ཁྱེད་ལ་ཤོར་བའི་འཛུམ་རྒས་མེད།

གང་ལྟར། འདི་འདྲའི་རྒས་རྒྱུ་མེད་པའི་འཛུམ་མདངས་འདི། རང་དབང་གི་དགའ་དུས་སྡུག་དུས་ཚང་མར་གནས་ཡོད། དེ་ནི་ཁྱོད་ཉིད་གཅིག་བུར་དབང་བའི་ངས་ཁྱེད་ལ་བཅིངས་པའི་འཛུམ་རེད། འཛུམ་འདི་ནི་ལས་དང་འབྲེལ་ཡོད་དམ། ཁྱེད་དང་འབྲེལ་ཡོད། ཡང་ན། ངའི་ཞེན་ཆགས་དང་འབྲེལ་ཡོད་དམ། གང་ཤེས། ལན་གསལ་བོ་ཞིག་དུས་དེ་རིང་དེ། ལོ་ངོ་བཅུ་ཕྲག་གཅིག་ལྷག་རྗེས་སུ་ཡང་རྙེད་མ་སོང་།

དོན་དངོས་སུ་ངས་ཁྱེད་རང་ལ་བཅིངས་པའི་འཛུམ་མདངས་འདི་རྒས་ཀྱང་འགྲིག་མོད། རྒས་པ་ཕར་ཞོག ད་དུང་། གཞོན་ཉམས་ལྡན་པའི་སྒང་ལ་སྟོབས་ཤུགས་ཀྱང་རྒྱས་འདུག རྒྱས་སྟངས་དེ་ཡང་རླངས་འཁོར་གྱི་ནང་། སྲང་ལམ། གོམ་ཁ་ལེན་པའི་སྔ་གཞུག ཟ་འཐུང་གི་བར། གླེང་མོལ་གྱི་ཁྲོད། མི་ཚོགས་ཀྱི་གསེང་། ཁྱོད་རང་དོན་ངོ་མ་དེ་རིང་གང་དུ་ཡོད་དམ། བདེ་མོ་ཡིན་ནམ། འུ་གཉིས་ནམ་ཞིག་ངའི་རྒས་རྒྱུ་མེད་པའི་འཛུམ་དམངས་དེ། ཁྱོད་ཉིད་ཁོ་ན་ལ་དབང་བའི་འཛུམ་མདངས་འདི་ཁྱོད་ལ་སྟོན་པའི་གོ་སྐབས་ཤིག་ཡོད་སྲིད་དམ། དེ་ཡང་གང་ཤེས། འཆི་བདག་འདི་དབང་བཙན་ལ། ལས་དབང་འདི་མི་ཤེས། ད་དུང་། རང་དབང་མེད་པའི་མི་ཚེ་འདི་འདྲ་ཞིག་གི་ཁྲོད། གང་ལྟར། ངའི་འཛུམ་མདངས་དེ། རྒས་མེད་པའི་འཛུམ་མདངས་ཁྱོད་ལ་ཤོར་ཡོད་ལ། དེ་རིང་ཡང་རྒས་མེད་པར་ཡོད།