ང་ཚོས་ཆོས་ལུགས་ལ་གཞི་མ་བཅོལ་བར་མིའི་བཟང་སྤྱོད་གོང་མཐོར་གཏོང་རྒྱུར་འབད་བརྩོན་མང་ཙམ་གནང་དགོས་ཀྱི་འདུག ཆོས་ལུགས་ལ་མ་བརྟེན་པའི་མིའི་རིགས་ཀྱི་བཟང་སྤྱོད་དེས་འཛམ་གླིང་ཞི་བདེ་བསྐྲུན་རྒྱུར་ཕན་ཐོགས་ཆེན་པོ་འདུག ཅེས་༧གོང་ས་མཆོག་གིས་གསུངས་འདུག
༧གོང་ས་མཆོག་གིས་རཱ་ཇི་སི་ཐན་གྱི་མཛད་འཕྲིན་ཁག་ལེགས་པར་བསྐྱངས་རྗེས། རྒྱ་གར་གྲོང་ཁྱེར་མུམ་བྷེ་རུ་ཆོས་ཕྱོགས་ཀྱི་མཛད་འཕྲིན་བསྐྱངས་ཡོད་ཅིང་། ཕྱི་ཚེས་ ༡༨ ཉིན་མུམ་བྷེ་གཙུག་ལག་སློབ་གྲྭ་ཆེན་མོར་ཕེབས་ཏེ། སྲོལ་རྒྱུན་ལེགས་བཤད་དང་དེང་རབས་བསམ་བློ་ཞེས་པའི་བརྗོད་གཞིའི་ཐོག་གསུང་བཤད་གནང་འདུག སྐབས་དེར་༧གོང་ས་མཆོག་གིས། འཚེ་མེད་ཞི་བ་དང་ཆོས་ལུགས་མཐུན་སྒྲིལ་གཉིས་ནི་འཛམ་གླིང་ལ་མིག་དཔེར་འོས་པའི་རྒྱ་གར་གྱི་སྲོལ་རྒྱུན་གཅེས་ནོར་ཡིན་སྟབས། འཛམ་གླིང་མི་མང་གིས་གནད་དོན་དེ་གཉིས་ཐོག་རྒྱ་གར་བའི་ལེགས་བཤད་ལེན་འོས་པ་ཞིག་རེད།
མཱར་ཊིན་ལོ་ཐིར་ཀིན་མཆོག་དང་ནེལ་སེན་མན་ཌི་ལཱ་སོགས་ཀྱིས། གྷན་དྷིས་དབུ་ཁྲིད་པའི་རྒྱ་གར་གྱི་འཚེ་མེད་ཞི་བའི་ལྟ་གྲུབ་ལ་གཞི་བཅོལ་ཏེ་ལས་འགུལ་སྤེལ་བ་དེས་བློ་སྟོབས་དང་སེམས་འགུལ་ཆེན་པོ་ཞིག་ཐེབས་ཡོད་པས། རྒྱ་གར་གྱི་ལྟ་གྲུབ་དེར་འཛམ་གླིང་ཡོངས་སུ་ངོས་འཛིན་དང་བསྔགས་བརྗོད་ཆེན་པོ་ཐོབ་ཡོད་ཅེས་དང་། རྒྱ་གར་ནི་འཛམ་གླིང་སྟེང་ཆོས་ལུགས་རིས་མེད་དང་མང་གཙོའི་རྒྱལ་ཁབ་ཆེ་ཤོས་དེ་ཆགས་ཡོད་ཅིང་། རྒྱ་གར་གཞུང་གི་རྩ་ཁྲིམས་ནང་ཆོས་ལུགས་རིས་མེད་ཅེས་པའི་བརྗོད་ཚིག་བཀོད་ཡོད་པར་མ་ཟད། ཆོས་ལུགས་ཁག་ཚང་མར་ཁྲིམས་ཀྱིས་སྲུང་སྐྱོབ་དང་གུས་གཙི་ཆེན་པོས་ཁྱད་མེད་དུ་ལག་ལེན་བསྟར་བཞིན་ཡོད་སྟབས། རྒྱ་གར་བ་ཚོས་སྲོལ་རྒྱུན་གྱི་རང་གི་གཅེས་ནོར་འཛམ་གླིང་ཧྲིལ་པོར་ཁྱབ་བརྡལ་གཏོང་དགོས་པ་རེད་ཅེས་གསུངས།
