ཁ་སང་ཕྱི་ཚེས་ ༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པས། སོག་པོའི་རང་དབང་འཐབ་རྩོད་མཁན་དང་། རྒྱ་གཞུང་དང་ལངས་ཕྱོགས་ཐ་དད་འཛིན་མཁན་གྱི་དམངས་གཙོ་དོན་གཉེར་བ་སྐུ་ཞབས་ཧཱ་ཏ་ལགས་གང་མྱུར་ཀློད་གྲོལ་དགོས་པའི་འབོད་སྐུལ་ཞུས་ཡོད་པ་དང་། དེ་བཞིན། ཉེ་སྔོན་ནང་སོག་མི་མང་ཚོགས་པ་དང་སོག་པོའི་འགྲོ་བ་མིའི་ཐོབ་ཐང་བརྡ་འཕྲིན་བསྟི་གནས་གཉིས་ཀྱི་མིང་ཐོག་ནས་སྐུ་ཞབས་ཧཱ་ཏ་ལགས་ ༢༠༡༡ ལོའི་ནོ་བྷེལ་ཞི་བདེ་གཟེངས་རྟགས་ཀྱི་འོས་མིའི་ཁོངས་སུ་མིང་འདོན་སྙན་ཞུ་ཞིག་ཀྱང་ཕུལ་ཡོད་འདུག
སྙན་ཞུ་དེའི་ནང་། སྐུ་ཞབས་ཧཱ་ཏ་ལགས་ཀྱིས་འདས་པའི་དུས་ཡུན་རིང་པོར་ཞི་བའི་ཐབས་ལམ་ཁོ་ནར་བརྟེན་ཏེ་སོག་པོའི་རང་དབང་འཐབ་རྩོད་བྱས་ཡོད་པ་དང་། ཁོང་ནི་སོག་པོའི་རིག་གནས་སྲུང་སྐྱོབ་ཚོགས་པ་དང་སོག་པོ་དམངས་གཙོ་མཉམ་འབྲེལ་ཚོགས་པ་གསར་འཛུགས་གནང་མཁན་ཡིན་པ་མ་ཟད། ཁོང་ནི་ནང་སོག་མི་མང་ས་ཡ་ལྔའི་དབུ་ཁྲིད་གཅུག་པུ་དེ་ཡང་ཡིན། ཁོང་གིས་ཕྱི་ལོ་ ༡༩༩༢ ལོར་གསར་དུ་བཙུགས་པའི་སོག་པོའི་དམངས་གཙོ་མཉམ་འབྲེལ་ཚོགས་པས་ད་ལྟའི་བར་དུ་ཁོང་གི་ཞི་བའི་ལམ་སྟོན་ཁོ་ནར་བརྟེན་ཏེ་སོག་པོའི་མི་རིགས་ཀྱི་རང་དབང་དང་འགྲོ་བ་མིའི་ཐོབ་ཐང་བརྩོད་ལེན་བྱས་ཡོད་ཅེས་སོགས་བཀོད་ཡོད་འདུག
ད་དུང་སྙན་ཞུ་དེའི་ནང་། རྒྱ་ནག་དམར་ཤོག་དབང་སྒྱུར་བའི་དྲག་དམག་གིས། ཕྱི་ལོ་ ༡༩༤༧ ལོར་སོག་ཡུལ་དུ་བཙན་འཛུལ་བྱས་པ་ནས་བཟུང་། འདས་པའི་ལོ་ ༦༣ རིང་ལ་རྒྱ་གཞུང་གིས་མི་རིགས་རྩ་བརླག་དང་རིག་གནས་ཤུལ་མེད་བཟོ་བའི་དྲག་པོའི་དབང་སྒྱུར་གྱི་སྲིད་ཇུས་རབ་དང་རིམ་པ་སྤེལ་ཏེ། སོག་རིགས་ཁྲི་ ༢༠ ལྷག་དམར་གསོད་དང་། སོག་པོའི་མི་གྲངས་ཀྱི་བརྒྱ་ཆ་ ༣༠ ཙམ་ལ་བཙོན་འཇུག་མནར་གཅོད་བཏང་ཡོད། རྒྱ་གཞུང་གིས་༼ སོག་རིགས་སྤུན་ཟླར་རོགས་སྐྱོར། ༽དང་༼ འཐའ་འཁོབ་ས་ཁུལ་འཕེལ་རྒྱས། ༽ཟེར་བའི་ཁ་གཡང་སྒྲོག་བཞིན་ནང་སོག་ས་ཆའི་སུམ་ཆའི་གཅིག་ཙམ་རྒྱ་ནག་གི་ཞིང་ཆེན་གཞན་པའི་ཁོངས་སུ་བཅད་བཟུང་དབང་སྒྱུར་བྱས་ཤིང་། སོག་ཡུལ་གྱི་རང་བྱུང་ཁོར་ཡུག་དང་སོག་རིགས་མི་མང་གི་འཚོ་བའི་གནས་བབ་བཅས་ལ་བལྟས་ཏེ། ལོ་རེར་སོག་ཡུལ་དུ་རྒྱ་རིགས་ཁྲི་བཅུ་ལྷག་གནས་སྤོར་བྱེད་བཞིན་ཡོད། ཕྱི་ལོ་ ༡༩༤༩ ལོར་ནང་སོག་ཏུ་རྒྱ་རིགས་གྲངས་འབོར་བརྒྱ་ཆ་ ༡༦ ཙམ་ལས་ཟིན་གྱི་མེད་ཀྱང་། ༢༠༠༠ ལོར་སོག་ཡུལ་དུ་རྒྱ་རིགས་ཁྲི་ ༡༨༤༧ ལས་བརྒལ་ཏེ་འབོར་བརྒྱ་ཆ་ ༧༩ ལྷག་ཟིན་ཡོད།
དེ་བཞིན། རྒྱ་ནག་གིས་སོག་ཡུལ་ནང་རྡུལ་མཚོན་ཚོད་ལྟའི་རྟེན་གཞི་བཙུགས་ཏེ་རང་བྱུང་ཁོར་ཡུག་ལ་ཉམས་ཆག་ཚབས་ཆེན་བཏང་སྟེ། ད་ལྟ་སོག་པོའི་རྩྭ་ཐང་གི་བརྒྱ་ཆའི་ ༦༥ ཙམ་བྱེ་ཐང་དུ་གྱུར་ཡོད་ལ། ལྷག་པར་དུ་འདས་པའི་ལོ་ ༢༠ ནང་། རྒྱ་གཞུང་གིས་དབང་ཤུགས་དང་དཔལ་འབྱོར་གཉིས་མཉམ་འབྲེལ་གྱི་ཐོག་ནས། མངོན་སེམས་འཛེམས་མེད་ཀྱི་ཐོག་ནས་རྒྱ་རིགས་ཆེན་པོའི་མི་རིགས་དབང་སྒྱུར་གྱི་སྲིད་ཇུས་སྤེལ་ཏེ། སོག་པོ་མི་རིགས་ཀྱི་རྩྭ་ས་དང་ཞིང་ཁ་རྣམས་བཙན་འཕྲོག་བྱས་ཤིང་། སོག་རིགས་རྣམས་བཙན་དབང་གིས་རྒྱ་རིགས་འདུས་སྡོད་ཀྱི་གྲོང་ཁྱེར་ཆེ་ཁག་ཏུ་མཉམ་བསྲེས་བྱེད་བཞིན་ཡོད་སྐོར་སོགས་བཀོད་འདུག
ལོ་སྔ་མའི་ཕྱི་ཟླ་ ༡༢ ཚེས་ ༡༠ ཉིན་སྐུ་ཞབས་ཧཱ་ཏ་ལགས་ཀྱི་ ༡༥ ཡི་དུས་བཀག་བཙོན་འཇུག་གི་དུས་ཡུན་རྫོགས་ཏེ་ཀློད་གྲོལ་གཏོང་དགོས་ཀྱང་། རྒྱ་གཞུང་གིས་ད་དུང་ཁོང་ཀློད་གྲོལ་བཏང་མེད་པ་མ་ཟད། ཉེ་ཆར་ཁོང་གི་ཆུང་མ་དང་བུ་བཅས་ཀྱང་བཀག་ཉར་བྱས་ཏེ། ད་ཆར་ཁོང་ཅག་གར་ཡོད་ཅི་ཆགས་ཀྱི་གནས་ཚུལ་གང་ཡང་ཤེས་རྟོགས་བྱུང་མི་འདུག སོག་པོའི་དམངས་གཙོ་ཚོགས་པས་གསར་ལམ་ཁག་ཏུ་བརྗོད་པ་ལྟར་ན། ད་ལྟ་སྐུ་ཞབས་ཧཱ་ཏ་ལགས་ཀྱི་གཟིགས་གཞིའི་གནས་སྟངས་སྐྱོ་བོ་ཆགས་ཤིང་། གདོང་མདོག་སྐྱ་བོར་གྱུར་ཞིང་དུས་རྒྱུན་སྐྱུག་མེར་ལངས་ཏེ་ཟ་མ་བཟའ་མི་ཐུབ་པར་མ་ཟད། ཁོང་གི་རྐང་པའང་ཐང་བོ་མེད་པར་གོམ་པ་ ༥༠༠ ཙམ་ལ་ཕྱིན་ཡང་ཐང་ཆད་དེ་ངལ་གསོ་དགོས་པའི་གནས་སྟངས་ཆགས་ཡོད་ཅེས་བརྗོད་འདུག
གསར་འགོད་པ། ཚེ་རིང་རྒྱལ།
དགྱ་དམར་གྱིས་སྐུ་ཞབས་ཧཱ་ཏ་ལགས་གང་མགྱོགས་གློད་གྲོལ་གཏོང་དགོས།
སྐུ་ཞབས་ཧཱ་ཏ་ལགས་སུ་ཞི་བདེའི་གཟེངས་ཐོབ་པར་རྒྱབ་སྐྱོར་ཡོད་།