རྒྱ་གཞུང་གིས་གཞིས་རྩེ་ས་ཁུལ་དུ་སྡོད་ཁང་གསར་རྒྱག་དང་འཚོ་བའི་ཁ་སྣོན་ལ་དངུལ་སྤྲད་དེ། རྒན་རབས་པ་ཚོའི་ཁྲོད་༧གོང་ས་མཆོག་དང་བོད་པའི་རྩ་དོན་གླེང་མཁན་དཀོན་པོ་རེད་ལ། རྒྱ་ནག་གི་གཡོ་ཐབས་དེའི་དབང་གིས་རྒན་གཞོན་བར་ལྟ་བ་མ་མཐུན་པ་ཡོང་གི་འདུག་ཟེར།
འདས་པའི་ལོ་ངོ་དུ་མའི་རིང་རྒྱ་ནག་གཞུང་གིས་བོད་ནང་གི་བོད་མི་ཚོར་སྡོད་ཁང་གསར་རྒྱག་དང་རིག་གཞུང་ཡར་རྒྱས་ཀྱི་ལས་གཞི་སྤེལ་ཏེ། བོད་མིའི་འཚོ་བར་སྔར་ལས་ལྷག་པའི་ཡར་རྒྱས་ཕྱིན་ཡོད་སྐོར་བཤད་ཀྱང་། དོན་དངོས་ཐོག་དེ་ནི་བོད་མི་ཚོའི་ཁ་འགོག་ཐབས་དང་གཞན་གྱི་མིག་འཁྲུལ་ཐབས་ཙམ་ལས་གྲོང་ཁྱེར་དང་རྒྱང་ཐག་རིང་བའི་གྲོང་གསེབ་ཁག་ཏུ་ལྟོ་བ་འགྲང་གི་མེད་པ་མང་པོ་ཡོད་རབས་འདུག ས་ཁུལ་དེ་དག་གི་ལོ་ཆུང་བྱུས་པ་དག་ཀྱང་སློབ་སྦྱོང་གི་གོ་སྐབས་མ་ཐོབ་པར་བ་ཕྱུགས་འཚོ་སྐྱོང་དང་གཞན་གྱི་གཡོག་ཏུ་བརྒྱུགས་ཏེ་མི་ཚེའི་སྐྱེལ་བཞིན་ཡོད་འདུག་ཅིང་། རང་ལོ་ ༣༠ ལ་སོན་པའི་གཞིས་རྩེ་སྦོན་པོ་སྡེ་བའི་སྤེན་པ་ལགས་ཀྱང་དཀའ་སྡུག་གི་འཚོ་བ་ཐབས་ཆག་དེའི་ཁྲོད་ནས་འཚར་ལོངས་བྱུང་བའི་འབྱོར་མེད་དབུལ་བོའི་བུ་ཞིག་རེད།
ཟླ་འདིའི་ཕྱི་ཚེས་ ༥ ཉིན་གསར་འགོད་པས་ཉེ་ལམ་བོད་ནས་གསར་དུ་འབྱོར་བའི་སྤེན་པ་དང་མཉམ་དུ་གཞིས་རྩེ་ས་ཁུལ་གྱི་གྲོང་ཁྱེར་དང་གྲོང་གསེབ་ཀྱི་བར་ཁྱད་དང་གྲོང་གསེབ་ཁུལ་གྱི་འཚོ་བའི་གནས་སྟངས་དངོས་ཀྱི་ཐད་གླེང་མོལ་བྱས་པ་ཡིན། ཁོང་གིས་ས་བྱི་ཞི་རྒོལ་ཆེན་མོའི་སྐབས་ཀྱི་ཁོང་གི་ཚོར་སྣང་དང་འབྲེལ་ཏེ་བརྗོད་དོན། ང་རང་ལ་མཚོན་ན་ལོ་ ༡༦ སྟེང་ནས་གཞན་གྱི་གཡོག་པོར་བརྒྱུགས་ཏེ་འཚོ་རྟེན་བཙལ་མཁན་ཞིག་ཡིན། ༢༠༠༨ ལོར་ཁམས་ཕྱོགས་སུ་ལས་ཀ་བྱེད་སྐབས་ལྷ་ས་དང་ཨ་མདོ་རྔ་པ། ཁམས་དཀར་མཛེས་བཅས་ཀྱི་བོད་མི་ཚོས་རྒྱ་གཞུང་ལ་ངོ་རྒོལ་སྐད་འབོད་བྱས་པའི་གནས་ཚུལ་གོ་སོང་། སྐབས་དེར་ང་རང་གི་བསམ་པར། ད་ནི་ངའི་ཕ་ཡུལ་གཞིས་རྩེ་ས་ཁུལ་གྱི་བོད་མི་ཚོར་ཡང་དཀའ་ངལ་དང་ན་ཟུག་དེ་གཅིག་མཚུངས་ཀྱིས་ཡོད་སྟབས། གཞུང་ལ་མི་དགའ་བའི་རྣམ་འགྱུར་ཞིག་སྟོན་རྒྱུ་རེད་དྲན་སོང་། འོན་ཀྱང་ད་བར་གྲགས་འགུལ་ཅི་ཡང་བྱུང་མ་སོང་།
ད་ལྟ་བསམ་བློ་བཏང་ན་གཞིས་རྩེ་ས་ཁུལ་གྱིས་འོས་ལངས་མ་བྱས་པ་དེར་རྒྱུ་མཚན་ཁ་ཤས་ཡོད་པར་རེད། འདས་པའི་ལོ་གཅིག་གཉིས་གོང་ནས་རྒྱ་ནག་གཞུང་གིས་གཞིས་རྩེ་ས་ཁུལ་གྱི་རྫོང་དང་ཞང་། གྲོང་བརྡལ་སོགས་ཀྱི་བོད་མི་ཚོར་སྡོད་ཁང་གསར་རྒྱག་དང་འཚོ་བའི་ཁ་སྣོན་ལ་དངུལ་དངོས་ཕོན་ཆེན་སྤྲད་ཡོད་པ་མ་ཟད། ལྐོག་དངུལ་སྤྲད་དེ་མི་མང་གི་བློ་ཁ་བསྒྱུར་ཐབས་དང་། ཁ་འགོག་ཐབས་མང་པོ་བྱས་ཡོད་པ་རེད། རྒན་རབས་པ་མང་པོ་ཞིག་གིས་རྒྱ་ནག་གི་བྱེད་སྟངས་དེ་ལ་སེམས་གཏིང་ནས་ཡིད་ཆེས་བྱེད་ཀྱི་ཡོད་པ་མ་ཟད། རྒྱ་ནག་གི་རོགས་སྐྱོར་མེད་ཚེ་ཕལ་ཆེར་འཚོ་ཐབས་བྲལ་བའི་འདུ་ཤེས་ཤིག་བཟུང་སྟེ། གཞོན་རབས་པ་རྣམས་ལ་དེ་ལྟར་ཁ་སློབ་གོ་གཏོང་ཁུལ་བྱེད་ཀྱི་འདུག དེ་བཞིན། གཞིས་རྩེ་ས་ཁུལ་གྱི་གྲོང་སྡེ་ཁག་མང་པོ་ཞིག་གི་རྒན་འཁོགས་ཚོས་རྒྱ་ནག་གི་གསར་ལམ་ཁག་ཏུ་༧གོང་ས་མཆོག་དང་བོད་གཞུང་ལ་སྐྱོན་བརྗོད་བྱས་པའི་དབང་གིས་རྒན་གཞོན་བར་ལྟ་བ་མ་མཐུན་པ་ཡང་ཡོང་གི་འདུག ཅེས་དང་།
