ནང་མི་གཅིག་གི་དྲོད་སྐྱིད་སྦྱིན་བྱུང་།

ཁ་སང་ཕྱི་ཚེས་  ༢༨ ཉིན་རྒྱ་གར་བྷོ་ལེ་ཝོ་ཌི་( Bollywood)གློག་བརྙན་འཁྲབ་སྟོན་མཁན་ལྕམ་སུའུ་ཞི་མེ་ཏ་སིན་(Sushmita sen)ལགས་བཞུགས་སྒར་དུ་ཆེད་བཅར་གྱིས་༸གོང་ས་མཆོག་ལ་མཇལ་ཁ་ཞུས་འདུག 

ལྕམ་སུའུ་ཞི་མེ་ཏ་སིན་ལགས་ཀྱིས་༸གོང་ས་མཆོག་ལ་མཇལ་ཁ་ཞུས་རྗེས། གསར་འགོད་པའི་བཅར་འདྲིའི་ལན་དུ། ཏཱ་ལའི་བླ་མ་མཆོག་གི་བྱམས་བརྩེ་ཐུགས་རྒྱུད་ཀྱིས་ཕྲན་ལ་ནང་མི་གཅིག་པ་ལྟ་བུའི་དྲོད་སྐྱིད་ཀྱི་སེམས་ཚོར་སྦྱིན་བྱུང་།  ཐེངས་འདིར་ཏཱ་ལའི་བླ་མ་མཆོག་ལ་མཇལ་བའི་སྐལ་བཟང་བྱུང་བ་དེ་ནི་རང་ཉིད་ཀྱི་བསོད་ནམས་དང་གཟི་བརྗིད་ཅིག་ཏུ་ཚོར་གྱིན་ཡོད།  ཅེས་དང་། རང་ཉིད་ཀྱི་མི་ཚེ་ནང་འཛམ་གླིང་གི་རླབས་ཆེན་མི་སྣ་༸གོང་ས་ཏཱ་ལའི་བླ་མ་མཆོག་དང་ཡུམ་ཆེན་ཁྲེ་རེ་ས་(Mother teresa ) རྣམ་གཉིས་ལ་མཇལ་བའི་སྐལ་བཟང་བྱུང་བར་དགའ་སྤོབས་ཆེ་ཤོས་ཤིག་ཆགས་ཡོད་འདུག ཅེས་བརྗོད་འདུག

རང་ལོ་ ༣༥ སོན་པའི་ལྕམ་སུའུ་ཞི་མེ་ཏ་སིན་ལགས་ནི། ཕྱི་ལོ་ ༡༩༩༤ ལོའི་འཇིག་རྟེན་མཛངས་མ་དང་རྒྱ་གར་མཛངས་མའི་མཚན་སྙན་ཐོབ་མྱོང་བའི་རྒྱ་གར་གྱི་སྐད་གྲགས་ཅན་གྱི་གློག་བརྙན་འཁྲབ་སྟོན་མཁན་ཞིག་ཡིན་པར་མ་ཟད།  རྒྱ་གར་ནང་གི་དབུལ་བོ་དང་དབང་སྐྱོན་ཅན་གྱི་བྱིས་པ།  ཉམས་ཆུང་བུད་མེད་བཅས་ལ་རོགས་སྐྱོར་གནང་སྟེ་སྤྱི་ཚོགས་ཞབས་ཞུའི་ལས་རིགས་ཐོག་འབད་འབུང་གི་ཕྱག་ལས་རླབས་ཆེན་གནང་མཁན་ཞིག་ཀྱང་ཆགས་ཡོད།

གསར་འགོད་པ། ཚེ་རིང་རྒྱལ།