ཉེ་སྔོན་རྒྱ་ནག་ནང་གནས་བཞུགས་ཤེས་ལྡན་པ་ཀྲང་པའོ་ཧྲོའུ་ཡིས་༼ ངས་རྒྱ་ནག་གི་ཉེས་ཁྲིམས་ཨང་ ༡༠༥ དེ་རྩིས་མེད་གཏོང་དགོས་པའི་ལངས་ཕྱོགས་འཛིན་རྒྱུ་ཡིན། ༽ཞེས་པའི་རྩོམ་ཡིག་ཅིག་སྤེལ་ཏེ། རྒྱ་ནག་གི་ཉེས་ཁྲིམས་ཨང་ ༡༠༥ དེ་ནི་རྒྱལ་ཁབ་ཀྱི་སྲིད་དབང་ཁྲིམས་ཀྱིས་སྐྱོང་བའི་དམངས་གཙོའི་ལམ་ལུགས་དང་རྒྱབ་འགལ་དུ་གྱུར་ཡོད་ལ། ད་ལྟའི་བར་དུ་རྒྱ་ནག་གི་སྒེར་གཅོད་གཞུང་འཛིན་པ་དག་གིས་ཉེས་ཁྲིམས་འདི་སྤྱད་དེ། གཞུང་དང་ལྟ་བ་ཐ་དད་འཛིན་མཁན་གྱི་རྩོམ་པ་པོ་དང་ཤེས་ལྡན་པ་མང་པོར་ཉེས་མེད་མནར་གཅོད་གཏོང་རྐྱང་བྱེད་བཞིན་ཡོད། རྒྱ་ནག་གི་ཉེས་ཁྲིམས་འདི་ནི་ཆབ་སྲིད་མཚན་ཉིད་རིག་པའི་གཞུང་ལུགས་དང་འགལ་ཡོད་པར་མ་ཟད། སྲིད་དབང་ནི་དམངས་ལས་བྱུང་ཞིང་དམངས་ལ་དབང་བའི་འགྲོ་བ་མིའི་སྤྱི་ཚོགས་ཀྱི་ལམ་ལུགས་དང་ཡང་རྒྱབ་འགལ་དུ་སོང་ཡོད་ལ། རྒྱ་ནག་དམངས་གཙོའི་སྤྱི་ཚོགས་སུ་བསྒྱུར་དཀའ་བའི་འགོག་རྐྱེན་གཙོ་བོའང་འདི་ལ་ཐུག་འདུག ཅེས་བརྗོད་ཡོད།
པའོ་ཡིས་ཧྲོའུ་ལགས་ཀྱིས་ཨ་རིའི་རླུང་འཕྲིན་ཁང་གིས་བཅར་འདྲིའི་སྐབས། རྒྱ་གཞུང་གིས་རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་ཉེས་ཁྲིམས་འདིའི་འོག་ཤེས་ལྡན་པ་མང་པོར་བཙོན་འཇུག་མནར་གཅོད་བཏང་ཡོད། དཔེ་མཚོན་ཙམ་དྲངས་ན། དམངས་གཙོའི་ལས་འགུལ་བ་ལིག་ཞན་པེན་གྱིས་དམར་ཤོག་སྒྲིག་འཛུགས་ལ་ངོ་རྒོལ་བྱས་པར་བརྟེན། རྒྱལ་ཁབ་ཀྱི་སྲིད་དབང་མགོ་རྟིང་སློག་མཁན་གྱི་ཉེས་མིང་ཕོགས་པ་དང་། གཞུང་དང་ལྟ་བ་ཐ་དད་འཛིན་མཁན་ལིག་ཞོ་པའོ་དང་ཀྲང་ཙྭོ་རན་གཉིས་ཀྱིས་དམར་ཤོག་པའི་སྒྲིག་འཛུགས་ལ་སྐྱོན་བརྗོད་ཀྱི་རྩོམ་ཡིག་སྤེལ་བ་དང་ཡིག་ཆར་མིང་རྟགས་བཀོད་པ། གསར་ལམ་ཁག་གི་བཅར་འདྲི་དང་ལེན་བྱས་པ་སོགས་ལ། རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་ལས་འགུལ་རྩོམ་མཁན་གྱི་ཉེས་མིང་བཏགས་ཏེ་བཙོན་འཇུག་བྱས་ཡོད།
དེང་སྐབས་སྒེར་གཅོད་དབང་འཛིན་པ་ཚོས་ཁོང་ཅག་དམར་ཤོག་པའི་སྒྲིག་འཛུགས་དང་རྒྱལ་ཁབ་ཀྱི་སྲིད་དབང་གཉིས་ངོ་བོ་དབྱེར་མེད་དུ་འཛིན་བཞིན་ཡོད། སྤྱིར་སྲིད་དོན་ཚོགས་པ་ནི་མི་མང་ལས་བྱུང་ཞིང་། སྲིད་དོན་ཚོགས་པར་སྐྱོན་བརྗོད་དག་ཐེར་ཀྱང་མི་མང་གིས་བྱ་དགོས་པར་མ་ཟད། སྲིད་དོན་ཚོགས་པ་གང་ཞིག་རྩིས་མེད་དུ་གཏོང་མིན་ཡང་མི་མང་ལ་དབང་ཆ་ལྡན་དགོས་པ་ཞིག་ཡིན་པས། སྔོན་ཆད་གུང་ཁྲན་ཏང་ཡང་མི་མང་གིས་བཙུགས་པ་རེད་ལ། ད་ལྟ་གུང་ཁྲན་ཏང་རྩིས་མེད་གཏོང་བའི་དབང་ཆ་ཡང་མི་མང་ལ་ལྡན་དགོས་པ་རེད། ཅེས་བརྗོད་ཡོད་པ་རེད།
རྒྱ་ནག་གི་ཉེས་ཁྲིམས་ཨང་ ༡༠༥ ཞེས་པའི་ནང་། རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་རྩ་འཛུགས་དང་ཇུས་གཞིའི་ཁྲོད་འཛུལ་ཞུགས་བྱེད་པ་དང་། སྤྱི་ཚོགས་རིང་ལུགས་ཀྱི་ལམ་ལུགས་རྩད་རྫོགས་ཀྱི་ལས་འགུལ་སྤེལ་བའི་རིགས་ལ་རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་ཉེས་ཁྲིམས་ཡོད་པ་མ་ཟད། སྤྱི་ཚོགས་ཁྲོད་གཡོ་འགུལ་སློང་བའི་ལས་གཞི་དང་མང་ཚོགས་ལ་སྐུལ་སློང་བྱེད་སོགས་རྒྱལ་ཁབ་ཀྱི་སྲིད་དབང་དང་སྤྱི་ཚོགས་རིང་ལུགས་ཀྱི་ལམ་ལུགས་ལ་གནོད་གཞིའི་ལས་དོན་ཚང་མར་རྒྱལ་ཁབ་ཀྱི་སྲིད་དབང་མགོ་རྟིང་སློག་པའི་ཉེས་ཁྲིམས་གཅོད་རྒྱུ་ཡིན་པའི་གཏན་འབེབས་བཟོས་ཡོད་པ་རེད།
གསར་འགོད་པ། ཚེ་རིང་རྒྱལ།
གང་ལྟར་ཡང་རྒྱ་ནག་དབང་ཆ་གཅིག་སྡུད་ལམ་ལུགས་ལས་འདས་ཏེ་མང་གཙོའི་ཕྱོགས་སུ་གོམ་པ་ངེས་པར་དུ་སྤོ་རྒྱུ་རེད།