ཁ་རོག་གེར་བསྡོད་པ་དེ་ནི་ཁྱེད་རང་གི་རང་གཤིས་སུ་གྱུར་ཉིན་ནས། སུ་ལ་ཡང་འདྲིས་ཤིང་མ་གཤིབ་པའི་མི་གཤིས་སྐྱུར་མོའི་དེ་ཡི་ལྟག་རྒྱབ་ན། ཁ་རོག་གེར་སྐོང་ནས་སྟོང་ལབ་ལ་གོམ་པའི་མྱི་ངན་ཁྱེད་རང་། འཇིག་རྟེན་གྱི་གནས་ལུགས་དང་རྒྱུ་མཚན་ལས་བརྒལ་ནས། མྱི་སེམས་མང་བོ་ཞིག་གི་ཕ་རོལ་ན། ཁེར་རྐྱང་གི་རུམ་ཁ་ཞིག་འཚོལ་བའི་དུས་སུ། ཁྱེད་རང་ལ་ཁྱེད་རང་ལས་ལྷག་པའི་འགྲེལ་བཤད་གང་ཡང་མ་མཆིས་མོད། ཡིན་ཡང་། ཁྱེད་རང་ཤེས་མཁན་གྱི་ཁྱེད་རང་དེ་ནི་མྱི་མ་རེད། འདྲེ་རེད། འདྲེ་དེ་ཡང་མི་ཚོགས་ཤིག་གི་ལྟག་རྒྱབ་ན། ཁ་རོག་གེར་ལབ་རྒྱག་པར་གོམ་པའི་མྱི་ཁྱེད་རང་རེད།
གནམ་སའི་རིག་ངེས། རྒྱུ་འབྲས་ཀྱི་ཚད་འཇལ་ངེས། ལས་དབང་གི་ཐག་གཅོད་བྱེད་ངེས། དཀོན་མཆོག་གི་ཐར་བ་གཏོང་མི་སྲིད། ཐག་རིང་ཐུང་གང་རུང་གི་མྱི་ཁྱེད་རང་། ཁྱེད་རང་ནི་གྲུབ་མ་འདྲེ་བར་གྱུར། གྲུབ་མར་དགའ་བ་འདྲེ་ཡི་རང་གཤིས་ཡིན་ཟེར། ཏག་ཏག་ཁྱེད་རང་འདྲེ་ཡིན་ངེས་རེད། བྱེད་སྟངས་ཀྱང་འདྲེ་ཡི་བྱེད་སྟངས་ཤིག་འབྱོར་ཡོད། མྱིས་མི་ཤེས་ས་ཤིག་ནས། མྱིས་མི་རིག་ས་ཞིག་ནས། མྱིས་མི་གོ་ས་ཞིག་ནས། ཁྱེད་རང་ནམ་རྒྱུན་གྱི་མྱི་དེ་གཏན་ནས་མིན་པར་གྱུར་འགྲོ དེ་ཡང་ཁོར་ཡུག་དང་ཁང་ཁྱིམ། བྱིས་པ་དང་མཛའ་མོ། ཕ་མ་དང་ཉེ་དུ། བརྩེ་དུང་དུང་ལ་རྒྱ། དེ་དག་བརྗེད་པའི་སྐབས་ཀྱི་ཁྱེད་རང་། མྱི་མ་རེད། འདྲེ་རེད། འདྲེ་དེ་ཡང་ཕྱི་ཐག་མེད་པའི་འདྲེ་ཞིག་རེད། སྐབས་དེ་དུས་ཀྱི་ཁྱེད་རང་ནི། གནམ་འོག་འདིས་ཆེས་མི་ལེགས་པའི་མྱི་ཞིག་ཡིན།