ཁོས་མུ་མཐུད་དུ་བརྗོད་དོན། ཕྱོགས་གཞན་ཞིག་ནས་འདས་པའི་ལོ་མང་རིང་རྒྱ་རིགས་ཕོན་ཆེན་པོ་གཞིས་རྩེ་ས་ཁུལ་དུ་བསླེབས་ཏེ། ལས་ཁུངས་ཁག་གི་ལས་བྱེད་མཐོ་གྲས་ཚང་མ་རྒྱ་རིགས་ཆགས་ཡོད། བོད་རིགས་ལས་བྱེད་ཉུང་ངུ་ལས་མེད་ལ། དེ་དག་གི་ལས་ཀ་ཡང་ཧ་ཅང་ཐབས་ཆག་རིགས་རེད། བོད་རིགས་སློབ་ཆེན་འཐོན་མཁན་ཚོར་ལས་ཀ་རག་ཁག་པོ་ཆགས་ཡོད། དེ་བཞིན། ཚོང་ཁང་དང་མགྲོན་ཁང་། ཁྲོམ་རྭ་མང་ཆེ་བ་ཡང་རྒྱ་མིས་བཟུང་ཚར་ཡོད། བོད་པ་ཚོ་ཨར་ལས་རྒྱག་མཁན་དང་མགྲོན་ཁང་གི་ཞབས་ཞུ་བ། ཟ་ཁང་གི་ཕོར་བ་འཁྲུད་མཁན་སོགས་ཆགས་ཡོད། བོད་རྒྱ་གཉིས་ཀྱི་འཚོ་བའི་གནས་བབ་ལ་ཁྱད་པར་ཆེན་པོ་ཤོར་ཡོད་ལ། གྲོང་ཁྱེར་དང་གྲོང་གསེབ་བར་ལའང་ཁྱད་པར་ཆེན་པོ་ཤོར་ཡོད། དཀའ་ངལ་མང་པོ་ཞིག་གི་རྐྱེན་པས་བོད་པ་ཚོས་མི་རིགས་ཀྱི་འཐབ་རྩོད་དྲན་ཐུབ་ཀྱི་མེད། ཅེས་བརྗོད་བྱུང་།
ཡང་ཁོང་ལ་གཞིས་རྩེ་ས་ཁུལ་གྱི་གྲོང་གསེབ་ཁག་གི་སློབ་གྲྭའི་གནས་སྟངས་དྲིས་པར་ཁོས་ལན་བསྐྱོན་དོན། དཀའ་ངལ་ཆེ་ཤོས་མང་ཚོགས་ཀྱི་ཤེས་ཡོན་གནས་སྟངས་ཆགས་འདུག མི་རིགས་དང་རིག་གཞུང་ཐོག་བསམ་བློ་གཏོང་མི་ཤེས་མཁན་ཞིག་ལ་མཚོན་ན། ལྟོ་གོས་འགྲིག་ཙམ་དང་འཚོ་བ་འཁྱོལ་ཙམ་ཡོད་པ་རེད། སློབ་གྲྭའི་ཕྱོགས་ནས་ང་ཚོའི་གྲོང་ཚོ་དེ་ཐབས་སྐྱོ་བོའི་གནས་སུ་གྱར་ཡོད། གང་ཡིན་ཞེ་ན། གྲོང་ཚོར་ཁྱིམ་ཚང་ ༡༦༠ ཙམ་ཡོད་ཀྱང་། ད་ལྟའི་བར་སློབ་ཆེན་དུ་སྐྱོད་བཞིན་པའི་སློབ་མ་ ༡ དང་སློབ་འབྲིང་སློབ་མ་ ༤ ལས་བྱུང་མེད། སློབ་གྲྭ་རེ་གཉིས་ཡོད་པ་དེ་དག་ནང་རྒྱ་ཡིག་ཁོ་ན་ལས་བོད་ཡིག་ཡག་པོ་འཁྲིད་ཀྱི་མི་འདུག གཞིས་རྩེ་ལ་མཚོན་ན་གྲོང་གསེབ་ཁག་མ་གཏོགས་བོད་ཡིག་བོད་སྐད་བཀོལ་སྤྱོད་བྱེད་ས་ཡོད་པ་མ་རེད། མང་ཆེ་བའི་འཚོ་བ་སྐྱོ་ཐག་ཆོད་དེ་ཕྲུ་གུ་སློབ་གྲྭར་གཏོང་ཐུབ་ཀྱི་མེད་ལ། འགའ་རེ་ཡིས་ཕྲུ་གུ་སློབ་མཐར་ཕྱིན་ཡང་ལས་ཀ་མི་རག་སྟབས། སློབ་གྲྭ་ཟེར་བ་དང་ཤེས་ཡོན་ཟེར་བ་དེ་དགོས་མཁོ་མེད་པ་ཞིག་ལ་ལྟ་བཞིན་ཡོད། ཅེས་བརྗོད་བྱུང་།
