ལྷོ་བྱང་ཀོ་རི་ཡའི་གྲོས་མོལ།

ཁ་སང་ཕྱི་ཚེས་ ༢༠ ཉིན་ལྷོ་ཀོ་རི་ཡས་བྱང་ཀོ་རི་ཡའི་འདོད་མོས་ལྟར་དེ་སྔའི་རྒྱལ་ཁབ་གཉིས་ཀྱི་རྩོད་རྙོག་སྐོར་དང་ད་ལྟའི་དམག་དོན་ཐོག་ཞི་འགྲིག་གྲོས་མོལ་བྱ་རྒྱུར་ཁེ་ལེན་བྱས་ཡོད་འདུག

ལྷོ་ཀོ་རི་ཡའི་བདེ་འཇགས་བློན་ཆེན་སྐུ་ཞབས་ཀེམ་ཀེ་ཝན་ཇེན་ Kim Kwan Jin གྱིས་བརྗོད་གསལ་ལྟར་ན། བྱང་ཀོ་རི་ཡའི་ཕྱི་སྲིད་བདེ་འཇགས་བློན་ཆེན་སྐུ་ཞབས་ཀེམ་ཡོང་ཆུན་ Kim Yong-Chun གྱིས་ཁོང་ལ་གློག་འཕྲིན་འབྱོར་ཏེ། རྩོད་རྙོག་གི་གནད་དོན་ཐད་ཕྱོགས་གཉིས་ཀྱི་མཐོ་རིམ་མི་སྣ་བརྒྱུད་དེ་ཞི་འགྲིག་ཡོང་ཐབས་ཀྱི་གྲོས་མོལ་བྱ་འདོད་ཡོད་སྐོར་བརྗོད་པ་ལྟར། ཀེམ་ཀེ་ཝན་གྱིས་ཀྱང་དེ་ལྟར་བྱ་ཆོག་པའི་ཁེ་ལེན་བྱས་ཡོད་འདུག

ལྷོ་ཀོ་རི་ཡའི་ངོས་ནས། ད་སྔའི་རྩོད་རྙོག་སྐོར་ལ་གྲོས་མོལ་བྱ་རྒྱུ་དང་། དེ་བཞིན་མ་འོངས་པར་རྡུལ་ཕྲན་མཚོན་ཆ་གསོག་འཇོག་དང་བཟོ་སྐྲུན། ཉོ་ཚོང་སོགས་མི་ཆོག་པ་སོགས་ལ་ཡང་གྲོས་མོལ་བྱ་དགོས་སྐོར་ལན་འདེབས་བྱས་ཡོད་འདུག ལྷག་པར་དུ་དེ་སྔོན་ལྷོ་ཀོ་རི་ཡའི་མཚོ་གྲུ་ཞིག་བྱང་ཀོ་རི་ཡས་གཏོར་སྐྱོན་བཏང་བ་དང་། མི་ ༤༦ ཙམ་གྱི་ཚེ་སྲོག་ཤོར་བ། ལོ་སྔོན་མའི་ཕྱི་ཟླ་ ༡༡ པར་བྱང་ཀོ་རི་ཡས་ཡེན་པེ་ཡོན་མཚོ་གླིང་ཐོག་ཚུར་རྒོལ་གྱིས་སྒྱོགས་མདེལ་འཕངས་ཏེ། ལྷོ་ཀོ་རི་ཡའི་མི་ལ་ཤི་རྨས་ཐེབས་པ་བཅས་ལ་བྱང་ཀི་རི་ཡས་འགན་འཁུར་དགོས་ལུགས་ཀྱང་བརྗོད་ཡོད་འདུག

ཉིན་འདི་འགར་ལྷོ་བྱང་གཉིས་ཀྱི་མཐོ་རིམ་དམག་དོན་མགྲིན་ཚབ་པས་འབྲེལ་མོལ་ཙམ་བྱུང་ཡོད་ཀྱང་། གྲུབ་འབྲས་ཁ་གསལ་གང་ཡང་བྱུང་མི་འདུག སྲིད་དོན་དབྱེ་ཞིབ་པ་དག་གིས་ཐེངས་འདིའི་ལྷོ་བྱང་བར་གྱི་མཐོ་རིམ་དམག་དོན་མི་སྣ་ཐུག་འཕྲད་བྱས་པ་དེ་ནི་ལོ་མང་པོའི་རྗེས་ཀྱི་ཐེངས་དང་པོ་དེ་ཆགས་ཡོད་སྟབས། དེ་ནི་བཟང་ཕྱོགས་ཀྱི་རྣམ་འགྱུར་ཙམ་ཡིན་སྐོར་རྗོད་ཀྱི་ཡོད་འདུག

གསར་འགོད་པ། བནྡེ་སྐྱབས།