ཉེ་ཆར་བལ་ཡུལ་གྲོས་ཚོགས་ཀྱིས་སྲིད་བློན་གསར་པ་འོས་འདེམས་ཐེངས་བཅུ་བདུན་པ་དེ་གནང་རྒྱུ་གཏན་ཁེལ་འདུག ཐེངས་འདིའི་སྲིད་བློན་འདེམས་རྒྱུའི་འོས་གཞིའི་ནང་བལ་ཡུལ་གྱི་ཆབ་སྲིད་ཚོགས་པ་ཆེ་ཤོས་ ༤ མཉམ་ཞུགས་བྱེད་ཀྱི་ཡོད་པ་དང་། ཚོགས་པ་དེ་དག་ནི་བལ་ཡུལ་ཀུང་རི་སི་ཚོགས་པ་དང་། མཱ་ཌེ་སེ་མི་མང་རང་དབང་མཐུན་ཚོགས། བལ་ཡུལ་དམར་ཤོག་ཚོགས་པ། མའོ་ཚོགས་པ་བཅས་རེ་རེ་ནས་འོས་མི་གཅིག་རེ་ལངས་ཡོད་པ་དང་། འོས་མི་སུ་ལ་རྒྱལ་ཁ་ཐོབ་ན་དེའི་ཕྱོགས་གཏོགས་གཞུང་འཛིན་ཚོགས་པ་ཆགས་རྒྱུ་ཡིན་པ་རེད།
སྔ་ལོའི་ཕྱི་ཟླ་ ༦ པའི་ནང་སྲིད་བློན་ཟུར་བ་མཱ་ཌེཧྥུ་ཀུ་མར་དགོངས་ཞུ་བྱས་བཅུག་པ་ནས་ད་ལྟའི་བར་སྲིད་བློན་འདེམས་པར་ལས་རིམ་ཐེངས་ ༡༦ སྤེལ་ཟིན་ཡང་གྲུབ་འབྲས་སོན་མེད། འོན་ཀྱང་ཐེངས་འདིར་འོས་འདེམས་ཀྱི་བརྒྱུད་རིམ་ལ་བསྒྱུར་བཅོས་བཏང་ཡོད་སྟབས། ཉིན་འགའི་རྗེས་སུ་འོས་མི་རྒྱལ་ཁ་ཐོབ་མཁན་དེ་སྲིད་བློན་ཆགས་རྒྱུར་རེ་བ་བྱེད་ཀྱི་ཡོད་འདུག ཐེངས་འདིའི་འོས་འདེམས་ཀྱི་ལས་རིམ་བསྒྱུར་བཅོས་ནང་། འབྱུང་འགྱུར་ཉིན་འགའི་རིང་འོས་འདེམས་བསྟུར་མུར་ཐེངས་གསུམ་ལ་བྱས་མཐར་རྒྱལ་ཁ་འཐོབ་མཁན་ལ་འོས་གྲངས་བརྒྱ་ཆ་ ༥༠ ལས་བརྒལ་དགོས་པ་བཟོས་ཡོད་འདུག
དེ་རིང་གཟའ་ཕུར་བའི་ཉིན་འོས་འདེམས་དང་པོ་དེ་བྱེད་ཀྱི་ཡོད་འདུག་ལ། འོས་འདེམས་དང་པོར་འོས་གྲངས་བརྒྱ་ཆ་ ༥༠ ལས་བརྒལ་མཁན་མ་བྱུང་ཚེ། གནངས་ཉིན་གཟའ་སྤེན་པའི་ཉིན་འོས་འདེམས་གཉིས་པ་བྱ་རྒྱུ་ཡིན་འདུག སྐབས་དེར་ཡང་བརྒྱ་ཆ་ ༥༠ ལས་བརྒལ་མཁན་མ་བྱུང་ཚེ། འོས་གྲངས་ཉུང་ཤོས་ཀྱི་འོས་མི་གཉིས་ཕྱིར་འཕུད་བཏང་སྟེ། འོས་གྲངས་མཐོ་ཤོས་གཉིས་ལ་གཟའ་ཉི་མའི་ཉིན་བསྐྱར་དུ་འོས་བསྡུ་ཐེངས་གཅིག་བྱ་འཆར་ཡོད་འདུག འོན་ཀྱང་། སྐབས་དེར་ཡང་སྔར་བཞིན་བརྒྱ་ཆ་ལོང་མཁན་མ་བྱུང་ཚེ། བསྐྱར་དུ་ཚོགས་པ་ཁག་མཉམ་རུབ་ཀྱིས་འོས་མི་གསར་བ་འཚོལ་འདེམས་ཐེངས་གཅིག་བྱ་རྒྱུ་ཡིན་འདུག
གསར་འགོད་པ། བནྡེ་སྐྱབས།
