ཁྱེད་ཅག་ལ་མ་འོངས་པའི་རེ་བ་ཆེན་པོ་ཞིག་བཅོལ་ཡོད།

ཟབ་སྦྱོང་འདིའི་ཐོག་ནས་ཉམས་མྱོང་དང་ཤེས་ཡོན་གང་ཐོབ་པ་དེ་དག་ཕྱིར་རང་རང་གི་ས་གནས་སུ་ལོག་སྐབས། སློབ་གྲོགས་གཞན་ལ་ཁྱབ་སྤེལ་བྱ་རྒྱུའི་འགན་འཁུར་ཡོད་ལ། ཟབ་སྦྱོང་འདི་ཐོབ་པ་བརྒྱུད་དེ་སོ་སོ་ཡང་མ་འོངས་པར་བོད་གཞུང་དང་། བོད་པའི་སྤྱི་ཚོགས་ནང་འགན་འཁུར་ཐུབ་མཁན་ཞིག་ཆགས་དགོས་ཟེར།

དེ་རིང་སྔ་དྲོའི་ཆུ་ཚོད་ ༡༡ སྟེང་ངྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག བཙན་བྱོལ་ནང་གི་སློབ་གྲྭ་ཁག་ ༡༨ ཙམ་གྱི་འཛིན་རིམ་བཅུ་གཅིག་པའི་སློབ་ཕྲུག་ ༡༡༥ ཙམ་ལ་ ༼ བཙན་བྱོལ་བོད་མིའི་མང་གཙོ་དང་བོད་ནང་གི་དངོས་ཡོད་གནས་སྟངས་ངོ་སྤྲོད་ཟབ་སྦྱོང ༽ ཞེས་པའི་ཟབ་སྦྱོང་ཞིག་དབུ་འཛུགས་བྱས་སོང་ལ། ཝར་ནཱ་དང་ས་རཱ་མཐོ་སློབ། ཤེས་རབ་དགའ་ཚལ་སློབ་གླིང་བཅས་ཀྱི་སློབ་ཕྲུག་དང་སློབ་གྲྭ་གཞན་ཁག་ཅིག་གི་དགེ་རྒན་དང་སློབ་སྤྱི་སྐོར་ཞིག་ཀྱང་མཉམ་ཞུགས་བྱས་འདུག ཟབ་སྦྱོང་དེ་ཉིན་དགུའི་རིང་ཚོགས་འཆར་ཡོད་པ་དང་། བཀའ་ཁྲི་ཟམ་གདོང་རིན་པོ་ཆེ་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་རྣམ་གཉིས་ཀྱིས་གཙོས་པའི་ལྷན་ཁང་ཁག་གི་འགན་འཛིན་དང་ཚོགས་པ་སྒྲིག་འཛུགས་ཁག་གི་སྐུ་ཚབ་བཅས་ཀྱིས་ཟབ་ཁྲིད་གནང་འཆར་ཡོད་འདུག

ཟབ་སྦྱོང་དབུ་འཛུགས་ཀྱི་ཐོག་མར་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་དེའི་འགན་འཛིན་བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་ཉམས་ཞིབ་ཁང་གི་ལས་དོན་ངོ་སྤྲོད་གནང་དོན། ང་ཚོའི་ཟབ་སྦྱོང་འདི་མགོ་འཛུགས་བྱས་ཏེ་ད་བར་ལོ་བདུན་ཙམ་ཕྱིན་ཡོད་ལ། ཐེངས་འདི་ནི་སྐབས་བདུན་པ་དེ་ཆགས་ཡོད། ལས་འཆར་འདིར་དཔལ་འབྱོར་གྱི་རྒྱབ་སྐྱོར་གནང་མཁན་གཙོ་བོ་ཡུ་རོབ་ཀྱི་རྒྱལ་སྤྱིའི་བོད་དོན་ལས་འགུལ་ཁང་རེད། ཉམས་ཞིབ་ཁང་འདིའི་ལས་ཁུངས་ཨ་མ་ལྡི་ལིར་ཡོད་སྟབས། རྒྱ་གར་གྱི་མཁས་དབང་རིགས་དང་གྲོས་ཚོགས་གོང་འོག་གི་འཐུས་མི་སོགས་དང་འབྲེལ་བ་བྱས་ཏེ། བོད་དོན་གོ་རྟོགས་སྤེལ་བ་དང་། ཁོང་ཅག་གི་དགོངས་འཆར་བླངས་ཏེ་ཚོགས་གཙོ་གཞོན་གཉིས་ལ་སྙན་གསེང་ཞུ་བཞིན་ཡོད། གཞན། ལྡི་ལི་ཁུལ་གྱི་བོད་མི་ཚོར་མཐུན་འགྱུར་རོགས་གང་ཐུབ་ཞུ་བཞིན་ཡོད། ཅེས་དང་།

