ཉེ་ལམ་ཧོང་ཀོང་དུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་སྲུང་སྐྱོབ་དྲ་བས་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་སྙན་ཐོ་ཞིག་བཏོན་ཡོད་པ་དང་། དེར་ཕྱི་ལོ་ ༢༠༡༠ ལོར་རྒྱ་གཞུང་གིས་འགྲོ་བ་མིའི་ཐོབ་ཐང་ལ་སྔར་ལས་ལྷག་པའི་དམ་དྲག་ཆེན་པོ་བྱས་ཡོད་སྐོར་བཀོད་འདུག
སྙན་ཐོ་དེའི་གཙོ་འགན་པ་ཝང་སུང་ལིན་གྱིས་བརྗོད་དོན། ཕྱི་ལོ་༢༠༡༠ལོར་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ལོ་སྔོན་མ་དང་བསྡུར་ན་ཇེ་སྡུག་ཏུ་སོང་སྟེ། སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་རྩོད་ལེན་པ་མང་པོ་ཞིག་ལ་དྲག་གནོན་དང་རྡུང་རྡེག་ཚབས་ཆེན་ཡོད་པ་མ་ཟད། འདས་པའི་ལོ་གཅིག་རིང་རྒྱ་གཞུང་གིས་འགྲོ་བ་མིའི་ཐོབ་ཐང་བརྩོན་ལེན་པ་ ༣༥༤༤ ཙམ་འཛིན་བཟུང་བཀག་ཉར་བྱས་འདུག་ལ། དེའི་ཁྲོད་མི་༡༡༨ཙམ་ལ་དྲག་རྡུང་བྱས་ཏེ་རྨས་སྐྱོན་ཚབས་ཆེན་བཟོས་ཡོད་པ་དང་། མི་༣༦ཙམ་ད་བར་གར་སོང་ཆ་མེད་དུ་གྱུར་འདུག ཅེས་བརྗོད་འདུག
འགྲོ་བ་མིའི་ཐོབ་ཐང་སྲུང་སྐྱོབ་དྲ་བས་ཀྱང་། རྒྱ་གཞུང་གིས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྩ་འཛིན་ཡིག་ཆར་མིང་རྟགས་བཀོལ་ཏེ།རྩ་འཛིན་གྱི་ནང་ལ་ལ་འགན་ལེན་བྱ་རྒྱུའི་ཁས་ལེན་བྱས་ཡོད་སྟབས། ད་ལྟ་འཛིན་བཟུང་བཀག་ཉར་འོག་ཡོད་པ་རྣམས་གང་མྱུར་ཀློད་གྲོལ་གཏོང་རྒྱུ་དང་། སླར་ནས་སྨྲ་བརྗོད་རང་དབང་དང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་ཚོར་རྡུང་རྡེག་གཏོང་རྒྱུ་མཚམས་འཇོག་བྱ་དགོས་པའི་འབོད་སྐུལ་ཞུས་འདུག
གསར་འགོད་པ། ཚེ་རིང་རྒྱལ།
འབོད་བསྐུལ་ཞུས་སྡོད་པ་ལས་དོན་ངོ་མིའི་ཐོག་ལག་ལེན་བསྟར་དགོས།
འགྲོ་བ་མི་ཡི་ཐོབ་ཐང་ནི་འགྲོ་བ་མི་ཡོངས་ལ་དགོས་ཀྱི་ང་ཚོ་བོད་གཅིག་པུ་གཏན་ནས་མིནངེས་པར་དུ་འགྲོ་བ་མི་ལ་ཐོབ་ཐང་སྤྲོད་དགོས