བློ་བཟང་སེང་གེ་དང་བོད་མིའི་སྐྱིད་སྡུག་མཉམ་མྱོང་།

ཐོག་མར་བོད་མིའི་གུས་སྲོལ་བཟང་བོ་དེ་དང་འབྲེལ་ནས་བཀའ་བློན་ཁྲི་བ་གསར་བ་བློ་བཟང་སེང་གེ་མཆོག་ལ་བཀའ་ཁྲིའི་སྲིད་སྟེགས་གསར་བའི་མིང་བྱང་དེ་རེག་པར་རྟེན་འབྲེལ་ཞུ་བ་དང་འཚམ་འདྲི་བཀྲ་ཤིས་བདེ་ལེགས་ཡོད། དེ་འབྲེལ་གྱི་བོད་མི་མང་སྤྱི་འཐུས་གསར་བ་དག་ལ་ཡང་དེ་མཚུངས་ཞུ།

སྐབས་བབ་ཀྱི་གནད་དོན་དངོས་ནི། ད་ནི་ཁོང་ཚོ་ལ་ང་བོད་མི་དཀྱུས་མ་ཞིག་གི་རང་གི་འགན་བླངས་དེ། སེམས་ཁོང་རུས་པའི་གཏིང་ནས་འབོད་སྐུལ་ཞུ་རྒྱུ་ཡིན། འབོད་སྐུལ་དེ་ཡང་བོད་མི་སྤྱི་མཚུངས་ཀྱི་ཡ་ཆུང་སེམས་ཀྱི་རེ་བ་ཡང་ཡིན་བཞག་རེད། ཁ་ཡོད་དོན་ཡོད་ཀྱི་རྡོག་རྩ་ཆིག་སྒྲིལ་དང་། བོད་རྒྱ་ཆེ་མི་མང་གི་མངོན་འདོད་དངོས་ལ་འཇུས་དེ། བོད་མིའི་སྐྱིད་སྡུག་མཉམ་མྱོང་གི་བྱ་བར་རང་གི་ཚེ་སྲོག་ཚུན་ཆད་བདེན་པའི་དབང་བོར་བཞག་ནས་འབད་རོགས་ཞུ་ཞེས་རེ་སྐུལ་ཞུ་བཞིན་ཡོད།

དེ་དང་ཆབ་གཅིག གནད་འགག་གི་དུས་ཚོད་འདི་ལ། ༧གོང་ས་མཆོག་ཆབ་སྲིད་ཀྱི་སྟེགས་བུ་ལས་བགྲེས་ཡོལ་ལ་ཕེབས་ཀྱང་། འདི་ཕྱིའི་སྐྱབས་གནས་སུ་ནམ་ཡང་བགྲེས་ཡོལ་དུ་སོང་མེད་ལ། ལྷག་པར་༧གོང་ས་སྐུ་ཕྲེང་བཅོ་ལྔ་བ་མཆོག་བོད་མིའི་སེམས་ཁོང་གི་རྨིང་རྡོ་རུ་སླར་ཡང་བྱོན་རྒྱུར་བོད་མི་ཀུན་ལ་འདོད་པ་ཡོད་པ་སྨྲོས་མེད་ཡིན་དུས། རྒྱ་ནག་སྲིད་གཞུང་གིས་ཉེ་དུས་ནས་བཟུང་། ༧གོང་ས་མཆོག་སྐུ་འཚོ་བཞུགས་མ་ཐུབ་པའི་ཉིན་མོ་དེར། སྐུ་ཕྲེང་བཅོ་ལྔ་བའི་ཡང་སྲིད་བཙལ་འཚོལ་ཐད་དུ་དོན་མེད་ཉོག་གཏམ་གྱི་གསལ་བསྒྲགས་སྤེལ་བ་དེ་དག་ལ་རྣོ་ངར་ལྡན་པའི་སྒོ་ནས་ལན་འདེབས་ནན་པོ་བྱེད་རོགས་ཞུ།

ལྷག་པར་དུ། བློ་བཟང་སེང་གེ་ལགས། ད་ལྟའི་བཀའ་ཁྲི་གསར་བ་ཡིན་དུས་ན། ད་ནས་བཟུང་། ཡུལ་ལུང་གང་དུ་ཕྱོགས་བསྐྱོད་བྱས་ཀྱང་། སྐྱབས་བཅོལ་ལག་ཁྱེར་སེར་བོའི་སྟེང་ནས་འགྲོ་བ་ལས། རྒྱལ་ཁབ་གཞན་གྱི་ལག་ཁྱེར་འཁུར་ནས་མི་འགྲོ་བར་སེམས་ཁོང་ནས་རེ་བ་ཆེན་པོ་ཞུ་ཡི་ཡོད། ཉེ་དུས་སུ་བློ་བཟང་སེང་གེ་ལགས་ཀྱི་རྒྱ་ནག་གི་མི་སེར་ལག་ཁྱེར་ཡོད་རབས་སོགས་གཏམ་ཆལ་ཡང་གང་ས་ནས་གླེང་བ་རེད། དེང་ཕྱིན་བཀའ་ཁྲིའི་མིང་ཐོག་ནས་ཨ་རིའི་ལག་ཁྱེར། རྒྱ་ནག་མི་སེར་ལག་ཁྱེར་སོགས་གང་ཡང་བེད་སྤྱོད་མི་གནང་་རྒྱུའི་འབོད་སྐུལ་ཤུགས་ཆེན་ཞུ་རྒྱུ་ཡིན།

དེ་འབྲེལ་གྱི་སྤྱི་འཐུས་གསར་བ་དག་གིས་ཀྱང་ཁོང་ལ་ཤུགས་ཆེན་པོའི་སྒོ་ནས་རྒྱབ་སྐྱོར་བྱེད་པ་དང་། དེ་མཚུངས་ཀྱི་བོད་མིའི་སྐྱིད་སྡུག་མཉམ་མྱོང་ནི་དོན་དག་ལ་འཁྱོལ་བ་ཞིག་ཡོང་བར་རེ་སྨོན་ཞུ།

མཐའ་དོན། བློ་བཟང་སེང་གེ་དང་བོད་མི་མང་སྤྱི་འཐུས་ཡོངས་ཀྱི་རང་གི་ཁྱིམ་ཚང་ལས་རང་གི་ལས་ཀ་གཙོ་བོར་འཛིན་ཐུབ་པར་ཡིད་ཆེས་ཆེན་པོས་སྒོ་ནས་བོད་ནང་གི་རེ་འབོད་ནམ་དུས་ཐོག་ལ་གསན་ཐུབ་པ་དང་། དུས་ཐོག་ལ་མགྲིན་ཚབ་པ་ཞིག་བྱེད་ཐུབ་པར་རེ་བ་ཆེན་པོ་ཡོད།