ཕྱི་ཚེས་ ༡༩ ཉིན་༧གོང་ས་མཆོག་གི་མུམ་བྷེ་རུ་འཚོགས་བཞིན་པའི་ཀླད་ཁམས་ཚན་རིག་ཚོགས་ཆེན་ཐེངས་ ༡༦ པའི་སྟེང་ཕེབས་ཏེ་བཀའ་གནང་དོན། ང་ཚོའི་མིག་གིས་མཐོང་ཐུབ་པ་དང་ཚོར་ཐུབ་པའི་དངོས་པོའི་གནས་སྟངས་ཐོག་ཚན་རིག་པ་ཚོས་ལག་རྗེས་ཆེན་པོ་བཞག་ཡོད་ཀྱང་། བསམ་བློའི་ཚན་རིག་དང་སེམས་ཚོར་རྣམ་གཞག་ཐོག་རྒྱ་གར་གྱི་སྲོལ་རྒྱུན་ནས་གསུངས་པའི་ཞི་གནས་དང་ལྷག་མཐོང་གི་འགྲེལ་བཤད་དེ་ཧ་ཅང་ཟབ་མོ་འདུག་ལ། དེ་དག་ཉམས་ལེན་བྱ་རྒྱུར་ནང་བསམ་བློའི་རྣམ་བཞག་སྐོར་རྒྱུས་མངའ་ཡག་པོ་དགོས་ཀྱི་རེད། ང་ཚོས་སེམས་ཚོར་འདྲ་མིན་རིགས་ལ་སྟངས་འཛིན་ཐུབ་རྒྱུར་ཆོས་ཀྱི་རྣམ་བཞག་དེ་ཤེས་དགོས། ད་ཆར་ནུབ་ཕྱོགས་པའི་ཚན་རིག་པ་གྲགས་ཅན་ཚོས་གནས་ཚུལ་དེ་ཚོར་དོ་སྣང་ཆེན་པོ་བྱེད་ཀྱི་འདུག། ཅེས་དང་།
ལུས་སེམས་གཉིས་ཀྱི་འབྲེལ་བའི་སྐོར་ལ་ཞིབ་འཇུག་གི་དགོས་པ་གསུངས་དོན། བསམ་བློའི་འཕྲོད་བསྟེན་གྱི་ཐོག་ནས་ལུས་པོ་བདེ་ཐང་ཡོང་དགོས་རྒྱུ་གཙོ་བོ་ཞིག་ཡིན། ང་ཚོར་ཞི་བདེའི་བསམ་བློ་བཟོ་ཐུབ་རྒྱུའི་ནུས་པ་ཡོད་ལ། དཀའ་ངལ་ཅི་ཞིག་འཕྲད་ཀྱང་ཕྱོགས་ཡོངས་ཀྱི་གནས་ཚུལ་ཤེས་ཏེ་དཀའ་ངལ་དེར་ལྟ་ཐུབ་ཚེ། སེམས་ཀྱི་དངངས་སྐྲག་ཆུང་དུ་འགྲོ་བ་དང་སེམས་ལ་ཞི་བདེ་ཡོང་ཐུབ་ཀྱི་ཡོད། སེམས་ཁྲལ་དང་དངངས་འཚབ་ཀྱིས་མིའི་ཀླད་རྫས་ཕྲ་མོར་འགྱུར་ལྡོག་དང་ཤུགས་རྐྱེན་ཐེབས་ཏེ། ལུས་ལ་ན་ཚ་ཡོང་གི་ཡོད་སྟབས་སེམས་ཀྱི་ཞི་བདེ་ནི་ནད་གཞི་སྔོན་འགོག་གི་ཐབས་ལམ་ཡག་ཤོས་དེ་རེད། ཅེས་གསུངས་འདུག
ཡང་ཁོང་གིས་ཆོས་ལུགས་ལ་མ་བརྟེན་པར་མིའི་ཀུན་སྤྱོད་ཡར་རྒྱས་གཏོང་ཐབས་སྐོར་ལ་བཀའ་གནང་དོན། མི་སྒེར་གྱི་མི་ཚེ་སྐྱིད་པོ་ཞིག་དང་སྤྱི་ཚོགས་ཞི་བདེ་ཡོང་བར་ནང་བསམ་བློའི་རིན་ཐང་ལ་འབད་བརྩོན་བྱ་དགོས་ཤིང་། ལྐོག་ཟ་དང་ཞེ་སྡང་། ཕྲག་དོག་དང་ཞེད་སྣང་སོགས་ཀྱིས་སྤྱི་ཚོགས་ནང་མ་སྐྱིད་པ་བཟོ་བཞིན་ཡོད་སྟབས། ང་ཚོས་ཆོས་ལུགས་ལ་གཞི་མ་བཅོལ་བར་མིའི་བཟང་སྤྱོད་གོང་མཐོར་གཏོང་རྒྱུར་འབད་བརྩོན་མང་ཙམ་གནང་དགོས་ཀྱི་འདུག