མཇུག་མཐར་སྤེན་པ་ལགས་སུ་ཕ་ཡུལ་གྲོང་ཚོ་སྦོན་པོ་ལ་མཚོན་ན། ༧གོང་ས་མཆོག་ལ་དད་གུས་དང་ཕྱི་སྡོད་བོད་མིའི་སྐོར་ལ་རྒྱུས་མངའ་གང་འདྲ་ཡོད་མེད་དྲིས་པར་ཁོང་གིས། གྲོང་ཚོའི་ནང་གི་གཞོན་སྐྱེས་ཚོའི་ཁྲོད་༸གོང་ས་མཆོག་དང་ཕྱི་སྡོད་བོད་མིའི་གནས་ཚུལ་གླེང་མཁན་རེ་ཟུང་ཡོད་པ་རེད། འོན་ཀྱང་རྒན་པ་ཚོ་མང་ཆེ་བ་རྒྱ་ནག་གི་འཚོ་རྟེན་གྱི་དངུལ་དང་སྡོད་ཁང་ལ་དགའ་ཐག་ཆོད་དེ། ༧གོང་ས་མཆོག་དང་བོད་དོན་ལ་ཡ་བྱེད་མཁན་ཡོད་པ་མ་རེད། ངས་ད་བར་རྒན་པ་ཚོའི་ཁྲོད་ནས་བོད་མི་རིགས་དང་བོད་ཀྱི་གནད་དོན་གླེང་མཁན་ཞིག་གོ་མ་མྱོང་ལ། ང་རང་གི་ཕ་མ་གཉིས་ཀྱི་གམ་ནས་ཀྱང་ཐོས་མྱོང་མེད། ཅེས་བརྗོད་བྱུང་།
གསར་འགོད་པ། དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
དྲ་གྲོགས་ཚོ་ངེད་ཚོས་རྒྱུག་པ་ལེབ་རྡུང་བྱེད་མི་ཉན། གཞིས་ཀ་རྩེའི་མི་རེ་བཟུང་གིས་རྒྱ་མིའི་ཉུལ་མ་བྱས་པས་རྒྱུ་མཚན་གྱིས་གཞིས་རྩེ་བ་ཡོངས་རྫོགས་དེ་ལྟར་རེད་ཞེས་བརྗོད་ན་གཡག་ཞ་རས་རྩྭ་བ་བཟས་པ་དང་གཉིས་སུ་མ་མཆིས།
དེ་ལྟར་ན་ཆོལ་གསུམ་གྱི་བོད་མི་ཡོངས་རྫོགས་དགྱ་མིའི་ཉུལ་མ་ཡིན་པར་ཐལ། ཆོལ་ཁ་གསུམ་གའི་ནང་ལ་དགྱ་མིའི་ཉུལ་མ་ཡོད་པའི་ཕྱིར་ཞེས་ན་ལན་ཇི་ལྟར་འདེབས།
