེ་ཡོད་པ་ནི། བོད་མི་རིགས་ཀྱིས་གནད་དོན་དེར་ཁ་གཅིག་གྲགས་ཀྱིས་ངོས་ལེན་མི་བྱེད་པའི་རྣམ་པ་ནི་དམངས་གཙོ་ཡང་དག་ཅིག་གི་ཚད་གཞི་ལྟར་ཡོད་ལ། སྐུ་མདུན་གྱིས་འདི་ལ་བཀའ་ལན་གནང་སྐབས་སུ། ཁོང་ལ་ཡང་འགྲོ་བ་མིའི་ཐོབ་ཐང་དགོས་པ་རེད་ཅེས་སྐུ་རྩེད་དང་བཅས་གསུང་སྟངས་དེ་ཡང་ཡིད་དབང་འཕྲོག་པ་ཞིག་ཡིན། འོན་ཏེ། ད་ནི་ང་ཚོས་དངོས་གནས་ཅི་ཞིག་བྱེད་དགོས་རེད།

ཡང་མིན་ན། བར་འདི་ན་དབུ་མའི་ལམ་འདྲ་ཡོད་དམ།

ང་ཚོས་མཐའ་གཅིག་ཏུ་འདི་རེད་དང་དེ་མ་རེད་ཀྱི་གནས་ལུགས་ཆེན་པོ་དེ་ཚོ་གནས་སྐབས་རིང་ཕར་བཞག་སྟེ། ཅུང་བསམ་བློ་ཐོངས་ས་ནས་བལྟས་ན། སྐུ་མདུན་གྱིས་ཁོང་བགྲེས་ཡོལ་ཆ་ཚང་གནང་གི་ཡིན་ཅེས་གསུངས་པ་ནི་ཁོང་གི་ཐུགས་ཕམ་དང་སྐུ་ཚེགས་ཀྱི་དབང་གིས་མིན་པར། ཁོང་གི་ཐུགས་ཁྲལ་དང་དེ་ལ་དཔག་པའི་གྲ་སྒྲིག་གི་ངོས་ནས་རེད་འདོད། དེ་དང་འདྲ་བར། བོད་མི་རིགས་ཀྱིས་ཁོང་བགྲེས་ཡོལ་མི་གནང་རྒྱུའི་གསོལ་བ་མཐའ་གཅིག་ཏུ་འདེབས་བཞིན་པ་ནི། ཞེད་སྣང་ལ་འབྲེལ་བ་ཡོད་ནི་ཡོད་རུང་། གཙོ་བོ་ནི་ངོ་ཚ་དང་བཟང་སྤྱོད་ཅེས་པའི་སྲོལ་རྒྱུན་གྱི་རྫུ་བག་མཐུག་པོ་དེའི་དབང་གིས་རེད། མདོར་ན། ཁོང་སྐུ་དྲིན་ཆེན་པོ་ཡིན་པ་དྲན་སྟངས་ཤིག་ལ་འབྲེལ་བ་འདུག་སྙམ། མ་མཐར་ཡང་ང་རང་གིས་དེ་ལྟ་བུ་ཞིག་ཡང་ཡང་དུ་ཚོར་མྱོང་།