ཆོས་ལུགས་ལ་མ་བརྟེན་པའི་མིའི་རིགས་ཀྱི་བཟང་སྤྱོད་དེས་འཛམ་གླིང་ཞི་བདེ་བསྐྲུན་རྒྱུར་ཕན་ཐོགས་ཆེན་པོ་འདུག དུས་རབས་ཉི་ཤུའི་ནང་ཚན་རིག་དང་འཕྲུལ་ཆས་ཡར་རྒྱས་ཆེ་རུ་ཕྱིན་ཡོད་ཀྱང་དུས་རབས་དེ་ནི་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཡོད།
སྔོན་ཆད་རྩོད་རྙོག་དང་འཁྲུག་རྩོད་བྱུང་ཡོད་ཀྱང་གཏོར་བཤིག་ཆེན་པོ་ཐེབས་ཐུབ་ཀྱི་མེད། དེང་སྐབས་གཏོར་བཤིག་གཏོང་རྒྱུའི་ནུས་པ་ཡོད་སྟབས་ང་ཚོར་དཀའ་ངལ་ཚད་ལས་བརྒལ་བ་བཟོ་རྒྱུའི་ཉེན་ཁ་ཡོད་པ་རེད། དེའི་སྟབས་ཀྱིས། འཕྲུལ་ཆས་ཡར་རྒྱས་ཕྱིན་པ་དེས་འཛམ་གླིང་ཞི་བདེ་དང་བྱམས་བརྩེ། བདེ་སྐྱིད་བསྐྲུན་རྒྱུའི་ངེས་པ་གང་ཡང་ཡོད་མ་རེད་ཅེས་གསུངས། མུམ་བྷེ་གྲོང་ཁྱེར་གྱི་མཛད་འཕྲིན་ཁག་གྲུབ་རྗེས་ཕྱི་ཚེས་ ༢༠ ཉིན་གྱི་ཞོགས་པའི་ཆུ་ཚོད་ ༡༠ སྟེང་༧གོང་ས་མཆོག་མཁའ་ལམ་བརྒྱུད་ཕྱིར་བཞུགས་སྒར་དུ་ཆིབས་བསྒྱུར་བསྐྱངས་ཏེ། ཉིན་དེའི་སྔ་དྲོའི་ཆུ་ཚོད་ ༡༢ ཐོག་བོད་ནས་ཕེབས་པའི་གསལ་མཇལ་བ་ ༢༠༠ ལྷག་ལ་མཇལ་ཁ་གནང་བཀའ་སློབ་གནང་འདུག
གསར་འགོད་པ། དཔལ་ལྡན།
ཀླུ་ལགས་སྐུ་མཁྱེན་ད་ཁྱོད་ཀྱིས་༧གོང་ས་མཆོག་གི་བཀའ་སློབ་ལ་རྩ་ཆེ་ཆུང་ཞིག་བཤད་མ་སྡོད།༧གོང་ས་མཆོག་གི་ད་བར་དུ་བཀའ་སློབ་རྩ་ཆེན་རྐྱང་ལས་རྩ་ཆུང་བ་ཞིག་ག་དུས་གསུངས་སོང་།
༼ཆོས་ལུཊ་ལ་མ་བརྟེན་པའི་བཟང་སྤྱོད་ཅིག་འཚོལ་དགོས་༽ཞེས་པ་འདི་བཀའ་སློབ་རྩ་ཆེན་ཞིག་རེད༌༌༌
འཛམ་གླིང་བླ་མ་འཛམ་གླིང་ཉི་མ་ལགས། ཉི་མ་མ་ཤར་མིག་གཉིས་དོན་མེད་ཡིན།
རྒྱལ་སྤྱིའི་ཁ་ཕྱོགས་ཤར་ལ་ཕྱོགས་ན་ཡང། རང་རིགས་གཞོན་སྐྱེས་དུ་མ་ནུབ་ལ་འཁོར།