དྲང་མོར་ཞུས་ན་ང་རང་ཡང་གཞི་རྩེ་ནས་ཡིན། མ་ཟད་རྒྱ་གར་དུ་མ་ཐོན་བར་རྒྱ་ཕྲམ་དམར་པོ་དང་ཇོ་གླང་རང་བྱུང་སྲུང་སྐྱོབ་ཁུལ། ད་དུང་རྒྱ་གཞུང་གི་ལས་ཁུངས་འགར་ལས་ཀ་འདྲ་བྱས་བསྡད་པ་ཡིན། སྤྱིར་བཏང་སྤེན་པ་ལགས་ཀྱི་གསུངས་པ་བཞིན་རྒན་རྒོན་རྣམས་ཀྱི་ཁྲོད་མི་རིགས་ཀྱི་རྩ་དོན་གླེང་མཁན་ཉུང་ཉུང་རེད་ཟེར་བ་བདེན་པ་ཡིན་ཡང་ང་རང་གི་རྒན་དམ་པ་ཁོང་རྣམས་དང་སྤོ་ལགས་རྣམས་ཀྱིས་མི་རིགས་ཀྱི་ལ་ཞེན་དགོས་ཚུལ་གསུངས་མྱོང་། མ་ཟད་རྒྱ་ཕྲམ་དམར་པོའི་སྐབས་སུ་ང་ཚོའི་དཔེ་དེབ་ཀྱང་དང་གྱོན་པ་སོགས་ཆ་ཚང་བལ་ཡུལ་བརྒྱུད་རྒྱ་གར་ནས་བཏང་བ་ཡིན་ཙང་། དེ་དག་གི་སྟེང་དུ་དབྱིན་ཡིག་ལས་བྲིས་པའི་(free tibet)དང་(i love tibet)ཞེས་བྲིས་འདུག ་ང་ཚོ་ཚོགས་པ་དེའི་ཚོགས་མི་ཉིས་བརྒྱ་བརྒལ་བ་ཚང་མས་བོད་དོན་གླེང་མཁན་ཤ་སྟག་རེད། གོང་དུ་གཞི་རྩེ་བ་ཚང་མ་མྱུལ་མ་ཡིན་སྐོར་བྲིས་འདུག དངོས་གནས་ཐབས་སྐྱོ་བོ་རེད། གཞི་རྩེ་ན་སོ་མྱུལ་ཁ་ཤས་ཡོད་པ་བདེན་པ་ཡིན་ཀྱང་ཚང་མ་ཟེར་བ་ནི་ནང་འཁྲུགས་སློང་བའི་སྐད་ཆ་རེད། ང་རང་བོད་དུ་སྡོད་དུས་དུད་ཁྱིམ་མང་ཆེ་བས་རྒྱ་གར་དུ་འགྲོ་མཁན་རྣམས་ལ་བཟའ་འཐུང་སྤྲད། ལམ་སྟོན་བྱས་པ་གསལ་པོ་ཤེས་ཀྱི་ཡོད། དེ་འདྲ་སོང་ཙང་དྲྭ་ཐོག་ཏུ་མཆན་སྤེལ་བ་དེ་འཛམ་གླིང་གང་སར་ཁྱབ་ཀྱིན་ཡོད་པ་ཤེས་པ་བྱས་ཏེ་འགན་འཁུར་ཡོད་པའི་མཆན་བཏབས་རོགས། དེ་མིན་ངོ་མ་སེམས་ལ་བརྒྱབ་ཀྱི་འདུག
གང་གི་སྤེན་པས་གསུངས་པ་རྣམས་ལྷད་མེད་ཀྱི་བརྡ་སྦྱོར་ཞིག་རེད།
ང་ལྷ་ས་ནས་བོད་སྐད་ཐར་ཐོར་ཤེས་མཁན་གྱི་རྒྱ་ཁ་ཆེ་ཞིག་དང་ལྷན་དུ་རློང་འཁོར་ནང་ཡོང་བའི་ལམ་བར་གཞིས་ཀ་རྩེ་ནས་ཁྱིམ་དུ་བདེ་འབྱོར་གྱི་ཁ་པར་བཏང་རྗེས། ཁ་ཆེ་དེས་བོད་ནས་རྒྱ་གར་དུ་བྲོས་བྱོལ་བ་གང་མང་ཞིག་ས་ཆ་འདི་ནས་སྟབས་མ་ལེགས་སྟེ་བོད་རིགས་རྒྱུག་ཁྱིས་རྣམས་ཀྱིས་མཐོང་ནས་རྒྱ་མི་ཉན་རྟོགས་པ་ལ་བརྩིས་སྤྲོད་བྱས་ཡོད་པའི་གནས་ཚུལ་བཤད་སོང་།།
