དེང་དུས་འཛམ་གླིང་གི་ཡུལ་གྲུ་གང་སར་བོད་མི་ཟེར་དུས་ལྷད་མེད་པ་དང་དག་གཙང་སྤུས་དག་གི་མི་རིགས་ཤིག་ལ་ངེས་འཛིན་བྱེད་ཀྱི་ཡོད་ལ། དེ་ལ་རྗེས་འགྲེང་ནས་བོད་མི་ཆེས་མི་ཉུང་བ་ཞིག་གིས་ཀྱང་རང་ཉིད་རྫུན་མ་བཟོ་མཁན་གྱི་བོད་མི་བྱུང་དང་བྱུང་བཞིན་ཡོད། དོན་དངོས་སུ་བོད་མི་རིགས་འདི་ཡང་འཛམ་གླིང་མི་དམངས་སྤྱི་དང་འདྲ་བར་དང་བོ་ཕ་མ་གཉིས་ཀྱི་འཁྲིག་སྲེད་ཀྱི་བདེ་བ་ལས་ཁུ་ཁྲག་གི་གྲུབ་པ་དང་། ཕྱིས་སུ་འགྲོ་བ་མི་སྤྱི་མཚུངས་ལྟར་མའི་མངལ་ལས་ཐོན་པ་ཡིན། དེ་ཡིན་དུས་བོད་མི་རིགས་ལ་ཡང་དགའ་སྐྱོ་ཆགས་སྡང་ཡོད་པ་ནི་བཤད་མ་དགོས་པ་ཡིན།
དགའ་སྐྱོ་ཆགས་སྡང་ཡོད་པའི་མི་རིགས་ཤིག་ལ་མཚོན་ན་བྱ་བ་བཟང་ངན་གང་ཡིན་ཡང་ཡོད་ལ། སྐད་ཆ་བཟང་ངན་གང་ཡིན་ཡང་བཤད་ཀྱི་ཡོད། དེ་མཚུངས་བོད་མི་དག་གིས་ཀྱང་སྐད་ཆ་བཟང་ངན་གཉིས་ཀ་བཤད་ཀྱི་ཡོད་ལ། བཤད་དགོས་པ་ཡང་ཡིན། བྱ་བ་ཡང་དེ་མཚུངས་ཀྱི་ཁོང་ཁྲོའི་གནས་སྐབས་ཀྱི་སྐད་ཆ་དང་ངར་ཤུགས་རང་བཞིན་གྱི་ལས་འགུལ་སོགས་འདྲ་མིན་བྱུང་གི་ཡོད་ལ། བྱུང་དགོས་པ་ཞིག་ཀྱང་ཡིན། དེ་དག་གི་འབྲས་པུ་ཡང་དེ་མཚུངས་བཞིན། མིའི་རིགས་ཀྱི་འདོད་བློ་ཞིག་སྒྲུབ་ཐུབ་ཀྱི་ཡོད།
དེས་ན་བོད་མི་དག་གིས་བོད་དོན་ནས་འགོ་བཙུགས་དེ་རང་སྒེར་གྱི་དོན་དག་ཚུན་ཆད་ཅིག་སྒྲུབ་པ་ལ། འཚེ་བ་མེད་པ་དང་ཞི་བདེའི་རང་བཞིན་ཅན་ཞིག་དུ་ཡོང་དགོས་པར་གླེང་གི་ཡོད་ལ། དེ་ནི་ཡོངས་གྲགས་སུ་མཁས་པར་ལོན་པ་དང་ཤེས་ཡོན་ཅན། སྙན་གྲགས་ཅན་དག་གི་སྐད་ཆའི་ཚོམས་ཡིན་པ་ལས། དོན་དངོས་ལ་ཞུགས་དེ་མི་སེམས་ལ་འཁོ་བའི་དུས་ཚོད་ཀྱི་སྐད་ཆ་ཞིག་ཡིན་མིན་ལ་དོགས་པ་བྱས་ན་ཆོག་པ་ཡིན། དེ་བཞིན་དུ་རེ་ཟུང་གིས་དེ་