ང་ཚོ་ཚང་མས་ཤེས་གསལ་ལྟར། སྐུ་མདུན་གྱིས་ཁོང་ཉིད་བགྲེས་ཡོལ་ཆ་ཚང་གནང་རྒྱུ་ཡིན་གསུངས་པ་དེ་སྲིད་ཕྱོགས་ནས་རེད་མ་གཏོགས། ཆོས་ཕྱོགས་ནས་ག་ལ་ཡིན། ཁོང་གི་ཐུགས་རེ་འདི་ནི་ཕྱག་ལེན་རིགས་ཤིག་ཡིན། དཔེར་ན། ཁོང་གིས་ནམ་རྒྱུན་བོད་པ་ཚོར། ༼རེ་བ་ཡག་ས་ནས་རྒྱོབ། གྲ་སྒྲིག་སྡུག་ས་བྱོས།༽ ཞེས་གསུང་གིན་ཡོད། ཁོང་བགྲེས་ཡོལ་གནང་འཆར་འདི་ནི་ཁོང་གིས་ནམ་རྒྱུན་གྱི་གསུང་འདི་ཕྱག་ལེན་དུ་བསྟར་བ་རེད། ༧གོང་ས་མཆོག་གིས། གྲ་སྒྲིག་སྡུག་ས་ནས་གནང་གི་ཡོད་པ་རེད། ཡིན་ཡང་། བོད་པ་ཚོས་གྲ་སྒྲིག་སྡུག་ས་ནས་བྱེད་རྒྱུར་ག་གོར་དང་ཕྱིར་བཤོལ་མང་པོ་ཞིག་བྱེད་གི་འདུག ཐ་ན། སྐད་ཆ་བཤད་སྟངས་དང་ལས་ཀ་བྱེད་སྟངས་མང་པོ་ཞིག་ནི་ཁོང་གི་གྲ་སྒྲིག་འདིའི་ལྡོག་ཕྱོགས་སུ་འགྲོ་བཞིན་པ་ཡང་མང་པོ་རེད། ཁང་གསར་རྡོ་རྗེ་ལགས་ཀྱིས་ཉེ་ཆར་རྒྱ་རི་རིན་པོ་ཆེ་ཡིས་ཀུན་གླེང་ནང་དུ་བཀའ་མོལ་གནང་སྟངས་ཤིག་གསལ་བཤད་བྱས་པ་ལྟ་བུ་རེད།

དེས་མི་ཚད་བཀའ་ཁྲི་ཟམ་གདོང་རིན་པོ་ཆེ་མཆོག་གིས་ཀྱང་ད་ལོའི་དམངས་གཙོའི་དུས་དྲན་གྱི་ཉིན་མོར་བཀའ་ཤག་གི་གསུང་བཤད་ནང་ནས་ང་ཚོར་བཀའ་བཀྱོན་ལྕི་ཐག་ཆོད་ཅིག་གནང་བྱུང་། བཀའ་ཁྲི་མཆོག་གི་ཐུགས་འཚབ་དེ་ནི་གུས་བཀུར་ཞུ་འོས་པ་ཞིག་རེད། ཡིན་ཡང་། ཅུང་ཧང་སངས་དགོས་པ་ཞིག་ལ་ཁོང་གིས་རྒྱ་ནག་གཞུང་གི་བཤད་སྟངས་ཤིག་དྲངས་ནས་བཀའ་བཀྱོན་གནང་བྱུང་། ང་ཚོ་ཆུང་དུས་འཚར་ལོངས་བྱུང་ཡོང་སྐབས་ནམ་རྒྱུན་འདི་འདྲ་ཞིག་གོ་རྒྱུ་ཡོད། ༼གུང་ཁྲན་ཏང་མེད་ན་ཀྲུང་གོ་གསར་པ་མེད་༽ཟེར། སྔོན་ཆད་དེ་བདེན་བདེན་འདྲ་བསམ་ནས་ལོ་མང་པོ་ཕྱིན། ཕྱིས་སུ་དེ་མི་བདེན་པར་ཤེས་ནས་ཀྱང་ལོ་གང་འཚམ་ཕྱིན། གང་ལྟར། ཉེ་ཆར་བཀའ་ཁྲི་མཆོག་གིས་ཀྱང་། ༼༧གོང་ས་མཆོག་མེད་ན་བོད་ལ་དམངས་གཙོ་མེད་༽ཟེར་ནས་གསུངས་སྐབས་ལམ་སེང་རྒྱ་ནག་གཞུང་གི་བཤད་སྟངས་དེ་ཡང་སེམས་ལ་དྲན། སྐུ་མདུན་གྱི་བཀའ་དྲིན་ང་ཚོ་ཚང་མས་ཤེས་གི་རེད། ཡིན་ཡང་། བཀའ་ཁྲིའི་གསུང་འདི་ཅུང་ཐལ་ཆར་ཤོར་བའི་ཆབ་སྲིད་ཀྱི་སྐད་ཆར་ཚོར་བྱུང་། བཀའ་གསུང་འདི་འདྲ་ཞིག་གནང་བའི་དགོས་པ་རྒྱུ་མཚན་དེ་ཚོ་ཡང་གསལ་བོ་ཆགས་རྒྱུ་མི་འདུག་ལ། དེ་ལས་ལྡོག་སྟེ། བཀའ་མོལ་འདིའི་ཤུགས་ན་སྐུ་མདུན་གྱི་གྲ་སྒྲིག་ལ་མཐའ་གཅིག་ཏུ་རྒོལ་རྒྱུའི་བསམ་བློ་ཡང་སྐུང་ཡོད་པར་མ་ཟད། རྒྱ་ནག་གཞུང་གིས་སྐུ་མདུན་གྱི་སྐུ་ཚེ་ལ་ཚད་བཙུགས་ནས་བོད་དོན་བཤད་ཀྱིན་པ་ལྟར། ང་ཚོའི་ཕྱོགས་ནས་ཀྱང་གང་ལ་གང་འཚམ་གྱིས་སྐུ་མདུན་གྱི་སྐུ་ཚེ་རིང་ཐུང་ལ་ཚད་བཙུགས་ནས་ལས་དོན་སྒྲུབ་ཀྱི་ཡོད་པ་ལྟ་བུ་ཞིག་མཐོང་གི་འདུག དེས་ན། ཁ་སང་དེ་རིང་པེ་ཅིན་དང་ངྷ་རམ་ས་ལ་གཉིས་ཀྱི་ཚོད་དཔག་རྣོན་པོ་འདིའི་བར་ནས་ཚད་མེད་པའི་ཐུགས་ཕམ་མྱོང་མཁན་ནི་སྐུ་མདུན་གཅིག་པུ་མིན་ནམ།

སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ཀྱིས་ཀྱང་བོད་ཀྱི་དུས་བབ་གསར་ཁང་གི་དྲི་ལན་ཏུ། སྤྱི་འཐུས་རྒྱུན་ལས་ཀྱི་གྲོས་མོལ་ལྟར། སྐུ་མདུན་ཐེངས་འདིའི་ཕྱོགས་ཕེབས་ནས་ཕྱིར་ཕེབས་མཚམས་ཚོགས་གཙོ་བགྲེས་གཞོན་གཉིས་ཡར་བཅར་ནས་མུ་མཐུད་དུ་མགོན་པོ་གང་ལ་སྐྱབས་འཇུག་ཞུ་རྒྱུ་ཡིན་སྐོར་བཤད་འདུག འདི་ཚོ་གོ་ཡོང་དུས་ད་ནི་སྐུ་མདུན་གྱི་དགོངས་བཞེད་ལ་མཐའ་གཅིག་ཏུ་རྒྱབ་སྐྱོར་ཞུ་དགོས་པའི་དུས་ཤིག་མིན་ནམ་སྙམ།

འཆར་ལོར་༧གོང་ས་མཆོག་གིས་བོད་མིའི་ཆོས་སྲིད་གཉིས་ཀྱི་ཐུགས་འགན་བཞེས་ཏེ་མི་ལོ་ ༦༠ འཁོར་བ་ཡིན་ལ། གོ་སྐབས་དེ་དང་བསྟུན་བོད་གཞུང་དམངས་གཉིས་ཀས་ཁོང་ལ་བཀའ་དྲིན་རྗེས་དྲན་དང་བརྟན་བཞུགས་རྒྱས་པ་ཞིག་འབུལ་རྗེས་གསོལ་འདེབས་འདི་ལྟ་བུ་ཞིག་འབུལ་དགོས་པ་འདྲ། ཇི་སྲིད་༧སྐུ་མདུན་གྱི་སྐུ་ཚེ་བརྟན་སོང་ན་དེ་སྲིད་དུ་བོད་དོན་གྱི་བདེན་མཐའ་མྱུར་ནས་མྱུར་ཏུ་གསལ་ཡོང་གི་རེད་ལ། ཇི་སྲིད་སྐུ་མདུན་གྱི་ཐུགས་དགོངས་རྒྱས་སོང་ན་དེ་སྲིད་དུ་བོད་མི་རིགས་ཀྱི་སེམས་པ་ཡང་བདེ་སོང་བ་ཡིན་ཅེས་ཞུ་དགོས་པ་དང་། ད་ནས་བཟུང་མགོན་པོ་གང་གི་ཐུགས་རེ་བཞིན། བོད་མི་རིགས་ཀྱི་སྲིད་ཕྱོགས་ཀྱི་ལས་འགན་ཡོངས་རྫོགས་བོད་མི་རིགས་རང་གིས་འཁུར་གི་ཡིན། ཡིན་ཡང་། མ་གྱུར་སེམས་ཅན་ཀུན་གྱི་དོན་དུ། གང་གིས་མུ་མཐུད་ནས་འཛམ་བུའི་གླིང་གི་སྐྱེ་རྒུ་ཀུན་ལ་ཆོས་ཕྱོགས་ཀྱི་མཛད་པ་འཕྲིན་ལས་སྐྱོང་རྒྱུ་དང་། བོད་མི་རིགས་ཀྱིས་ནམ་ཡང་གང་གི་མཛད་པ་འཕྲིན་ལས་ནམ་མཁའི་མཐའ་རུ་རྒྱས་རྒྱུར་གསོལ་བ་སྨོན་ལམ་དང་མཐུན་འགྱུར་གནང་རྒྱུ་ཡིན་ཅེས་དང་། ཡིན་ཡང་། མགོན་པོ་གང་ནི་མུ་མཐུད་ནས་བོད་མི་རིགས་ཀྱི་ངོ་ཚབ་དང་། མགྲིན་ཚབ་པ་གཉིས་སུ་མེད་པ་དེ་ཡིན་ཅེས་ཞུ་དགོས་པ་རེད།

