ཕྱི་ཚེས་ ༡༠ ཉིན་བྱང་ཨ་རིའི་མངའ་སྡེ་མ་ས་ཅུ་སེཊ་ས་གནས་བྷོས་ཊོན་དུ་བོད་རིགས་སྤྱི་མཐུན་ཚོགས་པའི་གོ་སྒྲིག་འོག བོད་མིའི་རང་དབང་སྒེར་ལངས་ཐེངས་ ༥༢ པ་སྲུང་གཙི་གནང་ཡོད་པ་དང་། སྔ་གྲོའི་ཆུ་ཚོད་ ༡༡ ཐོག་ས་གནས་བྷོས་ཊོན་སྤྱི་ཁྱབ་ལས་ཁུང་(CITY HALL)མདུན་དུ་ཡོད་པའི་ཨ་རིའི་རྒྱལ་དར་དང་མངའ་སྡེའི་དར་ཆ་དང་མཉམ་དུ་བོད་ཀྱི་རྒྱལ་དར་ཀྱང་བསྒྲེངས་འཛུགས་གནང་སྟེ། བོད་རྒྱལ་ཁབ་ཆེན་མོའི་རྒྱལ་གླུ་དང་རྒྱལ་བའི་ཞབས་བརྟེན་བཏོན་འདུག
ཕྱི་དྲོ་ཆུ་ཚོད་གཉིས་དང་ཕྱེད་ཀའི་ཐོག་མངའ་སྡེའི་སྤྱི་ཁྱབ་ཚོགས་ཁང་ཆེན་མོའི་(STATE HALL)མདུན་ཐང་དུ་མཛད་རིམ་གཉིས་པ་དབུ་འཛུགས་གནང་ཞིང་། སྐབས་དེར་བོད་རིགས་སྤྱི་མཐུན་ཚོགས་པའི་དྲུང་ཆེ་བློ་བཟང་རྒྱལ་མཚན་ལགས་ནས་དུས་དྲན་གྱི་ངོ་སྤྲོད་གསུང་བཤད་གནང་ཞིང་། ཚོགས་པའི་རིག་གཞུང་འགན་འཛིན་ཀརྨ་ཕུན་ཚོགས་ལགས་ཀྱིས་བོད་ཡིག་དང་། རིག་གཞུང་སྟི་གནས་ཁང་གི་རྒྱུན་ལས་བུ་མོ་བསྟན་འཛིན་གཡུ་སྒྲོན་ལགས་ཀྱིས་དབྱིན་ཡིག་ཐོག་༧གོང་ས་མཆོག་གསུམ་བཅུའི་དུས་དྲན་གྱི་གསུང་བཤད་ལྗགས་ཀློག་གནང་ཡོད།
དེའི་རྗེས་ཚོགས་པའི་འགན་འཛིན་ལྷན་ཚོགས་ཀྱི་ཚོགས་གཞོན་ངག་དབང་ནོར་བུས་འདི་ལོའི་ཕྱི་ཟླ་ ༧ ཚེས་ ༢༠ ནས་ ༢༧ བར་ཁེབ་ཀོཊ་ནས་ས་གནས་བྷོས་ཊོན་བར་རྒྱལ་སྤྱིའི་བོད་རང་བཙན་ལས་འགུལ་ཚོགས་པས་བོད་རང་བཙན་ཆེད་གོམ་བགྲོད་ཅིག་གནང་གཏན་ཁེལ་ཡོད་པ་གསལ་བསྒྲགས་དང་། ཚོགས་པའི་དྲུང་ཆེ་མཆོག་གིས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཌེ་ཝིལ་པེ་ཁྲེ་རིག་(Governor Deval Patrick)མཆོག་ནས་བསྩལ་གནང་མཛད་པའི་བོད་ཀྱི་ཉིན་མོ་ངོས་འཛིན་(Proclamation)གྱི་གསལ་བསྒྲགས་བསྐྱངས་ཡོད། དེའི་རྗེས་གོམ་བགྲོད་སྐད་འབོད་མགོ་འཛུགས་བྱས་ཡོད་འདུག