དག་གི་གནད་འགག་ངེས་འཛིན་གྱིས་བོད་མི་རིགས་ལ་ཡང་ཁོང་ཁྲོ་ཡོད་འོས་པ་དང་། དེ་ཡང་ལག་ལེན་དུ་བསྟར་འོས་པ་སོགས་གླེང་དུས་སུ། དེ་དག་ནི་བོད་མི་རིགས་ཀྱི་ཞབས་འདྲེན་དང་། དེ་དག་ནི་བོད་མི་རིགས་ཀྱི་བླ་བཙོང་ཡིན་པ་ལྟ་བུ་ཞིག་གླེང་གི་ཡོད་པ་མ་ཟད། བོད་མི་དེ་ཡི་རིགས་སྤྱི་ཚོགས་ཀྱི་གྲལ་མཐར་བརྫོངས་ཨེ་ཐུབ་ལ་འབད་མཁན་གྱི་ཁ་ཞེ་མི་གཅིག་པའི་མི་ཡང་མང་བོ་ཞིག་བྱུང་གི་ཡོད། དེ་དག་གི་རྗེས་སུ་འགྲེང་ནས་རང་ཉིད་ཀྱི་གང་འདོད་པ་དག་གླེང་མི་འཕོད་པའི་སྐྱེ་བོ་སྡར་མ་ཡང་ཆེས་མི་ཉུང་བ་ཞིག་བྱུང་གི་ཡོད་པ་རེད།
གནད་འགག་སྐབས་སུ་གང་ཡང་བྱེད་འཕོད་པ་དང་། གང་ཡང་བཤད་འཕོད་པ་དང་། གང་ཡང་སྒྲུབ་འཕོད་པ་ཞིག་བྱུང་ན། ད་གཟོད་གནད་འགག་གི་དུས་ལ་འཁོ་བའི་མི་རིགས་ཤིག་གི་སྣེ་ཁྲིད་པ་ཡིན་ཟེར་ན་ཆོག་པ་ཡིན་ལ། མི་རིགས་རང་ལུགས་ཤིག་གི་ལ་རྒྱ་ཡིན་ཟེར་ན་ཡང་འགྲིག ང་ཚོས་གསལ་བོ་ཞིག་ཤེས་དགོས་པ་དེ་ནི་ང་ཚོས་མི་རིགས་རང་ལུགས་ཀྱི་གནད་དོན་དང་མི་རིགས་རང་ལུགས་ཀྱི་གོམ་གཤིས་སོགས་ལ་གཏོར་བཅོམ་ཐེབས་ཀྱི་འདུག་ཟེར་ནས་རྩོད་ཀྱི་ཡོད་པ་ལས། འགྲོ་བ་མིའི་རིགས་ཀྱི་རིག་གཞུང་གོམ་གཤིས་ཤིག་རྩོད་ཀྱི་མེད།
ང་ཚོས་གལ་སྲིད་ང་ཚོས་འགྲོ་བ་མིའི་རིགས་ཀྱི་གོམ་གཤིས་དང་། འགྲོ་བ་མིའི་རིགས་ཀྱི་རིག་གཞུང་ཞིག་ལ་རྩོད་ལེན་བྱེད་ཀྱི་ཡོད་ཟེར་ན། ང་ཚོ་ལ་ཐོག་མར་འགྲོ་བ་མིའི་རིགས་ཀྱི་གོ་ཐོབ་དེ་ཡོད་མེད་ལ་ཞིབ་དུ་བསམ་བློ་གཏོང་རན་ཡིན། དེ་ཡིན་དུས་ད་གཟོད་ང་ཚོས་མི་ཆོས་རང་ལུགས་ལྟར། མི་རིགས་རང་ལུགས་ཀྱི་རྩ་བ་བརྟན་པོར་བཙུགས་དེ། བོད་མི་རིགས་ཤིག་ཤི་གསོན་གྱི་ཁ་མཚམས་འདིར་ཡོད་དུས་སུ། སྐད་ཆ་བཟང་ངན་གཉིས་ཀ་བཤད་དགོས་ལ། དོན་དག་བཟང་ངན་གཉིས་ཀ་སྒྲུབ་དགོས། འོ་རེད། མཐའ་མཇུག་དུ་རྒྱ་མོ་ཞིག་གིས་བོད་དང་རྒྱ་མིའི་བར་དུ་སྐད་ཆ་འདི་འདྲ་ཞིག་བཤད་ཡོད་པ་དེ་ལ་བསམ་བློ་ཞིབ་དུ་གཏོང་རོགས་ཞུ། བོད་མི་ས་ཡ་དྲུག་རེད། རྒྱ་མི་དུང་ཕྱུར་བཅུ་གསུམ་ལྷག་རེད། དེ་གཉིས་བསྡུར་བ་ཡིན་ན། བོད་མི་ས་ཡ་དྲུག་པོ་མེད་པར་གཏོང་བ་ལ་ང་རང་རྒྱབ་སྐྱོར་ཡོད་ཅེས་བཤད་པ་རེད།
བྱ་གཞུང་འཇམ་དབྱངས་ལགས། ང་ཚོས་རང་གི་བླ་མ་སྟེ། སྤྱི་ནོར་༧གོང་ས་མཆོག་གི་ངེད་ཅག་ལ་མ་གསུང་བའི་བོད་མིའི་སྐྱིད་སྡུག་སྐོར་གང་ཡང་ལུས་མེད་ཚོད་ཡིན། འོན་ཀྱང་། ང་ཚོ་སྟེ། བོད་མི་ཆེས་མང་བོ་ཞིག་གིས་རང་གི་ཁ་ལྟོ་གཉིས་གཙོ་བོར་འཇག་པ་ལས་མི་རིགས་ཀྱི་གནད་དོན་གཙོ་བོར་བསམ་མ་ཐུབ་པའི་ནག་ཉེས་དེ་ཡིས་ད་ལྟའི་གཉེན་འཕྲེང་གི་དུས་ཚོད་འདི་དང་ལེན་བྱེད་ཐུབ་ཀྱི་མེད་པ་རེད། དེ་ཡིན་དུས་ང་ཚོས་གང་ས་ནས་སྐད་ཤུགས་ཆེ་ཙམ་གྱིས་རང་གི་མི་རིགས་འདི་འདི་ལས་སད་པར་བྱེད་དགོས་ལགས།
འཇམ་མགོན་ལགས། འུ་ཅག་གི་ལས་དབང་འུ་ཅག་གིས་གླེང་དགོས་པ་ནི་མོས་མེད་ཡིན་ལ། འུ་ཅག་གི་འགན་དེ་ཡང་འུ་ཅག་གིས་ཕྲག་དུ་ལེན་དགོས་པ་ཡིན་དུས། མི་རིགས་རང་ལུགས་ཀྱི་གནད་དོན་དེ་ཡང་མ་གླེང་ཐུ་མེད་ཀྱི་གནད་དོན་ཞིག་ཡིན། ལྷག་པར་དུ་མི་རིགས་རྒྱུད་སྤེལ་གྱི་ལམ་ཁ་དེ་ཡང་དངོས་ནས་གལ་ཆེན་ནང་གི་དོན་ཆེན་ཞིག་ཆགས་ཡོད་པ་ཡིན། ང་རང་སྔོན་ཆད་རྡ་སར་ཡོད་དུས་སུ་མཐོ་སྒང་གི་རྒྱབ་མདུན་སྟེང་དུ་ཡང་དེ་ཡི་སྐོར་ཞིག་བྲིས་མྱོང་ཡོད་ལ། སྐབས་དེར་གྲོགས་པོ་ཞིག་གི་ཀུ་རེ་དང་བཅས་ང་ལ་གཡབ་རེ་བྱེད་མི་ཐུབ་པའི་མི་ཞིག་གང་ན་ཡོད་ཟེར། དེ་ཡང་དངོས་ནས་ཟུར་ཟའི་སྐད་ཅིག་ཡིན་ན་ཡང་། འགན་མི་འཁུར་བའི་སྐད་ཆ་དེ་ལྟར་བཤད་ན་འགྲིག་ཡང་། ང་ཚོ་དངོས་ནས་སད་རན་པའི་དུས་ཚོད་གཉན་འཕྲེང་ཅན་ཞིག་གི་ཁྲོད་ཀྱི་མི་རིགས་ཡིན་པ་སེམས་སུ་ངེས་དགོས་ཀྱི་ཡོད་ལགས།