ང་ཚོས་ཟབ་སྦྱོང་འདི་ལ་རྒྱ་བལ་འབྲུག་གསུམ་ནང་གི་སློབ་གྲྭ་ཁག་གི་འཛིན་རིམ་བཅུ་གཅིག་ཡོངས་ཀྱི་སློབ་ཕྲུག་གི་འཐུས་ཚབ་འཛོམ་ཐུབ་པའི་སྡིངས་ཆ་ཞིག་ཆགས་ཡོད། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་ཟེར་བ་འདི་ནི། བོད་མི་མང་སྤྱི་འཐུས་ལྷན་ཚོགས་དང་། འཇར་མན་རོགས་ཚོགས་གཉིས་ཟུང་འབྲེལ་གྱི་ལས་འཆར་ཞིག་གི་མིང་རེད། ལས་འཆར་འདིའི་དམིགས་ཡུལ་བོད་པའི་སྤྱི་ཚོགས་ནང་འགན་འཁུར་ཐུབ་མཁན་གསོ་སྐྱོང་དང་། བོད་པའི་ཆབ་སྲིད་གནས་བབ་རྒྱལ་སྤྱིའི་ཐོག་བསྙབ་ཐབས། བཙན་བྱོལ་སྤྱི་ཚོགས་ཀྱི་དམངས་གཙོའི་འཕེལ་རིམ་དང་དམངས་གཙོ་སྲ་བརྟན་ཡོང་ཐབས་བཅས་རེད། ང་ཚོས་ཟབ་སྦྱོང་འདི་ལ་རེ་བ་ཆེན་པོ་ཞིག་དང་དམིགས་ཡུལ་ངེས་ཅན་ཞིག་བཟུང་ཡོད། ཁྱེད་ཅག་འདིར་ཕེབས་མཁན་ཚང་མས་ཟབ་སྦྱོང་འདིའི་ཐོག་ནས་ཉམས་མྱོང་དང་ཤེས་ཡོན་གང་ཐོབ་པ་དེ་དག་ཕྱིར་རང་རང་གི་ས་གནས་སུ་ལོག་སྐབས། སློབ་གྲོགས་གཞན་ལ་ཁྱབ་སྤེལ་བྱ་རྒྱུའི་འགན་འཁུར་ཡོད་ལ། དེ་ཙམ་དུ་མ་ཟད། ཟབ་སྦྱོང་འདི་ཐོབ་པ་བརྒྱུད་དེ་སོ་སོ་ཡང་མ་འོངས་པར་བོད་གཞུང་དང་། བོད་པའི་སྤྱི་ཚོགས་ནང་འགན་འཁུར་ཐུབ་མཁན་ཞིག་ཆགས་དགོས། ཞེས་ངོ་སྤྲོད་གནང་བྱུང་།

 དེའི་རྗེ་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། མི་སུ་འདྲ་ཞིག་ཡིན་ཡང་དང་པོ་སོ་སོ་ངོ་ཤེས་རྒྱུ་གལ་ཆེན་པོ་རེད། སོ་སོ་ངོ་ཤེས་པ་ཟེར་བ་དེ་སོ་སོའི་མིང་དང་སློབ་གྲྭ ལུང་ཚན་ངོ་སྤྲོད་ཤེས་ཙམ་ལ་རང་ངོ་རང་གིས་ཤེས་ཟེར་བ་མ་རེད། ང་ལ་མཚོན་ན། ཆབ་སྲིད་ཀྱི་གནས་སྟངས་ཤིག་གི་འོག་ནས་མིའི་ལུང་པ་ནས་འཚར་ལོངས་བྱུང་བ་རེད། སོ་སོའི་རྒྱལ་ཁབ་མིག་གིས་ཀྱང་མཐོང་ཡོད་པ་མ་རེད། དེ་རིང་འདིར་ཡོད་པའི་སློབ་ཕྲུག་རེ་ཟུང་བོད་ནས་ཕེབས་རེད་ལ། མང་པོ་ཞིག་བོད་ཕྱི་ལོགས་ནས་སྐྱེས་པ་རེད། དེར་བརྟེན། རང་ཉིད་སུ་ཡིན་ངོ་ཤེས་པ་ལ་ཐོག་མར་རང་གི་རྒྱལ་ཁབ་ཧ་གོ་དགོས་པ་རེད། རྒྱལ་ཁབ་ཧ་གོ་བ་ལ་རྒྱལ་ཁབ་དེའི་ནང་གི་སྒྲིག་འཛུགས་ཀྱིས་མཚོན་པའི་འགྲོ་སྟངས་མང་པོ་ཞིག་ཤེས་དགོས། ལྷག་པར་དུ་ང་ཚོས་འཛམ་གླིང་ནང་བོད་པར་རྒྱབ་སྐྱོར་གནང་རོགས་ཟེར་ནས་འབོད་སྐུལ་ཞུ་བཞིན་ཡོད་པ་རེད། དེའི་དགོས་པ་རྒྱུ་མཚན་གང་ལ་ཐུག་ཡོད་པ་རེད། བོད་ནང་གི་གནས་སྟངས་གང་ལ་བསླེབས་ཡོད་པ་རེད། འདི་དག་ཀྱང་ངེས་པར་དུ་ཤེས་དགོས། ཞེས་དང་།