རྒྱ་དྲིན་ཆེན་དྭ་ཡངས་ཆར་པ་འབབ་འབབ། །
རྒྱ་དྲིན་ཆེན་རྒྱ་དངུལ་ཆར་པ་འབབ་འབབ། །
དྭ་དངུལ་གྱིས།
དྭ་ཡངས་རྒྱ་དངུལ་གཉིས་ཀྱི་ཁྱད་པར་དང་། །
སྤྲོད་མཁན་ལེན་མཁན་གཉིས་ལ་ཁྱད་པར་ཙམ། །
ང་དང་དུས་ཀྱིས།
བློ་ཕངས་པ་ཞིག་ལ་དེ་དངོས་ཡོད་གནས་ཚུལ་རེད། བརྒྱ་ཆ་བརྒྱ་ཡིན་མིན་གང་ལྟར་ཡང་གཞིས་ཀ་རྕེ་པ་ཧ་ཅང་མང་པོ་ཞིག་རྒྱ་ལ་བློ་དཀར་ཞིང་སྙིང་ཉེ་བ། ནང་གཏམ་ཕྱིར་བསྐྱལ་བྱེད་མཁན། སོ་མྱུལ་བ་རེད། བདེན་མི་བདེན་གཞེས་རྩེར་འགྲོ་ན་རིང་པོར་མ་འགོར་བར་ཤེས་ཀྱི་རེད།
དེ་བདེན་པ་རེད། ང་ཡང་སྔོན་མ་དེར་ཡོད་དུས་ས་ཁུལ་དེས་མི་འགའ་རེས་བཤད་ན་ས་འདི་ནས་མི་ལ་བློ་གཏད་རྒྱུ་ཡོད་པ་མ་རེད་ཆ་ཚང་རྒྱ་མིའི་ཉུལ་མ་རེད་ཟབ་ཟབ་བྱོས་ཟེར་མཁན་མང་དུ་ཐུགས་སོང་། དེ་དུས་ང་ཡིད་ཞེ་དྲག་ཆེས་མ་སོང་།
པཎ་ཆེན་ཐམས་ཅད་མཁྱེན་པའི་གདན་ས་རེད་དེ་འདྲ་ཞིག་ཡིན་མི་སྲིད་སྙམ་སོང་། ཡིན་ད་དེའང་བདེན་པ་འདྲ་་་་་དེ་འདྲའི་ཡིད་ཕངས་པ་ལ་་་་སེམས་སྐྱོ་པ་ལ་་་དངོས་གནས་་་་་
དེ་བདེན་པ་རེད། ང་ཡང་སྔོན་མ་དེར་ཡོད་དུས་ས་ཁུལ་དེས་མི་འགའ་རེས་བཤད་ན་ས་འདི་ནས་མི་ལ་བློ་གཏད་རྒྱུ་ཡོད་པ་མ་རེད་ཆ་ཚང་རྒྱ་མིའི་ཉུལ་མ་རེད་ཟབ་ཟབ་བྱོས་ཟེར་མཁན་མང་དུ་ཐུགས་སོང་། དེ་དུས་ང་ཡིད་ཞེ་དྲག་ཆེས་མ་སོང་།
པཎ་ཆེན་ཐམས་ཅད་མཁྱེན་པའི་གདན་ས་རེད་དེ་འདྲ་ཞིག་ཡིན་མི་སྲིད་སྙམ་སོང་། ཡིན་ད་དེའང་བདེན་པ་འདྲ་་་་་དེ་འདྲའི་ཡིད་ཕངས་པ་ལ་་་་སེམས་སྐྱོ་པ་ལ་་་དངོས་གནས་་་་་