སྐུ་མདུན་གྱི་བགྲེས་ཡོལ་ལ་བོད་མི་རིགས་ཀྱིས་ངོས་ལེན་བྱས་པ་ནས་བཟུང་གནད་དོན་རེ་ཟུང་ལ་མངོན་གསལ་གྱི་འགྱུར་བ་ཡང་འགྲོ་དགོས། དཔེར་ན། ༢༠༡༡ ལོར་ཁོང་གིས་གསུམ་བཅུའི་དུས་དྲན་གྱི་གསུང་འཕྲིན་མཐའ་མ་དེ་བསྩལ་ཀྱང་ཆོག་གི་རེད། ཁོང་གིས་ཆོས་ལུགས་མ་གཏོགས། ཆབ་སྲིད་ཀྱི་མཛད་སྒོ་ཁག་གི་ནང་དུ་ཐུགས་འགན་མ་བཞེས་ན་ཡང་འགྲིག་གི་རེད། དེ་བཞིན་དུ། བཙན་བྱོལ་བོད་མིའི་བཅའ་ཁྲིམས་ནང་གི་སྐུ་མདུན་གྱི་སྐུ་དབང་དེ་ཚོར་ཡང་བསམ་བློ་བཏང་ཆོག་གི་རེད། ཡིན་ཡང་། ཁོང་ནི་བོད་མི་རིགས་ཀྱི་ངོ་ཚབ་དང་མགྲིན་ཚབ་པ་གཉིས་སུ་མེད་པ་དེ་ཡིན་པ་ཇི་བཞིན། འདིའི་ཐད་ནས་མུ་མཐུད་དུ་ཐུགས་འགན་བཞེས་དགོས་སྐོར་ཞུ་དགོས་པ་རེད། འདི་ལ་༧སྐུ་མདུན་ཀྱང་ཐུགས་མོས་ཡོད་པ་ཁོང་གི་བཀའ་མོལ་གཞན་པ་དག་ན་གསལ་བོར་གསུངས་ཡོད། ད་ནས་བཟུང་བཀའ་ཁྲི་དང་ཁྲིམས་ཞིབ་པ། སྤྱི་འཐུས་ཚོགས་གཙོ་སོགས་ཀྱིས་ཀྱང་༧སྐུ་མདུན་གྱི་མདུན་ནས་ཆབ་སྲིད་ཀྱི་ཐུགས་འགན་བཞེས་པའི་དམ་འབུལ་མ་ཕུལ་ན་འགྲིག་གི་རེད།

དེ་ལྟར་ཕྱིན་པ་ཡིན་ན། སྐུ་མདུན་གྱི་ཐུགས་རེ་འགྲུབ་སོང་བ་རེད་ལ། བོད་མི་རིགས་ཀྱི་རེ་བ་ཡང་འགྲུབ་སོང་བ་རེད། འདི་ནི་སྙིང་རྗེ་ཚད་མེད་དང་དད་པ་ཚད་མེད་ཀྱི་དབང་དུ་གྱུར་བའི་༧སྐུ་མདུན་དང་བོད་མི་རིགས་བར་གྱི་དབུ་མའི་ལམ་ལྟ་བུ་ཞིག་ཀྱང་རེད། སྐབས་འདིར་རེ་བ་རྩ་ནས་མ་འགྲུབ་མཁན་དེ་རྒྱ་ནག་གཞུང་གཅིག་པུ་ཆགས་གི་རེད།