 ཁོང་མོས་མུ་མཐུད་དུ་གསུངས་དོན། ང་རང་ལོ་ ༢༠ རིང་སྤྱི་འཐུས་ནང་ཞབས་ཞུ་བསྒྲུབས་ཤིང་། དེ་ལས་ལོ་ ༡༠ རིང་ཚོགས་གཞོན་གྱི་འགན་ཁུར་ཏེ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འགན་འཛིན་ལྷན་ཚོགས་ཀྱི་ཚོགས་མི་ཆགས་པ་རེད། ལོ་ངོ་ཉི་ཤུའི་རིང་གི་ལས་ཀ་ཡག་ཤོས་ཤིག་སློབ་ཕྲུག་ཚོར་ཟབ་སྦྱོང་སྤྲོད་ཀྱིན་ཡོད་པའི་ལས་གཞི་འདི་ཡིན་བསམ་ཡོད། སྤྱི་ཚོགས་ཤིག་གྲ་འགྲིག་པོ་ཆགས་དང་མི་ཆགས། ལྷག་པར་དུ་བོད་པའི་རྩ་དོན་འཐབ་རྩོད་ཀྱི་རྒྱུན་བསྐྱང་ཐུབ་དང་མི་ཐུབ། ཁྱེད་ཅག་ད་ལྟའི་སློབ་ཕྲུག་དང་མ་འོངས་པའི་རྗེས་འཛིན་པ་ཚོར་རག་ལས་ཡོད། སྔོན་མ་སོ་སོ་སློབ་ཕྲུག་ཡིན་སྐབས་མ་འོངས་བོད་ཀྱི་སོན་རྩ་ཟེར་བའི་ཚིག་དེ་ལ་སེམས་ཚོར་དམིགས་བསལ་མེད། འོན་ཀྱང་ད་ལྟ་བསམ་བློ་བཏང་ཡོང་ན་ཚིག་དེ་ལྕི་ཁོག་ཆེན་པོ་རེད་ལ། འགན་ཆེན་པོ་ཞིག་ཀྱང་ཡོད་པ་རེད།

སློབ་ཕྲུག་ཁྱེད་ཚོ་དང་ཁྱེད་ཅག་ལ་གོ་སྒྲིག་བྱས་པའི་ཟབ་སྦྱོང་འདི་ལ། བོད་མི་མང་སྤྱི་འཐུས་ལྷན་ཚོགས་དང་བཙན་བྱོལ་བོད་གཞུང་གི་ངོས་ནས་ལས་འགན་ཧ་ཅང་གལ་ཆེན་ཞིག་ཏུ་གཟིགས་ཀྱི་ཡོད། ཟབ་སྦྱོང་འདི་མགོ་བཙུགས་པ་ནས་ད་བར་བཀའ་ཁྲི་ཟམ་གདོང་རིན་པོ་ཆེ་མཆོག་ཐེངས་གཅིག་ཀྱང་ཕལ་ཆེར་ཆད་མྱོང་མེད། ཐེངས་གཅིག་ལས་ཡུལ་དངོས་ནས་ལས་ཀ་མཚམས་བཞག་སྟེ་འདིར་ཆེད་དུ་ཟབ་ཁྲིད་གནང་དུ་ཕེབས་པ་རེད། དེ་འདྲའི་གལ་ཆེན་དོན་ཆེན་དུ་བརྩི་དོན་ཁྱེད་ཅག་ལ་རེ་བ་ཆེན་པོ་ཞིག་བཅོལ་གྱི་ཡོད་པ་རེད། འོན་ཀྱང་ཉིན་བཅུ་གྲངས་ནང་ཆ་ཚང་བ་ཞིག་ཁྲིད་ཐུབ་པ་མ་རེད། ལམ་སྣེ་ཙམ་བསྟན་རྗེས་སོ་སོས་འབད་བརྩོན་བྱས་ཏེ་ཤེས་པར་བྱ་དགོས་པ་རེད། སོ་སོ་ངོ་ཤེས་པ་དང་སོ་སོའི་རྒྱལ་ཁབ་ཧ་གོ་བའི་རྗེས་ལ་ནུས་པ་ཅི་ཙམ་འཐོན་ཐུབ་མིན་ཁྱེད་རང་ཚོར་ཐུག་ཡོད་པ་རེད། ཅེས་རེ་འདུན་བཏོན་སོང་།

གསར་འགོད་པ། དོན་འགྲུབ་བཀྲ་ཤིས།