སྐད་ཆ་བཤད་ཤེས་པ་དེ་ཡང་དོན་སྙིང་མེད་ནི་ཞིག་བཤད་ཀྱི་ཡོད། འདང་རྒྱགས་པ་དེ་ཡང་རྒྱུ་མཚན་མེད་ནི་ཞིག་འདང་རྒྱགས་ཀྱི་ཡོད། བསམ་བཞིན་པ་དེ་ཡང་དགོས་པ་མེད་པ་ཞིག་བསམ་བཞིན་ཡོད། འཚོལ་བཞིན་པ་དེ་ཡང་ཕུགས་འབྲས་མེད་པ་ཞིག་ཡིན། གང་ལྟར། ཁྱེད་རང་ནི་མྱི་འབག་གྱོན་པའི་འདྲེ་ཞིག་ཡིན། ཁྱེད་ཀྱིས་མྱི་མང་བོ་ཞིག་གི་སེམས་སུ་ན་ཟུག་བསྐྲུན་ཡོད། ཁྱེད་ཀྱིས་མྱི་མང་བོ་ཞིག་ལ་དྲན་གདུང་བཞག་ཡོད། ཁྱེད་ཀྱིས་མྱི་མང་བོ་ཞིག་དོན་མེད་དུ་བསྡིག་ལ་གཏད་ཡོད། དོན་དངོས་ཐོག གང་ཡང་མི་འཇོན་པའི་ཁྱེད་རང་ནི། མྱི་གྲལ་ནས་འདུག་པ་ལས། རིག་མི་ཐུབ་པའི་འདྲེ་སུ་འབོད་པའི་གྲལ་རིམ་དེར་འཛུལ་བཞུགས་བྱེད་ཐུབ་ན་ཡག་ས་རེད།
དེ་ན་ཁྱེད་ལ་གོ་ས་ཞིག་ཡོད་སྲིད། དེ་ལ་ཁྱེད་ལ་མཛའ་གྲོགས་ཡོད་སྲིད། དེ་ན་ཁྱེད་ལ་རང་དབང་ཡོད་སྲིད། དེ་ན་ཁྱེད་ལ་གནས་ཚང་ཡོད་སྲིད། དེ་ན་ཁྱེད་ལ་སྐད་ཤུགས་ཡོད་སྲིད། དེ་ནས་ཁྱེད་རང་གི་འདྲེ་ངོ་མའི་བྱེད་ལུས་འགུལ་བསྐྱོད་ཐ་དག་གི་རམ་འདེགས་ཡོད་སྲིད། མྱི་གཟུགས་ལ་འདྲེ་ཡི་རྣམ་ཤེས་ཅན་ལགས། ཁྱེད་རང་འདི་ནས་ག་ལེར་ཕེབས་ན་རེད།
ཁྱེད་གཉིས་གཅིག་རྗེས་གཅིག་གིས་མཐུད་དེ་ཡོང་ནས་བསམ་ཚུལ་གསུངས་དེར་མོས་གུས་ཡོད། རྗེས་སུ་ཡི་རུང་ཞུ།
དྲ་གྲོགས་ཤ་ཁྲག་རུས་གསུམ་ལ་བཀྲ་ཤིས་བདེ་ལེགས་ཞུ
ཨ་རོ། ཁ་རོག་གེར་སྡོད་ཀྱིན་དང་ཡང་སྟོང་ལབ་རྒྱག་གི་བོ
སུ་ལའང་འབྲེལ་འདྲིས་མེད་མཁན་ཞིག་གིས་ཡུལ་སྟོང་བ་ལ་སྟོང་ལབ་བྱ་བཞིན་ན་དེས་མིའི་སྤྱི་ཚོགས་ལ་དཀྲུགས་ཤིང་དང་ཆག་སྒོ་མི་བཟོ་བས་སྐྱོན་མི་འདུག ཧ ཧ ཧ རྩེད་མོ་མིན་ན་དུམ་པ། འགྲོ་རྒྱུ་ཡིན།
ཚོར་བའི་བ་སྤུ་ཆ་བོ་གཟེངས་ཡོད་སྐབས་ཤིག་ལ་བྲིས་པ་རེད་བསམ་སོང་།
གང་ལྟར་མྱི་ཀླད་པས་དབང་བསྒྱུར་ན་ཡག་ནོ་མ་གཏོགས་ཚོར་བས་དབང་བསྒྱུར་ན་ཡག་རྒྱུ་མི་འདུག
དེ་ཙམ་ཡིན།