བཀའ་ཁྲིའི་གདམ་ག་དང་ངའི་འཆར་སྣང་།

འབྲུག་ཐར་རྒྱལ། གོ་པལ་པུར་བོད་ཁྱིམ་སློབ་མ།

ང་ཚོ་ཕྱི་ཡུལ་ཏུ་གྱར་ནས་མི་ལོ་བཅུ་ཕྲག་ལྔ་ལྷག་དལ་གྱིས་བགྲོད་ཀྱིན་པའི་སྐབས་འདིར། བོད་པའི་ཆབ་སྲིད་ཀྱི་བསྟི་གནས་འདི་ནི་འགྱུར་ལྡོག་གི་དཀྱོགས་མཚམས་ཤིག་ལ་སླེབས་ཡོད་པར་སྙམ། དེ་ཡང་བླ་མ་དང་སྐུ་དྲག་རིང་ལུགས་ནས་དེ་རིང་གི་དམངས་གཙོའི་གཙོའི་ལམ་ཆེན་དུ་ཤར་སྐྱོད་ཀྱི་བརྒྱུད་རིམ་འདིའི་བར་གྱུར་ལྡོག་དང་གཅིག མི་རབས་རྒན་པ་རྣམས་ཀྱི་ལས་འགན་དེ་ཡང་རིམ་བཞིན་གཞོན་པ་རྣམས་ཀྱིས་འཁུར་དགོས་པ་དང་གཉིས། ཁ་སང་ལ་བསྐྱར་ཞིབ་ལས་སང་ཉིན་གྱི་མདུན་ལྗོངས་ལ་རྒྱང་གཟིགས་བྱེད་པ་དང་གསུམ་བཅས་ནི། འགྱུར་ལྡོག་གི་བར་ནས་གསར་བཏོད་དང་གཅིག་སྒྲིལ་གྱི་ལམ་བུ་ལ་ཁ་ཕྱོགས་པའི་སྟ་གོན་རེད་སྙམ།

སྤྱིར་བསམ་བློ་བའམ་རྩོམ་པ་པོ་སུ་འདྲ་ཞིག་ཡིན་རུང་བློ་གཟུ་བོར་གནས་པའི་རྣམ་དཔྱོད་དང་དོན་སྙིང་ལྡན་པའི་གཏན་ཚིགས། དེའི་རྒྱབ་ལྗོངས་ཀྱི་བདེན་དཔང་དན་རྟགས་སོགས་དགོས། འོན་ཀྱང་རང་ཉིད་ཤེས་ཡོན་པ་ཚད་ལྡན་ཞིག་ཏུ་རློམས་ནས་སྟོབས་ཆེན་རྒྱལ་ཁབ་ཨ་རི་དང་གོ་ལ་གཅིག་གྱུར་གྱི་ཤེས་ཡོན་བསྟི་གནས། ཁྲིམས་དང་ཚོང་རིགས་ལ་འཛམ་གླིང་གི་གཙུག་རྒྱན་དུ་གྱུར་བའི་ཧར་ཝར་ཌི་གཙུག་ལག་སློབ་གཉེར་ཁང་གིས་གོང་དུ་བཀུར་བའི་སློབ་དཔོན་ཆེན་མོའམ་མཁས་དབང་གཅིག་ལ་ཚད་མེད་ཀྱིས་དམའ་འབེབས་གཏོང་བ་དང་། དོན་མེད་ཀྱིས་འཆལ་གཏམ་འདྲ་མིན་སྤེལ་བ་ནི་གཅིག་སྒྲིལ་ལ་རྡོག་རོལ་བཏང་བ་དང་། དམངས་གཙོའི་དོན་སྙིང་མ་རྟོགས་པར་དམངས་གཙོའི་ཁེ་ཕན་ལ་ལོངས་སྤྱོད་མི་ཤེས་པའི་མི་བུ་འགའི་རྩོམ་ཡིག་བཀླགས་རྗེས་འབྲི་མགོ་བརྩམས།

