སྔ་ལོར་རྒྱ་ནག་ནང་ལོགས་ཀྱི་ས་ཁུལ་མང་ཆེ་བར་ཐན་སྐྱོན་ཚབས་ཆེན་བྱུང་ཡོད་པ་དང་། ཡང་ས་ཁུལ་རེ་ཟུང་ནང་དབྱར་དུས་ཆར་ཞོད་ཆེ་དྲགས་པའི་དབང་གིས་ལོ་ཏོག་འཕྲོ་བརླག་ཏུ་སོང་བ་དང་། དགུན་དུས་ཁ་བ་ཤུགས་ཆེན་བབ་པའི་དབང་གིས་དགུན་གྲོ་བེད་མེད་དུ་གྱུར་བ་སོགས་རང་བྱུང་ཁམས་ཀྱི་གོད་ཆགས་ཤུགས་ཆེན་ཐེབས་ཡོད།
ཟླ་འདིའི་ཕྱི་ཚེས་ ༩ ཉིན་རྒྱ་ནག་དབུས་ཐན་འགོག་བཀོལ་འདོམ་སྡེ་ཚན་གྱི་འཆར་འགོད་གསུམ་པ་ས་གནས་ཁག་ལ་ཆེད་གཏོང་བྱས་ཡོད་འདུག འཆར་འགོད་ཚན་ཆུང་འདིར་ལས་དོན་སྒྲུབ་མཁན་གྱི་ཚོགས་ཆུང་ ༢༩ དང་། ཆེད་མཁས་པའི་ཚོགས་ཆུང་ ༨ བཅས་ཡོད་ཅིང་། ཐེངས་འདིར་ཐན་སྐྱོན་ཚབས་ཆེ་བའི་ཞང་ཆེན་ཁག་ཏུ་བསྐྱོད་དེ། ཞིང་ཁར་ཆུ་འདྲེན་པ་དང་དམངས་ཀྱི་འཐུང་ཆུའི་དཀའ་ངལ་སེལ་བ། དེ་བཞིན་དགུན་གྲོ་འདེབས་ཡུལ་དག་ཏུ་རྨ་ཆུ་དང་འབྲི་ཆུ་འདྲེན་པ་སོགས་བྱ་འཆར་ཡོད་འདུག
ཕྱི་ཚེས་ ༩ ནས་ ༡༠ བར་གྱི་ཉིན་གཉིས་རིང་རྒྱ་ནག་བྱང་ཕྱོགས་ཁུལ་དུ་གནམ་རུབ་སྟེ་ཁ་བ་བབས་ཡོད་སྟབས། ཧྭི་ནན་དང་ཧྲན་ཏུང་། པེ་ཅིན་སོགས་མུ་མཐུད་ཁ་བ་འབབ་ཆེད་དམག་དཔུང་གིས་མེ་ཤུགས་འཕུར་མདའ་ ༢༠༣ ཙམ་འཕངས་ཏེ་ཁ་བ་ཤུགས་ཆེན་འབབ་རྒྱུར་རེ་བ་བྱས་ཡོད་འདུག་ལ། དེ་བཞིན་མཁའ་དམག་གིས་གནམ་གྲུ་ ༥ ཙམ་བཏང་སྟེ་ཁ་བ་ཕབ་ཡོད་འདུག
ཉིན་འདི་འགར་རྒྱ་ནག་གི་བྱང་ཕྱོགས་ས་ཁུལ་མང་ཆེ་བར་ཁ་བ་བབས་ཏེ། ཉིན་བརྒྱ་དང་བརྒྱད་ཀྱི་རིང་ཆར་ཆུ་མ་བབས་པའི་ལེའུ་མཇུག་བསྒྲིལ་ཡོད། པེ་ཅིན་ལ་མཚོན་ན། འདས་པའི་མི་ལོ་ ༦༠ རིང་བབས་མ་མྱོང་བའི་ཁ་བ་ཤུགས་ཆེན་བབས་ཡོད་མོད། ཤིན་ཅིང་དང་ཐེན་ཅིན། ཨན་ཝེ། ཧྲན་ཏུང་། ཅིང་སུའུ་སོགས་སུ་ཁ་ཆར་འདྲེས་མ་ཙམ་བབས་ཡོད་ཀྱང་འབབ་ཡུན་ཐུང་བ་དང་། འབབ་སྟངས་ཆ་མཉམ་མིན་པའི་དབང་གིས་ཐན་སྐྱོན་གྱི་གནད་དོན་ལ་ཕན་ཐོགས་ཆེན་པོ་བྱུང་མི་འདུག
ཨེ་མ། ཡ་མཚན་ལ་ཡར་རྒྱས་མང་དྲགས་པའི་སྐྱོན་མ་རེད་དམ། ལས་རྒྱུ་འབྲས་ཞེས་པ་དེ་ནས་ཧ་གོ་ཐུབ།