བོད་མི་ས་ཡ་དྲུག་མེད་པར་གཏོང་བའི་བྱེད་ལས་ང་ཚོས་ཀྱང་བྱེད་ཀྱིན་འདུག
དེང་སྐབས་བོད་ཀྱི་བུད་མེད་དག་བུ་ཕྲུག་གསོ་སྐྱོང་བྱ་རྒྱུ་དགའ་བོ་མེད་པ་དང་། ཁྱོ་ཀ་དག་ཀྱང་དེ་དག་ལ་འཐད་པ་རེད། དེ་བས་འདིའི་ཕྱོགས་ལ་ང་ཚོས་ངེས་པར་དུ་བསམ་བློ་གཏོང་དགོས་རྒྱུ་འདུག ༧གོང་ས་མཆོག་གིས་ཀྱང་གལ་ནན་གྱིས་འདིའི་སྐོར་ལ་བཀའ་སློབ་གང་མང་ཕེབས་བ་རེད། ཡིན་ན་ཡང་། ཡིད་གཟབ་དང་ཉན་འཇོག་བྱེད་མཁན་མི་འདུག་ཀ ངོ་མ་ཐབས་སྐྱོ་བོ་རེད། ཟིན་བྲིས་བ་དག་གིས་ཀྱང་དེ་སྐོར་གྱི་ཟིན་ཐོ་ཞིག་ད་བར་མཐོང་མ་མྱོང་། དེའི་སྟབས་ཀྱིས་དེའི་སྐོར་ལ་དཔྱད་བརྗོད་དང་བསམ་ཚུལ་གང་མང་གསུངས་ཐུབ་ན་ཡག་པོ་འདུག
གྲོགས་བོད། ཤ་ཁྲག་རུས་གསུམ་ལགས། ཉིད་ནས་སྔར་མི་བཤད་པ་ཞིག་དང་རྒྱུན་ཏུ་དྲན་བཞིན་པ་ཞིག དེ་རིང་ཚང་མའི་མིག་ལམ་ལ། དེ་རིང་ཀུན་གྱི་རྡོག་སྣེ་ལ་འདི་ལྟར་དེད་ནས་ཐོན་ཐང་ཐལ། འདི་ལྟར་བཞུར་ནས་རྒྱུག་བའི་སྒང་རེད། ངོ་མ་ཡིན་འདི་བསམ་ཞིབ་དོན་ལྡན་ཞིག་རེད་ལ་ང་ཚོ་ཚང་མའི་ཕྲག་ལ་བབ་པའི་ལས་འགན་ཞིག་དང་། དོ་ཁུར་དང་ཡིད་འཇོག གཟབ་ནན་དང་ཧུར་ཐག་བྱེད་རན་པའི་སྐབས་ཤིག་ཀྱང་རེད། ལྷག་དོན་རྒྱ་མོ་དེའི་བཤད་པའི་སྐད་ཆ་དེ་༼ བོད་མི་ས་ཡ་དྲུག་རེད། རྒྱ་མི་དུང་ཕྱུར་བཅུ་གསུམ་ལྷག་རེད། དེ་གཉིས་བསྡུར་བ་ཡིན་ན། བོད་མི་ས་ཡ་དྲུག་པོ་མེད་པར་གཏོང་བ་ལ་ང་རང་རྒྱབ་སྐྱོར་ཡོད་ཅེས་བཤད་པ་རེད།༽ ཅེས་བཤད་པ་དེ་ང་ཚོ་ཁོག་འདར་རྒྱག་བྱེད་ཞིག་མ་ཡིན་ནམ།