མཁས་དབང་བློ་བཟང་སེང་གེ་ལ་མཚོན་ན་ཕྱི་ཡུལ་གྱི་གཞིས་ཆགས་ཤིག་ཏུ་སྐྱེས་ཤིང་། རིམ་གྱིས་བཙན་བྱོལ་ནང་སློབ་གྲྭ་འགྲིམས་ཏེ་འཚར་ལོངས་བྱུང་བའི་བོད་ཕྲུག་དཀྱུས་མ་ཞིག་རེད། གཞི་རིམ་གྱི་ཤེས་ཡོན་དང་མཐོ་རིམ་དབར་རྡོ་རྗེ་གླིང་དུ་སློབ་གཉེར་བྱས་པ་དང་དེའི་རྗེས་ལྡི་ལི་མཐོ་སློབ་དུ་དབྱིན་ཡིག་༼English Honors༽ དང་ཁྲིམས་༼LLB༽ཆེད་སྦྱོང་ཐོན་མ་ཐག་འཛམ་གླིང་སྤྱིའི་ཁྲིམས་དང་ཚོང་རིགས་ཀྱི་གཙུག་ལག་སློབ་གཉེར་ཁང་ཆེས་ལེགས་ཤོས་ཧར་ཝར་ཌིར་སློབ་གཉེར་བྱེད་རྒྱུའི་གོ་སྐབས་ཐོབ་པ་རེད། བོད་མི་ས་ཡ་དྲུག་གི་ནང་དུ་སྔར་ཁོང་ལྟ་བུ་ཞིག་བྱུང་མ་མྱོང་བ་འདི་ཁོའི་གྲུབ་འབྲས་ཤིག་མ་རེད་དམ། གཡུར་དུ་ཟ་བའི་གྲུབ་འབྲས་འདིས་མགོ་ནག་བོད་པ་རྣམས་དང་ལྷག་པར་དུ་ཤེས་ཡོན་ལ་དོན་གཉེར་ཅན་རྣམས་ལ་མིག་དཔེ་བསྟན་ཡོད།

ཁོང་གིས་གོ་སྐབས་འདི་དམ་འཛིན་དང་ཤེས་ཡོན་ལ་དོན་གཉེར་ཆེན་པོས། ཕྱི་ལོ་ ༢༠༠༤ ལོར་ཁྲིམས་ལུགས་ཚན་རིག་གི་སློབ་དཔོན་ཐོན་ཐུབ་པ་དང་། ཤར་ཨེ་ཤི་ཡའི་ཁྲིམས་ཀྱི་ཉམ་ཞིབ་པའི་ལས་གནས་སུ་ཧར་ཝར་ཌིའི་སློབ་དཔོན་ཆེན་མོར་བསྐོ་བཤག་གནང་། འདི་ནི་ཨེ་ཤ་ཡའི་རྒྱལ་ཁབ་སོག་པོ་དང་འབར་མ་སོགས་མི་སྟོང་ཕྲག་མང་པོའི་ནང་དུ་བྱུང་མ་མྱོང་བ་དང་། ༧སྐྱབས་མགོན་རིན་པོ་ཆེ་མཆོག་གིས་ཀྱང་ཡང་ཡང་གསུངས་བཞིན་པའི་རིག་གཅིག་རྐང་འཛིན་གཟེངས་ཐོན་གྱི་མིག་དཔེར་འོས་པའི་མི་སྣ་གཅིག་ཆགས་ཡོད།

ཁོང་གི་ཤེས་ཡོན་གྲུབ་འབྲས་དང་ལྷག་པར་དུ་རང་མི་རིགས་དང་རྒྱལ་ཁབ་ཀྱི་ཆེད་དུ་ཆོད་སེམས་བརྟན་པོས། བོད་ཀྱི་གནས་བབ་དང་རྒྱ་ནག་གི་འགྱུར་འགྲོས་སོགས་ལ་ལོ་ཟླ་མང་པོའི་རིང་འཚོལ་ཞིབ་བྱས་པས་ཧར་ཝར་ཌི་གཙུག་ལག་སློབ་གྲྭ་ཆེན་མོ་དང་ཁྲིམས་ཀྱི་སློབ་གྲྭའི་ནང་དུ་གནད་དོན་དེ་དག་གི་ཐོག་བཀའ་འདྲི་ཞུ་ཡུལ་མི་སྣ་ཚད་ལྡན་ཞིག་ཏུ་ངོས་འཛིན་ཞུ་བཞིན་པ་དང་། དེ་བས་འདས་པའི་ལོ་ངོ་བཅོ་ལྔའི་རིང་རྒྱ་ནག་གི་ཤེས་ཡོན་ཅན་སྟོང་ཕྲག་མང་པོ་དང་ལྷན་ཏུ་བོད་དོན་གོ་བསྡུར་དང་དངོས་ཡོད་བདེན་འཚོལ་ཀྱིས་བོད་རང་དབང་སླར་གསོའི་ཐོག་གསར་བཏོད་ཀྱི་རྣམ་པས་མདུན་མཆོངས་ཀྱི་ལེའུ་གསར་པ་ཞིག་བསྐྲུན་པ་རེད། འདི་ནི་༧སྐྱབས་མགོན་རིན་པོ་ཆེས་རྒྱ་ནག་གི་ཤེས་ཡོན་ཅན་རྣམས་དང་ལྷན་ཏུ་བསམ་ཚུལ་བརྗེ་ལེན་བྱེད་དགོས་ཞེས་ཡང་ཡང་གསུངས་པ་ལག་ལེན་ཏུ་འཁྱོལ་པ་མ་རེད་དམ།

མཁས་དབང་བློ་བཟང་སེང་གེས་སླར་ཡང་༧སྐྱབས་མགོན་རིན་པོ་ཆེའི་བཀའ་དགོངས་བཞིན།  རང་ཉིད་ཀྱི་སྐབས་འཕྲལ་གྱི་ལས་དོན་དོར་ནས་ཕུགས་རྒྱང་རིང་པོས་བཙན་བྱོལ་བོད་གཞུང་ལ་ལས་ཀ་བྱེད་པའི་ཆོད་སེམས་བརྟན་པོ་ཡོད་པ་ནི་ང་ཚོ་དགའ་འོས་པའི་གནད་དོན་གཅིག་རེད། དེས་ཁོང་གི་ལྷག་བསམ་དང་རིགས་ཞེན་མངོན་ཐུབ་ངེས་རེད། ད་ལྟ་བོད་ཀྱི་ཤེས་ཡོན་པ་མང་དག་ཅིག་ཕྱི་ཡུལ་གྱི་མེ་སེར་ཆགས་པ་དང་ནུབ་ཕྱོགས་པ་རྣམས་ལ་ཞབས་ཞུ་སྒྲུབ་པ་ལས་བོད་མི་རིགས་ཀྱི་ཆག་འཇིག་དང་བདེ་སྡུག་ལ་བསམ་གཞིགས་བྱེད་མཁན་ཤིན་ཏུ་དཀོན། འདིས་ཕྱི་ཡུལ་གྱི་ཤེས་ཡོན་པ་རྣམས་རང་ཡུལ་ལ་ཁ་ཕྱོགས་དགོས་པ་གསལ་འདོན་བྱས་ཡོད།

འོ་ན་ང་ཚོར་མགོ་འཁྲིད་ག་འདྲ་ཤིག་དགོས་པ་རེད་དམ། ང་ཚོས་ནམ་རྒྱུན་བཤད་བཞིན་པའི་ཉམས་མྱོང་། ལྷག་བསམ།  མི་རབས་རྒན་པ།  བོད་ཡིག་གི་ཤེས་ཚད་ཡག་པོ་ཡོད་པ་ཞེས་པའི་འགྲེལ་ལོག་བསྐྱར་ཟློས་ཀྱི་ཚིག་འབྲུ་འདི་དག་གིས་བཀའ་བློན་ཁྲི་པའི་མཚན་ཉིད་གཞལ་ཐུབ་བམ། རྒྱལ་ཁབ་ཅིག་འཛིན་སྐྱོང་བྱེད་པར་ངེས་པར་དུ་ཁྲིམས་ལུགས་གཞིར་བཞག་གིས་མདུན་བསྐྱོད་བྱ་དགོས་ན་ཁྲིམས་ལུགས་ཆེད་མཁས་པ་ཞིག་གིས་འཛིན་སྐྱོང་བྱེད་ཐུབ་པ་གོར་མ་ཆག

དེར་བརྟེན་ཁོང་རྒྱལ་སྤྱིའི་ཁྲིམས་ལུགས་དང་འགྲོ་བ་མིའི་ཐོབ་ཐང་། མང་གཙོའི་ལམ་ལུགས། རྩོད་རྙོག་འདུམ་འགྲིག་བཅས་ལ་དམིགས་བསལ་ཆེད་ལས་པ་ཡིན་པ་མ་ཟད། རྣམ་དཔྱོད་དང་ལྡན་པའི་འཆར་འགོད། གཏམ་བཤད་ཀྱི་སྒྱུ་རྩལ་ལྡན་པ། འདི་དག་རྒྱལ་ཁབ་ཅིག་གི་སྲིད་ཀྱི་སྣེ་མོར་གཏོགས་པ་རྣམས་ལ་དགོས་ངེས་ཀྱི་ཆ་རྐྱེན་རེད། དེ་ཡང་རྒྱ་གར་གྱི་ཡབ་ཆེན་དུ་གྱུར་བའི་སེམས་དཔའ་ཆེན་པོ་གྷན་ངྷི་དང་སྲིད་བློན་ནེ་རུ། ཨ་རི་བྲན་གཡོག་ལམ་ལུགས་མེད་པར་བཟོ་མཁན་ལིན་ཁན། ད་ལྟའི་ཨ་རིའི་སྲིད་འཛིན་ཨོ་བྷ་མ་སོགས་ཁྲིམས་ལུགས་ཀྱི་ཆེད་མཁས་པ་ཤ་སྟག་རེད།

གནད་དོན་གཞན་ཞིག་གླེང་ན་ཉམས་མྱོང་ནི་ལས་དོན་དང་མཉམ་ཏུ་ཡོང་རྒྱུ་ལས། ཉམས་མྱོང་དང་ལས་དོན་གཉིས་ཐ་དད་དུ་དབྱེ་རྒྱུ་མེད་པ་རེད། ཁོང་གི་ལོ་རྒྱུས་ལ་ཕྱིར་མིག་བལྟས་ཚེ་ཁོང་ནི་ཤེས་ཡོན་དང་སྤྱི་ཚོགས་གང་ཅིའི་ཐད་ལ་ཉམས་མྱོང་ཕུན་སུམ་ཚོགས་པོ་ཡོད་པ་སྨྲ་མ་དགོས། འདི་ནི་མི་རབས་གསར་རྙིང་གི་དབྱེ་འབྱེད་དང་ཕྱོགས་ཞེན་མིན་པར་མི་རབས་གཉིས་ཀྱི་མཐུད་མཚམས་རེད།

འདི་ནི་མཁས་དབང་བློ་བཟང་སེང་གེའི་ཤེས་ཡོན་གྱི་བརྒྱུད་རིམ་དང་གྲུབ་འབྲས། རང་ཡུལ་ལ་ཁ་ཕྱོགས་པའི་ལྷག་བསམ། གསར་བཏོད། མི་རིགས་དང་རྒྱལ་ཁབ་ལ་བཅངས་བའི་དུངས་ཞེན། གཞིས་ཆགས་ནས་འཚར་ལོངས་བྱུང་བའི་བོད་ཕྲུག་དཀྱུས་མ་ཞིག་བཀའ་བློན་ཁྲི་པའི་སྲིད་སྟེགས་སུ་བཞེངས་བ་ནི་ཕྱི་ཡུལ་གྱི་མང་གཙོ་འཛམ་གླིང་ལ་མངོན་པ་ཡིན་ནོ།  །